أدوها فرصه

 

هذا و قد شُكلت الحكومه الجديده وطالعتنا ستاتوسات الفيسبوك وتويتات تويتر بما لذ وطاب من نقد للحكومه و تعالت الأصوات الحاده أنها حكومة عجائز وأن كثير من الوزراء لهم تاريخ غير مشرف أو إنهم ذو خلفيه فلوليه أو إنهم من زمن الإخوان!!

بل و يستنكرون ويشجبون أن هذه ليست بحكومه مابعد الثوره!

 وكأن حكومة قنديل كان يوجد بها وزير وحيد يسمن ويغنى من جوع

 فى رأيى الشخصى أنهم فعلا حكومة من العجائز ومن الممكن (وليس أكيد) ان يوجد من هو له تاريخ فى الحزب الوطنى ونعم يوجد وزيرين من حكومة قنديل

 but sooooooooo whaaaaaaaaaaaat

هل هذا مقياس جيد للكفاءه ؟ 

هل هذا له علاقه بمدى كفاءة حكومة مابعد الثوره ؟ 

هل من المعقول أننا لم نتعلم شىء من تجربة الإخوان ومازلنا نقول يجب أن يكون وجه جديد ؟ 

هل لازالنا نختذل نجاح إختيارتنا فى كون هذا الشخص وجه جديد فقط ليس إلا؟؟

 ألم يكن مرسى وجه جديد ورفيق كفاح ورفيق ميدان وأهله وعشيرته فصيل وطنى ولذلك فضلناه على شفيق الفلول ؟؟ :) 

هل نعتبر أن العواجيز كلهم سيئين ؟؟

ألم يعتبر كبر السن دلاله على الخبره؟

هل البلد فى حالة رفاهيه لكى نعين الشباب الأن؟

 هل هذا التوقيت المناسب لذلك؟

قال لى أحد أصدقائى (من عاصرى اللمون) لا أريد فى الحكومه الجديده حزب وطنى أو إخوان أو فلول أو إخوان أو داخليه !!!!

وبالرغم من إنه أقصى قيما يقرب من ثلاث أربع الشعب 

إلا إنه أيضا إعتبر إن (كل) الإخوان و الحزب الوطنى والفلول و الداخليه غير كفء للوزاره  !!!

لم أقل إنها سوف تكون أنجح حكومه
ولا أتوقع من الأساس أداء فوق الممتاز بسبب تردى الأوضاع
ولكن أيضا كتابة شهادة وفاتها من قبل رؤية أدائها هو نوع من أنواع العبث 
لست متفائله ولكن ثقتى فى الإختيار على أساس الكفاءه وليس على أساس (الدقن) أكبر
إعتبروها مرسى وأدوها فرصه :)
ولما تثبت عدم جدارتها نبقى ننزل الشارع نطالب باسقاطها
وفر مجهودك لوقته متعملشى فيها ثائر عمال على بطال 
 

المتأسلمين على مدار عام

فكرت فى تجميع فيديوهات للإخوان ومؤيديهم على مدار مدة عام
 عشان لما اخوانى يقولك هاتلى لينكات على التكفير والكدب واباحة القتل وتأجيج الفتنه وعلى السبب اللى خلانا ننزل يوم 30
 تبقى تحط اللينك ده فى عينه

العريان يرفض شعار يسقط يسقط حكم العسكر ايام ماكانت العلاقه حميمه بينه وبين الجيش قبل ماينفصلوا

       هنا

الكتاتنى يطلب من زياد العليمى الإعتذار لطنطاوى 

هنا

مرسى بيقول ان قطع الطرق جريمه لا تهاون فيها 

(انما لأهله وعشيرته اوك)

هنا

صفوت حجازى وسلمنى السلطه وانا مفتحشى ملفات الفساد 

(الغايه تبرر الوسيله دائما عند الإخوان المتأسلمين)

هنا

الشيخ الزغبى من يموت فى مواجهات الاخوان مع الجيش مجرم وليس شهيد 

هنا 

حزب الأصاله والمرونه السلفى بيقول على معتصمى مجلس الوزراء اجندات وممولين 

هنا 

تعليق الدكتور المحترم (اللى مش بتاع صفقات مع شفيق ابدا )ياسر برهامى على احداث مجلس الوزراء

هنا 

المحترم خالد عبد الله يتهم معتصمين التحرير بالزنا 

هنا

رجال الدين بيخوضوا فى عرض ام عبايه بكباسين 

هنا

الأستاذ محمود شعبان بتاع هاتولى راجل بيبيح دم المعارضه اللى عايزه تقوم الرئيس وبالتالى دمنا كلنا

هنا

هشام قنديل رئيس الوزاره بيتكلم عن الرضاعه والاسهال بدل مايتكلم عن وضع البلد الاقتصادى
هنا 

الأساتذه اللى بيكفروا الشعب عشان محدش يقولك مفيش تكفير

هنا 

رد مرسى على الشيخ اللى بيكفر شعبه وبيدعى عليهم

ثور الله فى برسيمه 

هنا 

الشيخ عبد المقصود بيدعى على معارضين الرئيس الفاشل ومرسى اخرس مش بيفتح بقه 

هنا 

الفيديو اللى بيهدد فيه الاشكيف عاصم عبد المجيد بتوع 30 يونيو

هنا 

البلتاجى بيعترف ان تفجيرات سيناء من تدبيرهم ومع ذلك المؤيدين  لسه مش مصدقين 
هنا 

عبدالله بدر يسب احد المعارضين له فى المسجد
 (رجل دين مفيش كلام)

هنا
شهادة اخوانى على احداث قتل ستات المنصوره فى مسيرة تأييد الشرعيه
هنا 
وده حسابه على الفيس ومكتوب فيه نفس الكلام
هنا 

الإرهاب لا دين له

نحن نعانى من الارهاب

لأننا سمحنا لأنفسنا أن نرفع الشابوه للفلسطنيين عندما كانوا يقومون بتفجير أنفسهم فى الإسرائليين المدنيين (الأبرياء) ولم نشجب ذلك أو نطلق عليه لفظ إرهاب ولكننا أطلقنا عليه لفظ جهاد ضد الإحتلال لمجرد إنه كان ضد إسرائيل

نحن نعانى من الإرهاب لأننا سمحنا لأنفسنا أن نرفع الشابوه لتنظيم القاعده بزعامة بن لادن أن يهجم على برجى التجاره فى أمريكا وقتل العديد من (الأبرياء ) ولم ننتفض لذلك لمجرد إنه كان ضد أمريكا

ونسينا ان قتل المدنيين العٌزل هو إرهاب وتطرف مهما كانوا أقباط أو يهود أو بوذيين أو مسلمين

وعندما تدعم الإرهاب اليوم سوف تجنى ثمار دعمك له من أرواح المقربين لديك أو أنت شخصيا غدا

للإرهاب وجوه كثيره ولكنه يظل إرهاب

وبالمثل اذا لم ننتفض لنار المحاكم العسكريه اليوم سوف تحرقنا غدا 
واذا لم ننتفض لنار توحش أمن الدوله من جديد سوف تحرقنا ناره غدا 
تخلصوا من ازدواجيتكم وتمحوروا حول مبادئكم وليس اهوائكم حتى تعيشوا فى سلام واتساق ذاتى 

صك الغفران

 

 

ما أصعب التسامح و الغفران !!!
ماأصعب أن ترتدى معطف التسامح لكى يحميك من نيران الكراهيه
خاصة إذا كان من قام بإيذائك قام به عن قصد !!
فلن يجدى أن تقول مئات المرات أنك سامحته إذا لما تكون فعلا قد غفرت له من داخلك و بحور الغفران قد غمرت أراضى المراره وصحراء الخذلان
الغفران هديه من الله إما يعطيها لنا أو لا
الله يغفر لأنه قوى أما نحن فضعفاء 

يا الله إلهمنا الغفران

جنة الإخوان

عندما تقرأ كتاب جنة الإخوان تتخيل إنه سيره ذاتيه جديده لإخوانى منشق إنتبه لنداء عقله بعدما توقف عن الإستعانه به منذ دخوله الجماعه ومن ثم قفز بدوره من فوق أسوارها هاربا من قيودها إلى غير رجعه 

ولكن مايميز سامح فايز عن بقية المنشقين إنه كان طوال الوقت متمردا على الجماعه تمتلىء جعبته بالعديد من الأسئله التى يحاول البحث لها عن اجابات وحينما وجد الاجابه قرر القفز من فوق أسوار الجماعه للأبد

الكتاب يتحدث عن رحله داخل الكاتب أكثر منها رحله خارجه يسأل نفسه ويجيب عليها, يستخدم المنطق فى التفكير بطريقه جيده حتى يجعل القارىء يندهش من إنضمامه لجماعه قائمه على توقف العقل عن التفكير واستبداله بالطاعه العمياء

 يتحدث عن الأثار النفسيه التى خلفتها الجماعه بداخله اكثر من التحدث عن الأمور الدينيه و الإجتماعيه والسياسيه داخل الجماعه 

مما أعطى للكتاب مذاق خاص وبٌعد أعم و أشمل حيث يساعد القارىء على تحليل سلوكيات أفراد الجماعه دون أن يكون شخص متخصص

إلى هنا انتهيت من سرد أرائى فى الكتاب وإليكم بعض فقراته إذا أردتم الإطلاع   

          

( وفى تلك اللحظه التى تتمازج فيها الدعوتان دعوة الإسلام ودعوة الإخوان حتى لا ترى فرقا بينهما تبدأ التكليفات فتجد نفسك لإراديا وأنت تدافع عن الجماعه كأنك تدافع عن الإسلام وعندما تدافع الإسلام وكأنك تدافع عن الجماعه وبالتالى لا غرابه لما نجده من الشباب الإخوانى الذى لا يمل من تبرىء نفسة من تهمة تكفير الأخر لأنه فعلا لا يرى فى خطابه نبرة تكفير ولأنه يظن أن كلا من الإسلام وخطاب الجماعه منفصلان بينما هما فى عقله الباطن خطاب واحد فقد يكفرك الإخوانى ثم ينفى إنه كفرك لأنه يردد فقط)

(أذكر من دفعنى للتوقيع للبرادعى أثناء حملة جمع التوقيعات فى العام 2010 كان شابا اخوانيا,اليوم وفى 2012 تغير الخطاب وأضحى البرادعى فى نظر الإخوان لا يصلح وهو عميل لأمريكا وخرج علينا أحد شيوخ السلفيه وقال أن البرادعى جاء لتطبيق الليبراليه وترجم الليبراليه بأنها دعوى لأن تسير أمهاتنا فى الشوارع دون الحجاب فسألت نفسى أو لم يكن التيار الإسلامى على علم بأنهم يساندون زنديقا؟؟؟ ولنفترض جدلا أنهم أخطأوا فى الحكم على البرادعى حينها أليس ذلك أدعى أن يفكر شباب الإخوان فى أنه من الممكن أن تخطىء قيادتهم؟؟)

(صعدت إلى فصلى الدراسى وأخذت أحدث بعض زملائى عن إننا يجب أن يكون لنا دور فى الهجوم على سياسات أمريكا واليهود ضد المسلمين ضاربا بعرض الحائط جميع التحذيرات من ادارة المدرسه وقررنا أن نخرج فى تظاهره بعد اليوم الدراسى ولكن قد أصابتنى الرجفه من كلمة تظاهره لقد طلبوا منى ان أتقدمهم ولكنى خزلتهم وبمجرد إنتهاء اليوم الدراسى تركتهم وذهبت وعندما حضرت المدرسه اليوم التالى وصل الى مسامعى انها كانت معركه مع رجال الامن

 تملكتنى الحسره وإعترانى الندم لاننى تهاونت فى حق اصدقائى كان يجب ان أتصدرهم فى هذا الأمر وتركى لهم ليس له ترجمه سوى إنه نفاق هل يقول الاخوان مالا يفعلون ؟أم ان هذا أمر خاص بى؟)

(لم يعوضنى المسجد عن مفهوم الأسره الاخوانى أنا الان أعيش منفردا أشعر بهذا الخواء العاطفى الذى كان يملأه مفهوم الأسره داخل الإخوان وهذا المفهوم من أهم أسباب بقاء التنظيم طوال تلك السنوات يكفى ان تعلموا إنه لو مر يوم دون أن يراك الأصدقاء فى المسجد فإنهم يأتونك فى المساء للإطمئنان عليك فى أفراحك وأحزانك يكونون بجوارك

 كانت كل تصرفاتهم هى فى نظرهم عباده وسببا فى إعطائهم الحسنات غير ان تلك الحسنات لم تكن تأخذ الشرعيه الا إذا كانت للإخوان وطالما انى تركتهم فلا حسنات من ورائى)

(سألت أحد اصدقائى الملتزمين غير إنه لا ينتسب للاخوان من ستختار رئيسا فرد قائلا الشيوخ والعلماء يلتفون حول الدكتور مرسى وهل تعرف الدكتور مرسى معرفه جيده ؟

قال لا لكن أثق فى هذه الزمره من العلماء التى إلتفت حوله هنا إنسحقت رؤيته أمام رؤية الشيخ

تمازج الخيوط بين الإله والشيخ جعل الامر اكثر تعقيدا بالظبط مثل تمازج مفهوم الدين والجماعه سابقا وقد يقول احدهمان العيب فى التطبيق ومامن نقيصه فى الدين غير ان القائل قد تناسى ان هؤلاء الشيوخ الذين اساءوا التطبيق هم أنفسهم مايسطرون لنا الكتب والمجلدات التى نرى الدين من خلالها وهنا تتحول النقص فى التطبيق إلى دين وإذا أردت التحلل من تلك الخطيئه فعليك أن تتحلل من الدين بهذا المفهوم وتتفكك ومن ثم تعيد بناء الامر من جديد)

 

30/6

 

وهكذا أسقطنا الإخوان :)

أسقطنا الكابوس والهم اللى كان كابس على قلوبنا

أسقطنا الجهلاء والمتعصبين

الشعب من 30 يونيو وهو بيكتب بثورته حقائق للتاريخ :

أولها إنه شعب لا يٌقهر

 إنه فاهم و واعى ومش بينضحك عليه بالزيت والسكر

 مهما كان بسيط ومهما كان كل همه لقمة العيش

إنه نفسه فى رئيس يمثله مش يمثل عليه

إنه يقدر يعاند امريكا ويستخدمها فى ثورته على الإخوان

 زى ماإستخدمته أمريكا فى ثورة يناير عشان تبليه بالإخوان

إنه شعب مالوش أى مقاييس أو تقدر تتنبأ برد فعله تجاه أى حاجه

 فى الوقت اللى تتخيل فيه إنه زهأ ومبقاش عنده حماس تلاقيه أثبتلك العكس تماما وقالك لأ عندى أمل وحماس إنى أغير حالى للأحسن

إنه كره الإخوان أكتر ما كره مبارك 

وأنا فى الاعتصام وسمعت البيان كنت فرحانه أوى لدرجة انى كان نفسى أسلم على كل مصرى وكل مصريه وأحضنهم وأبوسهم وأباركلهم

عمرى ماكنت متضايقه إنى مكنتش جزء من ثورة ينايربالرغم من انى كنت من معارضين مبارك ومؤيده للثوره عليه

 لكن للأسف كنت متأكده انها مش ثوره مصريه صافيه وانها مهما حاولنا ننكر كانت (برعاية امريكا)

إنما فخوره إنى جزء من تصحيح مسار ثورة يناير وهو يوم

30 يونيو

وبفتكر النهارده كل البوستات اللى كتبتها تحذير من الاخوان على مدار سنه كامله ونشوف ايه من كلامى اتحقق وايه لأ

 بوست سيكولوجية الإخوان1  اول بوست اكتبه عن الاخوان 

وبوست إينشتين والغباء 

 اللى كنت بقصد بيه ان الناس كانت عارفه ومتأكده ان الاخوان اندال وملهمشى كلمه ولا عهد لهم ومع ذلك انتخبتهم مع احترامى لكل منتخبيهم

  وبوست أنا واحده من العاهرات اللى انتخبوا شفيق اللى ياما اشتمت بسببه  لانى انتخبت قاتل لم تثبت عليه تهمة القتل بدلا من انتخاب عصابه 

وبوست الطرف التالت  اللى كنت بثبت بيه ان الإخوان هما الطرف التالت و الى كانوا هيولعوا البلد لو كان شفيق هو اللى نجح

وبوست سياسة القطيع 

وبوست استبداد واستعباد 2 من سلسله بوستات الاستبداد والاستعباد اللى كنت بتكلم فيه عن الاستبداد والدين

وبوست لم يحن سقوطه بعد  اللى كنت بتكلم فيه عن التوقيت الخاطىء لاسقاط مرسى

وبوست عم فتحى وحكايته مع الاخوان 1و2

وبوست ليه هاقول للدستور لأ 

وبوست إلا الإخوان

وبوست سيكولوجية الإخوان 2 

 كنت عارفه  للأسف ان الاخوان خراب مصر ونهايتها 

وفعلا حصل
واتعلمت من اللى حصل حاجات كتير اوى اولها انى لازم اكون فى موقع الحدث عشان احكم صح 
 حسيت بالقهر اللى كانوا بيحسوه ثوار يناير لما كان حد بيخوض فى عرضهم او يقول انهم (كلهم) ممولين او قابضين او بلطجيه لانى اتحطيت فى نفس موقفهم وبقيت ادافع نفس دفاعتهم لما حد يقول ان اللى نازلين ضد مرسى بلطجيه وفلول 
اكتشفت فى نفسى حاجه جديده كنت دايما بستغربها فى اى ثائر شجاع
 وهى انى فعلا مستعده اموت فى سبيل ماأؤمن به 

انا كنت يائسه جدا لكن أنا متفائله جدا باللى جاى دلوقتى

لأننا وجهنا لأمريكا صفعه وعرفناها اننا لما نحب نعمل حاجه هنعملها ودى البدايه وحاسه ان بعد كده هيبقى احسن ان شاء الله

 ثقتى عظيمه فى الله والجيش من بعده ياما صليت وسجدت ودعيت لربنا انه ينقذنا من الاخوان وكنت بكلم ربنا اكنه معايا واقوله يارب انت عارف انهم منافقين وكدابين يارب رد كيدهم فى نحورهم وربنا استجاب لدعائى ودعاء مصريين كتيرلسه بيفهموا الحمد لله

 كفايه انى اسمع إسم كلمة الجيش أو شيخ الازهر او البابا تواضروس أو البرادعى عشان اطمن ان الوطن فى يد عقلاء

 كفايه انى أشوف الحاكم العسكرى واقف على المنصه والجيش مأمن الحشد فى بنها عشان أطمن إن مفيش حد من الإخوان هيقرب مننا

أو يعتدى علينا

 كل حريات وثورات العالم فى نظرى متساويش لحظة إحساس بالأمان ممكن أفتقدها بحكم المتعصبين والجهلاء

 وهو ده تعريف الحريه بالنسبه لى

إمبارح بس انا أخدت حريتى :)

ملحوظه :الصوره من إعتصام بنها

سيكولوجية الإخوان 2

 بمناسبة إنى فى ناس مؤيدين الإخوان ((بتوع ربنا)) أو الإخوان نفسهم 

((بتوع ربنا برضه)) بيدخلوا عندى فى المدونه وبيسمعونى مالذ وطاب من الشتايم لمجرد إنى بختلف معاهم فى الرأى  أنا بقولهم إنكم كل ما تزيدوا فى الشتايم هازود فى البوستات اللى بتحرق دمكم وبتجننكم وبتخلى النور اللى وشكم ينطفى وزبيبة الصلاه تختفى وبتبانوا على حقيقتكم :)

فى الجزء الثانى واللى أكيد مش هيكون الأخير فى الحديث عن سيكولوجية الإخوان 

هنتكلم عن الحيل الدفاعيه اللى بيعملوها المؤيدين فى حالة لما مرسى بيعمل مصيبه جديده فى البلد

الإخوانى لما مرسى يعمل مصيبه

 يبدأ الأول بحيله دفاعيه إسمها الإنكار

وتلاقيه رايح قايلك إيه مصدرك ؟؟

جبت الكلام ده منين؟؟

أكيد من الإعلام الفاسق الداعر الفاجر إعلام مبارك ...إلخ

عشان يشكك فى معلوماتك طبعا

ولما يلاقى مفيش فايده من الإنكار و المعلومات أكيده 

يقوم يعمل حيله دفاعيه تانيه إسمها الإسقاط 

ويروح رامى التهمه على حد من الإتنين

 (المخلوع) أو جبهة الخراب (على حد تعبيرهم)

ولما يلاقى مفيش مبرر منطقى يخلى مبارك أو جبهة الإنقاذ مسئولين 

 وإن التهمه لابسه مرسى لابساه

يبتدى يعمل حيله دفاعيه إسمها التبرير 

والمصيبه تتحول بقدرة قادر إلى حكمه و حنكه سياسيه

 وتخيل بقى لو مرسى ماكنشى عمل كده كان ايه اللى حصل ؟؟!
هاهاهاهاهاهاهاهاهاهاها

(ضحكه رقيعه)

ماذا حدث للثوره المصريه ؟

ماذا حدث للثوره المصريه للكاتب والمفكر جلال أمين 

عندما بدأت فى الصفحات الأولى من الكتاب شعرت بالضيق من حصر كم السلبيات فى المجتمع المصرى على غير هدى للحلول !

ولكنى بعدما استطردت القراءه وجدت الكاتب يحلل السلبيات التى تخص الجانب الإقتصادى وسببها وطرق علاجها فقط بوصفه أستاذ إقتصاد فى المقام الأول

 ولكنه للأسف أغفل بقية الجوانب

  وقد حرص على إنهاء كل فصوله وفقراته التى يتحدث فيها عن الثوره المصريه وماهيتها والعلاقات القائمه بين أفراد الشعب بسؤال؟

 وهذا فى حد ذاته لم يجعلنى أستمتع بالكتاب لأننى كنت أريد البحث عن إجابات منطقيه داخل الكتاب بما إن عنوان الكتاب عباره عن سؤال 

ولكنى وجدت الكاتب بدوره يبحث عن إجابات

ما أعجبنى فى الكتاب تركيزه على الأمور النفسيه التى يصعب قياسها وقت الثورات ولكنها تكون مؤثره فى نجاح الثوره من فشلها والتى لا يلتفت إليها البعض كثيرا 

مثل قوة الشعور بالغضب ودرجة عناد أصحاب السلطه ومدى تأييد قوه خارجيه للمتمردين فى الداخل

 كما أعجبتنى المقارنه التى اجراها بين ثورة يوليو وثورة يناير والمقارنه التى أجراها بين الدين والتدين

وإلقائه الضوء على أن ظاهرة الإستعمار تعمل الأن فى ميدان النفس أكثر من ميدان الحرب

 أيضا لفت نظرى إصراره فى بعض صفحات الكتاب على وصف الثوره المصريه بالإنتفاضه  ثم تسميتها مجددا بالثوره  !!

 أم هى بمثابة زلة لسان بسبب موقفه من الثوره كما سيضح فيما بعد؟

أعجبنى أيضا إلقاء الضوء على عدم حيادية الإعلام وقت الثوره بسبب أن بعض القنوات كانت تختار من المعلقين من تعرف انه يناصر الثوار وتمتنع عن دعوة غير المناصرين لها !

و إلقائه الضوء على بعض السلبيات كعدم وجود برامج واضحه أثناء الترشيح لمجلس الشعب (كأن يكتفى مثلا بالدعوه الى العداله الاجتماعيه كأن أحدا يريد الظلم الإجتماعى!!)

ومن المثير فى الكتاب أن الكاتب حاول الإشاره إلى أن ثورات الربيع العربى وتساقط الحكام الواحد تلو الأخر على طريقة الدومينو بأنها نادره فى التاريخ وهى لاتحدث عادة إلا بمساعده من الخارج وهو ما أتفقت معه مائه  بالمائه  

ومن الفقرات التى أعجبتنى:

1-(إعترض أحد بالقول إن فى الصوره مظنه للعباده أى الرسم والتمثال قد يوقعان المرء فى الوثنيه التى نهى عنها الدين حينها أجابه الشيخ محمد عبده إن لسانك أيضا مظنه للكذب فهل يجب ربطه مع أنه يجوز أن يصدق كما يجوز أن يكذب ؟؟)

 2- موقف ناشط سياسى من الأقباط خلال الحقبه الناصريه كان لايخفى بالمره رفضه لفكرة القوميه العربيه اذا كان شعوره الوطنى وحبه لأمته محدودين بالحدود السياسيه لمصر وحدها )

3- الذى يمنع التقارب ويديم الخلاف ليس تضارب الأراء ولكنه تضارب المصالح الشخصيه

إلا الإخوان !

 كنت عايزه أكتب بوست بقالى  فتره أتكلم فيه عن الأوضاع السياسيه الجاريه لكن كنت زهقانه جدا زى كل المصريين

 مش زى كل المصريين أوى

  خلينا نقول زى بعضهم

 لأن أكيد فيه فريق هايص من بعد ماحس ان البلد بقت عزبة ابوه 

ماهى مصر كده لازم يكون فيها فريق هايص وفريق لايص 

قبل الثوره كان الحزب الوطنى ومن يؤيده الفريق الهايص وبقية الشعب لايص

 وبعد الثوره برضه بقوا الإخوان ومن يؤيدهم الفريق الهايص وبقية الشعب برضه لايص

يعنى لازم الشعب يبقى لايص فى الحالتين!!

بالرغم من اننا دايما بنقول إن مصر مش ممكن تسقط وإن شاء الله حالها هاينصلح

 ودايما نستشهد بإنها ذُكرت فى القراءن وده كافى انها لن تسقط

 لكن ساعات بحس انها وكأنها ذُكرت فى القراءن لأنها خير مثال على البلد اللى هاتفضل طول عمرها مغلوب على أمرها وحالها مايل!:(

المهم الحوار المصرى دلوقتى ماشى كالأتى :

مصر بقت منشقه على نفسها و كلها شلل 

ومافيش واحد مصرى ماسك فى إيد أخوه 

إلا الإخوان 

 فريق منظم ومتعاون

 قائمين على السمع والطاعه صحيح مافيش كلام

 بس ايد واحده على الحلوه والمره وعشان كده ناجحين ووصلوا للتمكين وخدوا مصر 

يرد واحد من الثوار  اللى دمهم حامى يقولى:

إييييييييييييييييه؟  الإخوان خدوا مصر ؟؟لا طبعا ولا يقدروا يابنتى انتى هبله؟؟ 

دى الثوره مستمره انتى متعرفيش كده ولا ايه ؟؟؟!!

أقوله إزاى مستمره ؟؟

أنا بناضل وبثور كل يوم؟

ايوه يعنى ايه الفعل الثورى اللى حضرتك بتعمله دلوقتى وبسببه تبقى الثوره مستمره ؟

بستنكر وبنقد مبتشوفنيش على الفيس وتويتر ؟!

طب وده كفايه؟؟

 لأ روحت المليونيه بتاعة المقطم وفشخت أم الإخوان أنتى مشفتنيش هناك؟؟

طيب المهم المحصله إيه بعد ده كله؟ إنت أفدت البلد فى إيه؟؟

معرفشى بس الثوره مستمره !!!

لازم تعترف بفشل الثوره وتعمل ثوره جديده

لأ أنا عاجبنى دى !

 تفضل المناقشه على كده مع إن الثوره لا مستمره ولا حاجه دى إتركبت من زماااااااااان وإتمشى بيها وخسرت بنزين كتير و باظت وإتركنت لا الاخوان استفادوا بيها ولا الشعب إستفاد بيها

شعار الثوره مستمره هو مجرد شعار فارغ من أى مضمون 

زى بالظبط شعار حق الشهداء وشعار القصاص اللى لبسونا فى مرسى

 طب مرسى رجع حق الشهداء ؟

لا بس ماكنشى المفروض ننتخب قاتل!

طب يعنى عشان متنتخبش قاتل تقوم تنتخب عصابه كامله؟؟

 لا بس شفيق ؟؟؟ انتى اكيد اتجننتى

عشان تفتكرى انى هانتخب بتاع البنبونى !!!!

وبالرغم من انى بشوف كتير من أصحابى الثوريين لهجتهم اتغيرت على ستاتوس الفيس ناحية بتاع البمبونى اللى ياما إتشتمت بسببه

 وإتحول  بقدرة قادر من شفيق بلوفر لسعادة الفريق شفيق :D

الا انى بطنش وبعمل نفسى مش واخده بالى

 لييييييييييييه بقى ؟

عشان مش هاكسب حاجه لما اعايرهم زى ما البعض بيعمل 

 أنا اللى يهمنى إننا نلتف حوالين شخص أى شخص بس (((نلتف)))

لكن احنا مش بنلتف احنا كل واحد فى ناحيه وكل واحد باعتقاد 

 90 مليون فكر واعتقاد 

 بالنسبه للثوار وان كنت شايفه المصطلح ده بقى مبتذل أوى لأنهم هما حتى بقى كل واحد فيهم فى إتجاه 

ولكن لحد دلوقتى بيقسموا الناس وبيعملوا نفس الحاجات الغلط اللى ياما نقدتها فى بوستاتى الأولانيه وقت الثوره وزعلت منى ناس كتير 

برضه لسه بيقسموا الشعب لثوار وفلول وحزب كنبه و... و ... مع ان مصر إتلخبطت على بعض من زماااااااااااان 

من أيام إنتخابات الرئاسه وبقى صعب تطلق على فئه معينه إنها فلول أو غيره

يطلعلى اخويا الثائر تانى يقولى:

لاااااااااااااااااااا اصلى انتى مش فاهمه احنا مصالحنا متعارضه دى ناس بتكره الثوره عمرهم ماهيساعدونا

بيكرهوا الثوره اه لكن بيحبوا مصر ؟

اهو اهو اديكى قلتى بيكرهوا الثوره؟

وقلت كمان انهم بيحبوا مصر يعنى لو جبتلهم بديل هايلتفوا حواليه ونبقى أقوياء فى مواجهة جبروت الإخوان

ايه ده يعنى انتى كمان زيهم؟ انتى فلول ؟؟؟!!

ولهذا تنتهى المناقشه بينى وبين الاخ الثائر لانه استخلص بذكائه حقيقه مهمه وهى انى  فلول لمجرد انى اختلفت معاه وطبعا لا سبيل لاقناعه 

والايام اللى فاتت لسه معلمتوش ان فى الاتحاد قوه وفى التقسيم ضعف

 (ولكم فى الاخوان عظه)

 ولسه متعلمشى إن ثوره قامت بغرض الانتقام وليس الاصلاح لازم تبقى نهايتها الإخوان!!

بالمناسبه فى رأى سمعته الأيام اللى فاتت من شخصيه على الفيس كان بيقول

 ان عشان الثوار كانوا عايزين يستأثروا بالثوره لنفسهم ويخطفوها من الشعب قام الإخوان كمان خطفوها منهم وإستأثروا بيها 

نييجى للأقباط بقى

 أقباط مصر غلبانين جدا نفسهم بس يعيشوا بحريه  من غير إضطهاد  وده أبسط حقوقهم وعشان كده معظمهم إختار شفيق عشان يحصلوا على 

(حريتهم الخاصه بيهم وليس الحريه التى رسمها الأخرون لهم)

  واللى مقدرهاش حد 

لكن للأسف اتصدموا بنظام  دمهم تقيل على قلبه ونفسوا يغورهم فى كندا أو فى أى حته ويرتاح منهم 

وكل ماتيجى مناسبه تخصهم يقوم ينكد عليهم بفتاوى لوذعيه ملهاش اى سند او دليل قراءنى تحرم تهنئتهم بعيدهم

أما بخصوص السلفيين واضحين وصرحاء أكتر من الإخوان بس برضه مفيش مانع انهم ياخدوا حته من التورته 

وعندهم الغايه تبرر الوسيله زى بقية التيار الدينى 

وللسبب ده معندهمشى مانع يحطوا ايديهم فى ايد واحد زى شفيق كانوا بيقولوا عليه فلول أول ماطيف الرئاسه هفهف عليه طالما هايفوتلهم منصب زى الاستاذ ياسر برهامى كده :D

 ولما حصل و ركبوا الإخوان حولوا الدفه على الإخوان

 لو الإخوان عرفوا يملوا عينهم بمنصب أو غيره بيسكتوا ويطرمخوا عليهم

 ولو الإخوان نفضوا ليهم بيبدوأ يكشروا عن أنيابهم ويفضحوا الرئاسه زى ماحصل مع علم الدين كده :D

ناس أصحاب مبدأ صحيح !

أما بخصوص أبو إسماعيل ولو أن خساره أجيب سيرته

 لكنه مجرد شخصيه متسلقه نفسه يفضل فى الصوره بأفعاله القذره سواء باعتصام او نباح فى الإعلام أو تعدى على مدينة الإنتاج الإعلامى وبلطجه متناهيه

  ولما أنصاره يعملوا مصيبه يستندل و يقول:

لم أكن أعلم مطلقا!!:D

    وده طبعاعشان متعشم أن أول مرسى مايمشى هو ينط مكانه وبرضه ال..... اللى بتدعمه وفاكراه متدين وتقى وشيخ وكده كتيييير !!

من جهة أخرى هنواجه معضله نزول الجيش من عدمه 

طبعا الناس اللى طهقت من أرف  الإخوان ومعندهاش طاقه تستنى 4 سنين كمان زيى كده 

معندهمشى مشاكل ان الجيش ينزل ويرحمهم من الأرف ده كله بمنطق نار الجيش أو جنة الإخوان

هايطلعلنا أخونا الثائر تانى ويقولنا العسكر ؟؟؟؟؟ لا مش ممكن ده ينزل على جثتنا

 يسقط يسقط حكم العسكر

طب عندك بديل؟؟

لأ إنتى اتجننتى مش ممكن نرجع للأرف والمحاكم العسكريه

ماهو دلوقتى مفيش محاكم عسكريه عشان الاخوان بيصفوا على طول !

لا يسقط حكم العسكر!

طب هو فيه بديل ثورى له شعبيه ينزل الساحه ضد مرسى لما نعمل انتخابات رئاسيه مبكره ؟؟

لا بس برضه يسقط يسقط حكم العسكر !

وده بيحصل لأن زى مافى ناس عندها إخوانوفوبيا فى ناس عندها عسكروفوبيا أو زى مايكون شايفينها حاجه تكسف إنهم بعد مايقولوا يسقط يسقط حكم العسكر يرجعوا يتحوجوله من جديد 

مع ان لو دخلت جواهم ممكن تطلع من (بعضهم) عسكرى صغير بس خايف يطلع لأنه متكبر يطلعه لاحسن الثوره تاكل وشه مع ان الثوره راحت اصلا!

أما بخصوص جبهة الإنقاذ هما المعارضه العره اللى موجوده فى مصر 

معارضه على ماتفرج ونجيبلنا معارضه محترمه ينفع تعارض بقوة وحزم وتبقى إيد واحده

 بس طبيعى مايكونوش إيد واحده زيهم زى بقية الشعب حسب المنطق لأنهم منتخب من الشعب ده غير إن برضه كل واحد فيهم عينه على الكرسى أكتر ما عينه على مصر:( وعشان كده رغباتهم متعارضه مع إن الحل فى إيديهم بس يتحدوا

لكن هما إتحادهم زائف للأسف

  لكن لو فكروا إنهم يرشحوا واحد منهم ويشتغلوا عليه ويلمعوه بلغة حيلهم بينهم 

قدام الشعب ويقفوا وراه وليس أمامه 

الشعب هايثق فيهم ويلتف حوالين الشخصيه دى فى مواجهة الإخوان 

ويبقى ده البديل اللى يكونوا جاهزين بيه وقت ما مرسى يمشى بشرعيه أو بفضيحه ويبدأوا يحطوا أسامى للحكومه منهم ومن الكفاءات الموجوده على الساحه وماحدش بيعبرها عشان الأولويه لأصحاب الولاء وليس الكفاءه والنتيجه بهايم أمثال الأخ وزير الإعلام اللى بيتمسخر على الشعب ليل نهار ومصر على السفاله والشعب مش واخد باله ! 

طبعا إذا جبهة الإنقاذ فضلت على نفس أدائها ومتغيرتش يبقى معارضينها ليهم حق يسموها جبهة الخراب وليس الإنقاذ 

لأن المشكله إنهم معندهمشى أليات الإنقاذ أصلا 

حد هاييجى يقولى انتى طلعتى الكل وحش هو مفيش حد عاجبك فى البلد؟؟

هاقولك طب رد انت بمنتهى الصراحه :

هو مين فى البلد أدائه عاجبك؟؟؟!!

:D 

لكى الله يا مصر