58 مليون فكر

(وإحنا في المواصلات إمبارح وداخلين على مسجد الإستقامة
كان صوت الهتاف أمام المسجد واصل لمسافة طويلة جدا
وكان من الركاب معانا واحدة ست وإبنها
قالها : يا ماما عايز أنزل معاهم.
قالتله : بس يا ولة دي عيال قابضة وجاية تخرب.
  قالها : يا ماما دول اللى معانا في العربية رايحين!
بصت علينا كده بتتفحص أشكالنا ولقيتها دققت في شكل لحيتي بالذات
وسألتنا: إنتو نازلين ليه !؟
قلنالها: نازلين نستكمل الثورة وتحقق أهدافها .. شايفة تغيير في وجود المجلس ؟
سألتنا : إنتو مش ستة إبريل ؟
قلتلها : لأ أنا 16 إبريل D:
سكتت وابتسمت وبصت على المسيرة (شكلهم شباب كويس عادي)
وقفت العربية بعدها ونزلنا وشفتها بالصدفة إنضمت لينا هي وابنها)

القصه دى كتبها واحد من ثوار ميدان التحرير على الستاتوس بتاعه على الفيس وفى الحقيقه إن فى معنى مهم جدا بين سطورها 

وهو اللى بأكد عليه دايما من أول الثوره ماقامت

إن الناس سهل تقتنع وسهل تبقى إيد واحده بس باللين والهدوء 

مش بالهجوم والسب والنعت بالجهل مره وبالتخلف مره وحب العبوديه مره

وتصنيفهم أغلبيه صامته وحزب كنبه

  فى إمكان ثوار الميدان إنهم يقوموا اللى قاعد على الكنبه من على الكنبه ويخلوا الاغلبيه الصامته تتكلم

بس 

بالإقناع واللين وتفسير موقفهم بهدوء لكن هما بيتسهلوا الشتيمه على اعتبار ان دول كلهم أغبياء مش فاهمين حاجه وهو الناشط السياسى الوحيد اللى بيفهم

وفى نفس الوقت بيستنكروا إن الناس دى مش بتساندهم 

طب يساندوكم إزاى وأنتم بتشتموهم وبتسخروا منهم ليل نهار!!!!

يعنى الشاب اللى بيقول لأهله أنتم إتعودتم تكونوا عبيد

العبيد دول ربوك ثائر إزاى بتناضل من اجل حريتك

  إزاى العبيد يربوا أحرار ؟؟

ومع ذلك أنا مايهمنيش المجلس يمشى أو لأ

يعنى مش فلول ولا كنبه ولا اغلبيه ولكن 

(هارشه ومطنشه )

يعنى عارفه مساوىء المجلس  كويس و لكن مطنشه لحد مايمشى لأنى مش شايفالها حل تانى لازم نقبل بالحلول الوسط عشان الدنيا تمشى وعلى فكره الحلول الوسط هايتضمنها برضه عيش حريه عداله اجتماعيه ومش معنى ان الدنيا تمشى يعنى قصدى استقرار

ولو انى مش شايفه الاستقرار كلمه قبيحه

انما لو فضلنا نفرض على كل رياسه انها تاخدلنا حقنا من الرياسه اللى قبلها يبقى هاندخل فى حلقه مفرغه مش هانخرج منها لأن ببساطه

كله متواطىء مع كله 

 وعشان كده مستغربه أوى من الناس اللى إتفاجئت بسلوكيات المجلس وكأن المجلس ده جايلنا من بره مفترض فيه إنه يبقى فله شمعه منوره

ماهو أيوه بواقى النظام وتربيته 

وأكيد هايمشى على نهجه

والعقل والمنطق يقول إن مبارك ماكنشى بيحتفظ بحد نضيف طول الفتره دى يعنى أكيد طنطاوى فاسد زيه ولو سيناريو( الإنقلاب المتفق عليه) صح يبقى ده السبب فى التباطىء والتواطىء الى احنا شايفينه 

ومع ذلك مش هاكون متضايقه لو المجلس مشى برضه

ولو انى استبعد انه هايمشى الا على جثته أو حتى جثة كام شهيد تانيين وخصوصا انه مدعم بالأغلبيه الصامته وحزب الكنبه  اللى الثوار (بيشتموهم ليل نهار) وهما برضه اللى قالوا نعم فى التعديلات الدستوريه وهما اللى كتير منهم بيروحوا العباسيه

إنما كل اللى بحلم بيه اننا نكون ايد واحده تحت فكر واحد ومطلب واحد لاننا ساعتها بس هانكون اقوى ولا هايقدر علينا 100 مجلس ولا 100 مبارك

لكن كل مااحلم أصحى على كابوس ال5000 إئتلاف وال 7000 حزب وال3000 حركه

والنتيجه....

58 مليون فكر واعتقاد  

ده غير بقى اللى باعو القضيه من يوم ماقعدوا على الكرسى ولا يفرق معاهم حق شهداء ولا غيره 

  لكى الله يا مصر

لا شعورنا

 

وجهت صفعه لنفسى حينما تفوهت بجمله فجائيه  لم أعتاد على بين سطورها كجزء من أفكارى ولكنى صمتت لبرهه لكى أفكروسألت نفسى لماذا تفوهت بذلك؟

هذا ليس ماأعتنقه من أراء

 هل أناقد نفسى أم إنه تأثير هذا الجزء المتناهى الصغر والمظلم بداخلنا و الذى سوف نحيا ونموت دون أن نعرف مافى جعبته فحينما تتشكل أرائنا فى الحياه بدافع الميول والإتجاهات نثابر وندافع عن ما نؤمن به حتى النخاع

 ولكن

 لا نتوقف حتى نسأل أنفسنا هل هذه ميولنا وأرائنا بالفعل؟

 أم إن بداخلنا جزء يحارب هذه الميول ويكفر بها تماما ونحن لا نشعر به ؟

 فا اذا كنا لانشعر به يجب ان نعبث قليلا فى اعماقنا حتى نضع أيدينا عليه ونعرف لماذا يعبث بأرائنا

وإذا كنا نشعر به ولكن نتجاهله

 فلماذا؟

 هل لو أفصحنا عنه سوف يشكل خطرا ما علينا؟

 أم سيجعلنا غير مقبولين إجتماعيا ؟

أم سيجعلنا ضد التيار؟

 سيئه هى الأراء التى لم تولد من رحم القناعه الداخليه

 فكلما إتسعت الفجوه بين الداخل والخارج كلما إزداد الإنسان سوءا وقل سواءا

 و لكن كلما كان داخلنا الخفى على وفاق مع خارجنا كلما أوشكنا على الإقتراب من السواء ولكن لن نصل إليها قط لأننا 

كلنا مرضى نفسيين ولكن بنسب متفاوته

2012

كل سنه وكل متابعين المدونه بألف خير

وكل سنه وكل الشعب المصرى بألف بخير

ويارب تكون سنه جديده سعيده علينا وعلى مصر كلها

والسنه دى تفوقى يا مصر من اللى انتى فيه ويتصلح حالك

   

تحرير ولا عباسيه (4)

عشان أخلص سلسلة تحرير ولا عباسيه على خير ونفوق بقى للثوره التانيه

قررت أكتب بوست أدون فى حاجتين مهمين جدا وده لنفسى أكتر من للقراءه

هى حكايه حصلت لى من 8 شهور قبل الثوره وهاتوضح أنا ليه بشك فى بعض افراد 6 إبريل؟؟

كلنا كنا بنحلم بإن يبقى فى ثوره على الفساد ودايما كنا بنتمنى ده

إنما ماحدش كان يعرف قبل الثوره ب8 شهور إن هاتقوم ثوره

ولو كان حد قال كده كانت الناس هاتقول عليه مجنون أو بيهلوس

لكن الغريبه ان كان فى صديق ليا كان يعرف إن هاتقوم ثوره فى مصر

وقالى الكلام ده قبل الثوره ب8 شهور 

إزااااااااااااااااااااى مش عارفه 

الغريبه إن الشخص ده قال لى كمان إن ملف قتل السادات هايتفتح و(هايطلع) إن مبارك اللى قتل السادات!!!!

وطبعا أنا ساعة ما سمعت الكلام ده ماعلقتش وإفتكرته بيتمنى زى أى حد إن تقوم ثوره فى مصر ولم اهتم بكلامه

ولكن بعد 8 شهور قامت فعلا الثوره مع العلم إن لحد موقعة الجمل ماكنشى إسمها ثوره كانت مجرد مظاهره أو وقفه إحتجاجيه ضد الشرطه وفى عيدهم عشان قتل وتعذيب خالد سعيد واللى زيه 

وكل الدعوات اللى كانت بتتعمل ليها على الفيس ماكنشى بتتعمل على إنها ثوره ولكن بعد ما مبارك خطب خطاباته المشهوره وبعد موقعة الجمل ومابعدها 

ساعتها الناس كلها إتوحدت على مطلب واحد وهو إسقاط النظام وبعدين لما نجحت بقت ثوره

وبعدين بعدها بمده إتفتح ملف قتل السادات وساعتها بس حسيت إن صديقى ده ماكنشى بيقول كلام فى الهوا ولكنه( ممنهج) وخصوصا إنه قالى إنه يعرف إسراء عبد الفتاح (6 ابريل) معرفه قويه ومعاه رقم تليفونها وده كان غريب لإن اسراء من بنها وهو من اسكندريه

ولما سألته يعرفها منين مارضيش يقول

واللى شككنى فيه أكتر إنه كان دايما بيسافر سفريات سريه 

صحيح المعلومات اللى قالها  جايز تكون كانت قليله لكن لما ربطتها ببعض حسيت إنها مش إعتباطيه كمان  اللى لاحظته على الفيس إن طريقة الحشد للناس كانت غريبه جدا الشباب اللى كانوا  فى الميدان وعلى الفيس وبيحفزوا الناس عشان تنزل معاهم 

كنت بحس إنهم مبرمجين أو حافظين الكلام ولما كان حد من بتوع

(منكم لله خربتوا البلد ) بيتخانق معاهم أو يقولهم إرجعوا كفايه كده 

ماكنوش بيضيعوا وقت فى الرد عليه ولكن بيكرروا نفس الكلام ولا يلتفتوا إليه وكأنهم حد مدربهم على انهم لا  يلتفتوا لاى حد يرجعهم عن اللى فى دماغهم وكأنهم مدربين على الكلام ده أو متنومين مغنطيسيا مثلا , 

واللى أكد لى الكلام ده الفيديو ده

والفيديو ده

والفيدو ده  

كل حاجه بتعزف نفس اللحن وبتصب فى 6 إبريل 

وخصوصا إنى مش هاصدق إن ممكن المنظمات دى تدفع فلوس لله من غير أى غرض وخصوصا انى برضه مش قادره اقتنع ان كل الثورات دى قامت فى العالم بالترتيب ده صدفه !!!!

ومش هاكدب عليكوا برضه مش داخل دماغى ان الجيش والمخابرات بتوعنا نايمين فى العسل 

طب لو عارفين ليه مطنشينهم ولو مش ماسكين حاجه عليهم طب ليه بيتهموهم ؟؟

1. الحاجه التانيه بقى هى مايسمى بشبكة رصد ودى صفحه موجوده على النت وكانت بتحاول تسخن الناس وقت الثوره بطريقه غريبه والغريب انهم كانوا بيكدبوا عشان يضمنوا ان الناس تنزل الميدان وبيقولوا اخبار غير صحيحه زى انهم قالوا مره ان الجيش بيعمل عمليات تصفيه فى الميدان وبيضرب الناس بين عينيهم فى الوقت اللى ماكنشى ده حقيقى والاعلام كله بجميع توجهاته ماحدش خالص قال كده وانا بنفسى حذرت ناس كتير منها وطلبت منهم يعملوا unlike للصفحه ولا يثقوا فيه اخبارها ده غير ان الصفحه دى وواحده من صفحات خالد سعيد لانهم (اتنين مش واحده) كانوا بينزلوا بوستات وقت النت ماكانت مقطوعه فى مصر !!!!

    

الخلاصه : مش بقول ان الثوره مموله من الخارج عشان انا عارفه الافتكاسات والتعليقات المستفزه

ومش بقول ان الثوره كلها عملاء  أنا متأكده إن الثوره قامت بجميع طوائف الشعب وربنا يرحم شهداءها

ولكن مما لاشك فيه ان 6 ابريل شابهه سمعة الثوره وخصوصا انهم دايما حواليهم علامات استفهام ؟

تحرير ولا عباسيه !(3)

وفيها إيه لو كنت مع الثوره بس ماروحتش ميدان التحرير؟

ماهو اللى ماراحشى زى اللى راح يتفرج بس

 وزى اللى راح فضول

 وزى اللى راح عشان يظبط بنات

 وزى اللى راح عشان يتظبط حشيش

 وزى اللى راح لأن الجو عجبه هناك

 وزى اللى خرم من  الميدان عشان يروح حته تانيه

 ماهو اذا كنت نازله من بيتنا لاى غرض غير انى نازله الميدان شايله روحى على كفى عشان البلد يبقى نزولى أهبل ومالوش معنى 

ومع ذلك برضه أنا مانزلتش يمكن لانى كنت خايفه 

يمكن عشان ماقدرشى ابات فى الشارع

يمكن لان اهلى كانوا خايفين عليا

ممكن لأى سبب لكن مش عشان مش بحب البلد

 واحنا طول النهار نزايد على وطنية بعض

 ياللى بتقوله اللى مانزلشى الميدان يبقى مايستهلشى يعيش على ارضها بالله عليكم ده كلام ناس عاقلين ؟

مايستهلشى يعيش على ارضها ليه؟

 فشى سرها ؟؟

هو فى طريقه واحده بس مافيش غيرها تثبت بيها إنك بتحب البلد ؟

وهى إنى أنزل ميدان التحرير

 ده فى مية طريقه أثبت بيها إنى بحب البلد

 لو راعيت ربنا فى شغلى أبقى بحب البلد

لو فضلت ماسكه فى إيدى كوباية الأيس كريم لحد ما ألاقى باسكت أرميها فيه أبقى بحب البلد

 لو شلت ورقه من الأرض ونضفت الشارع بتاعى أبقى بحب البلد

لو ذاكرت وإجتهدت عشان أخد درجات علميه زياده أنفع بيها البلد أبقى بحب البلد

لو ربيت إبنى كويس وطلعته مهندس مايوقعشى عمارات أو دكتور يراعى ربنا فى مهنته أو ظابط يدافع عن البلد أبقى بحب البلد

 لو ربيت إبن صحيح جسديا وقللت مريض من البلد أبقى بحب البلد

 لو نصحت واحد راكن صف تانى إنه يمشى بعربيته أبقى بحب البلد

 لو تطوعت فى جمعيه خيريه تاخد من المليان تكب على الفاضى ابقى بحب البلد

 وحاجات كتير قوى لا يتسع البوست ليها لو عملتها ابقى برضه بحب البلد

انما بعد كده تيجوا تختزلوا البلد كلها فى ميدان التحرير ويبقى اللى بره الكام متر مربع ده مش بيحب البلد ؟

وياللى بتقولوا لى إنتى قاعده فى بيتك مرتاحه وبتكتبى وانتى مش شايفه حاجه بقولكم هو إيه اللى فى كتاباتى هايتغير لو نزلت يعنى لما وصفت هادمى السور ومقتحمى السفاره إنهم بلطجيه لو كنت نزلت وشفتهم بيعملوا كده بعينى كان إيه اللى هايختلف فى كتاباتى ؟؟

لما يكون مقياس البلطجه عندى هو العنف وفرض الرأى بالقوه يبقى إيه اللى هايتغير لو نزلت ماهى مبادئى هى مبادئى برضه مش هاديهم الحق فى ده

وبخصوص الحشيش وتظبيط البنات برضه إيه اللى هايختلف فى وجهة نظرى انا سمعت من ناس كتير الموضوع ده وماشفتش فعلا بعينى لكن اذا كان فى واحد ابن خالة صاحبتى رايح للغرض ده يبقى فيه شريحه زيه واذا كنت كلمت صديق ليا هناك وقلت له قولى بصراحه هو إنت روحت الميدان عشان انت ثورى ولا رايح لأن القعده عجبتك قالى (بصراحه القعده هنا حلوه قوى والجو جميل )!!!!

وبرضه هنلاقى شريحه زيه  

ااااااه لأ دول كدابين, قابضين ,فلول 

طب اللى كانوا بيلفوا سجاير عند مجلس الوزراء ؟

برضه فلول ؟

 انا بقول الكلام ده ليه؟

 مش عشان أشكك فى الثوره ولا فى دوافع الثوار ولا ادخل بقى فى مهاترات ملهاش لازم عشان أثبت بكل ما أوتيت من قوه ان الميدان فى حشيش أو دعاره

مش دى قضيتنا اصلا 

انا مقتنعه ان ميدان التحرير منتخب من الشعب عينه تجريبه بلغة علم النفس وعينه مثيره لأى أخصائى نفسى لأنها بتضم طوائف الشعب كلها لو كان قاصد باحث يجيبها ماكنشى جابها بالحرفنه دى

ثقافات مختلفه واعمار مختلفه 

كبار وصغيرين 

بنات وولاد وعائلات

 وفنانين ورياضيين

مسيحين ومسلمين

متوحدين على هدف واحد 

وطبيعى إن زى ما فى مصر حشيش هايبقى فى الميدان حشيش وزى ما فى فى مصر تظبيط موزز طبيعى يبقى فى  الميدان تظبيط موزز

اللى اقصد أقوله إن ده مالوش علاقه لا بالثوره ولا بدوافع الثوار بس الحكايه كلها

إن الميدان هو مصر بحلوها ومرها بكل مافيها من سلبيات وإيجابيات 

يتبع ....

تحرير ولا عباسيه !(2)

بالنسبه لرأى فى الثوره   :      

                                   

رأى مر بثلاث مراحل هاكدب لو قلت إنى مؤيده للثوره منذ الوهله الأولى ولكنى كنت بعتبرها مجرد

( مولد وهاينفض )

زى كل مره

 أه ...

ماهو زى الشعب ما فقد الثقه فى الحكومه ووعودها الكاذبه أنا كمان وأكيد فى شريحه كتيره زى فقدنا الثقه فى الشعب و مواقفه اللى مش بيكمل فيها زى كل مره

ولكن بعد ما الثوره بقت صلبه ولا يستهان بها إبتديت أحس إنها مش زى كل مره وهاتحقق مغزاها

وساعة موقعة الجمل وسرقة المتحف المصرى ولما الدنيا ابتدت تتقندل عيطت وخفت على البلد زى أى حد كان شايف إن الناس دى لازم ترجع وكنت مستعده أعمل أى شىء عشان الناس ترجع لما الناس إبتدت تقتل وتضرب فى بعضها لإنى كنت خايفه على الأرواح ,

الأرواح اللى بقت شهداء دلوقتى وهما عايزين ياخدوا حقهم

وما اقدرشى أنكر إنى كنت عايزه الثوار يصبروا لحد مافترة رئاسة مبارك تنتهى لإنى كنت حاسه إن الرجل ده بدأ يعمل حساب للشعب فعلا

 وكل اللى عايزه إنه يخرج بكرامته وبس

 جايز كنت صح وجايز كنت غلط انما دى كانت وجهة نظرى ساعتها

 ولما لثوره نجحت

كنت شايفه بعد كده إن الناس تهدى وتخرج كل طاقتها فى الشغل ويعملوا مليونيه  من غير إعتصام كل يوم جمعه تحت بند

( احنا اهو)

 بس ماتقلبشى بإعتصام لأنى أنا ضد تعطيل المصالح 

لأنى شايفه إن مش شطاره أبدا اننا نفضل فى مواجهة الريح على طول لكن مش هايحصل حاجه لو نطاطى لها شويه لحد ماتعدى انا ضد سياسات المجلس العسكرى وضد إنتهاكاته ومتأكده إنه غير سياسى على الإطلاق ولا يقدرعلى إدارة البلاد بل وغبى أحيانا لكن بفكر بنظام أصبر على جارك السو فى سبيل إن البلد تنهض

مش معنى كده إنى مش زعلانه على الشهداء زعلانه وواجعنى قلبى عليهم يمكن مش بطالب بحقوقهم بنفس حماس الثوار لأنى ماانكوتشى بنارهم زي الناس اللى فى الميدان وماشفتهمشى بيموتوا قدام عينيا يعنى برضه بدى لميدان التحرير عذره فى الرغبه فى القصاص 

عارفه إن المجلس سىء وأغبى من الغباء ذاته  بس هو كده من زمان وانتوا اللى اتخدعتوا فى (حامى حمى الثوره )ونسيتوا إنه هو المعنى الحرفى لكلمة فلول ومواقفه دى طبيعيه جدا ومتوقعه

 اللى عايزه اقوله 

 ساعات بيبقى التططنيش حل

 وساعات بيبقى القيام ب (ولا فعل) بيبقى أسلم فعل

وساعات بيبقى الجلوس فى البيت هو مسانده فى حد ذاته 

,يعنى انا كنت بضحك أوى على دعاة الإستقرار اللى بينزلوا يعملوا وقفه احتجاجيه وشايفه انهم لو عايزين استقرار يبدأوا بنفسهم احسن 

 خلاص خرجنا من القمقم والناس دى بقت تعملنا حساب ومش هانرجع للقمقم تانى ولا هانرجع زى ماكنا بس شوية

صبر وحكمه ومنطق

يتبع .....

معتز عبدالفتاح :

الامام مالك يقول: «إذا رأيت الرجل يدافع عن الحق فيشتم ويسب ويغضب فاعلم أنه معلول النية لأن الحق لا يحتاج إلى هذا». ويقول ديفيد هيوم: «قوة المنطق لا بد أن تكون أقوى وأكثر من منطقية من منطق القوة، وإلا اختفى المجتمع». وكما قلت من قبل. لا أخشى على مصر من إسرائيل أو من إيران أو أى دولة أجنبية. أخشى على مصر من بعض المصريين حين يضعون الشخص فوق المبدأ، الذات فوق المجموع، النفس فوق العقل. نعم أخشى على مصر من المصريين حين يفكرون بمنطق الثأر وليس بمنطق العدل؛ بمنطق الماضى وليس بمنطق المستقبل، بمنطق العصبية وليس بمنطق التعددية.

تحرير ولا عباسيه !(1)

ايه رأيك فى الثوره ؟

 ايه موقفك من الثوره ؟

 انتى مع الثوره ولا ضدها ؟

انتى مع ميدان التحرير ولا مع الكنبه ولامع الفلول ؟

دى عينه من الأسئله اللى بتسألها وللأسف مش بعرف أرد عليها بكلمه واحده لسببين:

  أولا: لأن موقفى من الثوره معقد حبتين وصعب يتلخص فى كلمه إسمها أه أو لأ

 وثانيا: لأن معظم الناس بتاخد الكلام حزمه على بعضها بمعنى

 إنت مع الثوره؟

تبقى لازم تكون مع ميدان التحرير وتكون مأيده على طول الخط من 25 يناير إلى إعتصام مجلس الوزراء  مرورا بحرق السفاره وهدم سورهاو تكون مع الثوار بسلوكياتهم الخطأ والصح و تكون مع 6 ابريل

 و تكون ضد المجلس وشفيق والاخوان والسلفيين

وده لا يصح

 ليه الواحد لازم يكون مع أو ضد

 ليه مايبقاش مع  الثوره بس لما يحب ينقدها ينقدها براحته من غير ماتتفتح نار جهنم عليه ويتقال عليه فلول مره وحزب كنبه مره واغلبيه صامته مره وبتاع الإستقرار مره ومنكم لله خربتوا البلد مره؟

وبالرغم من إن لا تنطبق عليا مواصفات أى فئه من الفئات دى لكن كلهم عندهم حق زى التحرير 

إزاى !!!!

فلول :لو بمنطق إنهم تربية النظام القديم يبقى يا عزيزى كلنا فلول

حزب كنبه:  ماهولازم تكون فى ناس فى الميدان وناس ماتقدرشى تنزل لأى  ظروف وقاعده فى بيتها يعنى عمرناسمعنا إن فى  ثوره قامت فى بلد بتعداد سكانها!!!

وتبقى ملياريه مثلا؟

طب الميدان يستوعبهم إزاى؟

اغلبيه صامته : بتنقسم لنوعين: ناس مش بتحب تزعل حد أو مش بتستحمل النقد أومش بتحب تدخل فى جدال  أوكلامهم محسوب عليهم زى فنانين ولاعبى الكرة مثلا

( القائمه السوداء إياها ) و بتسكت وبرضه مش بتسلم من السخريه

وناس تانيه ساكته عشان مش فاهمين وشايفين كل حاجه وعكسها وده غصب عنهم  برضه عشان  فى حاجات غامضه كتير حتى بالنسبه للثوار نفسهم

بتوع الإستقرار : فجأه كده بقى الإستقرار كلمه قبيحه وعجلة الإنتاج أوقح؟

 نفسى أفهم بننقدهم ليه ؟

الناس ديه سعادتها فى الإستقرار وكانت بتحب مبارك عشان السبب ده ولا بتفكر فى الدستور ولا مجلس الشعب ولا حكومة الإنقاذ الوطنى ولا غيره وشىء طبيعى إنهم يبحثوا عن الإستقرار لأنه المحور اللى بتدور عليه حياتهم زى ما الحريه هى المحور اللى بتدور عليه حياة اللى فى الميدان وزى مافى ناس بتدور على الإستقرار بقيت حاسه إن  فى ناس بتدور على عدم الإستقرار برضه وليها مزاج فى الفوضى وكأنها حاسه مثلا إن الإستقرار ده تواطىء وضعف 

منكم لله خربتوا البلد : ماهم شايفين البلد بتخرب فعلا قدامهم أرصفه بتتكسر ومبانى بتتحرق وأسعار بتزيد وبورصه بتقع هايقولوا إيه غير كده ؟

وكل دول مش بيسلموا من السخريه والنقد والتريقه ليل نهار

ده غير إنك لو ضد الثوره لأى سبب يبقى إنت بقدرة قادر بقيت ضد الشهداء كمان ويارب يتعمل فيك أو فى حد من قرايبك زى ماتعمل فيهم !!!!

ده على إعتبار إن فى ناس بتفرح فى الموت يعنى ؟

 يبقى الحل الوحيد إنك تكون مع ميدان التحرير على طول الخط عشان هما أكبر منك ويعرفوا مصلحتك أكتر منك ومش من حقك تقول رأيك ولا تتنفس وإلا قلة الأدب وطولة اللسان تشتغل على طول وطول النهار نتهم حزب الكنبه  إنهم سلبيين ونشتمهم ونسنفز فيهم عشان ينزلوا التحرير فى حين إن مافيش فايده من نزولهم لأنهم مش مقتنعين بالنزول من أساسه يبقى نزولهم أكيد مش هايكون مؤثر

 لأن ثوره من غير حماس ماتنفعشى 

يتبع .....

سيناريو اسقاط مصر للأبد

ابطال المسلسل 

الجزء الاول من المسلسل 

إبتدى بالأتى :

موقعة الجمل

  سقوط عدد من الشهداء

المشهد الاول

تحدى رهيب بين ثوار التحرير ومبارك وصوت هتافات  فى الخلفيه بتقول

(مش هانمشى هو يمشى )

المشهد التانى

المشير يذهب الى مبارك ويطلب منه التنحى كالأتى:

ياريس انا من رأى نعملهم اللى هما عايزينه عشان فى ظباط جيش ابتدت تنزل ميدان التحرير وانا خايف يحصل انقلاب

مبارك:

انت شايف كده يا طنطاوى ؟ ماشى بس بشرط تتضمن لى السلامه انا وعيلتى وفلوسى اللى نهبتها من الشعب

طنطاوى : اطمن يا باشا ان شاء الله طول مانا عايش  ماحدش هايقرب لك انت وعيلتك وماتخافشى 

هاظبطك

مبارك :اتفقنا يا طنطاوى روح هات عمر سليمان يقول خبر التنحى انا مش هاتكلم مع ولاد الكلب دول تانى

وقال عمر سليمان الخبر وهللت مصر وركب العسكر

الجزء التانى من المسلسل 

المشهد الاول

موقعة مصطفى محمود ثم مجلس الوزراء ثم سقوط عدد من الشهداء 

تحدى رهيب بين الثوار والمشير وضوت هتافات بتقول

(يسقط يسقط حكم العسكر)

المشهد التانى :

المجلس العسكرى منعقد ومشاورات حول انتخابات رئاسيه فى يناير بعد وصول الامور لذروتها

عنان :انا شايف يا سيادة المشير ان الحكاية إتأزمت جدا وان العيال البلطجيه دول مش هايرجعوا الا لما نسيب لهم الدنيا مطربقه على دماغهم

طنطاوى : انت شايف كده يا عنان ؟

عنان :ايوه يا سيادة المشير

طنطاوى : وانت يا مختار ايه رأيك ؟

مختار: بصراحه انا من رأى اللواء عنان وياريت حد من اخواننا الحلوين يمسكوهم عشان يعلموهم الادب

طنطاوى : وانت ايه رأيك يا شاهين ؟

شاهين : انا برضه شايف كده يا سيادة المشير بس الخطوه دى اذا ماتحسبتشى كويس يبقى هايحصل مصيبه هاييجى واحد يقرفنا ويسمع كلام العيال البلطجيه دول ويحاسبنا خدنا ايه وعملنا ايه  ومش بعيد نتحاكم هااااصت بقى 

المشير:لا طبعا انا مش ممكن اسمح بكده انت عارف كويس ان الجيش خط احمر مين ده اللى يقدر يحاسبنا ؟ 

عموما انتوا شايفين كده ؟

ماشى بس بشرط اللى ييجى نظبط معاه

عنان : انا بقترح نجيب حد من اخواننا الحلويين فعلا يا سيادة المشير طول عمرنا علاقتنا كويسه بيهم وهما عموما لا يهمهم شهداء ولا دياولوا دول ناس عمليين مش عندهم وقت للعواطف الخايبه دى هما كل اللى يهمهم الكرسى

المشير :ماشى هاتولى واحد منهم عشان اتفق معاه

وجه واحد منهم

(س) :انا سعيد جدا بالشرف اللى حضرتك ادتهولى ده انا مش عارف اشكرك ازاى

المشير:اه بس شرط تضمن لنا السلامه وماحدش يقولنا لحق شهداء ولا يحزنون ؟

(س) : امرك يا سيادة المشير ان شاء الله طول مانا عايش ماحدش هايقرب ليك انت ولا اى حد من المجلس ولاحد هايحاسبكم

المشير: طب والعيال البلطجيه بتوع التحرير هاتعمل معاهم ايه ؟

(س) : العيال دى مش بلطجيه يا باشا دول( كفره )

وربنا قال فى كتابه الكريم :يا أيها الذين امنوا إن تطيعوا فريقا من الذين كفروا يردوكم على اعقابكم خسرين ماتخافشى يا باشا انا

هاظبطك

ومشى المجلس وركب( الاخ ):

 المشهدالأخير فى اخر حلقه فى الجزء التانى من المسلسل : 

نهار خارجى فى ميدان التحرير(2025) على واحد من المتظاهرين مسحول على الأرض وهو بيردد فين (عايزين حق الشهداء ولا للمحكمات العسكريه)

الخ......

البوست لحد كده انتهى 

مش قصدى اشتم فى حد ولا اتريق على حد ولا اشكك فى حد ولكن هو مجرد تعبير عن خوفى من اللى جاى

من اننا نفضل نلف فى الحلقه المفرغه دى لحد مانتعب وندوخ ومنبقاش قادرين نكمل ولا قادرين نتراجع ويبقى

ياثوره ماتمت