تحرير ولا عباسيه !(3)

وفيها إيه لو كنت مع الثوره بس ماروحتش ميدان التحرير؟

ماهو اللى ماراحشى زى اللى راح يتفرج بس

 وزى اللى راح فضول

 وزى اللى راح عشان يظبط بنات

 وزى اللى راح عشان يتظبط حشيش

 وزى اللى راح لأن الجو عجبه هناك

 وزى اللى خرم من  الميدان عشان يروح حته تانيه

 ماهو اذا كنت نازله من بيتنا لاى غرض غير انى نازله الميدان شايله روحى على كفى عشان البلد يبقى نزولى أهبل ومالوش معنى 

ومع ذلك برضه أنا مانزلتش يمكن لانى كنت خايفه 

يمكن عشان ماقدرشى ابات فى الشارع

يمكن لان اهلى كانوا خايفين عليا

ممكن لأى سبب لكن مش عشان مش بحب البلد

 واحنا طول النهار نزايد على وطنية بعض

 ياللى بتقوله اللى مانزلشى الميدان يبقى مايستهلشى يعيش على ارضها بالله عليكم ده كلام ناس عاقلين ؟

مايستهلشى يعيش على ارضها ليه؟

 فشى سرها ؟؟

هو فى طريقه واحده بس مافيش غيرها تثبت بيها إنك بتحب البلد ؟

وهى إنى أنزل ميدان التحرير

 ده فى مية طريقه أثبت بيها إنى بحب البلد

 لو راعيت ربنا فى شغلى أبقى بحب البلد

لو فضلت ماسكه فى إيدى كوباية الأيس كريم لحد ما ألاقى باسكت أرميها فيه أبقى بحب البلد

 لو شلت ورقه من الأرض ونضفت الشارع بتاعى أبقى بحب البلد

لو ذاكرت وإجتهدت عشان أخد درجات علميه زياده أنفع بيها البلد أبقى بحب البلد

لو ربيت إبنى كويس وطلعته مهندس مايوقعشى عمارات أو دكتور يراعى ربنا فى مهنته أو ظابط يدافع عن البلد أبقى بحب البلد

 لو ربيت إبن صحيح جسديا وقللت مريض من البلد أبقى بحب البلد

 لو نصحت واحد راكن صف تانى إنه يمشى بعربيته أبقى بحب البلد

 لو تطوعت فى جمعيه خيريه تاخد من المليان تكب على الفاضى ابقى بحب البلد

 وحاجات كتير قوى لا يتسع البوست ليها لو عملتها ابقى برضه بحب البلد

انما بعد كده تيجوا تختزلوا البلد كلها فى ميدان التحرير ويبقى اللى بره الكام متر مربع ده مش بيحب البلد ؟

وياللى بتقولوا لى إنتى قاعده فى بيتك مرتاحه وبتكتبى وانتى مش شايفه حاجه بقولكم هو إيه اللى فى كتاباتى هايتغير لو نزلت يعنى لما وصفت هادمى السور ومقتحمى السفاره إنهم بلطجيه لو كنت نزلت وشفتهم بيعملوا كده بعينى كان إيه اللى هايختلف فى كتاباتى ؟؟

لما يكون مقياس البلطجه عندى هو العنف وفرض الرأى بالقوه يبقى إيه اللى هايتغير لو نزلت ماهى مبادئى هى مبادئى برضه مش هاديهم الحق فى ده

وبخصوص الحشيش وتظبيط البنات برضه إيه اللى هايختلف فى وجهة نظرى انا سمعت من ناس كتير الموضوع ده وماشفتش فعلا بعينى لكن اذا كان فى واحد ابن خالة صاحبتى رايح للغرض ده يبقى فيه شريحه زيه واذا كنت كلمت صديق ليا هناك وقلت له قولى بصراحه هو إنت روحت الميدان عشان انت ثورى ولا رايح لأن القعده عجبتك قالى (بصراحه القعده هنا حلوه قوى والجو جميل )!!!!

وبرضه هنلاقى شريحه زيه  

ااااااه لأ دول كدابين, قابضين ,فلول 

طب اللى كانوا بيلفوا سجاير عند مجلس الوزراء ؟

برضه فلول ؟

 انا بقول الكلام ده ليه؟

 مش عشان أشكك فى الثوره ولا فى دوافع الثوار ولا ادخل بقى فى مهاترات ملهاش لازم عشان أثبت بكل ما أوتيت من قوه ان الميدان فى حشيش أو دعاره

مش دى قضيتنا اصلا 

انا مقتنعه ان ميدان التحرير منتخب من الشعب عينه تجريبه بلغة علم النفس وعينه مثيره لأى أخصائى نفسى لأنها بتضم طوائف الشعب كلها لو كان قاصد باحث يجيبها ماكنشى جابها بالحرفنه دى

ثقافات مختلفه واعمار مختلفه 

كبار وصغيرين 

بنات وولاد وعائلات

 وفنانين ورياضيين

مسيحين ومسلمين

متوحدين على هدف واحد 

وطبيعى إن زى ما فى مصر حشيش هايبقى فى الميدان حشيش وزى ما فى فى مصر تظبيط موزز طبيعى يبقى فى  الميدان تظبيط موزز

اللى اقصد أقوله إن ده مالوش علاقه لا بالثوره ولا بدوافع الثوار بس الحكايه كلها

إن الميدان هو مصر بحلوها ومرها بكل مافيها من سلبيات وإيجابيات 

يتبع ....

تحرير ولا عباسيه !(2)

بالنسبه لرأى فى الثوره   :      

                                   

رأى مر بثلاث مراحل هاكدب لو قلت إنى مؤيده للثوره منذ الوهله الأولى ولكنى كنت بعتبرها مجرد

( مولد وهاينفض )

زى كل مره

 أه ...

ماهو زى الشعب ما فقد الثقه فى الحكومه ووعودها الكاذبه أنا كمان وأكيد فى شريحه كتيره زى فقدنا الثقه فى الشعب و مواقفه اللى مش بيكمل فيها زى كل مره

ولكن بعد ما الثوره بقت صلبه ولا يستهان بها إبتديت أحس إنها مش زى كل مره وهاتحقق مغزاها

وساعة موقعة الجمل وسرقة المتحف المصرى ولما الدنيا ابتدت تتقندل عيطت وخفت على البلد زى أى حد كان شايف إن الناس دى لازم ترجع وكنت مستعده أعمل أى شىء عشان الناس ترجع لما الناس إبتدت تقتل وتضرب فى بعضها لإنى كنت خايفه على الأرواح ,

الأرواح اللى بقت شهداء دلوقتى وهما عايزين ياخدوا حقهم

وما اقدرشى أنكر إنى كنت عايزه الثوار يصبروا لحد مافترة رئاسة مبارك تنتهى لإنى كنت حاسه إن الرجل ده بدأ يعمل حساب للشعب فعلا

 وكل اللى عايزه إنه يخرج بكرامته وبس

 جايز كنت صح وجايز كنت غلط انما دى كانت وجهة نظرى ساعتها

 ولما لثوره نجحت

كنت شايفه بعد كده إن الناس تهدى وتخرج كل طاقتها فى الشغل ويعملوا مليونيه  من غير إعتصام كل يوم جمعه تحت بند

( احنا اهو)

 بس ماتقلبشى بإعتصام لأنى أنا ضد تعطيل المصالح 

لأنى شايفه إن مش شطاره أبدا اننا نفضل فى مواجهة الريح على طول لكن مش هايحصل حاجه لو نطاطى لها شويه لحد ماتعدى انا ضد سياسات المجلس العسكرى وضد إنتهاكاته ومتأكده إنه غير سياسى على الإطلاق ولا يقدرعلى إدارة البلاد بل وغبى أحيانا لكن بفكر بنظام أصبر على جارك السو فى سبيل إن البلد تنهض

مش معنى كده إنى مش زعلانه على الشهداء زعلانه وواجعنى قلبى عليهم يمكن مش بطالب بحقوقهم بنفس حماس الثوار لأنى ماانكوتشى بنارهم زي الناس اللى فى الميدان وماشفتهمشى بيموتوا قدام عينيا يعنى برضه بدى لميدان التحرير عذره فى الرغبه فى القصاص 

عارفه إن المجلس سىء وأغبى من الغباء ذاته  بس هو كده من زمان وانتوا اللى اتخدعتوا فى (حامى حمى الثوره )ونسيتوا إنه هو المعنى الحرفى لكلمة فلول ومواقفه دى طبيعيه جدا ومتوقعه

 اللى عايزه اقوله 

 ساعات بيبقى التططنيش حل

 وساعات بيبقى القيام ب (ولا فعل) بيبقى أسلم فعل

وساعات بيبقى الجلوس فى البيت هو مسانده فى حد ذاته 

,يعنى انا كنت بضحك أوى على دعاة الإستقرار اللى بينزلوا يعملوا وقفه احتجاجيه وشايفه انهم لو عايزين استقرار يبدأوا بنفسهم احسن 

 خلاص خرجنا من القمقم والناس دى بقت تعملنا حساب ومش هانرجع للقمقم تانى ولا هانرجع زى ماكنا بس شوية

صبر وحكمه ومنطق

يتبع .....

معتز عبدالفتاح :

الامام مالك يقول: «إذا رأيت الرجل يدافع عن الحق فيشتم ويسب ويغضب فاعلم أنه معلول النية لأن الحق لا يحتاج إلى هذا». ويقول ديفيد هيوم: «قوة المنطق لا بد أن تكون أقوى وأكثر من منطقية من منطق القوة، وإلا اختفى المجتمع». وكما قلت من قبل. لا أخشى على مصر من إسرائيل أو من إيران أو أى دولة أجنبية. أخشى على مصر من بعض المصريين حين يضعون الشخص فوق المبدأ، الذات فوق المجموع، النفس فوق العقل. نعم أخشى على مصر من المصريين حين يفكرون بمنطق الثأر وليس بمنطق العدل؛ بمنطق الماضى وليس بمنطق المستقبل، بمنطق العصبية وليس بمنطق التعددية.

تحرير ولا عباسيه !(1)

ايه رأيك فى الثوره ؟

 ايه موقفك من الثوره ؟

 انتى مع الثوره ولا ضدها ؟

انتى مع ميدان التحرير ولا مع الكنبه ولامع الفلول ؟

دى عينه من الأسئله اللى بتسألها وللأسف مش بعرف أرد عليها بكلمه واحده لسببين:

  أولا: لأن موقفى من الثوره معقد حبتين وصعب يتلخص فى كلمه إسمها أه أو لأ

 وثانيا: لأن معظم الناس بتاخد الكلام حزمه على بعضها بمعنى

 إنت مع الثوره؟

تبقى لازم تكون مع ميدان التحرير وتكون مأيده على طول الخط من 25 يناير إلى إعتصام مجلس الوزراء  مرورا بحرق السفاره وهدم سورهاو تكون مع الثوار بسلوكياتهم الخطأ والصح و تكون مع 6 ابريل

 و تكون ضد المجلس وشفيق والاخوان والسلفيين

وده لا يصح

 ليه الواحد لازم يكون مع أو ضد

 ليه مايبقاش مع  الثوره بس لما يحب ينقدها ينقدها براحته من غير ماتتفتح نار جهنم عليه ويتقال عليه فلول مره وحزب كنبه مره واغلبيه صامته مره وبتاع الإستقرار مره ومنكم لله خربتوا البلد مره؟

وبالرغم من إن لا تنطبق عليا مواصفات أى فئه من الفئات دى لكن كلهم عندهم حق زى التحرير 

إزاى !!!!

فلول :لو بمنطق إنهم تربية النظام القديم يبقى يا عزيزى كلنا فلول

حزب كنبه:  ماهولازم تكون فى ناس فى الميدان وناس ماتقدرشى تنزل لأى  ظروف وقاعده فى بيتها يعنى عمرناسمعنا إن فى  ثوره قامت فى بلد بتعداد سكانها!!!

وتبقى ملياريه مثلا؟

طب الميدان يستوعبهم إزاى؟

اغلبيه صامته : بتنقسم لنوعين: ناس مش بتحب تزعل حد أو مش بتستحمل النقد أومش بتحب تدخل فى جدال  أوكلامهم محسوب عليهم زى فنانين ولاعبى الكرة مثلا

( القائمه السوداء إياها ) و بتسكت وبرضه مش بتسلم من السخريه

وناس تانيه ساكته عشان مش فاهمين وشايفين كل حاجه وعكسها وده غصب عنهم  برضه عشان  فى حاجات غامضه كتير حتى بالنسبه للثوار نفسهم

بتوع الإستقرار : فجأه كده بقى الإستقرار كلمه قبيحه وعجلة الإنتاج أوقح؟

 نفسى أفهم بننقدهم ليه ؟

الناس ديه سعادتها فى الإستقرار وكانت بتحب مبارك عشان السبب ده ولا بتفكر فى الدستور ولا مجلس الشعب ولا حكومة الإنقاذ الوطنى ولا غيره وشىء طبيعى إنهم يبحثوا عن الإستقرار لأنه المحور اللى بتدور عليه حياتهم زى ما الحريه هى المحور اللى بتدور عليه حياة اللى فى الميدان وزى مافى ناس بتدور على الإستقرار بقيت حاسه إن  فى ناس بتدور على عدم الإستقرار برضه وليها مزاج فى الفوضى وكأنها حاسه مثلا إن الإستقرار ده تواطىء وضعف 

منكم لله خربتوا البلد : ماهم شايفين البلد بتخرب فعلا قدامهم أرصفه بتتكسر ومبانى بتتحرق وأسعار بتزيد وبورصه بتقع هايقولوا إيه غير كده ؟

وكل دول مش بيسلموا من السخريه والنقد والتريقه ليل نهار

ده غير إنك لو ضد الثوره لأى سبب يبقى إنت بقدرة قادر بقيت ضد الشهداء كمان ويارب يتعمل فيك أو فى حد من قرايبك زى ماتعمل فيهم !!!!

ده على إعتبار إن فى ناس بتفرح فى الموت يعنى ؟

 يبقى الحل الوحيد إنك تكون مع ميدان التحرير على طول الخط عشان هما أكبر منك ويعرفوا مصلحتك أكتر منك ومش من حقك تقول رأيك ولا تتنفس وإلا قلة الأدب وطولة اللسان تشتغل على طول وطول النهار نتهم حزب الكنبه  إنهم سلبيين ونشتمهم ونسنفز فيهم عشان ينزلوا التحرير فى حين إن مافيش فايده من نزولهم لأنهم مش مقتنعين بالنزول من أساسه يبقى نزولهم أكيد مش هايكون مؤثر

 لأن ثوره من غير حماس ماتنفعشى 

يتبع .....

سيناريو اسقاط مصر للأبد

ابطال المسلسل 

الجزء الاول من المسلسل 

إبتدى بالأتى :

موقعة الجمل

  سقوط عدد من الشهداء

المشهد الاول

تحدى رهيب بين ثوار التحرير ومبارك وصوت هتافات  فى الخلفيه بتقول

(مش هانمشى هو يمشى )

المشهد التانى

المشير يذهب الى مبارك ويطلب منه التنحى كالأتى:

ياريس انا من رأى نعملهم اللى هما عايزينه عشان فى ظباط جيش ابتدت تنزل ميدان التحرير وانا خايف يحصل انقلاب

مبارك:

انت شايف كده يا طنطاوى ؟ ماشى بس بشرط تتضمن لى السلامه انا وعيلتى وفلوسى اللى نهبتها من الشعب

طنطاوى : اطمن يا باشا ان شاء الله طول مانا عايش  ماحدش هايقرب لك انت وعيلتك وماتخافشى 

هاظبطك

مبارك :اتفقنا يا طنطاوى روح هات عمر سليمان يقول خبر التنحى انا مش هاتكلم مع ولاد الكلب دول تانى

وقال عمر سليمان الخبر وهللت مصر وركب العسكر

الجزء التانى من المسلسل 

المشهد الاول

موقعة مصطفى محمود ثم مجلس الوزراء ثم سقوط عدد من الشهداء 

تحدى رهيب بين الثوار والمشير وضوت هتافات بتقول

(يسقط يسقط حكم العسكر)

المشهد التانى :

المجلس العسكرى منعقد ومشاورات حول انتخابات رئاسيه فى يناير بعد وصول الامور لذروتها

عنان :انا شايف يا سيادة المشير ان الحكاية إتأزمت جدا وان العيال البلطجيه دول مش هايرجعوا الا لما نسيب لهم الدنيا مطربقه على دماغهم

طنطاوى : انت شايف كده يا عنان ؟

عنان :ايوه يا سيادة المشير

طنطاوى : وانت يا مختار ايه رأيك ؟

مختار: بصراحه انا من رأى اللواء عنان وياريت حد من اخواننا الحلوين يمسكوهم عشان يعلموهم الادب

طنطاوى : وانت ايه رأيك يا شاهين ؟

شاهين : انا برضه شايف كده يا سيادة المشير بس الخطوه دى اذا ماتحسبتشى كويس يبقى هايحصل مصيبه هاييجى واحد يقرفنا ويسمع كلام العيال البلطجيه دول ويحاسبنا خدنا ايه وعملنا ايه  ومش بعيد نتحاكم هااااصت بقى 

المشير:لا طبعا انا مش ممكن اسمح بكده انت عارف كويس ان الجيش خط احمر مين ده اللى يقدر يحاسبنا ؟ 

عموما انتوا شايفين كده ؟

ماشى بس بشرط اللى ييجى نظبط معاه

عنان : انا بقترح نجيب حد من اخواننا الحلويين فعلا يا سيادة المشير طول عمرنا علاقتنا كويسه بيهم وهما عموما لا يهمهم شهداء ولا دياولوا دول ناس عمليين مش عندهم وقت للعواطف الخايبه دى هما كل اللى يهمهم الكرسى

المشير :ماشى هاتولى واحد منهم عشان اتفق معاه

وجه واحد منهم

(س) :انا سعيد جدا بالشرف اللى حضرتك ادتهولى ده انا مش عارف اشكرك ازاى

المشير:اه بس شرط تضمن لنا السلامه وماحدش يقولنا لحق شهداء ولا يحزنون ؟

(س) : امرك يا سيادة المشير ان شاء الله طول مانا عايش ماحدش هايقرب ليك انت ولا اى حد من المجلس ولاحد هايحاسبكم

المشير: طب والعيال البلطجيه بتوع التحرير هاتعمل معاهم ايه ؟

(س) : العيال دى مش بلطجيه يا باشا دول( كفره )

وربنا قال فى كتابه الكريم :يا أيها الذين امنوا إن تطيعوا فريقا من الذين كفروا يردوكم على اعقابكم خسرين ماتخافشى يا باشا انا

هاظبطك

ومشى المجلس وركب( الاخ ):

 المشهدالأخير فى اخر حلقه فى الجزء التانى من المسلسل : 

نهار خارجى فى ميدان التحرير(2025) على واحد من المتظاهرين مسحول على الأرض وهو بيردد فين (عايزين حق الشهداء ولا للمحكمات العسكريه)

الخ......

البوست لحد كده انتهى 

مش قصدى اشتم فى حد ولا اتريق على حد ولا اشكك فى حد ولكن هو مجرد تعبير عن خوفى من اللى جاى

من اننا نفضل نلف فى الحلقه المفرغه دى لحد مانتعب وندوخ ومنبقاش قادرين نكمل ولا قادرين نتراجع ويبقى

ياثوره ماتمت

هلاوس ليليه (3)

1-فى حياة كلا من الرجل والمرأه يوجد شخصان ,شخص للحب وأخر للزواج ولكن الفرق أن الرجل يسعى لوجودهم بكامل إرادته ولكن المرأه تسعى لوجودهم بكامل إضطرارها.

(عايزله بوست لوحده )

2- الإنسان عباره عن إستجابه كبيره لعدد لا نهائى من المثيرات التى لا يستطيع تغييرها و لكى يحيا فى هذا العالم يجب أن يغير جزء أو مجموعة أجزاء من إستجاباته.

(لذلك الحياه كلها صراع) 

3- تعبيرك عن رأيك داخل نطاق حريتك ولكن طريقة تعبيرك عن رأيك داخل نطاق حرية الأخرين.

So watch ur language,please

 

4-  الحد الأقصى من الموضوعيه ليس هو مراقبة ذاتك فحسب ولكن مراقبة الذات التى تراقب ذاتك ثم مراقبة الذات التى تراقب الذات التى تراقب ذاتك إلى مالا نهايه.

(وعشان كده ماتحاولش عمرك ماهتكون موضوعى 100%)

5- يجب أن يقرأ الإنسان جميع الكتب التى تتحدث عن فلسفة الحياه ثم بعدها يتبع فلسفته الخاصه.

(عشان الإنسان اللى بيصنع الكتب مش الكتب اللى بتصنع الإنسان )

6 - لم ولن يوجد قانون يعدل بين جميع البشر عدا القانون الإلهى.

(مثال :قانون الخلع خدم بس الست اللى نفسها تخلص من البنى أدم عديم الكرامه اللى متجوزاه ومش عارفه, لكن جنى على الست اللى مش عايزه تتنازل عن أى حق من حقوقها)

7-الخيانه مؤلمه كلمس الجمر.

(ممكن جرح لمس الجمر يتعالج بس لازم هايسيب أثر)

إحذروا ناقصات العقل والدين

أغلقت سماعة الهاتف بعد مناقشه هادئه بعض الشىء مع واحده من صديقاتى بخصوص الإخوان وكان واضح جدا تحيزها للإخوان وسئمها من السخريه منهم على مواقع التواصل ليل نهار فهى ترى من وجهة نظرها أن الإخوان ليسوا سيئين لهذه الدرجه ويجب إعطائهم فرصه وكانت تتحدث عن الكثير من الأمور التى نفهمها خطأ فى تطبيق الشريعه الإسلاميه على سبيل المثال قطع يد السارق إذ تقول أن يجب شهادة شخصين على السارق حتى تقطع يده وأن المسأله لن تتم إعتباطا 

وبعد إنهائى للمحادثه ذهبت لأرى صديقه أخرى كانت تشعر بإكتئاب بسبب خوفها من أن الإخوان يفرضوا عليها الحجاب وخوفها أيضا من تطبيق الشريعه الإسلاميه بطريقه خاطئه حيث إنها ترى أن فيما يخص قضية قطع يد السارق ماهى الضمانات أن لا يجىء أحد الأشخاص على خلاف معها بإثنين من الشهود ويدفع لهم مبلغ من المال لكى يشهدوا إنها سارقه ؟

عقلى ومنطقى شديدين التواضع والغير مبنيين على خلفيه سياسيه جيده بخصوص التيار الدينى عامة يرفضون من الأساس خلط الدين بالسياسه ومن قديم الأزل وأنا أتسائل أسئله شديدة التلقائيه :

 يعنى إيه إخوان مسلمين ؟لما هما مسلمين اومال الباقى يبقوا إيه؟ ,يعنى إيه اللى بيميزهم عننا؟)

 (يعنى ايه الاسلام هو الحل يعنى نرمى الاقباط فى الشارع ولا ندخلهم فى الإسلام بالعافيه ؟ وليه مايبقاش إتقاء الله هو الحل؟ )

 يعنى إيه يدمروا أضرحه؟ ,يعنى إيه يقطعوا ودن واحد بإسم الدين؟ مش أمن الدوله (ولا مؤاخذه) كان مريحنا منهم ؟)

نصحنى بعض أصدقائى كى أكون موضوعيه لذلك يجب أن أقرأ كتابات حياديه عنهم و حاولت مرارا وتكرار ولكن فشلت

لماذا؟؟ 

لأنى كل مره أحاول أن أسأل أو أقرأ أو أبحث عن تاريخهم لكى لا أبخسهم قدرهم ولا أظلمهم وأكون رأى موضوعى بشأنهم أتفاجأ بما هو أسوأ يجعلنى مصره أكثر  من ذى قبل على موقفى الأول

بالله عليكم كيف أرغب بكم فى السلطه وأنتم:

تطبقون الشريعه الاسلاميه حسب أهوائكم فقط

بالله عليكم كيف أرغب بكم فى السلطه وأنتم:

فيكم من تحدث عن غزوة الصناديق المشهوره التى إجتازها 70% من الشعب المصرى بنجاح بقيادة الشيخ يعقوب والتى سوف تأهلهم لدخول الجنه إن شاء الله

بالله عليكم كيف أرغب بكم فى السلطه وأنتم:

فيكم من زعم أن أى حريه غير الحريه التى يتحدثون عنها السلفيون (محتكرى الحريه) هى إباحيه 

بالله عليكم كيف أرغب بكم فى السلطه وأنتم:

تقومون بشراء أصوات إنتخابيه عن طريق تقديم هدايا عينيه وكأن ذلك لا يقع تحت بند الرشوه وأيضا تقديم الأضحيات أحيانا وكأن الأضحيه لا يجب أن تذبح وتوزع إبتغاء مرضات الله فقط ولكن توزع لحشد أصوات 

بالله عليكم كيف أرغب فى بكم فى السلطه وأنتم:

منكم الأستاذ صبحى صالح الذى وقف يتحدث مع (من صوتهن عوره )أثناء الإدلاء بأصواتهن ليطلب منهن إنتخابه مع علمه أن ذلك وسيله غير مشروعه فى العمليه الإنتخابيه

بالله عليكم كيف أرغب بكم فى السلطه وأنتم:

فعلتم العديدمن التجاوزات التى حدثت فى العمليه الأنتخابيه حتى تفوقتم على الحزب الوطنى فى المخالفات بإكتساح 

سبحان الله أليس هذا بغش وفرصه مزيفه للنجاح قد تكون من حق ماهو اصلح أو حتى مااتبع تعليمات العمليه الإنتخابيه؟ ولكن هذا طبعا لأن الغايه تبرر الوسيله هذا ما تفرضه لعبة السياسه القذره ولكن ليس مايفرضه دينناالحنيف

بالله عليكم كيف أرغب فى بكم فى السلطه وأنتم:

منكم الشيخ الشحات الذى يتألق فى حوار رائع مفسرا مصطلح الديمقراطيه على إنه ليس حرام فقط ولكنه كفر أيضا 

بالله عليكم كيف أرغب فى بكم فى السلطه وأنتم:

 تعتبرون أن الديمقراطيه كفر  ومع ذلك تسيروا على نهجها من إنتخابات وتسليم سلطه وترشيح ممن تعتبرون صوتهن عوره 

أم هذه قواعد اللعبه ؟أليس هذا بنفاق ؟؟ لماذا تقولون مالا تفعلون ؟

أفلا تعقلون ؟

أصحاب التيار الدينى :لا يهمنى جلوسكم على الكرسى ولكنى لن أتنازل عن حريتى مهما حييت لن أقبل أن يتخذ بعض الأغبياء فى الطريق الدين زريعه لكى يقوموا بإنتهاك حريتى والتعليق على مظهرى أو محاسبتى بأى طريقه

لأن الله وحده  هو من خلقنى وهو من سيحاسبنى على مظهرى 

ولن أقبل أن أجلس فى المنزل بدون عمل وأكون للفراش فقط كما تزعمون 

و إذا حدث ذلك سوف ننزل أنا ومن هم مثلى نطالب بحريتنا فى العيش كأدميين ويمتلىء ميدان التحرير من جديد بناقصات العقل والدين 

فلا تستهينوا بالنساء