إحنا أسفين يا أمن الدوله

بسبب فضولى الدائم لمعرفة مايدور وراء الكواليس كان هذا الحوار أثناء تناولى الإفطار فى إحدى أيام رمضان مع شخص على مقربه منى وذلك لسماع وجهة نظره فى الأحداث الجاريه

صحيح أنا طفحته اللقمه اللى بياكلها من كتر الأسئله بس ده ظابط أمن دوله حلال فيه اللى جراله

وده كان حديثنا زى ما دار بالظبط:

أنا:إنت بتشتغل فين دلوقتى ؟

ش: بإبتسامه ساخره:فى الأمن الوطنى

أنا: بإبتسامه خبيثه:ياراااااجل؟؟ يعنى الإسم بس اللى إتغير؟لكن الفعل زى ماهو مش كده؟

ش:مش ده اللى انتوا عايزينه؟

أنا:يعنى إنتوا هاتضحكوا على الشعب؟ خلى بالك الشعب مش اهبل وفاهم كل حاجه كويس قوى ومش هايسكت

ش :وهى الشرطه كانت عملت إيه للشعب عشان الشعب يعمل معاها كده

أنا :بذهول ثم حده:  مش عارف الشرطه عملت ايه للشعب؟الشرطه بتجنى اللى زرعته سنين طويله  

ش: بهدوء : ليه بأه

أنا :بحده أكتر:معاملتكم السيئه للشعب طول الفتره دى كل واحد حطى لى كام نجمه على كتفه إفتكر نفسه ملك النيا كلها ويمشى يبلطج على عباد الله ويرمى بلاه عليهم يعنى لما توقف سواق ميكروباص  فى لجنه وتقوله (إركن على جنب وهات الرخص يا روح أمك)أو لما تقفشوا عربيه ملاكى مفيمه وتقول لصاحبها (هو انت عاملها أوضة نوم ؟) دا رقى وتحضر وأدب ؟ فيها إيه لو إتعاملت معاه كويس وبرضه هاتطبق القانون بس بلاش إهانه ومرمطه فى خلق الله دا غير قانون الطوارىء بقى اللى جه على مزاجكم عشان تمارسوا بلطجتكم أكتر وأمناء الشرطه الى بياخدوا رشاوى عشان يعدوا أى حاجه غلط  دا غير الظباط الساديين فى  أمن الدوله وفضايحهم من أول  التصنت على المكالمات لحد الصعق بالكهرباء مرورا بالتحرش يعنى من الأخر الداخليه راكبه على البلد ومدلدله رجليها

ش:خلصتى؟

أنا :بإبتسامه مستفزه :أه

ش :أولا كل مهنه فى الدنيا فيها الحلو وفيها الوحش وزى مافى دكاتره نفسيين بيفشوا أسرار مرضاهم ومش بيتقوا ربنا فيهم اكيد فى دكاتره كويسين وزى ما فى مهندسين بيوقعوا عمارات وبيقتلوا أرواح فى برضه مهندسين كويسين  زى ظباط شرطه كويسين وفى ظباط مش كويسين

أنا:أوكيه بس النسبه الوحشه عندكوا بزياده وبتعمل كوراث

ش :ليه بتقولى كده انا كنت فى اللجان بفرق بين واحد راكب ميكروباص وبين واحد فى عربيه فى مصر الجديده  مثلا مش بعامل ده زى مابعامل ده وفى نفس الوقت كنت بعامل سواق الميكروباص بطريقه عاديه لحد ماهو يلابط معايا فى الكلام ويستعبط

أنا: جايز انت بتتعامل كده لكن فى كام ظابط زيك بيتعاملوا كده مع الجمهور؟

ش: حتى لو مش كتير أنا بعذر اللى بيتعاملوا بحده مع الجمهور أى حد بيتعامل مع الجمهور بيزهق  مش انتى ساعات بتدخلى مصلحه حكوميه والناس تعاملك بزهق وبقلة ذوق وتنفخ فى وشك ؟إشمعنى بأه بتكونى ناقمه وساخطه على ظابط الشرطه بس لما يزهق؟هو مش بنى أدم وله طاقه ؟ يا بنتى دا حتى الجيش نفسه كان الأول بيطبطب ويدلع الشعب لأن ماكنشى فى إحتكاك بينهم وبعدين بعد كده بأه يسب لهم بالدين هو الاحتكاك بالناس كده من كتر مالناس بتلابط  ومن كتر ما ظابط الشرطه بيتعامل ساعات مع فئات بنت وسخه وبيطلع ميتينه طول النهار يبقى لازم يبين العين الحمرا من الأول عشان يكسر حتة ان حد يلابط معاه ثم إنتى لما بتدفعى رشوه لأمين الشرطه بتبقى مشتركه معاه فى الغلط وده مش غلطه لوحده ولا إيه؟

أنا:طب وأمن الدوله برضه فيهم حلو ووحش؟

ش: أكيد طبعا ثم مالهم أمن الدوله ؟بيحافظوا على الامن فى البلد بأى وسيله كانت؟

أنا: اى وسيله زى التصنت والمراقبه والصعق والتحرش لحد ما السجين يمرض ؟

ش :التصنت:مش بنتصنت ونراقب غير على الللى محل شك ومش بنصعق غير اللى يستتاهل الصعق ثم ان غرفة التحقيقات عندنا تحت الارض و أى حد يأعد فيها ممكن يطلع عنده أمراض الدنيا كلها من الرطوبه او كتمة النفس  مش لازم حد يقرب له أو  يمد إيده عليه وبعدين اكلهم زى اكل العساكر ده الموجود نعمل ايه ؟

أنا: والناس اللى بتاخدوهم وكل ذنبهم انهم بيصلوا الفرض بفرضه فى الجامع اومربيين دقنهم ؟

ش  : مين اللى فهمك كده ؟الحاجات دى بتكون مستويات يعنى هو مش اول مايربى دقنه هانحطه تحت سبوت او لانه مواظب على الصلاه فى الجامع لكن بأه لو عملى شله فى الجامع من تلاته اربعه وبعدين كل يوم يزيدوا وبعدين الاجتماعات بعد ماكانت جوه الجامع بقوا يروحوا يجتمعوا فى اى مكان تانى المفروض انى استنى لحد ماتحصل مصيبه؟ ولا امنعها من اولها ؟

إنتى شايفه إنى ألم الناس دى قبل مايعملواحاجه تضر البلد , ولا استنى لما يقولوا على بنت زيك متبرجه وزنديقه ويقتلوكى أو يفجروا أتوبيس سياحى ولا متحف من المتاحف اللى مليانه أصنام على حد تعبيرهم وده كله طبعا بإسم الدين ؟ شغلتى أمنع المصيبه قبل ماتحصل ثم انتى عارفه ان فى ناس كتير فى امن الدوله قدمت استقالتها ومشيت فى اللى راح البحرين وفى اللى راح قطر؟يعنى احنا ندرب ونعلم ونصرف فلوس وبعدين الناس دى تاخدهم على الجاهز

وعشان حسيت إنى زودتها إبتسمت و سكت ومنعت نفسى بالعافيه انى اقوله (يعنى هما كانوا مدربين على حاجه عدله؟ ماهو مدربين على التعذيب والعنف ) وقلت له عموما للحديث بقيه وقمت من على السفره فى محاوله منى لعمل هدنه ...

وبعد الفطار كملنا حديثا كالأتى:

أنا:طب دول اللى بيعملوا ارهاب وبلبله للبلد لكن الناس التانيه الشريفه؟

ش:بقولك ايه انتى بتعملى حاجه غلط؟

أنا:لأ

ش:يعنى شخصيه محترمه وشريفه؟

أنا:بيقولوا

ش :حد قربلك ولا اتصنت على تليفوناتك ؟ولاخدك القسم إداكى علقه محترمه؟

أنا:لأ

ش:خلاص طول مانتى ماشيه مظبوط ماحدش هايعملك حاجه

أنا:مظبوط؟دا حسب تعريف المظبوط يعنى لو انا اتكلمت على النظام ونقدته انا شايفه ان ده من حقى ولو قلت أفضفض فى مدونتى ( اللى قطعا متراقبه )بكلمتين عن االنظام وفساده أروح ورا الشمس؟

ش:لو الكلام ماتعداش مرحلة النقد خلاص

أنا:وإذا تعدى ؟

ش:المختصين بالمراقبه هايراقبوكى لحد ماتزوديها أو النقد يتحول لفعل

أنا:وبعدين تفتحوا النار عليا

ش:والله زى مانتى شغلتك تعالجى المجانين أنا شغلى أحافظ على النظام

أنا: حتى لو النظام ده فاسد؟

ش: بإبتسامه ساخره:النظام مش حكومه بس النظام يعنى اننا نسيطر على كل حاجه فى البلد وانى نسعى ورا المعلومه وماتخفاش علينا اى خافيه ومانسبشى حاجه للظروف ده اللى بيحقق لواحده زيك الامان

أنا :وسعيك ورا المعلومه يخليك تجند الناس على بعضهم وابقى قاعده فى أى مكان وزميلتى بتخونى وبتفشى أسرارى ليكم؟

ش: هو إحنا كنا ضربناها على إيديها عشان تفشى أسرارك ؟دا ساعات الناس نفسها هى اللى بتيجى تعرض خدماتها فى إنها تجيب لنا معلومه قصاد مقابل مادى أو خدمه عايزينها من أمن الدوله هو انتى فاكره ان كله تجنيد ؟

أنا:وايه حكايه بدل الرقص اللى الناس لقتها جوه أمن الدوله؟

ش: بإبتسامه خبيثه مالها دى أحراز

أنا: والله ؟ولا دا عشان تلبسوها للمعتقلين كنوع من انواع الاهانه

ش:مش كل حاجه تسمعيها تصدقيها لازم تكونى شفتى بعينك

أنا: اوكيه خلينا فى اللى شفته بعينى فرم وحرق الملفات اللى موجوده

ش:دا أسلوب معروف لأن الملفات دى فيها أمن الدوله كلها وفيها فضايح وناس ناشطين ومعروفين جدا فى البلد واحنا بنراقب سلوكهم السياسى لقينا فى السكه مصايب فى سلوكهم الشخصى وكلام له علاقه بالأعراض وناس فى بلدك انتى بتحترميهم اوى وبتحترمى مواقفهم السياسيه ولكن فاسدين فى حياتهم الشخصيه والغريبه ان احنا بنسكت وهما اللى بيفضحوا نفسهم ويخرجوا يقولوا امن الدوله فبركتلنا فيديو بيهددونا بيه عشان يلحقوا يكسبوا تعاطف الناس قبل مالحقيقه تتعرف نسيب بقى الملفات دى تقع فى ايد الناس ويتفضحوا؟معروف اننا بنبقى واخدين أوامر بإعدام الملفات فى حالة أى طوارىء

أنا :والعادلى

ش:ماله احسن وزير داخليه جه كفايه انه قضى على الإرهاب

أنا بذهول:نعم؟اذا كان فى ناس بتختلف حوالين مبارك لكن العادلى مايختلفشى عليه اتنين انه قاتل بس إنت بتقول كده عشان كان مركبكوا على البلد

ش:مين قال إنه قاتل اذا كنت انا يوم 28 الصبح بسأل الأمن المركزى أنتوا تسليحكم إيه قالوا لى خراطيم الميه وقنابل مسيله للدموع لأن الريس عمل إجتماع مع الوزير وقاله ماتضربش نار على المتظاهرين

أنا:والله والقناصه دول إيه إن شاء الله ؟الشعب بس متنكر؟

ش:مافيش قناصه

أنا بإبتسامه سخريه:والله فكرتنى بالنكته اللى بتقول إن القاضى بيسأل الوزير عندك قناصه قاله لأ وهو عنده جوه

ش:بصى من الأخر كل وزير برضه مش هايعجب كل الناس ولعلمك هايطلع براءه وعشان كده هو قاعد ورا القفص بيبتسم فى هدوء وثقه

أنا فى محاوله منى لإنهاء الحديث:بينا الأيام هى اللى هاتثبت صحه كلامك من عدمه وعموما التاريخ مش بيرحم حد

إستأذنت من المكان وقمت عشان أمشى وأنا ماشيه عديت على خطاط وطلبت منه يكتب لى على يافطه :

هلاوس ليليه

  

* أتعس الرجال حظا مع النساء هومن تفضل المرأه ظل الحيط عن ظلهم

*أوفر الرجال حظا مع النساء هو من يحمى المرأه من جميع الرجال حتى نفسه

*أكون أسيره لمن يرسم بسمه على شفتاى وأمقت كل من يسقط على هذه الشفاه دمعه

 *إئتلافتنا الثوريه من أكثر الأشياء التى تدل على إختلافتنا الجوهريه

*الغد يبدأ من اليوم

 *إختيارتنا الخاطئه هى التى تصور لنا أحيانا أن لا وجود للحب

*إذا تعجبت من قدرة الأخرين على خداعك تذكر قدرتك على خداع الأخرين

*زهدت فى قسم من لا قسم له

*من راقب الناس مات جنونا

* نحتاج ثوره ضد أخلاقنا

سلاسل السلطه حديديه أم وهميه؟

سيظل هذا السؤال يتردد إلى أن أجد إجابه

هل يجلس على عرش السلطه  دائما الشخص الغير كفء والغير مؤهل لها أم حتى لو جلس مؤهل المؤهلين وكفء الأكفاء سيخضع لسلطه أعلى وأقوى تكمم فاه وتكبل أيديه بإستبدادها وتجعله ينفذ أوامرها ويصبح عبد المأمور؟

أم إن السلطه لديها حسابات اخرى تفرض على صاحبها لا يعرفها العامه وذلك على حسب المثل القائل:

( اللى مايعرفشى يقول عدس ) و(إللى إيده فى الميه مش زى اللى إيده فى النار)

وهل السلطه الأقوى أيضا لديها حسابات أخرى غير معروفه لدينا؟

وإذا عرف السبب بطل العجب ؟

على سبيل المثال عند تولى رئيس الوزراء عصام شرف الذى إستمد شرعيته من ميدان التحرير وبترشيح الثوار كان من المتوقع أن يحقق مطالب الثوار من أول حل أمن الدوله إلى القصاص للشهداء مرورا بوضع حد ادنى للأجور ولكن بعد ايام وشهور لم يحدث المتوقع منه وبدأ يعمل ودن من طين وودن من عجين ولما الثوار يطلبوا مطالب يتحرك متأخر جدا ثم  ينفذ مطالب اخرى  غير اللى طلبها الثوار على غرار خطابات مبارك  كده لدرجة إنه كلما أراه  أتذكر عبله كامل فى مسرحية وجهة نظر عندما كانت عمياء وكانت تناضل مع زملائها فى مؤسسه العميان ضد الفساد الموجود بالمؤسسه وعندما عاد لها نظرها وكان من المتوقع أن تناضل بقوه اكثر خذلت زملائها ورددت نفس عبارات المديرين الفاسدين وسارت على نهجهم.

وهذا ماحدث مع عصام شرف فعندما طالب الثوار بإقالة العيسوى بسبب سيره هو بدوره على نهج عبله كامل من التباطؤ فى القصاص للشهداء إلى عدم إعادة الأمن للشارع  المصرى مرورا بإتباع  نفس سياسات الكلب العادلى, نجد شرف  يسارع بتشكيل حكومه جديده لا تشمل إقالة العيسوى.

مثال اخر عندما طالب الثوار وزير الماليه الجديد بعمل موازنه نجد ان اول حاجه عملها منذ توليه الوزاره  هى رفض الموازنه

البوست لحد كده إنتهى .

ولو إنى مش بحب أكتب بوست اسأل فيه سؤال أنا شخصيا مش عارفه إجابته لكن هل لو إختارنا شخص من ميدان التحرير تتوافر فيه العوامل الأتيه:

1-كان موجود فى الميدان من يوم 25 يناير وظل حتى نهاية الاعتصام (يعنى لم يأخذ لقب القافز على الثوره او غيره)

2-لم ينتمى لاى حزب من الاحزاب (لا اخوانجى ولا ناصرى ولا وفدى ولا كفايه ولا 6 ابريل )

3-كان بياكل ال18 يوم أى حاجه غير(الكنتاكى)

4-مش قابض حفنه من الدولارات أو اليوروهات من أى جهه من الجهات.

5-لا يرتدى (حظاظه )ومتزوج من مصريه ملهاش قرايب فى أمريكا وياريت تكون من بولاق واخوها اسمه حسن وعليه حكم

هدفه الوحيد من نزوله التحرير وإعتصامه هو مصلحة البلد ولا أى شىء غير مصلحة البلد يعنى لم يحصل على اى لقب من الألقاب الاتيه :

(عميل - جاسوس- خاين- اجنداوى- فلول- ثوره مضاده- ماسونى)

وعيناه رئيس وزراء

 هل سيحقق مطالب الثوره جميعها وتبقى الحياه بمبى؟

أم إن أول قراراته ستكون إزالة ميدان التحرير بثواره وبناء منتجع لضباط الشرطه مكانه ؟

وهل حينها ستكون عنده أسباب قويه لهذا القرار؟أم لا؟

فكروا
إن نصف الناس أعداءلمن    :     ولى السطه هذا إن عدل

الغباء لا دين له

لو كان فى أعراض فى علم النفس إسمها هلاوس فجائيه كنت قلت إن بعض الناس بتجيلها هلاوس فجائيه

وفجائيه ليه لأنها تصدر من أشخاص غير متوقعه وفى أوقات غريبه مثل الهلاوس اللى إنتابت فضيلة الشيخ يعقوب  فى غفله من الزمن وجعلته يهذى بكلام غير معقول عن الإنتصارات العظيمه اللى حققتها غزوة الصناديق  بداية من( إن البلد بلدنا واللى مش عاجبه يروح امريكا وكندا )إلى النقد اللاذع لكل من أدلى بلا فى التصويت على التعديلات الدستوريه مرورا بتكبيرات العيد:))  والأسوأ إنه لم يثبت على موقفه ولكنه قال بالحرف الواحد(دى كانت مزحه)

وهى ذاتها نفس الهلاوس التى جعلت رجل الأعمال القبطى نجيب ساويرس يضع صوره  ميكى لديه لحيه وميمى ترتدى نقاب على حسابه على تويتر وعندما قامت الدنيا عليه  قال (دا انا كنت بهزر)

اى مزاح هذا؟

وأى ظروف هذه التى تسمح بهذه النوعيه من المزاح ؟

البلد داخله على فتنه طائفيه

وده بيقول كنت بهزر

بلطجيه

وشرطه يا جايه يا مش جايه

وده بيقول كنت بهزر

برلمانيه  ولا رئاسيه؟

وده بيقول كنت بهزر

إنتخاباتيه ولا دستوريه ؟

وده بيقول كنت بهزر

عسكريه ولا مدنيه ولا إخوانيه ؟

وده بيقول كنت بهزر

مسيحين مش طايقين سلفيين

ومسلمين متربصين لمسيحين

وده بيقول كنت بهزر

دم شهداء بينادى وإعلام غير حيادى

وده بيقول كنت بهزر

إقتصاد بعافيه والحاجه بتغلا

وده بيقول كنت بهزر

مشير بيرد المجاملات والشعب عايزها محاكمات

وده بيقول كنت بهزر

إعتصامات وإحتجاجات وبيات

وده بيقول كنت بهزر

ناس بتهاتى ورئيس وزراء مطيباتى

وده بيقول كنت بهزر

شرطه عايزه إباده

ووزير داخليه كالعاده

وده بيقول كنت بهزر

سلوكيات غلط وناس لبط

وده بيقول كنت بهزر

فلول عايزه الوقيعه ومجلس عسكرى سميعه

وده بيقول كنت بهزر

مئويه ملهاش لازمه ومليونيه تعمل أزمه

وده بيقول كنت بهزر

وقفه احتجاجيه لا ترقى لمرتبة ثوره ثانيه

وأجندات وإئتلافات وأحزاب فانيه

وده بيقول كنت بهزر

ياريت الناس تبطل هزار وتتكلم جد شويه وإلا كل واحد يخليه فى مجاله ومايتكلمشى فى السياسه

ورجل الدين يهتم بالدين وتعاليمه وبغزوة أحد والخندق بدل مايهتم بغزوة الصناديق ويرحم الدين من تلويثه بالسياسه

 ورجل الأعمال يهتم بالأعمال وبموبنيل سرقت كام النهارده بدل مايطلع فى الإعلام مره يسب بالدين  ومره يسخر منه

الست دى بتقول كلام تحفه

معقوله أنا فى لجنه بدلى بصوتى عشان حاجه تخص مصر؟؟

 

  

 روحت النهارده اللجنه عشان أدلى بصوتى لقيت طابور الرجاله فيه تقريبا 70 واحد وطابور الستات فيه 4 شكرت ربنا الأول إنى بنت ودخلت سلمت البطاقه وأخدت الورقه وقريتها كويس على أمل إنى أغير رأى برضه ماقتنعتش وصوتت باللى أملاه عليا العقل والمنطق وعلمت فوق الصندوق مش وراء الستاره عشان كان فى حد تانى ورا الستاره وده إستفز شاب من الواقفين وسألهم:

ليه بتخلوا الناس تعلم فوق الصندوق مش ورا الستاره ؟

وطبعا أنا قدرت كويس إن الناس إستوت من الغش وزهقت من أى إحتماليه للإستهبال وعشان كده طنشت وخرجت ومش هاممنى النتيجه تطلع بالعكس

أنا روحت وقلت نعم وأنا عندى إحساس كبير إن النتيجه هاتكون لأ  وده عشان نعم منطقيه أكتر وكمان ماتعودتش أبقى مع الرايجه 

لكن اللى هاممنى انى مبسوطه جدا بالتجربه وفرحانه اوى مش مصدقه نفسى إنى فى لجنه وبقول صوتى عشان حاجه تخص مصر

وإن صوتى هايكون له قيمه بجد مصر بتتغير

أنا متأكده إن مهما كانت النتيجه ربنا أكيد هايقف جنب مصر وهايحميها يعنى لاخوف من حزب ولا إخوان ولا ريس ولا برلمان أى حاجه مش هاتعجبنا بعد كده مش هانسكت والكل فاهم كده كويس وعاملنا ألف حساب أى كان اللى هايحصل فهو خير أن شاء الله 

ملحوظه : الجو الوطنى ده مامنعنيش إنى أعمل كارثه من كوارثى المعتاده وأبهدل نفسى بالحبر ولا منع شاب من اللى واقفين فى الطابور عشان يصوتوا يقولى : المزز بتصوت وإحنا معاهم هى دى مصر:))))

فودافون وموبينيل وإتصالات

شركات المحمول التلاته اللى موقفوش جنب الشعب المصرى وقت ثورته كان لازم مايكونوش عبد المأمور ويقطعوا الإتصالات ,أكيد فى واحد فى ميدان التحرير أو فى أى مكان فى مصر كان محتاج إسعاف ومات عشان مافيش حد قدر يكلم له الإسعاف وأكيد كان فى واحده أهلها عايزين يطمنوا عليها ومش عارفين يكلموها , أعتقد إن دى أقل حاجه ممكن نقدمها للشهداء بقالى فتره عايزه أعمل الإيفنت ده لكن ماكنش فى فرصه لكن لما لقيت نواره نجم كاتبه فى مدونتها الاقتراح ده:

http://tahyyes.blogspot.com/2011/03/18.html

دعمته انا كمان بإيفنت وده اللينك بتاعه :

.
http://www.facebook.com/event.php?eid=206606509349397&index=1 

 وده طبعا عشان يبقى فى نفس اليوم عشان الشركات تخسر أكتر على الأقل هما هايخسروا فلوس لكن إحنا خسرنا أرواح .

والله يرحم شهدائنا

تعديل ولا تغير؟

 

طب إيه الحل أروح يوم السبت أقول نعم ولا لأ على التعديلات؟

انا بجد مش عارفه حاسه ان متقدملى عريس ومستنى ردى اقول نعم ولا لأ نفسى اقول لا عملا بمبدأ :

(طالما إتأندلت خليها بقى متأندله شويه لحد ماتتعدل صح) 

لكن حاسه ان الجيش جاب اخره و احنا  كمان عايزين استقرار بأه

وعايزه اقول نعم بس خايفه من البرلمان والريس يستهبلوا فى الدستور الجديد ماهو مابنى على باطل فهو باطل وساعتها الدنيا هاتولع  لو قالوا حاجه فى الدستور واعترض عليها الشعب وعمل مظاهره والجيش ينزل تانى يخلص  طب ماهو كده كده موجود خلينا نعمله دلوقتى وخلاص والجيش يفضل معانا شويه لحد مانخلص مش عارفه قرفانين ليه على الأقل مش بيحاربوا

بس احنا كده نبقى مش مشيين بالترتيب المنطقى طب ايه الحل ينفع نقول نعم بس على شرط ان البرلمان والريس اللى هايعملوا الدستور مايرشحوش نفسهم تانى عشان نضمن يكونوا حيادين ومايعملوش دستور يخدم مصالحهم ؟
ولكن عشان 1- لقيت المجلس الأعلى للقوات المسلحه بيقول الأتى:
* ولــذا فقد تم إضــافة فقرة لهذه المادة تنظم حكما عاما يعالج أمر الاحتياج إلي تغيير دستوري بطريق سلمي حال الرغبة الشعبية في ذلك كما تضمن التعديل إضافة المادة 189 مكرراً والمادة 189 مكررا (1) ويتضمنان وجوب قيام كــــل من رئيس الجمهورية وأعضـــــاء مجلسي الشعب والشورى بانتخاب جمعية تأسيسية من 100 عضو خلال 6 أشهر علي أن تقوم الجمعية التــأسيسية بإعداد مشروع دستور جديد خلال الستة أشهر التالية ثم عرض مشروع الدستور علي الشعب خلال خمسة عشر يوماً من إعداده للاستفتاء عليه*

2-عشان ماينفعشى نقول نعم او لا بس بشرط.
3-عشان مش هانقع فى بير فى كل الأحوال.
4- عشان بميل للإستقرار .
5-عشان نعمل دستور جديد براحتنا من غير اى ضغوط من أى نوع.
هاقول 

بس المهم نفضل مصحصحين للجاى عشان أى حركة غدر ميدان التحرير موجود

مصر كيك

مصر وفسادها يذكرونى بقالب كيك  شديد اللذاذه ولكن أعلاه فاسد ولكى نستمتع به كان لابد من إزاله الجزء الفاسد أولا لكى نصل الى الجزء الناضج ولكن بعد إزالة الجزء الفاسد وجدنا شريحه أخرى فاسده وبعد إزالتها وجدنا شريحه أسفلها فاسده ونحن الأن مستمرين فى قطع الشرائح الفاسده واحده تلو الأخرى ولكن

إلى أين سنصل ؟؟؟؟

ومتى سنتوقف؟؟؟؟

أم إننا سنظل نقطع حتى ينتهى قالب الكيك ؟؟؟؟

كل يوم يمر بعد تنحى مبارك نكتشف شريحه أخرى من الفساد حتى وصلنا إلى أشخاص لم يكونوا بحساباتنا ولم نكن نتخيلهم وشريحه أخرى ليست فاسده ولكنها متحوله ومتغيرة المواقف وللأسف أشخاص  كانوا محط إحترام منى ومن غيرى, كانوا يصفقون للسلطه فى الماضى وبعدما (الدبيحه وقعت) طلبوا السكين ,أحترم من يصفق للسلطه ويستمر فى التصفيق للنهايه وأحترم من يبغض السلطه ويعبر عن بغضه للنهايه ولكنى لا أحترم من كان يصفق للسلطه فى الماضى ويطلب ودها وبعدما إنهارت طلب طعنها.

وفى النهايه أتمنى ألا نظل نقطع الشرائح الفاسده حتى ينتهى قالب الكيك.

لأ لازم إرهاب الدوله يتحل

لسه متأثره بكمية فبديوهات ووثائق ومدونات وحاجات كتيييييييييييييييير  عن أمن الدوله ده كفايه اللى عملوا الأهالى فيهم ده دليل على إن الناس كانت بتكرههم جدا أنا بجد مش قادره أصدق اللى شفته واللى سمعته

لما شفت برنامج بلدنا وسمعت علاء الاسوانى بيقول يتحل والفريق شفيق بيقول لا مايتحلش بس نعيد هيكلته إقتنعت بالفكره جدا وقلت :

(طبعا لازم نعيد هيكلته لكن مش نلغيه ... وايه ده هو إحنا بنستسهل دايما حابين نلغى بدل مانصلح )

لأ دا إحنا نلغى ونلغى ونلغى من هنا للسنه الجايه مش ممكن دول يكونوا بنى أدميين طبيعين صحيح عندنا فى مجال علم النفس كتب مخصوصه عن ظباط الشرطه وسيكلوجيتهم لكن ماكنتش فاكره إنهم للدرجه دى مش طبيعين وساديين وعشان نعيد هيكلة أمن الدوله وظيفيا سهل جدا إنما الكارثه بقى إنهم يعيدوا هيكلته نفسيا دى ناس إتعودت على القتل والتعذيب وإثارة الفضايح وتلفيق التهم وهتك الأعراض والتجسس  والترويع والسفاله وقلة الأدب  وفعل كل ماهو مقزز فى الدنيا دول للأسف تربية النظام القديم ومش ممكن هانحييهم معاه وفى نفس الوقت مش لاقيه فى شغلهم حاجه محترمه أقول معلشى نخليهم عشانها  هايخدوا وقت عشان يتربوا من أول وجديد دا لو إتربوا وكمان فى حاجه مهمه جدا الناس ماعملتش حسابها وهى الإنتقام هما أكيد مش هاينسوا اللى الشعب عمله فيهم وهايحاول بعضهم ينتقم وخصوصا إن الإنتقام ماشى سيكلوجيا أوى مع الشخصيات دى يبقى الحل إنهم يعاد تأهيلهم الأول وتظبيطهم نفسيا وبعدين وزارة الداخليه تشوفلها حل فيهم وتوزعهم على المجالات الأخرى اللى تضمن تحجيمهم لكن لو حاولت وزارة الداخليه تعيد هيكلة الجهاز أو حتى تقلص مهامه أو صلاحياته فا من وجهة نظرى كأخصائيه نفسيه (على قدى )مش متفائله بالنتيجه وحاسه إنهم هايبقوا عاملين زى الخلايا  الإرهابيه الغير نشطه ( لفتره معينه ) وبعدها ممكن يتوحشوا أكترمن الاول وكمان الناس نفسها مش هايكونوا طايقين حاجه إسمها أمن دوله

تناقضات ميدان التحرير

تحديث: لكل الناس اللى اتضايقت من جملة الناس بتوع التحرير انا قلت كده مش قصدى اهانه دى جمله عفويه لأنى مش عايزه اصنفهم كشباب لانى شفت بعينى انهم كانوا من جميع فئات الشعب وللمره المليون بسجل احترامى ليهم جدا النقد مش موجه لأشخاص ده موجه لبعض الأفكار اللى مش منطقيه الغرض من ده كله اننا نفضل نحب بعض ونبطل نخون بعض للمره المليون انا مع الثوره من قبل حتى مالثوره تحصل

كل حاجه فى الدنيا فيها مميزات وفيها عيوب قبل الثوره كان فيه مميزات وعيوب وبعد الثوره نفس الحكايه فيها مميزات وفيها عيوب يعنى المميزات ان احنا بنتطلع اننا نكون احسن ولو ان لسه مابقناش احسن ومن العيوب اننا فقدنا الاخلاق واحترام الكبير وللأسف بنسمى ده شرعيه ثوريه كنا دايما ايد واحده دلوقتى انقسمنا وبقى كل واحد رأى وناس مؤيده وناس معارضه وماحدش بيحترم رأى حد وكله مش طايق بعضه

بتوع ميدان التحرير بيتضايقوا اوى من اى حد يعارضهم فى حاجه وشايفين ان رأيهم هو الصح واى رأى مخالف خطأ وبيحجروا على أراء الأخرين وبيتنرفزوا اوى لما حد يقول رأى مخالف ليهم مع إن هما نفسهم رايحين ميدان التحرير عشان يعبروا عن رأيهم  بحريه وعايزين ديمقراطيه  بعد ماعانوا من الديكتاتوريه سنين طويله  ليه بيكونوا ديكتاتورين على الناس هو مش كل واحد حر يا جدعان ؟

كمان نزلوا عشان يدافعوا عن حقوق الناس ومطالبهم ولما الناس فرحت معاهم بتحقيق المطالب دى زعلوا وقالوا كنتم فين من الاول مانتم مانزلتوش الميدان معانا وكأن لازم ال80 مليون ينزلوا الميدان او انهم كانوا عايزين يحققوا مجد شخصى لهم ومش عايزين حد يشاركهم فيه وان ده انتصارهم لوحدهم طب كنتم بتقولوا من الأول ليه بقى انكم بتتكلموا بإسم كل المصريين ؟ كنتوا قصروا وقولوا انكم بتتكلموا بإسم نفسكم ؟ مستكترين الفرحه علينا ليه ؟هو مش كلنا مصريين ؟

كمان بتزعلوا اوى ان حد يخون وائل غنيم او اى رمز من رموز الثوره  ده على إعتبار إن الدهولل ده من رموز الثوره وتقولوا هو احنا لازم نخون يا جماعه  وايه دليلكم على كده ؟فى حين ان انتم واقعين فى نظرية المؤامره والتخوين دى لشوشتكم والدليل تخوين 100 فنان وفنانه وقلتم دول قابضين من النظام لمجرد انهم بيعبروا عن رأيهم زى أى حد  ده غير المذيعين والمذيعات اللى انضموا للبلاك ليست مؤخرا واخر ماخونتم هو شفيق لما قلتم بيسمع كلام مبارك وبيدير البلد من خلاله وبرضه مافيش دليل على كده لا حول ولا قوة إلا بالله ماهو مافيش دليل فى الحالتين  دا حتى الجيش حبيبكم شككتم فيه وقلتوا ده حد شاحنه ضدنا لمجرد إن الجيش إتخنق وزهق من عمايلكم وطلعت نواره نجم فى مدونتها تقول امن الدوله غير الجيش علينا وكأن الجيش أهبل بأه

بتزعلوا لو حد قال دول قابضين من الإخوان أو المعارضه أو بياكلوا كنتاكى عشان يفضلوا فى ميدان التحرير وأنتم كمان طول النهار بتتهموا الناس إنهم خاينين وعملاء وقابضين من النظام عشان بيقولوا لكم كفايه كده البلد باظت بقى كل دول قابضين من النظام ؟ده مبارك لو كان وزع فلوسه على كل دول يقبضهم عشان يشتريهم كان زمانه خرج من مصر مفلس

كمان بتقولوا انكم ايد واحده ومطالبكم واحده وبتسخروا من اى حد يقول فى اجندات تانيه  وفى نفسى الوقت نواره نجم تطلع تقول فى مدونتها كان فى ناس فى ميدان التحرير بيهتفوا هتافات غيرنا  وده يدل على إن فى ناس لها حسابات تانيه بلاش أجندات تانيه الكلمه اللى بتنرفزكم دى

انا ضد التعميم إنما فى دى هاعمم عمرى فى حياتى ماتكلمت مع حد فى ميدان الحرير او مؤيد لميدان التحرير إلا ولقيته بيفكر كده كلهم كلامهم واحد وتفكيرهم واحد فى السلبيات والإيجابيات على حد سواء

اذا كنتم عايزين البلد تكون احسن ممكن انما لو عايزين تقتلعوا الفساد من جذوره فا مش هاتقدروا وإلا تعملوا مظاهرات تطلبوا فيها إن الشعب يتنحى قلت ولسه بقول لازم نظبط من تحت زى فوق وربنا يهدى

ورحل شفيق وهو الكسبان

  

رحل شفيق, رحل الرجل الصح فى التوقيت الخطأ كل ذنبه إن مبارك إختاره وحلف اليمين قدامه مع إن المجلس الأعلى للقوات المسلحه كله حلف اليمين قدام مبارك وأولهم طنطاوى اللى أعتقد إنه له نصيب الأسد من الفساد وكمان اللى جه بعد شفيق اكيد برضه حلف اليمين قدام مبارك

رحل شفيق وهو الكسبان لأنه مش هايريح أعصابه ومش هايكون مضطر يحكم فراعين زينا مش عاجبهم العجب ولا الصيام  فى رجب والتاريخ بينا هايحكم باللى ليه واللى عليه

حسيت بالإشمئزاز من علاء الاسوانى واسلوبه فى الحوار مع الفريق شفيق رجل فى منتهى قلة الذوق واسلوبه فى الحوار غلب اسلوب سائقى الميكروباصات وحتى ماعملشى حساب لفرق السن وكمان فى حديثهم عن أمن الدوله ناقد نفسه يعنى فى الأول طلب إالغاء أمن الدوله ولما شفيق قاله ممكن نغير مهامه ونحددها ونعيد تشكيله أسلوبه من غير ما نغيره  لكن لازم يبقى موجود وقال ان كل الدول المتقدمه فيها امن الدوله قام الاسوانى قاله بس الدول دى( مافيهاش تعذيب ) سبحان الله ماهى مافيهاش تعذيب دى يبقى احنا بنتكلم فى اسلوب وليس مبدأ و ده الأسلوب اللى عايز يغيره شفيق ولا إحنا بنستسهل نلغى عن إننا نصلح ؟ 

ثم إيه عقدة النقص اللى عنده دى لما يسرى فوده قال هانكمل كلام بعد كده لو وقت سيادة الفريق يسمح يقوم يرد الاستاذ المحترم ويقول ولو وقتى انا كمان يسمح يا سلاااااااام ايه الغل ده بالذمه دا بنى ادم بيثق فى نفسه ؟ ولا دى طريقة حوار؟

دا كوم والاستاذ حمدى قنديل دا كوم تاااااانى خالص الاستاذ ساب كلام احمد شفيق اللى يخص اجتماع وزير الداخليه مع شباب من الثوره فى فندق الفورسيزون  ساب كل ده ومسك فى كلمه الفورسيزون وقاله  مش كان لازم يقعدوا فى ميدان التحرير ؟ايه التفاهه دى ؟يعنى يسيب المهم ويمسك فى الهايفه ؟ 

 لكل الناس اللى شايفه إنه الأنا عنده عاليه ومغرور :هو مش محتاج لأنه إبن ناس وراقى ومحترم واللى اضطره إنه يتكلم عن إنجازاته واحد مستفز جدا زى علاء الأسوانى لما تقريبا اهانه وقاله انه يعيش فى جلباب حسنى مبارك 

لكل الناس اللى شايفه إن الفريق شفيق مش بيعرف يدير حوار خلينا نستنى لما نشوف اللى بيعرف يدير الحوار  ويتكلم كويس هايعملنا إيه  وكمان ضباط الجيش دايما طبيعتهم كده بيعملوا اكتر مابيتكلموا ولا يجيدوا إدارة الحوار ومش معنى كده إنهم فاشلين بالعكس دى أكثر فئه بتعمل زى مابيقول الكتاب وده طبعا بصرف النظر عن فساد النظام القديم وكمان هو قاعد مع واحد روائى بيعرف يعبر كويس ويتكلم كتير ويعيش فى الدور كمان

ولكل الناس اللى شايفه إنه فاسد بقولهم إيه دليلكم على كده ؟  المنطق يقول إنه لو كان فاسد كان زمانه بقى رئيس وزراء من زمان ده طبعا حسب مقاييس النظام القديم  بالعكس ده مبارك عينه  فى وقت كان عايز يكسب فيه الشعب عشان يقدر يمشى بكرامته بعد إنتهاء مدة رئاسته  أو عشان يلحق يهرب فلوسه زى مالبعض بيقول وعلى كل حال خلينا نشوف الملاك اللى بجناحين اللى مش هايغلط غلطه اللى هايجى بعديه هايعمل إيه ؟

لكل الناس اللى شايفه إن شفيق بياخد أوامر من مبارك شفتوه بعينكم ؟ أو سمعتوه بودانكم ؟

لكل الناس اللى شايفه إن وحش لأنه بيقول الريس حسنى مبارك بدل مايقول الريس المخلوع بقى دى أخلاق يا بشر يعنى الرجل هو اللى معينه بعد مايمشى يقول الريس المخلوع او يشتم فيه ؟هى دى أخلاق ؟ وحتى لو كان عمل كده وشتم فيه كنتوا هاتقولوا عليه واطى وعديم الأخلاق لأنه ماطمرشى فيه اللى مبارك عمله معاه يبقى هايعمل فينا إيه ؟مش كده مش هو ده اللى كنتم هاتقولوه؟ يعنى هو لازم الرجل يقل أدبه عشان يكون إنسان كويس ويقول على مبارك ابن الكلب فلان الفلانى عشان يعجبكم يا ناس اتقوا الله

 عموما قلتها وبقولها تانى هو الكسبان