التحليل النفساوى لمرشحين الرئاسه

 أفتح الفيس بوك ألاقى فيديو بعنوان 

(الأماره النفسيه لمرشحين الرئاسه ) 

وبالرغم من إنى عمرى ماسمعت عن مصطلح الأماره النفسيه ده غير فى حوش أم تيتى 

ولكن قلت أتفرج عليه لأن دايما بيجيلى هيستريا فضول لأى حاجه فيها الأربع حروف دول :

(ن, ف , س , ي ,ة) 

 لقيت الطبيبه النفسيه  منال عمر متشنجه كعادتها وبتتكلم بجميع أجزاء جسدها وقال إيه بتحلل مرشحين الرئاسه نفسيا !!!!

ضحكت و قلت وماله خلينا نسمع بتقول إيه

 أفوجىء ألاقى ان الست منال بتفلتر مرشحين الرئاسه على مزاجها وبتسرد جميع مميزات اللى عجبوها وبتسرد جميع عيوب ومساوىء اللى ماجوش على مزاجها وده طبعا بعيد تماما عن الحياديه وحيادية التحليل النفسى بالذات ده طبعا لو سمينا ده تحليل نفسى

قلت أطنش خااااااالص 

ودخلت على صفحه تانيه لقيت العنوان ده:

 (التحليل النفسى لمرشحين الرئاسه عن طريق ملامح الوجه ) 

 قعدت أقول هو ده محكنا فى إختيار رئيس الجمهوريه ؟؟؟؟

طب هو المفروض أتراجع عن دعمى لأبو الفتوح لما أكتشف إنه إخوان ولا أتراجع عن دعمه لمجرد إن مناخيره مش عاجبه البيه ؟؟؟؟!!!!

ومع ذلك قلت أطنش خااااااااااالص

ودخلت على بوست تانى لقيت الصوره دى:

 

واللذيذ إنه قايل كلام عكس اللى قالته الدكتور منال تماما فيما معناه انه حلو وعسول !!!!

 طيب مش المفروض إن نتيجة التحليل تكون واحده فى أى معمل؟؟

 ولا ممكن واحد يطلع عنده السكرفى معمل ويطلع ماعندوش السكر فى معمل تانى؟؟!!

 لأ مش ممكن بقى!!!!

 هو إيه حكاية موضة التحليل النفسى للمرشحين الرئاسه ده ؟؟؟
اللى أعرفه ان التحليل النفسى نوع من العلاج بياخد من 1 الى 3 سنين بواقع 5 جلسات اسبوعيا وكل جلسه 45 دقيقه 

عشان بعد كده اطلع اقول بقلب جامد 

(أنا حللت فلان نفسيا )  

 و كمان ماينفعشى أطلع اقول انا حللته لأن اخلاقيات المهنه تمنع ان اى معالج أو طبيب يفشى اسرار التحليل ده
هل ده معناه ان شفيق وموسى وحمدين وابو الفتوح وسليمان والإخوان سابوا أشغالهم وخضعوا لجلسات تحليل لمدة سنه بواقع خمس جلسات أسبوعيا وكل جلسه 45 دقيقه؟؟؟!!!

وهل ده كمان معناه انهم اعطوا موافقه كتابيه للدكتوره عشان تقول تحليلهم النفسى قدام مصر كلها ؟؟؟!!!

 دى كلها مجرد أراء شخصيه وإسقاطات ياتصيب يا تخيب ومش ممكن يكون محكى فى إختيار الرئيس هو مجرد أراء حد تانى ولاترقى لمرتبة العلم 

 وطبعا من حق كل واحد يقول رأيه لكن ماينفعشى تكون تحت مسمى

 (التحليل النفسى)

 لأن زى مافى ناس بتصدق انهم هايدخلوا الجنه لو انتخبوا ابو اسماعيل

 وزى مافى ناس بتصدق انهم قالوا نعم فى التعديلات الدستوريه للدين
برضه فى ناس بتصدق ان كل الفلول شياطين لمجرد انهم ماجوش على مزاج الست منال عمر الثوريه ولن اقول طبيبه نفسيه لانها المفروض تكون حياديه وتتقبل كل الأراء والشخصيات بفلولها بإخوانها بثوارها 

سنحيا كدابين

عجبا لفضيلة الشيخ اللى راح وجه وإتطلع وشجب

 ولهث على كرسى الرئاسه بما فيه الكفايه 

والغريبه إنه عارف ومتأكد إنه أمه رحمها الله أمريكيه 

 طب نعملك ايه تانى يعنى ؟؟

فى حد يقول (أعتقد) إنها مش أمريكيه ؟؟؟

ماهى أعتقد دى معناها انك كداب

 هو من المفترض ان أى شخص مايعرفشى جنسية أمه ايه ؟؟؟

أو مثلا لو كانت طلبت الجنسيه فعلا وهى مريضه عشان تتعالج فى امريكا مش المفروض ان ابنها زى ماهايكون عنده فكره عن مرضها يبقى برضه عنده خبره بالأحداث اللى حصلت أثناء مرضها ؟

 بما فيهم الحصول على الجنسيه ؟؟؟ 

  وثانى كدبه بعد ما إتأكد إنها أمريكيه وقال 

(اصلى ماكنتش اعرف انها امريكيه)!!!!

  يبقى لو فرضنا انه مايعرفشى يبقى ابن عاق ومايعرفشى حاجه عنها

 هو مش الكدب حرام برضه يا فضيلة الشيخ زى المكياج اللى هاتحطه على رأس إهتماماتك لما تبقى الريس وتمنعه على اعتبار ان مشاكلنا الاقتصاديه خلصت وبقينا فى رفاهيه ؟

وانصاره عمرهم سألوا نفسهم هو شيخنا كداب أو لأ قبل مايدعموه؟؟

ولا حضروا العفريت ومش عارفين يصرفوه

 يعنى بعد مافضيلة الشيخ ايقظ الفتنه وسخن الناس وماهمهوش مصلحة البلد والامتثال للقانون الترشح وعاش فى نظرية المؤامره الوهميه عليه

 طلع كدااااااااااااااااب

 وانصاره عرفوا انه كداب 

ساعات بيتهيألى إنهم مش عارفين يتراجعوا عن دعمه ازاى

 فا النتيجه انهم مكملين عشان مايبقاش شكلهم وحش :)

مش دول بتوع قال الله وقال الرسول ؟ 

مش السلفيين اكتر ناس بيتبعوا سنة نبينا محمد عليه الصلاة والسلام انا بقى عمرى ماسمعت ان نبى الله محمد كان بيكدب أو بيلهث وراء كرسى رئاسه او عمل عملية تجميل فى مناخيره ؟؟

ثم يقصد بإيه إن دى مؤامره مدبره ضده ؟؟

على اساس ان المتأمرين دول هما اللى اقنعوا أمه من 8 سنين تاخد الجنسيه الأمريكيه عشان كانوا بيشموا على ضهر إيديهم إنه هاييجى يوم أسود والشيخ يرشح نفسه ؟؟؟؟

عرفتوا ليه مش عايزين ندخل الدين فى السياسه ؟ ولا لسه ؟

أفيقوا يرحمكم الله يا من تحملون شعار الدين ولا تتبعون تعاليمه

هلاوس ليليه 5

قلتها ولازالت بقولها الجواز مالوش مقاييس اطلاقا 

يعنى اذا كان لكل قاعده شواذ فايبقى الجواز هو مجموعة الشواذ دى وليس القاعده صعب اوى نقول لو عملنا كده او فكرنا كده يبقى اكيد هنختار صح 

وكمان مش منطقى نفضل ندى رأينا فى حياة غيرنا طول الوقت

 ونقول هو اللى غلطان او هى اللى غلطانه لانى مؤمنه بإن الباب المقفول على هى وهو دول صعب نعرف وراه ايه او تحكم مين غلطان ومين لأ  

 ولكن اللى متأكده منه جدا ان مش مشكله ابدا واحنا بنختار نختار على اساس مستوى اجتماعى جيد او مستوى مادى جيد او حتى نختار على اساس الحب ومش مشكله ابدا تلاقى واحد حلو متجوز واحده مش حلوه خالص او واحده حلوه متجوزه راجل معاق مثلا 

او نقول بثقه  انه طالما الاتنين دول بيحبوا بعض يبقوا اكيد هاتكون حياتهم سعيده وبعدين نستغرب لما نلاقيهم انفصلوا

 او نجزم بإن فى جوازه معينه اكيد هاتفشل لمجرد إن الست مثلا أكبر سنا من الرجل

 للأسف فى الجواز مافيش ضمانات لأى حاجه وفى الأخر اللى بيحقق السعاده فى الجواز هو نفس الشىء اللى بيحقق السعاده فى أى حاجه تانيه هو

( الرضا ) 

تلك الكلمه السحريه اللى لو دلت على شىء تدل على منتهى السكينه

 وهو ده الشىء اللى بيخلى الرجل الحلو مبسوط وهو متجوز واحده مش حلوه وكمان شايفها أحلى ست فى الدنيا 

وهو اللى بيخلى البنت الحلوه مش حاسه بنقص وهى ماشيه جنب الرجل المعاق وشايفاه كامل الرجوله 

 وهو اللى بيخلى المطلقه تبدأ حياتها من جديد 

وبيخلى الأرمله ماتتجوزشى بعد موت جوزها وتفضل تربى ولادها حتى ولو سنها صغير

 وهو اللى بيخلى البنت اللى إتأخرت فى الجواز (وما أكثرهن الأن) تعيش حياتها فى سكينه وطمأنينه على اعتبار ان قعادة الخزانه ولا جواز الندامه وهى مقتعه ان وضعها كده احسن بكتير

عشان كده أهم حاجه مش إننا نحب أو نتجوز بتفكير أو إحساس ولكن 

 إننا نكون راضيين ولكن الرضا ده شىء مش بكتسبه من الحياه ويصبح عاده للأسف ولكن لازم يكون موجود أصلا جوانا ومانبذلشى مجهود فى الحصول عليه وعشان كده 
يا بخت الراضيين

رئيس مصر القادم

بالرغم من إن عدد المرشحين للرئاسه فى اللمون وفى ناس كتير بتنتقد ده!!

 وناس شايفه إن المنصب فقد هيبته (زى الشرطه كده):) 

 وناس شايفه إنها حاجه تستدعى السخريه!!

وناس بتقول ياحسره على اللى مصر وصلت له!! 
وكأن مصر فى محنه إن فيها إنتخابات رئاسه

(معلشى أصلهم مش متعودين على كده)

 وإنما أنا شايفاها حاجه طبيعيه جدا

 دلوقتى فى رئيس تنحى عن الحكم بسبب ثوره ومطلب شعبى

 والعادى إن ييجى رئيس غيره وبما إننا فى بلد (المفروض) إنها ديمقراطيه

 يبقى لازم ييجى رئيس بالإنتخاب

 ولازم ناس ترشح نفسها 

وباب الترشيح يكون مفتوح لكل من تنطبق عليه المواصفات للترشح

 وفى الأخر الحكم هايكون ل( ص) أو( ص ) كالأتى :

الصندوق أو الصفقه

بمعنى 

 أولا : الصندوق لو مشى بما يرضى الله أتوقع أنه يتحسم للرجل ده

 لأنه بالمنطق لو حطينا عدد أصوات الناس اللى كانوا مرشحينه من الأول واللى أكيد ماغيروش رأيهم فيه لأنه مواقفه غير متغيره + عدد أصوات مؤيدين البرادعى اللى كانوا حاطين أبو الفتوح رغبه تانيه وبعد مالبرادعى خلع يبقى منطقى إنهم يختاروه  + عدد أصوات الناس اللى تعاطفت معاه بعد الإعتداء عليه بغض النظر

 (هو كان بعلمه أو لأ) + عدد أصوات بعض الإخوان اللى هايدعموه لأنه إخوانى بفكره + عدد أصوات الناس اللى شايفه إنه لا غبار عليه فعلا ويستاهل إنتخابه 

بعد مانجمع كل دول أعتقد إنه ينجح 

 ثانيا : الصفقه 

ولو كان للصفقه  المزعومه بين العسكر والإخوان واللى اتوقع برضه إنها منطقيه نوعا ما أتوقع يتحسم لحد من الإتنين دول

لأن العوا علاقته جيده بكل من المجلس والإخوان

 ولأن شفيق علاقته كويسه بكل الطرفين زائد إنه شخص جيد لتظبيط المجلس العسكرى بغض النظر عن إنه كان حريص جدا إنه مايبصش فى عين عمرو أديب لما سأله إذا كان الإخوان هايدعموه فى الإنتخابات أو لأ وكان بيجاوب وهو بيبص فى الورقه اللى فيها برنامجه الإنتخابى 

ودى أكيد حاجه غريبه وهايبان سببها عاجلا أو أجلا

أو الأخ ده 

وده لنفس السبب إنه على علاقه جيده بالمجلس العسكرى

ثالثا: للصندوق والصفقه معا

الإتنين يدعموا بعض بمعنى دعم كلا من المجلس والإخوان ويتحسم برضه لأبو الفتوح وده معناه و(إن كنت أستبعده) إن يكون أبو الفتوح فعلا بيصيع وهو على وفاق مع الإخوان وزى السمن على العسل مع المجلس ومتفقين على الشو ده قدام الرأى العام عشان الشعب يتعاطف مع أبو الفتوح أكتر وينتخبه وببعدين ييجى أبو الفتوح يظبط المجلس العسكرى ويضمن له الخروج الاّمن حسب ماتمليه الصفقه وأكيد برضه الصندوق هايكون له دور كبير جدا لأن زى ماقلت فى الأول فى ناس هاتنتخب أبو الفتوح من غير صفقه ولا يحزنون وإن كنت أستبعد صفة الغش والطرمخه عن أبو الفتوح 

أما بالنسبه لكل الإخوه الباقيين زى عمرو موسى وابو اسماعيل وصباحى وغيرهم  أتوقع إنه لن ينجح أحد 

أما بالنسبه للسواد الأعظم من المرشحين اللى ماحدش يعرف عنهم حاجه والغوغاء وعامة الشعب كتير منهم متأكدين إنهم مش هايكسبوا قدام الفطاحل اللى ذكرتهم فوق ولكن مترشحين بس عشان بس كل واحد منهم يقول

  (كنت مترشح لرئاسة الجمهوريه )

 الفشخره المصريه العاديه

(إنت أكيد أكيد فى مصر)
وفى الأخر دى كلها توقعات يا تصيب يا تخيب 

هلاوس ليليه (4)

شيكولاته ساخنه فى إحدى ليالى الشتاء

 

وقفت أمام النافذه أحتسى مشروب الشيكولاته الساخنه  

 وأتأمل الأمطاروهى تهطل بشده وتصطدم بأفكارى وذكرياتى المبعثره  

أحيانا كثيره أندم على عملى بهذه المهنه لأنها هدمت الحاجز الغير مرئى بينى وبين الأخرين وجعلتنى أكتشف ما أنا فى غنى عن إكتشافه فى البشر

 لازالت أؤكد أن من راقب الناس مات جنونا وليس هما

 أحيانا كثيره أكاد أصرخ في من حولى عندما ينعتوا شخص بما ليس فيه

عكفت على ملاحظة من حولى وتكوين أفكار وتصورات عنهم 

وأراهن نفسى على صحة ما إكتشفته 

تاره اخطأ وعشره أصيب وأحيانا أتمنى لو كنت مخطئه  

أشعر أحيانا أن لا وجود للسعادة المطلقه على وجه الأرض 

وإننا عندما نقول نحن سعداء نكون فى الواقع قد إخترنا أقل التعاستين

عندما تمتد أيدى الحاقدين لى  بالأذى لا يثير حزنى مافعلوه بقدر مايثير حزنى وجود  مثل هؤلاء فى الكون

أخفقت فى ملاحظة مابداخل الأشخاص القريبين منى وإمكانية التنبؤ بمايضمرونه لى من جيد أو ردىء وذلك لإنشغالى بملاحظة ما بداخل من هم بعيدين ولذلك ما أكثر طعنات القريبين فى حياتى  

تنويه

اصدقائى المدونين

لقد تم عمل صفحه للمدونه على الفيس وذلك لسهولة التواصل مع عامة الشعب 
إضغط هنا :)

like &share&enjoy:)

أحمق عاشقه

 

أعشقك كما لو كان قد خلق العشق بإسمك

لم تشتاق كل ذره من جسدى لإنسان كما تشتاق إليك

أستيقظ كل صباح على حرارة أنفاسك تلامس عنقى

وأخلد إلى النوم كل ليل برفقة همساتك تداعب أذنى

تلازمنى عباراتك وترافقنى لفتاتك وتبسمنى دعاباتك

أنظر بعينيك وأتنفس بنبضاتك

شرايينك تسير فى أوردتى

ودموعك تتساقط على وجهى

وألمك يعتصرنى

أتلهف لإحتضانك ولكنى أخاف أن أطيل إحتضانى بك فتمل منى

أعشق إبتسامتك عندما ترسم خطوط رفيعه بجانب عيناك

أعشق تعبيرات وجهك عندما تكون ممزقه بين اللهفه والرغبه فى العراك

أعشق نظراتك عندما تملؤها الرغبه فى تقبيلى 

أعرف جيدا إنك لن ترثى لحالى ولكنك سوف تزداد غرورا بأقوالى

حقا ماأحمقك

ومأحمقنى أكثر منك لاننى أعشقك

أستيقظ كل صباح وأدعوالله أن يرحمنى من لعنة حبك

أكرهك كما لم لو خلق المقت لك

لم أكن ساخطه على إنسان إلى عليك

أكره يدى التى تشتاق للمس وجهك

أكره جبينى الذى يشتاق للمس شفتاك

أكره شفتاى التى تشتاق للنطق بإسمك

لاأستطيع العيش ممزقه بين عشقى لك وجرحى منك

لا تتعجب منى

لم أفقد عقلى ولكننى فقط

 من صنعك

احنا مش اسفين يا شرطه

مش انتوا اللى كسرتوا نفس الشرطه ؟

 مش انتوا اللى بهدلتوا الشرطه ؟

 مش انتوا اللى ضيعتوا هيبة الدوله؟

 الشرطه نفسيتها تعبانه 

 أمن الدوله إتفكك وخلاص مابقاش بيتنبأ بالحدث قبل مايحصل

الشرطه غضبانه من الشعب ولمت هدومها وراحت عند أمها ومش هاترجع الا لماالشعب يصالحها ؟

دى بعض الجمل اللى بتتقال كل ماتحصل مصيبه فى البلد سببها الإنفلات الامنى واللى فى نظرى هى نوع من انواع السخف والاستهبال من( بعض )الناس 

وقلة ضمير من( بعض) رجال الشرطه

اللى بيقولوا ضيعتوا هيبة الدوله بقولكم هى إيه حكاية هيبة الدوله دى اللى  من ساعة ماقامت الثوره متمرمطه مابين مبارك والشرطه؟

 مع إن الاتنين اسوأ من بعض

 إزاى تختذلوا هيبة الدوله فى شخص فرد او مؤسسه ؟

 ثم إن هيبة الدوله لا تسقط بإسقاط الساقطين اساسا

ثم ليه ماقلتوش ان هيبة الدوله سقطت لما بناتنا إتعروا مرتين

 مره عشان نتأكد من عذريتهم ومره واحنا بنسحلهم

 مع إننا دوله اسلاميه ومسيحيه صعيديه عارفين قيمة الشرف والعرض وعارفين انه لما بيضيع بيضيع هيبة الشنبات اللى وراه

وبالنسبه لأمن الدوله

 أمن دولة ايه اللى اتفكك ؟ 

ماهو هو هو تحت مسمى الامن الوطنى

 ومن المفترض انه بيمارس وظيفته العاديه ولا هو مايعرفشى يمارسها غير لما تكون مغلفه بوسائل التعذيب عشان الظابط يحس انه فى جو نفسى لطيف ويقدر يشتغل ؟

مايشوف هو كان بيحصل على المعلومه ازى قبل الثوره ويحصل عليها دلوقتى 

مش أمن الدوله شغلته يحافظ على النظام ؟

ولا هو بيحمى الانظمه الفاسده بس ؟

 وكل شويه واحد يطلع يقول مش انتوا اللى بهدلتوا الشرطه ؟

وعشان كده الامن المركزى مش بيتدخل( زى احداث بورسعيد)

  اصله لو اتدخل هاتقولوا الشرطه بتضرب

افندم ؟

 ليه ؟

 هو احنا قاعدين فى حوش ام تيتى ؟ 

ولا واقفين فى خناقه ؟

 والامن المركزى خايف يتدخل تحت بند ماينوب المخلص اللى تقطيع هدومه ؟

 دى دوله وفيها قوانين يا ساده والمفروض ان يكون الامن المركزى مدرب على تأمين الماتشات ويكون عارف يعمل ايه فى الظروف اللى زى دى مهما حصل

 حتى لو على حساب حياته هو مش احسن من اللى راحوا

 ثم هو مش شايل حياته على كفه ؟

ازاى بيقف بمنتهى الجبن يتفرج ؟ ولا واخد اوامر انه يتفرج؟

وايه حكاية كسرتوا نفس الشرطه؟

 الظباط نفسيته تعبانه؟

يتعالجوا نفسيا

الامن المركزى غير مؤهل نفسيا ؟

نأهله

فى لواءات فعلا بينفذوا اوامر العادلى لحد دلوقتى ؟

يتحاكموا

 الداخليه كلها مش عايزه تشتغل ؟

خلاص تمشى ونخرج من كلية الشرطه على نضيف 

انما الوضع الامنى البشع ده مستحيل يستمر

 ان احنا نوصل لمرحله ان ممكن اى حد ينضرب عليه رصاص فى الشارع وكأننا فى شيكاغو دى كارثه بكل المقايييس

ولما نشتكى الناس تقول مش انتوا اللى كسرتوا نفس الشرطه ؟

 !!!!

انا عارفه ان الشرطه والشعب الاتنين ضحية نظام فاسد ركب دول فوق دول

 عن طريق التطبيقات الخاطئه للقوانين

والشرطه دلوقتى بتجنى ثمار اللى عملته وبتدفع تمنه من انتقام الشعب منها وفش غل السنين فيها 

انا عارفه انه صعب ان الواحد يشتغل فى ظل الظروف دى وعارفه ان الشعب ماعندوش وسط يا اما يرضى ينضرب على قفاه من غير سبب يا اما يضرب الظابط على قفاه من غير سبب

ولكن ياحضرة الظابط اتقى الله فى عملك ومتعاقبشى الشعب عشان هو اتهان منك كتير

اتقى الله فى عملك ومهنتك لانها مهنه انسانيه

 توفير الامن للناس ثوابه كبير عند ربنا ولكن المساهمه فى ترويع الامنين بشكل او بأخر اكيد عقابه شديد

وتذكر ان اللى بتعاقبهم دول مش من كوكب تانى هما قرايبك واخواتك وجيرانك واصحابك وممكن حد فيهم يموت ضحية إهمال أوسلبية أوتواطىء ظابط ماعندوش ضمير 

 طب ده دمه فى رقبة مين ؟؟؟

  

عصيان مدنى

مش هاعمل عصيان مدنى بس مش هاقول

لأ له

 مش هاقول بقى عشان الوضع الاقتصادى ومنكوا لله خربتوا البلد ولا حاجه لانها مخروبه أصلا 

ولكن لأن للمره المليون الشعب مش إيد واحده ومش متفق على حاجه 

وانا فى اعتقادى ان ده مهم بل اهم حاجه لازم تحصل

ولو ماحصلتشى مش هانوصل للى احنا عايزينه 

لو بقينا ايد واحده ولا هايقدر علينا 100 مبارك ولا 100 مجلس عسكرى ولا 100 سجين فى طره 

ولكن احنا متفرقين للاسف ومواقفنا متفتته

وعشان كده ضعيفه ومش بتجيب بتكون مؤثره

صحيح انا مش مع العصيان لكن لو كان مجدى وبجد فى مصلحة البلد 

وبقرار من جميع طوائف الشعب

اكيد كنت هاكون جزء منه لكنى للاسف مش متفائله ومش متنبأه بنتيجه جيده

لأن بصرف النظر عن الإستفتاءات المنتشره على الفيس بخصوص العصيان 

واللى أنا نفسى عملت واحد فيها 

واللى كلها بتأكد على إن الأغلبيه مش هاتعمل عصيان

ففى حقيقه مهمه ومنطقيه  جدا

بتقول ايه ؟ 

ان لو جمعنا( الاغلبيه) الصامته (حزب الكنبه +منكوا لله خربتوا البلد+ العباسيه+ بتوع لامؤاخذه الاستقرار  )

+ الفلول(طبعا) 

+ الاخوان والسلفيين( اللى الحمد لله طلعونا النهارده بفتوى لوذعيه كالعاده بتقول ان العصيان حرام شرعا )

+المواطنين الشرفاء (المأنتخين طول السنه وبيمضوا ويزوغوا وفجأه كده ضميرهم صحى وقرروا يروحوا أشغالهم عندا فى الثوار )

+ الهيئات والمؤسسات (اللى طلعت بيان النهارده بتقول فيه انهم مش هايضربوا زى السكه الحديد مثلا ) 

 بعد حاصل جمع دول كلهم هايفضل مين يعمل عصيان مدنى ؟

ولو فضل ميدان التحرير ياترى هايكون مؤثر ؟

وهايقدر يستحمل لحد امتى ؟

وخصوصا إنهم مش مدعمين بالأغلبيه

برضه هايفضل الميدان لوحده وماحدش معاه

صعبان عليا الميدان وحاسه بيهم 

العصيان المدنى مش حرام ومن حقهم وده كارت من كروت الثورات ومعروف جدا فى العالم كله ونجح قبل كده فى جنوب افريقيا فى مسيرة كيب تاون السلميه التى انهت الفصل العنصرى وفى الثوره الورديه فى جوروجيا التى ادت الى خلع الدوارد شفرنادزه والثوره البنفسجيه فى تشيكوسلوفاكيا التى ساهمت فى اسقاط النظام الشيوعى 

 وهما من حقهم يحققوا اهداف ثورتهم ويكملوها للنهايه وعشان كده بيعافروا لأخر نفس وعذراهم وحتى لو كنت مختلفه معاهم لكن عمرى ماكنت ضدهم وبتمنى من جوايا ينجحوا لكن للأسف متخونين ومكروهين من الشعب كله

وماحدش بيقدر هما بيعملوا إيه 

صحيح إنهم ممكن يكونوا مش عاملين حساب المستقبل ومش مستوعبين إنهم كده بيقتلوا مصر قتل رحيم (يعنى بيقتلوها عشان يرحموها من المجلس العسكرى ) 

ولكن فى نفس الوقت هما مش خاينين ولكن من وجهة نظرهم بيحبوا بلدهم ودى طريقتهم

كان نفسى الشعب يكون إيد واحده ويتفقوا على حاجه وساعتها هاكون جزء منها بكل كيانى

 

بابا

 

 

 

النهارده مر 24 سنه على رحيل بابا

عايزه أقوله السنه دى وحشتنى أوى كل مالدنيا تضيق بيا زياده كل ماحس انى محتجالك زياده ونفسى اترمى فى حضنك وأعيط 

بعدك صورة الرجل اللى شعره أبيض وحكيم مالهاش وجود فى حياتى

حاسه من غيرك إنى ماليش ضهر 

نفسى تكون راضى عنى وفخور بيا 

إدعيلى 

 

احمدك ربى واستعينك واصلى واسلم على خير خلقك وخاتم رسلك سيدنا محمد مسك الختام
اللهم ياحنان يامنان ياواسع الغفران اغفر له وارحمة وعافه واعف عنه واكرم نزله ووسع مدخله وأغسله بالماء والثلج والبرد ونقه من الذنوب والخطايا كما ينقى الثوب الأبيض من الدنس
اللهم أبدله دارا خيرا من دار...ه وأهلا خيرا من أهله وزوجا خيرا من زوجه وأدخله الجنة وأعذه من عذاب القبر ومن عذاب النار
اللهم ان كان محسنا فزد فى حسناته وان كان مسيئا فتجاوز عن سيئاته
اللهم انزله منازل الصديقين والشهداء والصالحين وحسن أولئك رفيقا ,

اللهم ارحمه كما رباني صغيرا اللهم ,

اجعل عن يمينه نورا وعن شماله نورا ومن امامه نورا ومن فوقه نورا حتى تبعثه آمنا مطمئنا فى نور من نورك ,اللهم إن أبي فى ذمتك وحبل جوارك فقه من فتنة القبر وعذاب النار وانت أهل الوفاء والحق فأغفر له وارحمه إنك أنت الغفور الرحيم اللهم ارجع نفسه اليك راضية مرضيه وادخله في جنتك مع عبادك الصالحين ,اللهم واظله تحت عرشك يوم لا ظل الا ظلك ولا باقي الا وجهك . 

اللهم بيض وجهه يوم تبيض الوجوه وتسود وجوه اللهم يمن كتابه .اللهم اجعل مرضه كفارة لجميع ذنوبه .

واجعل آخر عذابه عذاب الدنيا
اللهم اجعل ذريته ذرية صالحة تدعوا له بخير الى يوم الدين

وصلى الله على سيدنا محمد وعلى اله واصحبه وسلم

 

 

برعاية المجلس العسكرى؟

لبس فانلته الحمرا ونزل يهتف ويشجع

رجع ملفوف بكفنه وامه بتهتف عليه وتدمع

(ويوم مابطل أشجع هاكون ميت أكيد )

(جملة الألتراس المشهوره )

(إن لله وإنا إليه راجعون )

حاسه باإشمئزاز من الناس اللى مشكلتها دلوقتى هما شهداء ولا مش شهداء 

إتركوا مالله لله وهو وحده أعلم مين شهيد ومين غير شهيد

ولكنى احتسبهم عند الله شهداء على أى حال وربنا يغفر لهم ويصبر أهلهم

فى النهايه هما كانوا هناك بيشجعوا الفريق بتاعهم ومايستهلوش اللى جرالهم

وبالرغم من انى هاجمتهم قبل كده وقلت عليهم وقحين وبلطجيه

ولكن مهما حصل فهما مايستهلوش الللى جرالهم ده 

وخصوصا ان ماحدش قال ابدا انهم قلوا ادبهم على حد وحتى اليافطه اللى اترفعت فى المدرجات وكانت بتقول 

(بلد زباله مافيهاش رجاله) 

الكل اجمع على انها كانوا ماسكينها ناس مش منهم وكانت مقصوده لاستفزاز الشعب البورسعيدى 

,اللى نزلوا يدبحوا فى الناس دول بقى( الشعب البورسعيدى المستفز)

   ولا ناس تانيه متأجره ؟؟؟

كمان ناقمه وساخطه على سعادة المشير اللى طالع يقول:

(ده بيحصل فى أى بلد فى العالم )

ده بيحصل فى أى مكان فى العالم ؟؟؟؟

 73 شاب يموتوا وتقول ده بيحصل فى أى بلد فى العالم؟

على رأيك فى داهيه وإيه يعنى ؟

ايه يعنى 73 شاب يموتوا وناس تتصاب !!!!

 حقيقى كلامك مشين يا سيادة المشير

وكمان متضايقه من الناس اللى بتقول إحنا شعب همج وقليل الأدب وفاهمين الحريه غلط 

بقولهم طب ما احنا طول عمرنا شعب همج وقلالات الأدب وفاهمين الحريه غلط وطول عمر الشعب البورسعيدى والإسماعيلى بيقطع الفريق المنافس فى الماتشات أومال عمرنا ماسمعنا عن عدد القتلى دى ليه ؟

 

ولكن برضه مش داخل دماغى ابدا السيناريو بتاع ان المجلس العسكرى عمل كده عشان يرجع قانون الطوارىء عشان طنطاوى اصلا قال فى خطابه فى ذكرى الثوره انه لارجوع لقانون الطوارىء تانى وكلامه كان حاسم

ثم هو لو كان عايز يرجعوا كان بيلغيه ليه اصلا ؟؟؟

وكمان مش داخل دماغى السيناريو بتاع إن المجلس بينتقم من الألتراس لأن المجلس مش هايعيل ويحط راسه براس شوية عيال عشان ينتقم منهم هو ممكن (يعمل كده بس لأسباب أخرى) 

انما الأنتقام مش منطقى 

وكمان مش داخل دماغى السيناريو بتاع ان ده عقاب من الداخليه 

ولكن مش لأن الداخليه مش هاتعيل لأ 

لأنى أتوقع إن الداخليه ممكن تعيل وتنتقم 

ولكن مش قادة الداخليه ولكن صغار الظباط  وكمان عساكر الأمن المركزى

  وهما اللى سمحوا للبلطجيه دول يدخلوا

يا إما الأمن المركزى سابوا الناس على بعض من منطلق اننا شعب همج والعيال دى مقرفه و ياما هزأونا ويالا خليهم يخلصوا على بعض واحنا نقف نتفرج لأن كان واضح جدا إنهم بيتفرجوا 

أو إن عساكر الأمن المركزى دى بالفعل كانت واخده أوامر تتطنش

طيب واخده أوامر من مين ؟

من وزير الداخليه ؟ 

طب هو وزير الداخليه بيتصرف من دماغه ؟

أكيد لأ زى ماقلت  قبل كده 

بيرجع للمجلس العسكرى يبقى هانلف تلف ونوصل لنفس النقطه تانى

(المجلس العسكرى ) 

ليه بيعمل كده المجلس العسكرى وإيه مصلحته ؟

هاسيب النقطه دى واكيد هارجع لها تانى 

 سيناريو الإنتقام بتاع الفلول والناس اللى فى طره والثوره المضاده

أنا برضه مش مقتنعه بيه لأنهم من باب أولى يخلوهم فى بلاويهم وقضاياهم 

لكن برضه هما ممكن يدفعوا ويعملوا كده لأسباب أخرى

يمكن عشان يلهوا الناس عن قضاياهم 

لكن مش عشان ينتقموا لمجرد الإنتقام 

عامة سيناريو الإنتقام ده بالنسبه لى فاشل فاشل جدا ومش منطقى فى كل الأحوال

لأن لو حللنا نفسية الناس اللى فى طره حالا هنلاقى كل اللى بيحلموا بيه إنهم يطلعوا من المصيبه اللى هما فيها 

ويمكن لما يخرجوا يبقوا ينتقموا براحتهم 

انما دلوقتى مش وقته

أولوياتهم إنهم يخرجوا وبس وممكن يعملوا أى حاجه عشان يخرجوا من المصيبه دى حتى لو زى ماسمعت يدفعوا عشان الناس تموت والمحامى بتاعهم يقول :

(ماهى الناس بتموت دلوقتى وهما محبوسين يبقى هما ماكنوش مسئولين عن موت الناس قبل كده)

ده سيناريو منطقى الى حد ما ولكن السؤال الأهم بقى:

ده بيحصل برعاية (المجلس العسكرى) ولالأ؟