حصاد الأسبوع

مبروك الجنة لـ 10 مليون مصري مؤمن قالوا "نعم" ... ونتمنى الهداية لـ 6 مليون مصري قالوا "لا" ... وندعو لـ 34 مليون مصري ملهمش ملة بالدخول في دين الله أفواجاً :)

باسم يوسف على تويتر

الإخوانى :يوم مابطل ابرر لمرسى هاكون ميت اكيد !

انا على الفيس

ان القنوات الدينية دلوقتي بقت +18 :\  

تويته صديقه

مصر مش هتبات بردانه ان شاء الله

عمرو اديب

وسيذكر التاريخ انى عمرى ما مسحت اى حد من الخرفان من على الفيس ايمانا منى بحرية الرأى
هما اللى بيعملولى بلوك على طول 

انا على الفيس 

 لا يعلمون عن الدين غير الشكل أما المضمون فلن تجد بينهم مفكر أو عالم أنما مجرد خطباء، الكتب الوحيدة المقررة هى للبنا وسيد قطب

حافظ ابو سعده على تويتر 

تؤتؤ 

ده الإعلام ظالمهم 

مش عايزين نسمع غير صوتهم بس

خيرت الشاطر اللى بيجامل مسيحين امريكا يحب يقول ايه لخيرت الشاطر اللى بيكره مسيحين مصر؟
شيزوفرينا!!!!

حسبى الله ونعم الوكيل 

يومى فى الاستفتاء

اليوم ابتدا بالاستفتاء وانتهى فى القسم :)

وصلت مقر اللجنه الساعه 1:20 فضلت ماشيه مع الطابور لحد ماوصلت لباب اللجنه الساعه 1:40 

و بسبب اللى سمعته فى المرحله الاولى بقت عنيا فى وسط راسى وبقيت خافيه ادخل الاقى منجد او ترزى حريمى مسئول عن اللجنه بدل القاضى 

وعشان كده قلت اتأكد من ان القاضى قاضى

 روحت وبمنتهى الأدب والرقه وبإبتسامه هاديه قلت له : 

يضايق حضرتك انى اشوف الكارنيه بتاعك :) 

 ومعرفشى ليه افترضت انه مش هيمانع مش عارفه جبت ام العشم ده منين!

 لقيته بصلى بإبتسامه هاديه برضه وقالى: أيوه يضايقنى 

قلت له بإستغراب :ليه هو مش من حقى ؟ 

 قالى :لا مش من حقك

  وطبعا عشان انا حافظه الوصايا العشر من احد القانونيين اصحابى وقالى اثبتى حاله عنده ان امتنع انه يوريكى الكارنيه

 قلت له بلهجه اكثر حده:

 انى من حقى اشوف الكارنيه او اثبت عند حضرت انك امتنعت 

قالى بالحرف وبمنتهى البلطجه: مش عندى حاجه تثبتى فيها لو عايزه تعملى محضر فى القسم انى ماورتكيش الكارنيه اعملى محضر 

 المهم صوتت وسألت كل الناس اللى قاعده اذا كان هو قاضى او لأ كلهم قالولى مشفناش الكارنيه بتاعه وكان فيه ولد قاعد مندوب من حزب الدستور ادانى ارقام جبهة الانقاذ الزفت وقالى لو عايزه تبلغيهم

 المهم بعد ماخلصت تصويت روحت اخدت البطاقه وجايه امشى ونسيت احط صباعى فى الحبر قام ندالى القاضى وقالى: حطى صباعك فى الحبر من فضلك 

 رجعت تانى وحطيت صباعى فى الحبر على خفيف وهو مركز معايا

و لقيته بيقولى لازم الحبر يلمس ضوافرك 

مش عارفه اذا كان بيهزر او لا بس حسيت انه بيعاند معايا وخلاص عشان انا طلبت الكارنيه

 بعدها بصيت له بتحفز وقلت له قبل مامشى :يعنى لازم الحبر يلمس ضوافرى ؟اشمعنى فى دى ماشى صح يعنى ولما طلبت الكارنيه مش عايز توريهولى وانت عارف ان ده من حقى؟ 

 لم انتظر انه يرد وسبته ومشيت وروحت اشتكيت لظابط الجيش وظابط الشرطه  اللى واقفين بره قالولى هو قاضى بس لو عايزه تعملى محضر اعملى

قلتلهم: طب حد شاف الكارنيه بتاعه ؟

قالولى لأ

قلتلهم: يعنى هو مش قاضى ؟

قالولى : لا قاضى

 استغربت منهم اوى لانى كنت منتظره ان حد فيهم يقولى انا شفت الكارنيه يا انسه واطمنى هو قاضى 

  وانا ماكنتش عايزه اعمل مشكله وخلاص انا بس كنت عايزه حد يأكدلى انه قاضى لكن ماحدش خالص شاف الكارنيه بتاعه وعشان كده اضطريت اروح القسم اعمل محضر ولما روحت القسم لقيت ان المأمور بيعمل حاجه لطيفه جدا بيدون بس شكاوى الناخبين انما مش بصوره رسميه ومش فى شكل محضر

 ولما قلت له انى عايزه اعمل محضر ضده

  قالى ان ماحدش هايقدر يعمله حاجه

 وقالى بالحرف :يا انسه ده قاضى هو ظابط شرطه غلبان عشان حد يأذيه؟ 

 قلت له انا مش عايزاه يتأذى بس فى نفس الوقت من حقى اعرف هو قاضى او لأ

 وانا بتكلم معاه دخلت ست بتشتكى ان بنتها ماتت من 4 سنين واسمها فى الكشوف الانتخابيه وطلبت تعمل محضر وبرضه نائب المأمور رفض وقالها زى ماقالى

 (روحى المحكمه وقابلى رئيس اللجنه العامه للانتخابات والرئيس بتاع اللجان هناك يتصرف) 

وبعديها بشويه دخلوا 4 ستات منهم واحده منقبه من اللجنه بتاعتى ولما شفونى ضحكوا وده طبعا بسبب الخناقه اللى عملتها بره اللجنه وان القاضى مش عايز يطلع الكارنيه وده خلى الناخبات تفقد المصداقيه فى القاضى والاستفتاء 

وعشان كده جم ورايا لانهم علموا زيى وسألوه على الكارنيه  و برضه القاضى رفض يطلعلهم الكارنيه

 المهم فضلنا نجادل مع نائب المأمور ونشد معاه وهو وشوية ظباط قاعدين يبصوا لبعض من تحت لتحت بطريقه مريبه وكأنهم واخدين اوامر انهم اصلا مايحرروش محاضر ضد القضاه مما اثار ريبتى انا واللى معايا 

وخلانا نصُر اكتر على عمل محضر وانه من حقنا وقلنا له اننا لو معملشى محضر يبقى احنا عايزينه يعمل محضر فى القسم انه امتنع عن انه يعمل محضر :D

ودى كانت نصيحة القانونيين اللى فضلنا نسألهم بالتليفون واحنا واقفين

 ,المهم بعد جدال طويل مع نائب المأمور ورئيس المباحث انا والناخبات اللى معايا وكمان كان فيه رجل محامى واقف معانا وبيسخن الجو

 قام رئيس المباحث قال للرجل اللى بيعمل محاضر (مش عارفه ده رتبته ايه )

 اعملهم محضر  وبالرغم من اننا شكينا ان ده فض مجالس ونظام (ريحهم وخليهم يغوروا) 

 الا ان بالفعل الرجل خد اقوالى انا واللى معايا وخد بطايقنا وعمل محضر وسألنى اكتب :اثبات حاله ولا اتخاذ اللازم ؟

فتحت بقى وقلت له :هاااااا

 لانى طبعا مش بفهم فى الكلام ده وعارفه ان ممكن كلمه تخلى حقى يضيع ده

 (اذا كان هايرجع اصلا :))

بس لقيت المحامى قاله اكتب (اتخاذ اللازم)

 المهم مضينا على المحضر وخدنا رقمه وبعد كده فى واحده من اللى واقفين اتصلت بواحد قريبها مستشار يعرف رئيس اللجنه العامه للانتخابات وقالت له على اللى حصل قام المستشار ده كلم رئيس اللجنه العامه وقاله على اللى حصل من القاضى

 راح رئيس اللجنه العامه اتصل بالقاضى المؤرف بتاع اللجنه 

وسأله ليه مش بيرضى ان الناخبين يشوفوا الكارنيه بتاعه

 قاله يافندم اصل كل شويه واحده تتطلبه!

 قام طلب منه يعلقه فى البدله او على باب اللجنه 

 يعنى بسلامته كل مشكلته انه متكبر يطلع الكارنيه اعتقادا منه اننا شويه حريم فاضيه 

ونسى اننا لو كنا حريم فاضيه مكناش رحنا استفتينا اصلا وكنا فضلنا قاعدين فى البيت نحشى محشى

المهم انى طلعت من اليوم ده بعدة افكار:

1- اننا محتاجين نتعلم سلوكيات معينه زى اننا نثق فى نفسنا شويه كشعب ونبطل نحس بالنقص كل ماحد يقولنا طلعوا الكارنيه بتاعكم مهما كنا رتب او قيادات ونحترم القانون ونعرف ان مافيش حد فوق انه يتحاسب حتى رئيس الجمهوريهومافيش داعى ابدا ان لجملة (انتى مش عارفه انتى بتكلمى مين)

2- ان مافيش حد فينا كشعب بيثق فى التانى وعندنا فوبيا من الغدر

 يعنى انا والناخبات اللى معانا لم نثق فى القاضى بسبب حوادث انتحال القضاه المتكرره فى المرحله الاولى ولما روحنا القسم لم نثق فى الظباط انهم هايعملوا محضر ومش هايقطعوه بعديها,والظباط مش واثقين فى نويانا بسبب المحامى اللى شابهنا ومحسسهم انوا له اغراض تانيه من وراء مساعدته لينا ,

واحنا مش واثقين فى المحامى اللى واقف معانا وفضلنا نسأل نفسنا هو ليه بيساعدنا ومصلحته ايه ؟

3- ان بعيد عن نظرية المؤامره فيه حاجه مريبه اكيد وراء رفض نائب المأمور

انه يحرر محضر ضد القاضى بالرغم من ان القسم بيحرر محضر ضد اى حد

4- انى محتاجه محامى دليفرى ضرورى :)

حصاد الأسبوع

ملخص خطبة القرضاوى يوم الجمعه اللى فاتت 

 

(أهو ده اللي (ثار) و آدي اللي (خان) .. مالكش حق تلوم عليّا ).

ستاتوس رايق على صفحة صديق على الفيس

ابو اسماعيل مش بيقتحم مقرات

 ابسوليتلى 

ابو اسماعيل بيسخن حازمون بس

 وحازمون عليها الباقى

فيديو الشيخ المحلاوى اللى كان سبب فى مجزرة اسكندريه

الى الشيخ المحلاوى :

قال رسول الله محمد ( صلى الله عليه و سلم )
عليكم بالصدق فان الصدق يهدي الى البر و ان البر يهدي الى الجنة وما يزال الرجل يصدق ويتحرى الصدق حتى يكتب عند الله صديقا و اياكم و الكذب فان الكذب يهدي الى الفجور و ان الفجور يهدي الى النار و ما يزال الرجل يكذب و يتحرى الكذب حتى يكتب عند الله كذابا 

الإسلام هو الحل والإخوان هما المشكله

هذا مايريدون فعله بنا ولكن هيهات 

ابو اسماعيل وجملته المشهوره لما يتزنق:

(لم يكن لدى علم متلقا )

 رساله الى كل ثوار مصر 

 

علاء الاسوانى على تويتر:

محمد مرسى طلع اقل من المستوى الذى كنا نتوقعه و الفريق احمد شفيق عند ظهور النتيجه لم يفعل شى يضر مصر وشعبها مثل ما فعله محمد مرسى وجماعته الان لمصر وشعبها

  والله ؟ دلوقتى بقى شفيق محترم ؟

طب وايه اخبار أيتامه وأرامله  وعاهراته من منتخبات مصر برضه طلعوا محترمات ولا لسه ؟  

إخوان  

قُلْ هَلْ نُنَبِّئُكُمْ بِالأخْسَرِينَ أَعْمَالا (103) الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا (104) الكهف

هاتولوا راااااااااااااااااجل

 

روى ابن ماجة في سننه عن أبي هريرة - رضي الله عنه - قال: قال رسول الله - صلى الله عليه وسلم -: (سيأتي على الناس سنوات خداعة يُصَّدق فيها الكاذب، ويُكذَّب فيها الصادق، ويؤتمن فيها الخائن ويخون فيها الأمين، وينطق فيها الرويبضة)، قيل: وما الرويبضة؟ قال: (الرجل التافه يتكلم في أمور العامة)صدق رسول الله

لا للدستور 

  

ليه هأقول لا للدستور ؟

 

أولا :بغض النظر عن المواد اللى قلقانى زى بقية الناس

 اول ماقريت الدستور لوحدى وقعت فى غرامه

واستغربت اوى الناس بتنقده ليه

 انا كواحده من معارضين الاخوان معنديش مشكله نهائى 

 انى اقول نعم لدستورهم لو فعلا جيد

 ماهى مش غلاسه انى اقول لأ كده وخلاص لمجرد انى بعارضهم

  ولكن بعد قراءه تانيه متأنيه 

و(ماكنتش لسه استعنت بأصدقاء قانونيين) 

ومن وجهة نظر مواطنه بسيطه

لاحظت ان الدستور اجوف مليان شعارات فارغه من أى ضمانات ده غير الجمل اللى زي:

  (يحددها القانون و على النحو الذى يحدده القانون) 

دى اللى موجوده فى اخر معظم المواد حاسه انها شبه جملة وكله (بما لا يخالف شرع الله) 

يعنى ايه يحدد وفقا للقانون؟ 

ولو ده اتقال فى ماده او مادتين ماشى انما يتقال فى معظم المواد ده غريب جدا وكأنه بيقولى وابقى سلملى على القانون او قابلنى عند القانون يعنى الدستور مش بيضمنلى حاجه وكأن القانون هيبقاله رأى أخر دايما طيب اومال بنعمل دستور ليه اصلا ؟

ثانيا : خلو الدستور من مواد معينه تمس المرأه المصريه وحقوقها  لما تبقى العقليه اللى بتعمل الدستور شايفه ان صوت المرأه عوره او انها للفراش بس 

يبقى هاتطلع دستور يحمى حقوقها ازاى؟

دى وجهة نظرى البسيطه اللى مش مبنيه على حقائق قانونيه

نييجى بقى للجد 

 نتكلم فى بعض المواد اللى مبنيه على حقائق قانونيه وهى دى القنابل الموقوته اللى بين سطور الدستور :

1-   بخصوص الماده 2 والماده 219 اللى بتتكلم عن ان الشريعه الاسلاميه هى المصدر الرئيس للتشريع واللى مش عارفه لحد دلوقتى ليه هما مش ماده واحده!! هانركز على الماده 219 لانها اعم واشمل من الماده 2 وخصوصا ان الحكايه بهؤت منهم على الاخر فى التأسيسيه واضافوا جملة قواعدها الاصوليه والفقهيه ومصادرها المعتبره فى مذهب اهل السنه و(الجماعه) وكأنه بيفتح الباب للخلافات الفقهيه

 و هايفتح الباب بعد كده لتطبيق حد الرده على كل من سولت له نفسه معارضه الحاكم سياسيا وحل دمه طبقا للمذهب الفلانى او طبقا للمذهب العلانى مع ان القرءان والسنه كافيين جدا لتطبيق الشريعه الاسلاميه وبيحفظ حقوق كل المواطنين على اختلاف اديانهم وافكارهم السياسيه والدليل :

2- (ليس عليك هداهم ولكن الله يهدى من يشاء) البقرة 272

3-   (فمن شاء فليؤمن ومن شاء فليكفر) الكهف29

4-   فانما عليك البلاغ وعلينا الحساب الرعد40

5-   أفأنت تكره الناس حتى يكونوا مؤمنين يونس 99

6-   فذكر انما انت مذكر لست عليهم بمصيطر الغاشيه21,22

7-   (والذين اتخذوا من دونه أولياء الله حفيظ عليهم وما أنت عليهم بوكيل) الشورى 6

8-   (ربكم أعلم بكم إن يشأ يرحمكم أو إن يشأ يعذبكم وما أرسلناك عليهم وكيلا) الإسراء 54

كل القرءان بيأكد على نفس الفكره ان مش من حق حد يمشى فى الشارع يضرب الناس او يتعدى عليهم بحجة الهدايه وان للمسيحين الذين يختلفون فى دينهم عننا ليهم الحق فى الوطن زيهم زينا من غير مانفرض عليهم شريعتنا ده غير ان ربنا اعطى الحق لمن يختلفون فى دينهم عننا اننا نتركهم له وهو اولى بهم فمابالنا بالذين يختلفون فى فكرهم السياسى هل وجد فى القرءان مايفيد قتلهم او تعذيبهم او ماشابه؟

يبقى ليه نوسع ونقول مذاهب وحوارات؟ 

ثما مين الجماعه اللى يقصدهم فى الماده دول ؟ جماعة الاخوان مثلا ؟ ولا جماعة الامر بالمعروف والنهى عن المنكر ؟ولا جماعة التكفير والهجره؟

ممكن نلاقى حد طالع يقول اننا لازم نسمع كلام جماعة الاخوان

 اللى موجوده فى الدستور

قادرين ويعملوها

2- بخصوص الماده رقم 10 اللى بتقول ان (الاسره اساس المجتمع وقوامها الدين والاخلاق والوطنيه وتحرص الدوله  والمجتمع على الالتزام بالطابع الاصيل فى الاسره المصريه وعلى تماسكها واستقرارها وترسيخ قيمها الاخلاقيه وحمايتها وذلك على النحو الذى ينظمه القانون وتكفل الدوله خدمات الامومه والطفوله بالمجان والتوفيق بين واجبات المرأه نحو اسرتها وعملها العام وتولى الدوله عنايه وحمايه خاصه للمرأه المعيله والمطلقه والارمله )

شامه ريحه استعباط فى الماده دى

ايه معنى بقى ان الدوله والمجتمع يحرصوا على الالتزام بالطابع الاصيل فى الاسره المصريه وعلى (((ترسيخ))) قيمها الاخلاقيه ؟ ايه لازمتها الجمله دى انها تتحط اصلا وكأن الناس معندهاش اخلاق وكانت مستنيه الاخوان يروبوهم ؟

من جهة التربيه فيه كتير اتربوا واتعلموا مايعملوهاش تانى وينتخبوا الاخوان

 انما هل المقصود بان المجتمع يرسخ الاخلاق يعنى الاقى وانا ماشيه فى الشارع (المجتمع) بيغوزنى ويقولى اتحشمى يا إمرأه يا متبرجه ؟ ثكلتك امك؟

 الماده ملهاش اى معنى الا اذا كان المقصود منها فتح الباب للجماعات المتطرفه لنشر الفضيله المزعومه

ثم اى مجتمع بيتحدث عنه هو هايبقى فيه مجتمع واصى على مجتمع  تانى ؟ :)

3-الماده رقم 12 اللى بتقول (تحمى الدوله المقومات الثقافيه والحضاريه واللغويه للمجتمع ,وتعمل على تعريب التعليم والعلوم والمعارف )

ايه الغرض من تعريب العلوم ؟ ايه الفايده اللى هاتعود علينا من تعريب العلوم ؟

هل للحفاظ على اعلاء قيمة اللغه العربيه والحفاظ على الهويه كما يذهب البعض ؟

طب وايه اللى هايضر اللغه العربيه والهويه المصريه لو فضلت زى ماهى كان من باب اولى الاهتمام باللغه العربيه وتدريسها مع الحفاظ على علومنا بلغتها اللى بندرسها بيها

 ولو هانمشى بالقرءان والسنه رسولنا بيقول فى حديثه الشريف ("من علم لغة قوم أمن مكرهم")

ده غير اننا مش هانكتسب خبرات جديده اذا فضلنا ندرس بنفس لغتنا ولا هو الغرض عزلنا عن العالم وعجزنا عن مواكبة التطور العلمى وخلاص ؟

4- الماده رقم 14 التى تذهب الى ربط الاجر بالانتاج ؟

اى اجر واى انتاج ؟

ليه مايربطشى الاجر بساعات العمل ؟ او الاسعار ؟

5-الماده 14 بتتكلم على ان يجب ان يكون فيه حد ادنى وحد اقصى و لم يربط الحد الاقصى بالحد الادنى للاجور

6-الماده رقم 215 بتخلى التلفزيون والجرايد تابعين للمجلس الوطنى للاعلام يعنى معناها ان الحكومه هى اللى هاتحدد لنا نسمع ايه ونقرأ ايه,يعنى زى الاول بالظبط مافيش جديد

7-الماده 216 بتخلى برضه المؤسسات الصحفيه تحت رحمة الهيئه الوطنيه للصحافه والإعلام يعنى برضه غير مستقله

  8- الماده 149 اللى بتدى الحق لرئيس الجمهوريه يعفو عن اى حد او يخفف العقوبه مرفوضه لان مرسى هيستغلها اسوأ استغلال لما يطلعلنا من السجن اهله وعشيرته الإرهابيين عشان يجاملهم على قفانا

   9-   الماده 166 اللى  هاتخلى رئيس الوزراء والحكومه يفجروا لان ماحدش هايقدر يقدم فيهم بلاغ او يتهمهم بأى حاجه الا رئيس الجمهوريه او النائب العام او تلت اعضاء مجلس الشعب هما اللى ليهم الحق ده بس وده معناه انهم لو اخطأوا فى حق مواطن غلبان يبقى يقول على حقه يارحمن يارحيم لوكان مش من اهل وعشيرة الريس ومايعرفشى النائب العام ومايقدرشى ياخد موافقة 3اعضاء المجلس

10 -الماده 128 تتيح للريس انه يعين عُشر اعضاء مجلس الشورى يعنى بفرض انهم مش هايطلعوا كلهم اخوان لان (الناس العاديه مش بتترشح فيه اصلا) الريس هايعين لهم عُشر اعضائه كمان عشان يكملهم العدد اللى ناقص عشان يبقى الشورى كله اخوان ده غير ان مجلس الشورى مالوش اى  لازمه اصلا   

11- الماده 104 اللى بتقول ان مجلس النواب يبلغ رئيس الجمهوريه بكل قانون اقر فإذا اعترض عليه رده الى المجلس خلال 30 يوم من التاريخ 

مرفوضه طبعا لان هذا لا يجوز المفروض يبقى فيه فصل بين السلطات يعنى السلطه التنفيذيه ملهاش دعوه بالتشريعيه والعكس وكل واحد يخليه فى شغله 

 

                  

12-   الماده 93 التى تذهب ان ممكن جلسات مجلس الشعب والشورى تبقى سريه ايه الغرض منها ؟

 الشعب من حقه يعرف كل كبيره وصغيره فى الدوله كفايانا تعتيم

13- الماده 35 اللى بتقول ان لا يجوز القبض على احد ولا تفتيشه ولا حبسه ولا منعه من التنقل ولا تقييد حريته بأي قيد الا بأمر قضائى مسبب يسلتزمه التحقيق ويجب ان يبلغ كل من تقيد حريته بأسباب ذلك كتابه خلال 12 ساعه 

اشمعنى بقى 12 ساعه؟

يعنى يكون الواحد شبع ضرب ومرمطه ؟ 

وليه مايبقاش فى وقتها على طول ؟

من حق اى حد يعرف هو مقيد حريته ليه فى وقتها وليس بعد 12 ساعه

ولا هانرجع لأيام امن الدوله تانى؟ 

ماده واحده من دول تخلينى اقول لأ للدستور

مش ممكن حتى لو مش موافقه على 20% بس اقول نعم لسبب بسيط 

لان ممكن ال20% دول الى يسمموا حياتى وحياة كثيرين بعد كده
ده غير انه دستور اتكتب بدم ناس ملهاش اى ذنب غير انهم بيعبروا عن رأيهم
وكان سبب فرقه وانقسام الشعب 

هانزل واقول لأ 

وانا متأكده ان النتيجه هاتبقى نعم 

عشان لسه فيه خرفان بتمأمأ 

ولسه فى ناس بتقول نعم للدين 

ولسه فى زيت وسكر وهدوم جديده

ولسه فى متأسلمين شايفين ان التزوير مش حرام 

طالما لتطبيق شريعة الله

وكله بما لا يخالف شرع الله  

لكى الله يا مصر