يوميات ناخبه2

الناس هيست خلاص شويه يطلعوا يقولوا الانتخابات مزوره وشويه يطلعوا يقولوا دى ارادة الشعب الجبان شعب العواجيز اللى اتعود على العبوديه 

ماهو الاولى تلغى التانيه 

يعنى لو فرضنا ان فى تزوير يبقى حسب المنطق دى ارادة المجلس العسكرى

 انما لو فرضنا ان  دى ارادة شعب العواجيز واللى اتعود على العبوديه و....و... الى اخره من الكلام المحفوظ والغير مفهوم

 يبقى الانتخابات غير مزوره يعنى الاتنين عكس بعض

يعنى حتى فى دى مش عارفين تبقوا رأى واحد؟؟؟

 والناس قاعده تولول ليه على تويتر والفيس

 ومحسسنى ان شفيق ده غول او شيطان بقرنين 

وبيتكلموا عن اعتقالات وسفر وهجره

 ليه ده كله

 ايه كمية الاكتئاب والاحباط دى 

هو ولا هايعمل حاجه نهائى من دى

 ومايقدرشى الرئيس الجاى ايا كان انه يلعب بالشعب تانى او مايحققشى طلباته هو عارف ان الناس لسه سخنه وعندها استعداد تنزل التحرير فى اى وقت واكيد هايكون عايز يثبت نفسه

كل الشعب غلطان وكله الشعب مسئول

 ماحدش يقولى اصل المسيحين غلطانين عشان اعطوا اصوات لشفيق او ان الكنيسه غلطانه انها اعطت اوامر يعطوا اصوات لشفيق ماهو لو احنا عندنا تيار دينى بيتقى الله ومش (فزاعه) كانوا اعطوا اصواتهم للاخوان وليس الفلول وهما متطمنين

وماحدش يقولى (العواجيز العبيد) غلطانين لوحدهم ولبسونا فى الحيط

 وهو حمدين وابو الفتوح مش غلطانين ان ماحدش فيهم اتنازل للتانى عشان العند والعنجهيه وكانوا سبب فى تفتيت الاصوات؟؟

وهو المقاطعين مش غلطانين انهم مانزلوش يدعموا مرشحين الثوره بالحجه الهايفه (بتاعة اصل الانتخابات هاتتزور) ؟؟؟

مالكوش عين بقى تفتحوا بقكم وتقولوا هاننزل التحريرتعترضوا على الانتخابات اللى انتوا قاطعتوها اصلا 

وهما الإخوان مش غلطانين انهم بيعملوا لمصلحتهم وباعو الثوره والشهداء 

كل الشعب غلطان وكل العشب مسئول 

ولا تعايرنى ولا أعايرك الهم طايلنى وطايلك 

  

يوميات ناخبه

توجهت إلى لجنتى الإنتخابيه فى تمام الساعه السابعه ونصف وجدت طابور طوييييييييل من السيدات على شكل حرف u

ذهبت الى أخر الطابور وإتخذت مكانى وبدلا من الملل فكرت فى تجاذب اطراف الحديث مع بعضهن لعل الوقت يمر بسرعه

 بالرغم من إنى كنت متوجسه خيفه من إندلاع بعض المعارك بيننا 

(وماأدراكم ومعارك السيدات)

 ولكن الحديث مر بهدوء وبغض النظر عن إن الخمس سيدات الأماميين يرشحون شفيق والخمسه الخلفيين يرشحون شفيق 

ولكن لم ينزعج احد منهن كثير من إختيارى لابو الفتوح أومحاولة إثنائى عن ذلك ولذلك فقد كفى المؤمنين شر القتال

ظللت أمشى مع الطابور حتى وصلت للجنتى وذهبت لأعطيهم بطاقتى فأخذها أحدهم ولا أدرى لماذا سألنى هذه السؤال 

جايه عشان بتحبى مصر ؟

أجبت سريعا  : طبعا

ثم أخذت بطاقتى وذهبت لأدلى بصوتى وحينها أحسست بشعور لم ينتابنى من قبل أحسست برهبه وخوف مختلطين بالشعور بالمسؤليه تجاه البلد 

وإرتعشت يدى وأنا أمسك بالقلم

 وأحسست للحظات إننى أريد التراجع عن اختيار مرشحى 

ليس لعدم إقتناعى بإختياره ولكن لشعورى الرهيب بالمسؤليه تجاه قرارى وتوابعه على بلدى 

ثم بدر منى فعل لاإرادى 

ظللت أمر ببصرى ثانيا على أسماء المرشحين وكأننى أريد أن أتأكد من إنى إخترت الأصلح لمصر بالرغم من إنى لم أكن متردده بشأنه

وهنا أدركت اللحظه الفارقه على رأى ابو اسماعيل

ولكن بالرغم من ذلك كنت فرحه جدا لأننى أخطو خطوه أخرى على طريق الديمقراطيه وحينها قلت 

( منك لله يا مبارك كنت حارمنا من اللحظه دى )

أعلن إنتخابى للجدع ده

 

أيوه هانتخب ابو الفتوح 

هانتخبه وأنا مغمضة العين وصماء الأذن عن بعض تصرفاته الأخيره اللى ماعجبتنيش ومانكرشى إنها قللت رصيده عندى كتير بعد ماكنت بحبه وعملت له توكيل

 وأنا ساعتها ماكنتش متأكده إنى هانتخبه

هانتخبه وانا بنتقد تصرفه انه لم يتنازل لحمدين صباحى أو صباحى يتنازل له عشان الأصوات لا تتفتت بينهم وغلبوا الإتنين مصلحتهم السفلى عن مصلحة البلد العليا 

هانتخبه وأنا بنتقد تصريحاته عن مرض صباحى بفيروس C 

هانتخبه وأنا بنتقده إنه لم يوافق على إجراء مناظره بينه وبين صباحى بحجة إنهم واقفين على  أرضيه واحده ومع ذلك وافق على إجراء مناظره بينه وبين مايقول عنهم فلول وكان أولى به الترفع عن هذا  

هانتخبه بغض النظر عن إن المناظره دى نفسها قللت من أسهمه لأن ردوده على بعض  الأسئله لم تكن وافيه وكافيه ده غير ترديده بعض الشعارات اللى تودى ولا تجيب

هانتخبه وأنا متوجسه خيفه من علاقته بالإخوان وعدم إقتناعى التام بإنه إنفصل عنهم شكلا وموضوعا

هانتخبه وأناخايفه إنى ألاقيه بعد الفوز بيبوس إيد المرشد وتبقى يا مصر خدتى أكبر قفا فى حياتك 

هانتخبه وأنا مشمئزه منه بعد ماعرفت إنه مؤسس جماعة القتله اللى ياما صفت مثقفين وبارزين

هانتخبه وأنا متأكده إنه رجع فى كلامه فيما يخص( البيعه وحق الرده) فى مذكراته ورجع قال حاجه تانيه عشان يرضى الناس ويفوز بأصواتهم

هانتخبه بمنطق أحسن الوحشين 

وعشان أكون عادله لازم أذكر الإيجابيات 

1-برنامج إنتخابى جيد

2-شخصيه محترمه وصادقه الى حد ما أو( لحين إشعار أخر )

3-رجل مناضل و ذو فكر ثورى من قبل الثوره

4- رجل طيب وذو وجه سمح وبشوش

5- محب لعمل الخير ومساند لأبناء وطنه

 6- قدر على جمع العديد من أطياف الشعب المتنافره حوله ومصر فى أشد الحاجه إلى وحدة أبناءها الأن

7- إنتخابه هايهد الإخوان ومش هايديهم فرصه يتجننوا علينا على العكس لو طلعت النتيجه موسى أو شفيق

8- هو المرشح الوحيد اللى قابلته وجه لوجه وإقتنعت بحديثه

هاتقول لى ده؟

 هاقولكم :مش كل ثورى ناجح بالضروره يبقى رئيس جمهوريه ناجح

طب ده؟

شايفه فيه مبارك 

 

 

 وده؟

 

 أحبك أه أنتخبك لأ:)

وده ؟

قصدكم ده 

وده؟

مين خالد على ده ؟؟؟؟

مش قولنا مش كل ثورى ناجح يبقى رئيس جمهوريه ناجح ؟؟

وعشان كده هانتخب ابو الفتوح  

ولكى الله يا مصر 

عزيزى الإخوانى بقولك

عزيزى الإخوانى اللى هاتنزل الميدان لو النتيجه طلعت الفلول لأن (ممكن) التصويت يبقى مزور!!

 بقولك

 طب عندك إعتراض إن الشعب ينزل الميدان لو النتيجه طلعت إخوان لأن (أكيد) التصويت هايبقى  بالرشوه؟

عزيزى اللى ماكنشى عاجبك الظابط أبو 50% :

بقولك 

فى دفعه أمناء شرطة إترقت لرتب ظباط

البس يا شعب عشان خارجين :))

بقولك

 (مرسى عاوز كرسى) لما راح بنها  لعمل مؤتمر كان معاه اتوبيسات محمله ناس كتير !!

ياترى ليه ؟؟؟! 

هو مش كفايه اخوان بنها عليكوا ؟

ولا هى استعراض قوى ؟؟؟

واضرب صاحبك لو هما (كتير )

أعزائى كارهى شفيق :

بقولكم

 قليل من التريقه على شفيق مايضرش ولكن كثير من التريقه على شفيق يجعله رئيسا للجمهوريه :)) 

هاتعرفوا معنى جملتى دى قريبا

إلى محمد عبد القدوس اللى ضرب الست بالقلم لمجرد انها فى الدعايه الإنتخابيه بتاعة شفيق 

بقولك

 إن شاء الله إيدك تتشل

 بقولك

بعد الثوره إتغيرت الحكمه اللى بتقول أن الإختلاف فى الرأى لا يفسد للود قضيه وبقت

الإختلاف فى الرأى يفسد للود قضايا

بقولك

 فى جمل كتير مرتبطه بمعنى الديمقراطيه فى مصر :

قول اللى فى نفسك بس بينك وبين نفسك

رشح اللى فى نفسك بس بينك وبين نفسك

أى حد هايرشح واحد تانى غير مرشحى يبقى حمار

اللى هاترشح شفيق هاتنضرب بالشلوت فى بطنها او بالقلم على وشها

سؤال لشباب الإخوان

بقولك

 سمعت إن المرشد هايرجع فى كلامه وهايرشح البلتاجى بدل مرسى

هاتدعموه برضه على أساس الطاعه العمياء وان المرشد اكبر منكوا ويعرف مصلحتكوا اكتر منكوا ؟؟؟

كلاهما مؤلم

 حديث ذاتى فى إحدى الصباحات الكئيبه التى تعكس ليل دامس ملىء بالأفكار :

 دائما فى مفترق طرق أعانى من صراعات متواصله 

صراعات تتلو أخرى

 تلحق ببعضها وكأنها موجات فى بحر هائج  

 لا أعرف إذا كنت لا استطيع الاختيار من بين شيئين

 لانى لا اعرف ماذا أريد؟ 

أم لاننى أريد كلا الشيئين ؟

أم لانى لا أريد ايا منهما على الإطلاق ؟

 ولكن عزائى الوحيد إننى لازالت أنبض بالحياه

 فالصراع يتوقف فقط عند الموت  

مناظره ملهاش لازمه

(هاتقولهم لى حسنى حسنى هأقولهم لك إخوان إخوان)

التعليق ده شفته امبارح على جروب وبالرغم من انه مضحك جدا

 واكيد اللى كتبه كان بيهزر

 ولكن انا شايفه انه بيلخص طبيعة المناظره بين ابو الفتوح وموسى

فى رأى مافيش حاجه تانيه حصلت غير كده  

 كلامهم كله كان تحفز لبعض وليس موجه للشعب المصرى الغلبان 

ماحدش اتكلم على المستقبل الا عشان يستعرض عضلاته قدام الأخر ويبين انه هايعملنا اللى مايقدرشى يعمله التانى 

وماحدش اتكلم عن الشهداء الا عشان يضرب على الوتر اللى بيعجب الثوار كالعاده زى ماعمل ابو الفتوح  

 وماحدش عرض امكانياته الا عشان يعايرونا

المناظره كلها سلبيات

 وايجابيتها الوحيده انها عرفتنا وجوه اخرى للمرشحين ماشوفتهاش قبل كده

أول مره أشوف أبو الفتوح بيقول أو بيعمل حاجه مصطنعه عشان بس يعجب الناس ويطلع منافسه زباله

وأول مره أشوف أبو الفتوح عصبى ومتوتر كده !!!!

واول مره اشوف موسى متعالى ومغرور وعصبى ومتوتر كده !!!! 

ومهييس كده :)

لغة الجسد لعبت دور قوى جدا فى مناظرة امبارح وقالت اللى ماحدش قدر من المرشحين يقولوه للتانى 

أول اللى يحاولوه يقولوه بس بأدب 

حسيت انهم كانوا اول مابيطلعوا فاصل بيمسكوا فى خناق بعض وقبل مايرجعوا على الهوا بيرجعوا يعدلوا هدومهم تانى ويبتسموا للجمهور ولا كأن حصل حاجه 

موسى بيتكلم بتعالى جدا مع ابو الفتوح وده كان باين أوى فى حركة الرأس ولوى العنق اللى كلها إستنكار ورفض وسخريه وكأنه بيقوله

 (انت مين انت عشان تقف قدامى ده انت ولا ليك فى السياسه ولا تعرف عنها حاجه انت مجرد راجل بتاع بطاطين وطول عمرك بتدافع عن الاخوان مش الشعب الغلبان )

فى رأى كمان انها وسعت من موسى أوى فى حديثه عن الثوره وانه واحد منها وحسسنى كأنه هو اللى كان رافع اليافطه بتاعة يسقط يسقط حسنى مبارك فى الميدان 

وكمان ابو الفتوح كان بيتكلم بعصبيه جدا وبتوتر وتحفز من اول لحظه فى المناظره ده غير انه طول المناظره بيشوح فى وش عمرو موسى وبيلقح كلام عليه بصفته من النظام القديم وكأنه بيقوله:

 ( يالا يا فلول يا ابن الكلب مابقاش الا انت اللى هاتحكم مصر)

فى رأى المناظره دى بينت اسوأ مافيهم

 وبينتهم أضعف من بعض 

وكان أولى بهم بدل ماتبقى مناظرة فرش الملايه أو نشر الغسيل اللى مش نضيف انها تكون مناظره محترمه وكل واحد فيهم يحترم المرشح الأخر وده كان هايزود رصيدهم عند الناس 

ده غير ان كلامهم كله كان شعارات مش كلام بجد طالع من القلب وصريح وواضح 

المناظره ماكنشى ليها أثر بالنسبه لمؤيديهم لسبب بسيط إن كل واحد من مؤيديهم خرج بنفس الفكره هى هى عن مرشحه

وشاف كل عيوبه مميزات

 وبرضه شاف كل مميزات المرشح الأخر عيوب
يبقى ايه الفرق قبل وبعد المناظره ؟؟
ولا حاجه 

 ويبقى كده معملناش حاجه لأن هدف المناظره اننا تختار الأصلح للبلد
  وتحكم بشكل حيادى مش بشكل منحاز
ونعرف اننا ممكن نغير رأينا عادى بالنسبه لمرشح ونختار غيره لو كان أصلح 
ونبطل نلمع فى مرشحنا عن طريق اظهار عيوب ومساوىء المرشحين الأخرين ونتقبل نقد مرشحنا مش نتعامل معاه وكأنه حد جاب سيرة الست الوالده على رأى باسم يوسف 
وفى النهايه ربنا يولى علينا الأصلح

التحليل النفساوى لمرشحين الرئاسه

 أفتح الفيس بوك ألاقى فيديو بعنوان 

(الأماره النفسيه لمرشحين الرئاسه ) 

وبالرغم من إنى عمرى ماسمعت عن مصطلح الأماره النفسيه ده غير فى حوش أم تيتى 

ولكن قلت أتفرج عليه لأن دايما بيجيلى هيستريا فضول لأى حاجه فيها الأربع حروف دول :

(ن, ف , س , ي ,ة) 

 لقيت الطبيبه النفسيه  منال عمر متشنجه كعادتها وبتتكلم بجميع أجزاء جسدها وقال إيه بتحلل مرشحين الرئاسه نفسيا !!!!

ضحكت و قلت وماله خلينا نسمع بتقول إيه

 أفوجىء ألاقى ان الست منال بتفلتر مرشحين الرئاسه على مزاجها وبتسرد جميع مميزات اللى عجبوها وبتسرد جميع عيوب ومساوىء اللى ماجوش على مزاجها وده طبعا بعيد تماما عن الحياديه وحيادية التحليل النفسى بالذات ده طبعا لو سمينا ده تحليل نفسى

قلت أطنش خااااااالص 

ودخلت على صفحه تانيه لقيت العنوان ده:

 (التحليل النفسى لمرشحين الرئاسه عن طريق ملامح الوجه ) 

 قعدت أقول هو ده محكنا فى إختيار رئيس الجمهوريه ؟؟؟؟

طب هو المفروض أتراجع عن دعمى لأبو الفتوح لما أكتشف إنه إخوان ولا أتراجع عن دعمه لمجرد إن مناخيره مش عاجبه البيه ؟؟؟؟!!!!

ومع ذلك قلت أطنش خااااااااااالص

ودخلت على بوست تانى لقيت الصوره دى:

 

واللذيذ إنه قايل كلام عكس اللى قالته الدكتور منال تماما فيما معناه انه حلو وعسول !!!!

 طيب مش المفروض إن نتيجة التحليل تكون واحده فى أى معمل؟؟

 ولا ممكن واحد يطلع عنده السكرفى معمل ويطلع ماعندوش السكر فى معمل تانى؟؟!!

 لأ مش ممكن بقى!!!!

 هو إيه حكاية موضة التحليل النفسى للمرشحين الرئاسه ده ؟؟؟
اللى أعرفه ان التحليل النفسى نوع من العلاج بياخد من 1 الى 3 سنين بواقع 5 جلسات اسبوعيا وكل جلسه 45 دقيقه 

عشان بعد كده اطلع اقول بقلب جامد 

(أنا حللت فلان نفسيا )  

 و كمان ماينفعشى أطلع اقول انا حللته لأن اخلاقيات المهنه تمنع ان اى معالج أو طبيب يفشى اسرار التحليل ده
هل ده معناه ان شفيق وموسى وحمدين وابو الفتوح وسليمان والإخوان سابوا أشغالهم وخضعوا لجلسات تحليل لمدة سنه بواقع خمس جلسات أسبوعيا وكل جلسه 45 دقيقه؟؟؟!!!

وهل ده كمان معناه انهم اعطوا موافقه كتابيه للدكتوره عشان تقول تحليلهم النفسى قدام مصر كلها ؟؟؟!!!

 دى كلها مجرد أراء شخصيه وإسقاطات ياتصيب يا تخيب ومش ممكن يكون محكى فى إختيار الرئيس هو مجرد أراء حد تانى ولاترقى لمرتبة العلم 

 وطبعا من حق كل واحد يقول رأيه لكن ماينفعشى تكون تحت مسمى

 (التحليل النفسى)

 لأن زى مافى ناس بتصدق انهم هايدخلوا الجنه لو انتخبوا ابو اسماعيل

 وزى مافى ناس بتصدق انهم قالوا نعم فى التعديلات الدستوريه للدين
برضه فى ناس بتصدق ان كل الفلول شياطين لمجرد انهم ماجوش على مزاج الست منال عمر الثوريه ولن اقول طبيبه نفسيه لانها المفروض تكون حياديه وتتقبل كل الأراء والشخصيات بفلولها بإخوانها بثوارها 

سنحيا كدابين

عجبا لفضيلة الشيخ اللى راح وجه وإتطلع وشجب

 ولهث على كرسى الرئاسه بما فيه الكفايه 

والغريبه إنه عارف ومتأكد إنه أمه رحمها الله أمريكيه 

 طب نعملك ايه تانى يعنى ؟؟

فى حد يقول (أعتقد) إنها مش أمريكيه ؟؟؟

ماهى أعتقد دى معناها انك كداب

 هو من المفترض ان أى شخص مايعرفشى جنسية أمه ايه ؟؟؟

أو مثلا لو كانت طلبت الجنسيه فعلا وهى مريضه عشان تتعالج فى امريكا مش المفروض ان ابنها زى ماهايكون عنده فكره عن مرضها يبقى برضه عنده خبره بالأحداث اللى حصلت أثناء مرضها ؟

 بما فيهم الحصول على الجنسيه ؟؟؟ 

  وثانى كدبه بعد ما إتأكد إنها أمريكيه وقال 

(اصلى ماكنتش اعرف انها امريكيه)!!!!

  يبقى لو فرضنا انه مايعرفشى يبقى ابن عاق ومايعرفشى حاجه عنها

 هو مش الكدب حرام برضه يا فضيلة الشيخ زى المكياج اللى هاتحطه على رأس إهتماماتك لما تبقى الريس وتمنعه على اعتبار ان مشاكلنا الاقتصاديه خلصت وبقينا فى رفاهيه ؟

وانصاره عمرهم سألوا نفسهم هو شيخنا كداب أو لأ قبل مايدعموه؟؟

ولا حضروا العفريت ومش عارفين يصرفوه

 يعنى بعد مافضيلة الشيخ ايقظ الفتنه وسخن الناس وماهمهوش مصلحة البلد والامتثال للقانون الترشح وعاش فى نظرية المؤامره الوهميه عليه

 طلع كدااااااااااااااااب

 وانصاره عرفوا انه كداب 

ساعات بيتهيألى إنهم مش عارفين يتراجعوا عن دعمه ازاى

 فا النتيجه انهم مكملين عشان مايبقاش شكلهم وحش :)

مش دول بتوع قال الله وقال الرسول ؟ 

مش السلفيين اكتر ناس بيتبعوا سنة نبينا محمد عليه الصلاة والسلام انا بقى عمرى ماسمعت ان نبى الله محمد كان بيكدب أو بيلهث وراء كرسى رئاسه او عمل عملية تجميل فى مناخيره ؟؟

ثم يقصد بإيه إن دى مؤامره مدبره ضده ؟؟

على اساس ان المتأمرين دول هما اللى اقنعوا أمه من 8 سنين تاخد الجنسيه الأمريكيه عشان كانوا بيشموا على ضهر إيديهم إنه هاييجى يوم أسود والشيخ يرشح نفسه ؟؟؟؟

عرفتوا ليه مش عايزين ندخل الدين فى السياسه ؟ ولا لسه ؟

أفيقوا يرحمكم الله يا من تحملون شعار الدين ولا تتبعون تعاليمه

هلاوس ليليه 5

قلتها ولازالت بقولها الجواز مالوش مقاييس اطلاقا 

يعنى اذا كان لكل قاعده شواذ فايبقى الجواز هو مجموعة الشواذ دى وليس القاعده صعب اوى نقول لو عملنا كده او فكرنا كده يبقى اكيد هنختار صح 

وكمان مش منطقى نفضل ندى رأينا فى حياة غيرنا طول الوقت

 ونقول هو اللى غلطان او هى اللى غلطانه لانى مؤمنه بإن الباب المقفول على هى وهو دول صعب نعرف وراه ايه او تحكم مين غلطان ومين لأ  

 ولكن اللى متأكده منه جدا ان مش مشكله ابدا واحنا بنختار نختار على اساس مستوى اجتماعى جيد او مستوى مادى جيد او حتى نختار على اساس الحب ومش مشكله ابدا تلاقى واحد حلو متجوز واحده مش حلوه خالص او واحده حلوه متجوزه راجل معاق مثلا 

او نقول بثقه  انه طالما الاتنين دول بيحبوا بعض يبقوا اكيد هاتكون حياتهم سعيده وبعدين نستغرب لما نلاقيهم انفصلوا

 او نجزم بإن فى جوازه معينه اكيد هاتفشل لمجرد إن الست مثلا أكبر سنا من الرجل

 للأسف فى الجواز مافيش ضمانات لأى حاجه وفى الأخر اللى بيحقق السعاده فى الجواز هو نفس الشىء اللى بيحقق السعاده فى أى حاجه تانيه هو

( الرضا ) 

تلك الكلمه السحريه اللى لو دلت على شىء تدل على منتهى السكينه

 وهو ده الشىء اللى بيخلى الرجل الحلو مبسوط وهو متجوز واحده مش حلوه وكمان شايفها أحلى ست فى الدنيا 

وهو اللى بيخلى البنت الحلوه مش حاسه بنقص وهى ماشيه جنب الرجل المعاق وشايفاه كامل الرجوله 

 وهو اللى بيخلى المطلقه تبدأ حياتها من جديد 

وبيخلى الأرمله ماتتجوزشى بعد موت جوزها وتفضل تربى ولادها حتى ولو سنها صغير

 وهو اللى بيخلى البنت اللى إتأخرت فى الجواز (وما أكثرهن الأن) تعيش حياتها فى سكينه وطمأنينه على اعتبار ان قعادة الخزانه ولا جواز الندامه وهى مقتعه ان وضعها كده احسن بكتير

عشان كده أهم حاجه مش إننا نحب أو نتجوز بتفكير أو إحساس ولكن 

 إننا نكون راضيين ولكن الرضا ده شىء مش بكتسبه من الحياه ويصبح عاده للأسف ولكن لازم يكون موجود أصلا جوانا ومانبذلشى مجهود فى الحصول عليه وعشان كده 
يا بخت الراضيين

رئيس مصر القادم

بالرغم من إن عدد المرشحين للرئاسه فى اللمون وفى ناس كتير بتنتقد ده!!

 وناس شايفه إن المنصب فقد هيبته (زى الشرطه كده):) 

 وناس شايفه إنها حاجه تستدعى السخريه!!

وناس بتقول ياحسره على اللى مصر وصلت له!! 
وكأن مصر فى محنه إن فيها إنتخابات رئاسه

(معلشى أصلهم مش متعودين على كده)

 وإنما أنا شايفاها حاجه طبيعيه جدا

 دلوقتى فى رئيس تنحى عن الحكم بسبب ثوره ومطلب شعبى

 والعادى إن ييجى رئيس غيره وبما إننا فى بلد (المفروض) إنها ديمقراطيه

 يبقى لازم ييجى رئيس بالإنتخاب

 ولازم ناس ترشح نفسها 

وباب الترشيح يكون مفتوح لكل من تنطبق عليه المواصفات للترشح

 وفى الأخر الحكم هايكون ل( ص) أو( ص ) كالأتى :

الصندوق أو الصفقه

بمعنى 

 أولا : الصندوق لو مشى بما يرضى الله أتوقع أنه يتحسم للرجل ده

 لأنه بالمنطق لو حطينا عدد أصوات الناس اللى كانوا مرشحينه من الأول واللى أكيد ماغيروش رأيهم فيه لأنه مواقفه غير متغيره + عدد أصوات مؤيدين البرادعى اللى كانوا حاطين أبو الفتوح رغبه تانيه وبعد مالبرادعى خلع يبقى منطقى إنهم يختاروه  + عدد أصوات الناس اللى تعاطفت معاه بعد الإعتداء عليه بغض النظر

 (هو كان بعلمه أو لأ) + عدد أصوات بعض الإخوان اللى هايدعموه لأنه إخوانى بفكره + عدد أصوات الناس اللى شايفه إنه لا غبار عليه فعلا ويستاهل إنتخابه 

بعد مانجمع كل دول أعتقد إنه ينجح 

 ثانيا : الصفقه 

ولو كان للصفقه  المزعومه بين العسكر والإخوان واللى اتوقع برضه إنها منطقيه نوعا ما أتوقع يتحسم لحد من الإتنين دول

لأن العوا علاقته جيده بكل من المجلس والإخوان

 ولأن شفيق علاقته كويسه بكل الطرفين زائد إنه شخص جيد لتظبيط المجلس العسكرى بغض النظر عن إنه كان حريص جدا إنه مايبصش فى عين عمرو أديب لما سأله إذا كان الإخوان هايدعموه فى الإنتخابات أو لأ وكان بيجاوب وهو بيبص فى الورقه اللى فيها برنامجه الإنتخابى 

ودى أكيد حاجه غريبه وهايبان سببها عاجلا أو أجلا

أو الأخ ده 

وده لنفس السبب إنه على علاقه جيده بالمجلس العسكرى

ثالثا: للصندوق والصفقه معا

الإتنين يدعموا بعض بمعنى دعم كلا من المجلس والإخوان ويتحسم برضه لأبو الفتوح وده معناه و(إن كنت أستبعده) إن يكون أبو الفتوح فعلا بيصيع وهو على وفاق مع الإخوان وزى السمن على العسل مع المجلس ومتفقين على الشو ده قدام الرأى العام عشان الشعب يتعاطف مع أبو الفتوح أكتر وينتخبه وببعدين ييجى أبو الفتوح يظبط المجلس العسكرى ويضمن له الخروج الاّمن حسب ماتمليه الصفقه وأكيد برضه الصندوق هايكون له دور كبير جدا لأن زى ماقلت فى الأول فى ناس هاتنتخب أبو الفتوح من غير صفقه ولا يحزنون وإن كنت أستبعد صفة الغش والطرمخه عن أبو الفتوح 

أما بالنسبه لكل الإخوه الباقيين زى عمرو موسى وابو اسماعيل وصباحى وغيرهم  أتوقع إنه لن ينجح أحد 

أما بالنسبه للسواد الأعظم من المرشحين اللى ماحدش يعرف عنهم حاجه والغوغاء وعامة الشعب كتير منهم متأكدين إنهم مش هايكسبوا قدام الفطاحل اللى ذكرتهم فوق ولكن مترشحين بس عشان بس كل واحد منهم يقول

  (كنت مترشح لرئاسة الجمهوريه )

 الفشخره المصريه العاديه

(إنت أكيد أكيد فى مصر)
وفى الأخر دى كلها توقعات يا تصيب يا تخيب