جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

30‏/12‏/2010

حيوان إسمه ظابط شرطه



سيناريو جديد من سيناريوهات الإستخدام السىء لبعض ضباط الشرطه للبدله الميرى , لديهم سيكلوجيه خاصه دفعت البعض لدراستها ولو لم أكن ضد التعميم لقلت عنهم أنهم كلهم سيكوباتيين شىء غريب جدا ماشاهدته فى برنامج الحقيقه للإعلامى وائل الإبراشى.
ضابط شرطه حيوان  وأقول ده مع  الإعتذار للحيوان يدخل بصحبة طالبه فى كلية الأداب جامعة الزقازيق إلى المدرج ويجلس بصحبتها ويهرج ويضحك ويدخن السجائر فى وصله إستفزت بعض الطالبات وعندما قمن ليخبرن الدكتوره/نوال حامد التى كانت تقوم بالشرح لهن فى ذلك الوقت وطلبت منه الخروج من المدرج وهذا أبسط حقوقها قام هذا الحيوان بسبها ولعنها بالأم والأب وعندما همت بإخبار حرس الجامعه إعتدى عليها بالضرب وإنهال عليها بالشتائم وقال لها بالفم المليان إنتى مش عارفه إنتى بتكلمى مين وأنا إبن مين.
كان نفسى أكون موجوده عشان أعرفها هى بتكلم مين (هاتكون بتكلم مين يعنى حتة واد مددلع و صايع وسافل وحقير ومنحرف ماعندوش أخلاق وخساره فيه البدله اللى لابسها وهايكون إبن مين يعنى إبن واحد دلع إبنه لحد ماخسره ونسى يربيه على القيم والأخلاق والدين وإحترام الغير يعنى إبن منحرف لأب منحرف )
حقيقى أنا مستثاره جدا من الموقف ده.
على المستوى الخاص هو عدم إلتزام بكل المقاييس من لحظة دخوله المدرج  إلى قيامه بضرب الدكتوره فى بطنها وإهانتها بالرغم أنه مش معاه الحق فى ده وهو عارف ولما والده جه بدل مايمسكوا يديلوا ألمين ويهزأه وكان ممكن يبرد نار الدكتوره اللى قطعا ضاعت هيبتها فى الجامعه بدل مايعمل كده عرض على الدكتوره فلوس عشان تتنازل عن حقها طبعا عشان إبنه يخرج من الموضوع ده اللى كان ممكن يربيه ويعلموه الأدب لما يتوقف عن العمل أو يتجازى
على المستوى العام بقى إيه حكاية الجملة دى (إنت مش عارف إنت بتكلم مين)
الجمله دى بسمعها كتير أوى فى الشارع وفى الخناقات وفى كل حته مش عارفه يعنى إيه هو المفروض الشخص اللى واثق من نفسه ومن رقيه يسأل السؤال ده؟ عمرى فى حياتى ماسمعت حد بيقول الجمله دى وبيكون حد كويس وإبن ناس أو بنت ناس لأن دايما الشخص اللى بيقول كده بيكون فى الغالب شخص عنده عقدة نقص بيعوضها فى الجمله دى والمفروض إن (مين) ده  يكون شخص ذات مستوى مادى عالى ولا شخص ذات مركز عالى عشان نخاف منه ونعملله حساب حتى ولو كانت أخلاقه زى الزفت وواطى ولا إيه يعنى ؟
أنا أعتقد إن الشخص الوحيد اللى جدير بإحترام الأخرين هو الشخص اللى أخلاقه كويسه ومحترم بجد وعنده أخلاق  وضمير ودين وبيحترم الناس والقواعد حتى ولو كان ابن رئيس الجمهوريه مش الشخص المحترم بفلوسه أو مركزه عشان هو مين وإبن مين

07‏/12‏/2010

نكتة الإنتخابات البايخه



أسجل فى مدونتى إحترامى لموقف عضو مجلس الشعب السابق لدائرة بنها وهوالأستاذ محسن راضى (إخوان مسلمين) والذى قام بترشيح نفسه  للمره  الثانيه على التوالى لموقفه من عملية تزوير الإنتخابات حيث طبع منشور سخط على الحكومه وأتباعها ممن قاموا بتزوير الإنتخابات أينعم مش هايجيب نتيجه ولاحياة لمن تنادى لكن على الأقل لم يقف سلبيا وحاول أن يمنع( منكرا) بلسانه.

أشكره وأقول له لا حياة لمن تنادى فى بلد كان يعرف فيها الناجحين بالإسم  فى اليوم السابق لإقامة الإنتخابات.

لا حياة لمن تنادى فى بلد يعرض فيها الرشاوى على القائمين بالإنتخابات ليقوموا بتزوير النتيجه على مرأى ومسمع من جميع الناس وكان قبل ذلك يحدث فى الخفاء على رأى حسين الجاسمى زمان كان اللى على راسه بطحه بقى النهارده يا عينه يا جبايره.

لا حياة لمن تنادى فى بلد نجح فيها جميع الوزراء المرشحون وكأنهم كلهم محبوبون.

لا حياة لمن تنادى فى بلد يحقق فيها عضو مجلش الشعب مصالح شخصيه بدلا من خدمة الناس.

عموما الحكومه أكبر مننا وأكيد تعرف مصلحتها قصدى مصلحتنا أكتر مننا ولما تبقى شايفه إن الطبيب الخاص  للرئيس هو اللى المفروض يكسب يبقى لازم (يكسب )قصدى ينجح.

كما أتقدم بالشكر للنائب جمال (كوش) عن دائرة الرمله مركز بنها أينعم لم ينجح لكنه نجح فى الجمع بين إسمه وخطته الإنتخابيه فى أن واحد
إسمه جمال واللى هايعمله بعد ماينجح إنه (هايكوش).

كما أتقدم بطلب إحاطه للمرشح الذى إشترى الطماطم بعشرة جنيهات  أثناء حملته الإنتخابيه وقام ببيعها للناس بخمسة جنيهات فقط  ليضمن أصواتهم فأسأله بعد نجاحه فى الإنتخابات هلى ستكرر ذلك أم ستكتفى بعمل إتفاقيه مع إسرائيل لزرع محصول طماطم جديد مطابق للمواصفات السرطانيه.

كما أتقدم بطلب إحاطه أخر للمرشح الذى دفع 100 جنيه لكل منتخب حتى يضمن أصواتهم وأسأله هل ستكرر ذلك أم ستكتفى بإعادة جمع أموالك تحت مسمى
(علاج على نفقة الدوله)

كل إنتخابات مجلس شعب وإنتوا طيبين وعقبال إنتخابات الرياسه حتى أتقدم بالشكر للبرادعى على إصدار منشور مماثل لمنشور محسن راضى.

عينى على اهل كايرو

17‏/11‏/2010

حاجه تقرف

حاجه تقرف

دخلت على الأكونت الخاص بيا على الفيسبوك لقيت على الصفحه الرئيسيه واحد مدخل فيديو بيتكلم عن فضل الصلاه المفروض إنى أقول جزاه الله خيرا لكن اللى حصل إنى نقدته نقد لاذع جدا عجب بعض الناس وعملوه عليه لايك وماعجبش البعض الأخر وكتبوا تعليقات نقد ليا أنا والبعض الأخر لا مع ولا ضد والبعض بيشجع اللعبه الحلوه.

وكل ده ليه؟

لأن الأستاذ المحترم كاتب على الفيديو العنوان الأتى(فضيحة بنت فى خدمه إجتماعيه) إعتقادا منه إن ده العنوان اللى هايشد الناس إنها تتفرج على الفيديو على إعتبار إن الناس بتعشق الفضايح طبعا.

بقى بالذمه ده كلام فى حد يكتب على فيديو بيبين فضل الصلاه عنوان غير لائق كده ؟ ومايتناسبش مع الصلاه ولا قدسيتها؟ ولو الأخ ده متدين أوى وعايز يهدى الناس بيكدب ليه ؟هو العنوان ده مش يعتبر كدب وضحك على الناس عشان يغريهم يشوفوا الفيديو ؟ولا هو لازم عشان يهدى الناس لحسنه يعمل هو سيئه؟

واللى غايزنى إن الناس قاعده تشكر فيه وتقول له جزاك الله خيرا ,نفسى أفهم على إيه على إنه كدب وخدع الناس وحتى لو الفيديو محترم وهانقول الغايه تبرر الوسيله لسه الناس محتاجه النهارده فيديو يعلمهم أهمية الصلاه ؟هى الصلاه دى إختلفوا عليها الفقهاء ولاإيه؟ مافيش أيات صريحه فى القراءن والسنه بتتكلم عن أهمية الصلاه ولا الناس دى كانت محتاجه فيديو عنوانه فضيحة بنت فى خدمة إجتماعيه عشان يصلوا والله كان يقدر يكتب عنوان محترم  واللى عايز يتفرج يتفرج واللى مش عايز هو حر.

ربنا يهدى

06‏/11‏/2010

كانوا أحلى وهما أصغر

كانوا أحلى وهما أصغر

كنت إمبارح بتفرج على ألبوم صور لأطفال العيله
يا سلااااام

إيه البراءه  دى  قد إيه كانوا لطاف وقد إيه كانوا ظراف



قد إيه كانوا ناعمين وعاملين زى القطط السيامى أدب إيه و أخلاق إيه وهاديين وشكلهم حلو.



كبروا دلوقتى ماشاء الله ومنهم اللى بقى فى ثانوى ومنهم اللى بقى فى كليه

يا سلااااااام

إيه قلة الأدب دى
قد إيه  بقوا مستفزين وقد إيه بقوا همجيين وقد أيه بقوا وقحيين ومش بيسمعوا الكلام, الولاد بقوا بلطجيه والبنات بقوا  شلق

وده مش مايخص أطفال العيله بس لأ ده كل الأطفال والمراهقين ملاحظه إن كل جيل أسوأ من اللى قبله إحنا ماكناش كده لكنا أطفال كده ولا مراهقين كده.

المشكله إن زمان كنا تربية أب واحد و أم واحده وماكنشى فيه أكتر من سلطه فى البيت لكن دلوقتى الأب والأم بيتفرجوا والدش بيربى والنت بتربى.

الدش بيربى بقنواته المتنوعه يإما دين أوى يا إما إسفاف أوى مافيش وسط يعنى يا قنوات دينيه ومتزمته
 وبعضهم بيستخدم الدين وسيله للتجاره

أو قنوات سفور وفيديو كليب كلها عرى و إباحيه 

حتى برامج الأطفال بقت متناقضه
يإما  بتعرض العروسه باربى بشعرها الأصفر ومكياجها والميكروجيب بتاعتها أو العروسه فله بحجابها وإلتزامها الزياده بالنسبه لسنها.

والنت بمواقعها المختلفه  وخصوصا مواقع الشات اللى اتاحت الاتصال بين الجنسين بشكل اسهل يعنى الانفتاح على الغرب وتقاليده  والتقليد الاعمى من غير مانعرف ازاى ناخد اللى يناسبنا  سواء  من خلال النت او الدش.



والتأليعه الجديده المسماه بالإيمو اللى انتشرت وسط المراهقين عباره عن بنات قاصيين شعرهم قصه معينه وحاطيين كحل أسود غامق وياريت لو كان سايح يبقى موضه أكتر ولابسين أسود على طول واالمهم  إن الإيمو دول لهم طقوس معينه خاصه بيهم وبتشمل مظهرهم لكن طبعا البنات والولاد بيقلدوهم تقليد أعمى فى مظهرهم من غير مايفهموا هما بيعملوا كده ليه.

فى ناس كتير  بيتهموا التكنولوجيا  إنها هى اللى بوظت حياتنا وإن حياتنا كانت أبسط من كده بكتير قبل ماتبقى فى ثورة الإتصالات دى.

بس ده مش هو الحل عشان نبقى مهذبين وعندنا أخلاق إننا نبقى متخلفين ومعندناش ثقافه ؟

العيب فينا إحنا وفى إستخدامنا مش العيب فى التكنولوجيا المفروض إن لينا عقل ونقدر نميز الحلو من الوحش مش لازم أبدا الحلو يتفرض علينا لوحده عشان نختاره قدامنا قنوات كتيره نقدر نختار منها اللى يناسبنا ويناسب ولادنا وقدامنا النت بمواقعها المختلفه نقدر نسيب المواقع اللى مش تناسبنا وندخل على المواقع اللى تناسبنا وتناسب أخلاقنا.

بدل مانفضل نشتم فى التكنولوجيا ونقول حياتنا من غيرها كانت أحلى إحنا اللى محتاجين نغير طريقتنا فى التفكير وطريقة نظرتنا للأشياء بدل مانستسهل نغير الأشياء.

28‏/10‏/2010

حبة تهييس


حبة تهييس

ايه رأيكوا نسبنا من اللغه العربيه الفصحى ونتكلم بالعاميه الكلام الشيعبى اللى كلنا بنفهموا ده  كلام الهجايص على رأى أحمد زكى فى العيال كبرت أصل نفسى أفضفض و عايزة أكون على سجيتى قصدى على راحتى يعنى  بما إنى قلت مش هاتكلم بالفصحى وإذا ماكنتش هافضفض فى مدونتى هافضفض فين يعنى؟

وخصوصا إنى لقيت ناس كتير بيفضفضوا فى مدوناتهم من غير قيود وساعات من غير خشى  ولا أدب أصل المدونات دى نوع من انواع التنفيس بدل مالواحد يطق عشان كده أغلب أساميها بتعبر عن حالات معينه مروا بيها أصحابها وزهقوا لحد ماقرروا يفضفضوا وإنشالله الدنيا تخرب زى مفروسه وتخاريف وعايزة اتجوز ومذكرات مريض نفسى وسوسه المفروسه ومذكرات شابه غاضبه و طهقانه وفنانه مفروسه وغيرها كتير .

المهم إنى انا ليا مزاج أتكلم فى حاجات كتير  هى صحيح مش ليها علاقه ببعضها  وومكن يبان إنه تهييس لكن أهو تغيير بما انى سهرانه لوحدى بليل مستنيه الحنه اللى فى أظافرى تنشف ومش ورايا حاجه قررت أرغى معاكوا شويه .

شغلتى خلتنى دايما براقب الناس
  متتخضوش أوى كده وتخافوا منى حكايه المراقبه دى بتحصل أتوماتيك بعد مالواحد يبقى اخصائى او دكتور نفسى  ماهو عشان كده الناس دايما بيقولوا عليهم مجانين لأنهم بيشوفوا الحاجات اللى غيرهم مش بيشوفها ومع الوقت جسم الانسان بيبقى شفاف وروحه هى اللى بتبقى مرئيه واللى جواه فى قلبه وعقله بيبان ومعظم أفكاره بتبقى مكشوفه للمعالج النفسى .

حاجه تخوف أوى إن حد يقرا أفكارك مش كده؟

من نعمة ربنا علينا إن أفكارنا غير مرئيه وإلا كان فى مصايب كتييييييييييييير حصلت فى الدنيا وإنت واحد من الناس اللى كان هايحصلك كوارث لو أفكارك مرئيه إفتكر كده كام مره فكرت فيها فى حاجه حرام أو غلط أو حاجه فعلا عملتها وحاسس بالذنب إنك عملتها؟
عشان كده دايما يقولوا على الدكاتره النفسيين مجانين وده لأنهم بيتعاملوا مع الناس على أساس اللى جوه مش اللى بره يعنى مثلا لو فى واحده صحبتى بتعاملنى حلو أوى بعاملها معامله وحشه عشان عارفه إن من جواها بتغيير منى وده اللى بيخلى الناس تحس إن رد فعلى غريب ومش مناسب للموقف.

 بالرغم من ان أخلاقيات المهنه ضد ده قلبا وقالبا  وإن المفروض الناس مش فيران تجارب عندى لكن غصب عنى هاعمل ايه ؟صحيح أنهم بيقولوا (من راقب الناس مات هما )لكن انا شايفه غير كده من راقب الناس مات إندهاشا

بستغرب أوى على الناس اللى براهم غير جواهم هو المفروض إن الواحد يبقى جوه شىء وبره شىء ؟وحتى لو المفروض إن بره  يبقى غير جوه يبقى لازم جوه يكون أحسن لأن المظهر أهم من الجوهر.

بستغرب أوى على الناس اللى بتروح تصلى الجمعه وتسمع الخطبه وتخرج ماتعملشى منها ولا كلمه وبيتخيلوا إن دى عباده وكده بيرضوا ربنا.

بستغرب أوى على المنقبه اللى بتغشش فى الإمتحانات مع إن  عارفه إن من غشنا فليس منا أو المنقبه اللى بتتكلم فى أى مكان بصوت عالى أو بتزعق فى المواصلات مع إنها بتقول إن صوت المرأه عوره .

بستغرب أوى على الشيخ اللى بيحفظنى القراءن إنى لما بسألوه فى تفسير أيه ممكن مايعرفشى أو يفتى ويفسرها بطريقه وبعدين ألاقيها فى التفسير حاجه تانيه خالص وكأنى بسأله فى درس نصوص مع العلم إنه خريج دراسات إسلاميه ومش مجرد محفظ وبستغرب أكتر إنه مابيجيش ساعات نص الشهر وبرضه بياخد فلوسه كامله ومش بيعوض الحصص اللى غاب فيها لا حول ولا قوة إلابالله يا جماعه ده شيخ قراءن إذا ماكنشى هو يراعى ضميره مين يراعيه؟

بستغرب أوى على الناس اللى لسه فى وقتنا هذا مش بتصلى يا جماعه ده أبسط حقوق ربنا وأسهلها معقوله الناس مكسله تصلى خمس فروض والله ليهم وقت مهما كان الواحد مشغول يعنى معقوله لسه فى ناس مش عارفه قيمة الصلاه ولا ضرورتها؟ زى ست عندها 55 سنه ومش بتصلى وبتشتكى من عقوق إبنها ليها طب إيدى ربنا حقه عشان  إبنك يديكى حقك ويبقى ليكى عين تدعي لربنا واللى عنده ولاد أو عندها ولاد ومش بيصلوا هايدعوا لولادهم إزاى وربنا هايستجيب إزاى ؟واللى بيذاكر ويمتحن هايدعى ربنا إزاى إنه يذاكر وينجح ولما يتخرج يلاقى شغل بأى وش ؟معقوله لسه فى ناس مش بتصلى؟ ده ربنا توعد الناس اللذين عن صلاتهم ساهون طب هايعمل إيه فى اللى مش بيصلوا أصلا؟
والألعن إن فى ناس مش بتصوم رمضان وبيمشوا يكلوا فى الشارع عادى ومحجبين عشان ماحدش يفتكر إنهم مسيحيين وكأن الغريب دلوقتى الصوم خلاص مش قادريين يستحملوا 30 يوم ؟

بستغرب على الناس اللى مش عندها ضمير وبيعملوا حاجات وحشه جدا ببقى نفسى أصرخ فيهم وأقولهم والله فى يوم حساب وهانقف قدام ربنا سبحانه وتعالى .

بستغرب أوى على الريس ليه مش بيريح الناس ليه مش بيحكم بضمير وليه مش بيعيشنا عيشه كويسه ويرفع من مستوانا مع إنى متأكده إن البلد فيها فلوس  مش عارف إن فى يوم حساب ولو كان عايز ينغنغ نفسه هو وولاده أولا وبعدين يرمى لينا الفتافيت طب هو لسه مشبعشى نغنغه؟ طب فين الفتافيت؟

بستغرب أوى على الناس اللى بتترشح والناس اللى بتنتخب فى عضوية مجلس الشعب أو الرئاسه  والناس اللى بتعمل مظاهرات وإعتصامات إذا كان كده كده الحكومه هاتعمل اللى هيا عاوزاه فى الأخر أنا شخصيا مايهمنيش مين هايبقى رئيس مصر جمال ولا غيره المهم يكون بيتقى الله وعنده ضمير ومايهمنيش مين اللى ينجح  فى مجلس الشعب المهم إنه يتقى ربنا فى الناس بالمناسبه سمعت إنه فى واحد بيوزع على الناس طماطم وعيش و100 جنيه أنا شخصيا مستعده أنتخبه بس يفضل يدينى طماطم وعيش و100 جنيه المهم مش اللى قبل الإنتخابات المهم اللى بعدها مش بعد ماينجح الناس ماتشوفشى وشه .

بستغرب أوى على الناس اللى بتفتكر نفسها مضحيه على فكره مافيش وجود للكلمه دى كل واحد بيعمل اللى بيريحه واللى لاقى نفسه فيه واللى بيسعده والل يقدر يستحمله زى الست اللى مش بتتجوز بعد جوزها مايموت نقول دى مضحيه عشان ولادها لأ طبعا هى أصلا مش عايزة تتجوز ولو كانت سعادتها فى الجواز كانت إتجوزت زى بعضهم وأنا لا أعمم.

بستغرب أوى على الناس اللى طول النهار يشتموا فى الحكومه ويشتكوا إن مرتباتهم ضعيفه وفى نفس الوقت هما مش بيراعوا ربنا فى شغلهم كل واحد مستنى التانى يعمل الخطوه الأولى الناس عايزه الحكومه تبدأ هيا وتزود المرتبات عشان يشتغلوا بضمير وبرضه مش هايشتغلوا بضمير حتى لو مرتباتهم زادت والحكومه عايزه الناس تشتغل الأول  عشان تزود المرتبات وبرضه مش هايزودوا مرتباتهم مهما الناس تعبت وأنا لا أعمم

بستغرب أوى على طبيعة شخصية الرجل و المجتمع الذكورى اللى إحنا عايشين فيه وقد إيه الرجل ده مخلوق لا يعرف شىء عن المنطق أو عارف وبيستعبط عشان بس يكسب جوالاته مع الستات وبالرغم من كده مخلوق سوفسطائى جدا ماتقدرشى تاخد منه حق ولا باطل مهما كانت الست بوررم وبتتكلم بالمنطق هو بينفر من ده لأنه لو منطق الامور هايطلع غلطان أو مش رجل أصلا وبستغرب كمان إنه بيحب يضحك عليه ولو الست قالتله الحقيقه يبقى نهارها أسود لكن لازم تكدب قبل الجواز عشان تتجوز وبعد الجواز عشان الدنيا تمشى وبرضه أنا لا أعمم

بستغرب أوى على الناس اللى بيحولوا المسائل لقضايا ويعملوا من الحبه قبه وعايزين جنازه ويشبعوا فيها لطم وبيسيبوا الاساسيات ويتكلموا فى التفاهات..

بستغرب أوى على الناس اللى بيفتوا فى اللى مش يفهموا فيه مايقولوا ماعرفشى هى ليه الناس بتتكبر تقول ماعرفشى مع إن من قال لا أعرف فقد أفتى زى الناس اللى توصف لى فى مكان شارع ويتوهونى مايقولوا مانعرفشى .

بستغرب أوى على الناس اللى بيسيحوا الدنيا على بعضها ويدخلوا العيب فى الحرام والحرام فى العيب ويدخلوا الدين فى كل شىء طبعا لازم نتقى الله فى كل تصرفاتنا لكن فى أمور فى الحياه لازم نفصل فيها الدين عن الدنيا زى القنوات الدينيه الفضائيه اللى معظمها بيستخدم الدين وسيله للتجاره والربح مع إن الدين أسمى من كده ؟
إتفرست أوى لما شفت مذيع على قناة الرحمه الفضائيه مستضيف أحد أطباء الجلديه وبيتكلم عن مشاكل الشعر عند المرأه وبعدين المذيع تفضل مشكورا وقال جمله مستفزه جدا (وطبعا يا دكتور (أكيد) الحجاب بيكون أفضل وبيحمى شعر الأخوات المحجبات الملتزمات؟) وده طبعا عشان الدكتور يأمن على كلامه ويقوله أه وطبعا ماكان من الدكتور إلى إنه قال له فيما معناه إن الحجاب مالوش علاقه بحماية الشعر بجد حاجه مستفزه جدا هوإيه اللى أكد له ده إنشاء الله و البرنامج ده معمول عشان المشاكل الصحيه ولا الدعوه للحجاب ماهو ياده يا ده؟ ليه بندخل الأمور فى بعض أنا مش ضد الدعوه للحجاب ولو إن كل واحد عارف أوى الحلال من الحرام ولكن لازم تكون فى مكانها ولما القناوات دى دينيه وعايزه تدعو للحجاب يبقى تدعو للحجاب من خلال دكتور أمراض جلديه؟
لا يسعنى إلى إنى أقول للمذيع المستفز السطحى هى المرأه من المفترض تلبس الحجاب ليه عشان ترضى ربنا ولا عشان تحمى شعرها من عوامل الجو ؟

تهييس من هنا ومن هناك لكن الحقيقى  إن النماذج  دى أنا شفتها فى دنيا الواقع.

يالا كفايه كده شكلى صدعتكوا وأنا كمان زهقت وعايزه أنام  فلنكتفى بهذا القدر تصبحوا على خير


20‏/10‏/2010

32

happy birthday to u
happy birthday to u

   
إنزل يا جميل على الساحه وإتمختر كده بالراحه 
ده انا قد عنيك مع انى نظرة عينيك دباحه
مالك طالع فى العالى يا مالى قلبى ليالى 
امرك يا جميل



هوففففففففففففففففف




32


فيا حاجه متغيره؟

إيه هيا؟

ياترى إيه؟

أه عرفت إمبارح كان عمرى 31 سنه و 11 شهر و19 يوم لكن النهارده بقى عمرى 32 سنه.

متعوده دايما (:
إنى أحاسب نفسى مرتين فى السنه مره أخر السنه الميلاديه ومره مع بداية سنه جديده فى عمرى وأقيمها أشوف إيه سلبياتها وإيه إيجابياتها وإيه اللى إتعلمته و إيه اللى منعنى عندى إنى أتعلمه ومين اللى أثر فيا بالسلب والإيجاب.
وكنت بحتفظ بيه لنفسى لكن بما إن السنه دى قررت إنى أكون غير روتيينيه وأعمل كل حاجه جديده مش عملتها قبل كده قررت أشارك أخرين فيها .

مأقدرشى أنكر إن السنه الواحد وثلاثين من حياتى كانت شديدة القسوه شفت اللى ماشفتهوش طول حياتى إتعاملت مع ناس سيئه جدا وشفت ناس كتير معندهاش ضمير ولا أخلاق ولا دين عمرى ماكنت أتصور إنى ممكن أتعامل معاهم  وشفت خيانه كتير وغدر كتير وحظى السىء خلانى أتعامل  مع أحط طبقات المجتمع وبعترف إنى نزلت بمستوايا  كتير عشان أحاول أرد الإساءه بالإساءه أوحتى عشان أكون على مستوى الموقف لكن فشلت فى الإتنين وده كان أحسن ماهو مش لازم الناس دى ينجحوا فى إنهم يخلونى زيهم وده اللى إتعلمتوا مؤخرا و دى كانت من الإيجابيات وإتعلمت كمان إن زى مافى ناس وحشه فى الدنيا فى ناس حلوه حواليا كتير وإنى لازم أشوف نص الكبايه المليان مش الفاضى و إن مافيش حاجه ممكن تخلينى سعيده زى نفسى وإنى أسيطر على غضبى و إنى أسمع كويس قبل ماهاجم (((((((((:
وإنى أكون متأكده إن عاجلا أو أجلا هايدفع أى أنسان تمن غلطه ولو بعد حين ومش لازم أضيع وقت فى إنى أكره حد لكن لازم أضيع بعض الوقت فى إنى أحب نفسى.

عموما هى كانت سنه حافله واهى خلصت بحلوها ومرها وبأستقبل سنه جديده
كل سنه وانا اطيب
كل سنه وانا احلى 
كل سنه وانا انضج
كل سنه وانا اسعد



ويا مرحبا ببداية سنه جديده من عمرى كلها سعاده وتفائل وهناء

إلى اللقاء مع سنة جديده من عمرى



13‏/10‏/2010

عاده ولا عباده؟


 قضيه الحجاب من القضايا المثيره للجدل فقد اختلف العديد من الشيوخ والفقهاء حول الحجاب وفرضيته تاره وحول النقاب وفرضيته تاره أخرى فنجد فيما يخص الحجاب والنقاب فى القراءن والسنه الأتى:
1- قوله تعالى فى سورة النور(30):
(وَقُل للمُؤمِنَاتِ يَغضُضنَ مِن أَبصَارِهِن وَيَحفَظنَ فُرُوجَهُن وَلاَ يُبدِينَ زِينَتَهُن إِلا مَا ظَهَرَ مِنهَا وَليَضرِبنَ بِخُمُرِهِن عَلَى جُيُوبِهِن وَلاَ يُبدِينَ زِينَتَهُن إلى قوله: وَلاَ يَضرِبنَ بِأَرجُلِهِن لِيُعلَمَ مَا يُخفِينَ مِن زِينَتِهِن وَتُوبُوا إِلَى اللهِ جَمِيعاً أَيهَا المُؤمِنُونَ لَعَلكُم تُفلِحُونَ).
2- قالت عائشة رضي الله عنها: ( يرحم الله نساء المهاجرات الأُول؛ لما أنزل الله: وَليَضرِبنَ بِخُمُرِهِن عَلَى جُيُوبِهِن شققن مروطهن فاختمرن بها)رواه البخارى.
3- قوله تعالى فى سورة الأحزاب(59): (يأَيهَا النبِي قُل لأزواجِكَ وَبَناَتِكَ وَنِسَاء المُؤمِنِينَ يُدنِينَ عَلَيهِن مِن جَلابِيبِهِن ذلِكَ أَدنَى أَن يُعرَفنَ فَلاَ يُؤذَينَ وَكَانَ اللهُ غَفُوراً رحِيماً) .
4- قوله تعالى:( وَإِذَا سَأَلتُمُوهُن مَتَاعاً فـاسـأَلُوهُن مِن وَرَاء حِجَابٍ ذلِــكُم أَطهَرُ لِقُلُوبِكُم وَقـُلُوبِهِن الأحزاب:53
5-قال العلامة ابن عثيمين: ( فإن الخمار ما تخمِّر به المرأة رأسها وتغطيه به كالغدقة، فإذا كانت مأمورة بأن تضرب بالخمار على جيبها كانت مأمورة بستر وجهها.
6-عن ابن عمر رضي الله عنهما أن النبي قال: (لا تنتقب المرأة المحرمة ولا تلبس القفازين ) رواه البخاري

 هذا فيما يخص القراءن والسنه وحين نستعرض أراء بعض الفقهاء والشيوخ نجد الاتى:

قد أقر كلا من الشيخ متولى الشعراوى  والشيخ يوسف القرضاوى بفرضية الحجاب ووجوبه وبالرغم من عدم  رؤيتهم للنقاب فرض إلا إنهم لم يقوموا بنقد المنقبات أو تحريم نقابهم على إعتبار إنهم أخذوا بالأحوط.

وعلى الصعيد الأخرتوجد أوجه نظر مضاده مثل وجهة نظر الشيخ محمد عبده حيث قال بأن  ليس الحجاب ولا النقاب  فرضا وأنه لايوجد نص قراءنى يوجب ذلك وإنما هى عاده دخيله من بعض الأمم.
وقد إتفق معه الإمام الغزالى حين قال :أن إخفاء اليدين في القفازات وإخفاء الوجوه وراء النقاب وجعل المرأة شبحاً يمشي في الطريق معزولاً من الدنيا ،فذاك ليس ما لم يأمر به الدين.
وهذا معناه أن كل شيخ يفسر أيات الله من وجهة نظره حيث وجد أكثر من تفسير لمعنى كلمة خمارهل هى غطاء الرأس أم مجرد وشاح كانت تتزين به النساء أيام الجاهليه وأكثر من تفسيرلمعنى كلمة جيوبهن هل هى تغطية الصدر أم العنق ؟أم المراد تغطية الصدر والعنق مرورا بالوجه كما ذهب إبن العثيمين ؟وقد إختلف أيضا الفقهاء حول معنى الزينه والفرق بين الزينه الظاهره والباطنه .
وهل أية الخاصه بالنقاب  فى سورة الأحزاب (59)كان المراد منها حماية النساء من تحرشات الرجال أثناء مرورها بهم فقط أيام الجاهليه ؟على إعتبار أن النقاب يحمى الأن من التحرش؟
أسئله كثيره تثار حول ذلك ولا يوجد تفسير واحد فقط قاطع لا يحتمل المناقشه ولكننى بحاجه أن  أسأل بعض الأسئله ولن أدلى برأيى الشخصى لأنى غير مؤهله لذلك فلست داعيه أو شيخه ولكننى فقط تعودت أن أوزن أمورى بالمنطق ويجب على من يريد إقناعى أن يحترم عقلى أولا.
 فيما يخص النقاب فهل من المنطق أن يأمر الله سبحانه وتعالى الرجال أن يغضوا أبصارهم عن سيده تمشى كالشبح فى الطريق ولا يوجد أى شىء ظاهر منها إذا لماذا أمر الله بغض البصر إلا إذا كان معلوم أن المرأه مكشوفة الوجه ؟ وإذا كانت الوجوه مغطاه فمم يغض المؤمنون أبصارهم؟
و عندما طلب الله سبحانه وتعالى من كلا من المؤمنين والمؤمنات أن يغضضن أبصارهم لماذا لم يأمر الرجال أيضا بالتبرقع وستر وجوههم عن النساء إذا خافوا الفتنه عليهن؟ أم إعتبر أن عزيمة الرجل أضعف من عزيمة المرأه و أعجز عن التحكم فى نفسه؟
وعندما أوجب الإسلام كشف الوجه فى ركنين من أركانه وهو الحج والصلاه أفكان بهذا يثير الغرائز؟
وفيما يخص الحجاب لن أقول أن الحجاب فرض ولن أقول أنه ليس فرض ولكن لماذا لا توجد فى القراءن كله أيه صريحه ومباشرة توجب تغطية الشعر كوجود أيه مباشره تحرم الخمر والميسر.
لست ضد أحد أو مع أحد لست ضد المنتقبات ولا المحجبات ولا غير المحجبات ولا أشعر أن ذلك الموضوع يجب مناقشته من الأصل  فهذه عبادات والعبادات تكون  بين العبد وربه فقط فالعلاقه بين العبد وربه ليس من حق أحد التدخل فيها  ولاإكراه فى الدين وكل إنسان حر يرضى الله بطريقته الخاصه  والله سبحانه وتعالى هو من سيقوم بمحاسبتنا وهو كفيل بنا ولا يصح عمل يوم للقيامه على الأرض ويقوم كل إنسان بجلد أخيه الإنسان إن لم يكن بالقول يكون بالفعل أو بالنظرات القاسيه, والمنطق يقول أن الله سبحانه وتعالى لو أراد شكل محدد تحديد مباشر للحجاب ووصف دقيق لا يحتمل المناقشه كان أنزله فى كتابه الكريم ولكن من رحمة ربنا بنا أن الدين أيسر من ذلك فقد أباح الله لكل إنسان أن يرضيه بطريقته فقد أعطى الفرصه للمرأه رائعة الجمال أن تقلل فتنتها بالنقاب و فى ذات الوقت لم يتوعدها بعقاب معين إذا لم تفعل ذلك وأعطى الفرصه لغير المحجبه أن تقلل فتنتها بتغطية رأسها ولم يتوعدها بالعقاب أيضا إذا لم تفعل ذلك ولكنى ضد أن يتحول الدين لمعاملة المظهر وليس الجوهر وضد أن يكون الحجاب موضه وضد أن تنظر لى إحدى المنقبات نظره كلها إزدراء ونسيت أن تبسمها فى وجه أختها صدقه وأن الدين لم يأمرها يوما بقهر أختها فى الله لمجرد أنها لا ترتدى النقاب مثلها وضد مقاطعة إحدى صديقاتى للأخرى لمجرد إنها خلعت الحجاب لأن ظروف عملها تتطلب ذلك ونسيت أن ليس من حقها معاقبتها على شىء يخص الله وحده .
وليس الإخوه الرجال بمنأى عن ذلك فبأى منطق يقوم الرجل بإرتداء الجلباب القصيره  حتى لا يدنس من الأرض ويتزوج إمرأه ترتدى النقاب أو الإسدال وتمسح الأرض به أليس هذا تدنيس أيضا؟
لماذا يفعل  بعض الناس أشياء غير منطقيه تحت مسمى الدين ويعتبروا كل من خالفهم عاصى من الضالين وهل الحجاب أو النقاب هو المقابل الوحيد للإنحلال؟

وإذا نظرنا إلى أرض الواقع وجدنا الأتى:
هذه فتاه كبرت لترى أمها أو أختها  ترتدى الحجاب تقرر إرتدائه هى الأخرى على غير إقتناع تام  بأنه فرض أو لا.
وهذه فتاه لا يعجبها شعرها فتقرر إرتداء الحجاب لتخفى عيوبها.
وهذه فتاه فرض عليها والديها الحجاب عند البلوغ فتقرر إرتدائه إرضاء لوالديها.
وهذه فتاه ترى نفسها تزيد فتنه بالحجاب فتقرر إرتدائه .
وهذه فتاه تقرر إرتداء الحجاب من باب الموضه والتغيير.
وتلك سيده تقرر إرتداء النقاب لأنها بالعربى وحشه ودميمه وإلا لماذا لا ترفعه وهى فى حجره مغلقه كلها نساء (محجبات) وأقول محجبات أى مسلمات وليسوا نصارى مثلا حيث توجد بعض الأقاويل أن أى إمرأه من ديانه أخرى لا يجوز أن تظهر أمامها إمرأه مسلمه بزينتها فيجب أن تعاملها معاملة الرجل الأجنبى خوفا من أن توصفها لزوجها على العلم بأن المرأه المسلمه تفعل ذلك أحيانا.
وهذه فتاه ترتدى النقاب لتقوم بخلعه وقت اللزوم لتفعل أفعال مشينه .
وهذه ترتدى النقاب إعتقادا منها أنه الخطوه الطبيعيه بعد خطوة  الحجاب دون تفكير أو بحث .

ولن أغفل أيضا حجاب الرجال ولكن على طريقتهم مثل أصحاب الجلباب القصيره و(مركبى الذقن )ودائما أستخدم هذا اللفظ للتعبير عن الذقن الزائفه بمعناها الرمزى أى التى تعبر عن التناقض  بين المظهر والجوهر فتصبح الذقن مجرد نوع من التنكر يخفى وراءه العديد من مساوىء الأخلاق فقد أجد بعض الأشخاص مركب دقن ويرتدى جلباب قصيره ولا تكاد أتعامل معه فى أمور ماديه فيها بيع وشراء حتى أفوجىء بشخصيه جشعه جدا وكأن قد أصبحت اللحيه والجلباب من عدة الشغل

 فماعلاقة ذلك كله بإبتغاء مرضات الله ؟
وأين هذا من الدين ؟
أين الإحسان والإخاء والإستقامه وأين التعاون و الرحمه والسلوك الحسن ؟
أين الصدق و العفو عن الناس و الموده؟
أين إتقاء الله وإبتغاء مرضاته؟
هل تركنا كل ذلك وأصبح المظهر هو شغلنا الشاغل؟

الدين معامله وسلوك وجوهر وليس حجاب ولحيه ومظهر))

أكرر مره أخرى أنا لست مع أحد ولا ضد أحد ولم أعمم مثل بعضهم فليس كل المنتقبات والمحجبات محترمات ومتدينات وليس كل الغير محجبات سافرات ولكنى أستخدم التعميم فى مكانه حيث أحترم الكل.

 إعتراف الأزهر بأن الحجاب ليس فرض

مناقشات مجديه عن فرضية الحجاب

27‏/09‏/2010

مصدومه

مصدومه

جلست فوق المقعد الهزاز الموجود بشرفتها فى حالة إسترخاء وهدوء تام تنظر الى السماء  وتتأمل فيها وتستمع إلى أغنيه (مصدومه ) لإليسا وقد أعادت إليها ذكريات مؤلمه وحزينه فقد تذكرت من كان يسمى بحبيبها وكيف إنه قام بوعدها أنه سيضعها فى عينيه ولكنه بدلا من ذلك وضعها تحت قدميه وبمنتهى القسوة فقد تفوق على جميع أمثاله من الرجال ذوات الدناءه والخسه سواء فى قصص الفتيات المجروحات فى الواقع أو حتى فى المسلسلات والأفلام........


video


بيقول فى حقى كلام كتير مش حلو ليه؟
بيقول ماليش لازمه فى حياته من النهارده
وعشان ماهوش عارف يقول بغلط فى إيه
بيقول تعب منى عشان مشاعرى بارده
لو فيا عيب مش عيب يقول للناس عليه
ويحكى فيه ...ماهو مش صغير على الكلام ده

وهنا قررت الكتابه عنه لتفرغ المراره التى تحس بها على الورق  ولكنها حين أمسكت الورقه والقلم أحست أنه لا يستحق الورق الذى ستستخدمه ولا يستحق الحبر الذى سيستنفذه القلم فى  الكتابه عنه .

وعندما همت بأن تكتب عنه على الكمبيوتر أحست إنه لا يستحق الكهرباء التى سيستنفذها الجهاز وهى تكتب عنه.

وعندما فكرت أن تكتب عنه فى مدونه أحست إنه لا يستحق المساحه التى ستأخذها  المدونه من على النت لتكتب عنه.

فقررت أن تحتفظ بالحديث عنه لنفسها ولتكتب شىء أفيد منه.



*

ماذا تصنع اذا سقط من تحب من عينك ولم يسقط من قلبك

بعض انواع السقوط لا يعادله مراره سوى مرارة الموت


فالبعض يسقط من العين
والبعض يسقط من القلب
والبعض يسقط من الذاكرة

*
*
والذي يسقط من العين
يسقط بعد مراحل من الصدمه؛ والدهشة؛ والاستنكار؛ والاحتقار
ومحاولات فاشله لتبرير اختياره هذا النوع من السقوط ..
*
*
أما سقوط القلب
فإنه يلي مراحل من الحب ,,
والحلم الجميل ,,,
والاحساس بالضياع والندم
ومحاولات فاشله لاحياء مشاعر ماتت ..
*
*
أما سقوط الذاكره
فإنه يبدأ بعد مراحل من التذكر والحنين
وبعد معارك مريره مع النسيان
ناتجه عن الرغبه في التمسك بأطياف أحداث انتهت ..
وغالبا يكون سقوط الذاكره هو آخر مراحل السقوط
وهو أرحم أنواع السقوط ...
*
*
وليس بالضرورة أن الذي يسقط من عينيك يسقط من قلبك ..
أو أن الذي يسقط من قلبك يسقط من ذاكرتك ..
فلكل سقوط أسبابه التي قد لا تتأثر أو تؤثر في النوع الآخر من السقوط
*
*
فالبعض يسقط من قلبك ,,
لكنه يظل محتفظا بمساحاته النقيه في عينيك
فيتحول احساسك المتضخم بحبه الى احساس متضخم باحترامه
فتعامله بتقدير .. امتنانا لقدرته السامية في الاحتفاظ بصورته الملونه في عينيك
برغم امتساح الصورة من قلبك ..

وهذا النوع من البشر يجعلك تردد بينك وبين نفسك كلما تذكرته ...
شـــكـــرا
*

مصدومه بجد ومش بنطق ولا عارفه أرد
مصدومه عشان شكله فى عينى بقى مش ولابد
لو طول الوقت هانفضل نتكلم على بعض
هنخلى إيه للغرب عشان يحكوا فيه



أما المعاناه الكبرى ..
فهي حين يسقط من عينيك إنسان مــا
لكنه لااااا يسقط من قلبك
ويظل معلقا بين مراحل سقوط القلب وسقوط العين
وتبقى وحدك الضحية لأحاسيس مزعجه
تـحـبــه ,,, لكنك بينك وبين نفسك تـحــتـقـره
وربما احتقارك له أكثر من حبك ...
*
*
ولأن الذاكره كالطريق
تلتقط معظم الوجوه التي تلتقيها
والتي قد لا يعني لك أمرها شيئا
فإن سقوط الذاكره هو أرحم أنواع السقوط
لأنه آخر مراحل سقوطهم منك ..
فالذي يسقط من الذاكره لا يبقى في القلب ,,, ولا يبقى في العين
*
*
فكم هو جميل أن نجد لأنفسنا أماكن دافئه في قلوبهم وأعينهم..
لكن الأجمل هو أن نحافظ على نقاء هذه الأمكنه بهم....
وإذا قررنا يوما السقوط
فلنتجنب سقوط العين ..
لأن بعده يتسخ البياض وتصبح كل المساحات النقيه ملوثه


إزاى بينسى عشانه ياما عملت إيه ؟
بعد ماكل حاجه حلوه عرفها بيا
معقوله بقيت دلوقتى مش حلوه فى عينيه
معقوله كمان كل العبر طلعها فيا

وهنا أحست إنه لا يستحق حتى الإحتفاظ به فى نفسها
فنفسها أطهروأنقى من أن تحتويه....

بالخير أنا طول عمرى بتكلم عليه
وهايخسر إيه لو بالخير إتكلم عليا


وهنا تنهدت بقوه وقالت  فى نفسها لن أترك خلفى حذاء سندريلا الذى سيعيدك إلى
ولا مسمار جحا الذى سيعيدنى إليك
فأنا فتاه لاتنحنى لتلتقط رجلا سقط من عينيها إلا إذا.....

أمرى لربى وهو عاطول
بياخدلى حقى ومهما يطول
ظلمك على قلبى بدعى أنا لربى عنى هواك يزول
إنت القوى طيب ياظالمنى
جرب ترتاح بالليل وتغفا
هو العليم هو بينصفنى
ولاعنه شىء بالدنيا بيخفا


الله عليكى يا إليسا ناقص تقولى حسبى الله ونعم الوكيل

16‏/09‏/2010

مما قرأت



مما قرأت

1- أتمم نقص نفسك أولا ثم قم بمحاسبة الناس.

2- ليس هناك جميل ولا قبيح ولكن خيالنا هو الذى يصور لنا ذلك.

3-يصيب الناس من السعاده بقدر مايوطدون أنفسهم على أن يصبحوا سعداء.

4-إغلق الأبواب على الماضى وعش فى حدود يومك.

5-إن الله يغفر لنا أخطائنا ولك جهازنا العصبى لا يغفرها لنا قط.

6-كل مايتفق مع ميولنا ورغباتنا الشخصيه يبدو فى أعيننا مقبولا أما مايناقضها فإنه يثير غضبنا والحل هو أن  نفصل عواطفنا و تفكيرنا وأن نستخلص الحقائق بطريقه محايده.

7-سر الإحساس بالتعاسه هو أن يتوافر لديك الوقت لتفكر أنت سعيد أو لأ.

8-ليس فى إستطاعتنا أن نغير شىء من إحساستنا بمحض إرادتنا و لكن فى أستطاعتنا أن نغير أفعالنا فاذا غيرنا أفعالنا تغيرت إحساستنا بطريقه أليه.

9- التسليم بما حدث الخطوه الأولى فى التغلب على المصاعب.

10- عاجلا أو أجلا سوف يدفع المرء ثمن مارتكبه من شرور فمن ذكر ذلك جدير بألا ينتقم من أحد أو يلوم على أحد أو يكره أحد.

11- ما من شىء على الإطلاق يسعه أن يواتيك الراحه و الإطمئنان سوى نفسك.

12- بقدر أهميتك يكون النقد الموجه إليك.

13- فكر فى السعاده و إصطنعها تجدها ملك يديك.

14- إذا أردت أن تتجنب القلق هىء نفسك لقبول أسوأ الإحتمالات.

14‏/09‏/2010

فضفضه

فضفضه

لما كان حد بيسألنى إنتى بتشتغلى إيه وأرد أقول أخصائيه نفسيه كان تلقائى جدا ألاقى اللى قدامى بيحس إنى لقطه ويقولى إنتى جيتى فى وقتك ويفضفض لى بكل اللى جواه اللى مضايقه واللى حتى نفسه بس يقوله لمجرد إنه يفضفض حتى إن فى ناس كانت بتقول أسرار تخض وتودى فى داهيه من غير حتى ما يتأكدوا إنى محل ثقه أو لأ وحتى لو لم يسمح الزمان ولا المكان بده وكنت دايما بحس إن الناس بتعمل كده بشكل لا إرادى أو لا شعورى وكأنهم مبرمجين على الفضفضه طالما قاعدين قدام أخصائيه نفسيه أو يمكن أنا بقى اللى مريحه للأعصاب أكتر من اللازم بوصفى أخصائيه نفسيه وبشجعهم يحكوا لى لكن حسيت مؤخرا إن ده مش صحيح لما  إتعرفت بشخصيه معينه وكانت حريصه جدا إنها ماتحكيش أى حاجه تخصها وقالت لى اللى عايزانى أعرفه وبس وإحتفظت لنفسها بالباقى وبحاسه الأخصائى النفسى حسيت إنها وراها حكايه كبيرة وبصراحه كان عندى فضول أعرفها لكن ماحاولتش وحسيت إن المرة دى فشل سحرى كأخصائيه نفسيه وخصوصا إن شخصيتها كتومه وبتعنى أكتر مابتقول لكن فوجئت بعد كده إنها حكت كل شىء عن حياتها فى حضورى أنا وأصحاب مشتركين بينى وبينها وكأنها كانت مؤهبه ومستعده فى الوقت ده بالذات إنها تحكى وده اللى خلانى أحس إن الحكايه مش حكاية أخصائيه نفسيه ولا حاجه لا شعوريه الحكايه إن النفس البشريه معقده جدا وفيها أسرار كتيرة وبعتقد إن دى واحده من الأسرار إن أى حد مش بيتكلم ويفضفض عشان أى إعتبارات حتى ولو قدامه أعظم طبيب نفسى و إنما بيفضفض فى وقت معين عشان هو بكامل الإستعداد إنه يفضفض فى الوقت ده بالذات وكأنها حاجه بيولوجيه ملحه من داخل الجسم.
   



   

11‏/09‏/2010

تحيه إلى فرويد


تحيه الى فرويد





تتلخص نظرية فرويد عن النفس الإنسانيه فى الأتى:

(إن الحياة النفسية للإنسان ليست حيوانية فحسب، ولكنها كلها تنبع من جانب واحد من جوانب الحيوان هو الجنس وهو المسيطر على كل أفعال الإنسان فحقيقة الإنسان الباطنية العميقه ليست هى الطاقه الشهوانيه فحسب وإنما هى على وجه التحديد الطاقه الجنسيه والجنسيه بالذات دون أى طاقه أخرى من طاقات الإنسان أو الحيوان, فالمولود يرضع ثدى أمه بدافع جنسى ,ويتبرز بدافع جنسى ,ويظل يتعامل مع الأخرين بناء على هذا الدافع وحده ,واستمد من ماديته نفسيه تجعل الإنسان خاضعا لغريزته مسيرا بها بلا إختياره , فهو لا يملك إلا إنصياع لأوامرها , وإلا وقع فريسة الكبت المدمر للأعصاب)

وعندما بدأت فى دراسة علم النفس أعجبت جدا بنظرياته و أفكاره وخصوصا فيما يختص بالإيحاء وبالرغم من ذلك لم أتقبل تماما فكرة أن الجنس هو المحرك الأساسى للحياه والسلوك وأن كل مشكلاتنا لها جذور جنسيه حسب نظريته وكأن لا لنا عقل نفكر به ولا قلب نحس به وأحيانا كنت أحس بنوع  من الغثيان عندما أقوم بدراسة نظرياته و أرائه عن النفس و إرتباطها بالجنس وكيف إنه حتى قسم مراحل النمو على أساس جنسى .


  وأحسست أن رأى له قيمه كبيرة عندما علمت أن الكثير من علماء النفس فى عصره كان لهم نفس الرأى وقاموا بنقده فى هذه النقطه تحديدا

وبعد مرور العديد من السنوات  أقول إنى كنت مخطئه فى نقدى له وأيضا علماء عصره لو أمكنهم المعيشه فى هذا العصر لإختلفت وجهة نظرهم ورجعوا فى نقدهم له

إكتشفت بعد طول هذه الفتره( أن نعم الجنس قد أصبح هو من أهم محركات حياتنا إذا لم يكن هوالمحرك الأساسى للسلوك الأن والسبب فى فشل معظم العلاقات الزوجيه وفتور البعض الأخر وانتشار الزواج بين شباب الجامعات 

والسبب فى تعدد أنواع الزواج الذى فى رأى هو ليس أكثر من زنا مقنع مثل زواج المتعه والعرفى وزواج الهبه وزواج الكاسيت والزواج السياحى و زواج الفريند وزواج الوشم وزواج الدم والزواج المسيار فمثلا فى حالة الزواج المسيار عندما تقوم إمرأه بعرض نفسها على رجل لا تطلب منه أى حقوق ماديه ولا أى إلتزام ناحيتها بأى عدل بينها وبين زوجته الأخرى ولا حتى أن تنجب منه أطفال إذن لماذا تريد الزواج منه؟

وما يوجد فى المواقع الإباحيه على النت والشات الإباحى والفيديو كليبات العاريه وإنتشار الأفلام الإباحيه والمنحطه أخلاقيا تحت شعار حقيقى إسمه  الجنس بيبيع أكتر وشعار مزيف إسمه الجرأه ومواجهة حقائق الحياه حتى البرامج التلفزيونيه إبتدت تولى إهتمام لهذه النوعيه من الموضوعات .

وأحسست ذلك بشده بعد قرأتى لكتاب إعترافات ليليه لبثينه كامل وهو نسخه من حلقات برنامجها فى الراديو الذى كان يحمل نفس الإسم ولم تتح الفرصه لكى أسمعه ولكنى حمدت الله على إنى لم أتابعه وإلا كانت  تكررت حالة الغثيان التى عانيت منها عند قرأتى لنظريات فرويد وبشكل أشد لم أكن أتخيل أن 99% من الإعترافات  الليليه هى مشاكل جنسيه وعلاقات غير شرعيه وعلاقات غير سويه بين أب و إبنته أو فتاه وخالها أو عمها وهكذا ,لدرجة إنى أكملت قراءته بصعوبه بالغه وهذا بالطبع غير إنتشار حالات الإغتصاب والتحرش وأيضا إنتشار الخيانات بكل أشكالها التى لم تعد قاصرة على الرجال فقط ولكنها إمتدت لتشمل النساء من جميع الطبقات

والموضه الجديده المسماه بغشاء البكارة الصينى وهو دعوة مقنعه لإنتشار الفاحشه بدلا من أن تحمل الفتاه على عاتقها عبء عمليه لتقوم بخداع الرجل التى ستتزوجه تقوم بإستعمال غشاء البكاره الصينى من باب توفير الوقت والمجهود

أتمنى معرفة ماذا بعد ذلك؟ وما الشيء الذي سيتغير للأسوأ في أخلاقنا وأفكارنا بعد ذلك؟

 كنت أنقد فرويد ولكنى الأن أقول تحيه إلى الرجل الذى سبق فكره عصره

fafy music