جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

03‏/12‏/2012

عم فتحى وحكايته مع الإخوان

 القصه دى تخص دكتوره صحبتى ملهاش اى توجه حزبى ولا قابضه ولا دافعه ولا ليها مصلحه فى اى حاجه
عشان تبقوا يا مؤيدين الاخوان تصدقونا لما نقول ان الاخوان بيدفعوا رشوه وانهم لا عهد لهم وانهم بتوع مصلحتهم وانهم يهمهم ان الجعان يفضل جعان عشان يفضل ياخد زيت وسكر عشان يقول نعم للدين
مع انى عارفه ان حتى لو شفتوهم بعنيكوا بيدفعوا رشوه برضه هاتكدبوا وتقولوا مش ممكن نصدق ان الاخوان يعملوا كده
او هايوصل بيكم الامر انكم تحللوا الرشوه عشان تنصروهم ومش مهم تقولوا كلمة حق عشان ربنا
 

الراجل اللى واقف فى الصوره اودامكو ده : راجل غلبان و ارزقجى اسمه عم فتحى ...الراجل ده ساكن فى كفر ابو الريش و ده حى شعبى وانا بخليه يجيبلى طلباتى

النهارده بقى طلبت منه يجيبلى شويه طلبات و هو جايبهالى دار بينى و بينه الحوار ده بالحرف :
عم
فتحى : بصى يا دكتوره ايه رايك ؟
انا : فى ايه يا عم فتحى مش واخده بالى
عم فتحى : شوفتى الاخوان جابولنا هدوم نظيفه ازاى ؟ و كمان زيت و سكر و لحمه ده كانو بيوزعوا كمان جواكت جلد انما اييييه
انا : اخوااان ؟؟ ازاى ؟؟ جابولكو هدوم بمناسبه ايه ؟
عم فتحى : عشان نروح الاستفتاء يوم 15 و نقول نعم
انا : مين دول يا عم فتحى تعرف اساميهم ؟
عم فتحى : مانتى عارفاهم يا دكتوره د. م.الن صاحب صيدليه ( س) و الشيخ خ ح صاحب محل الالبان اللى فى الكفر
انا : بجد ؟ معقول ؟ طب فرشوا فين الحاجه دى و ادوهالكو بفلوس رمزيه و لا ببلاش
عم فتحى : ههههههههههههه فلوس ايه يا دكتوره كله ببلاش طبعا كانو فارشين جنب نفق ابو الريش عند المساكن
انا : آآآه دى حته مقفوله و متداريه بسور النفق
عم فتحى : اه يا دكتوره هم جابونا فى الحته الفاضيه اللى هناك دى و وزعوا علينا هدوم و جزم و زيت و سكر و لحمه
انا : طب و انت هتروح الاستفتاء يا عم فتحى و هتقول نعم ؟
عم فتحى : هههههههههههههه لا يا دكتوره احنا قعدنا مع بعض كلنا ( سكان الكفر ) و اتفقنا اننا ناخد منهم الحاجه و نروح نقول لا
انا : طب ليه يا عم فتحى ؟
عم فتحى : اصل احنا متغاظين منهم اصلهم عملوا فينا حركه وحشه فى العيد الكبيير جمعونا و قالولنا انهم هيدونا لحمه و قعدنا 5 ساعات مستنينهم و فى الاخر قالولنا معلش هنأجلها للشهر الجاى ..و احنا من ساعتها محناش طايقنهم ...و كمان فى واحده ست محاميه اسمها ابله حنان شافتهم و هم بيوزعوا علينا الحاجه و قعدت معانا بعد ما مشيوا و قعدت تشرحلنا الدستور ..ده مصيبه يا دكتوره و قالتلنا خدوا منهم الحاجه و روحوا قولوا لا
انا : طب ممكن اصورك يا عم فتحى
عم فتحى : ليه يا دكتوره اوعى تكونى هتوريها لحد ...احسن دول مسكوا واحد كان معدى بيصور بالموبايل و كانو هيموتوه من الضرب ...انا بس خايف لا تحرجينى معاهم احنا برضه بنستنفع منهم
انا : لا متخافش يا عم فتحى هصورك و مش هبين وشك بس الكلام اللى حكيتهولى ده فى ناس من الاخوان بتكدبه و انا عايزه اوريهم الهدوم اللى انت لابسها
عم فتحى : طب اذا كان كده ماشى يا دكتوره بس اوعى تجيبى سيرتى
انا : متخافش يا عم فتحى المهم انك تروح الاستفتاء و تقول لا ..عشان الناس دول عمرهم ما هيعملوا حاجه لمصلحتكوا و هيفضلوا سايبنكو فقراء و غلابه عشان وقت ما يحتاجوكم يشتروا اصواتكم
عم فتحى : مانا عارف يا دكتوره دول ناس ميعرفوش ربنا
 

4 مستعده أن أضحي بنفسي من أجل حقك في أن تقول رأيك ".:

ريـــمـــاس يقول...

صباح الغاردينيا د. فافي
معقولة الي بيحصل دا بجد اتقاجأت بيشترو حاجة الشعب
وكمان بيكدبوا بجد ربنا يكون في عونك يامصر
يارب احفظ مصر وشعبها "
؛؛
؛
لروحك عبق الغاردينيا
كانت هنا
Reemaas

فافى يقول...

طبعا يا ريماس اومال انتى فاكره ايه ده بيحصل من زمان وماحدش مصدق للاسف بس دورنا بقى اننا نوعى الناس
تحياتى :)

green scarf يقول...

انت عاوزة تفهمينى ان الاخوان بيوزعوا لحمة وهدوم ؟؟؟

فافى يقول...

green scarf
انا مش عايزه افهمك دى الحقيقه اللى مؤيدين الاخوان حتى النخاع رافضين يصدقوها :)

إرسال تعليق

fafy music