جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

27‏/08‏/2010

إحنا بنختارهم على أساس إيه ؟

إحنا بنختارهم على أساس إيه....؟

زوج وزوجه ولا شريك حياه......؟

سألت نفسك أو سألتى نفسك يعنى إيه شريك حياه ؟



شريك حياه مش يعنى زوج لابسه دبلته فى إيدى ولابس دبلتى فى إيده ولا هو أبو ولأدك ولا هى أم بناتك ولا هو الرجل اللى بتتجوزيه عشان تخلصى من كلام الناس أو عشان ترضى اهلك و لا هى الست اللى بتتجوزها عشان تطبخ وتربى العيال وإنت تعيش حياتك بره ويبقى ليك عالمك الخاص ولا هو الرجل اللى بيصرف عليكى أو يمارس عليكى سلطته  ولا هى الست اللى موجوده فى البيت بس لمزاجك وعشان تمارس عليها حقوقك الزوجيه ولا هو موجود فى حياتك بس عشان أحسن من ظل الحيطه ولا هى جاريه من جواريك .
شريك حياه جمله معناها أسمى من كده بكتير وهى دى المشكله ,الرجل لما بيجى يتجوز بيدور على زوجه والست بتدور على زوج مع إن لو كل واحد فيهم دور على شريك حياه اختياره هايختلف تماما وعشان كده فى ناس كتير بيندموا على إختياراتهم أو بالفعل بيختاروا غلط وده من الأسباب اللى أدت إلى إنتشار الطلاق أو إنتشار اللى إسمه جوازه والسلام وده الأخطر لأن على الأقل لما بيتم الطلاق كل  واحد فيهم بيبدأ حياته من جديد لكن لما نشوف إن مافيش فى حياتنا حب ولا تفاهم ولا حميميه ولا مشاركه  ونطنش عشان نحافظ على شكلنا الاجتماعى أو عشان الأولاد أو عشان خايفين من اللى بعد الطلاق وكلام الناس ونعيش بس عشان نربى ولادنا أو عشان يبقى إسمنا متجوزين والسلام تبقى الحياه لا ليها طعم ولا لون ونعمل كل حاجه فى حياتنا من غير إستمتاع ويتهيأ لنا إننا كده عايشين فى إستقرار مع إننا بنبقى عايشين فى غربه واللى بنسميه إستقراروالأرحم منه أبغض الحلال.

عمر ما الحياة كانت كده وعمر ما الجواز كان كده  وعمر ما فى أى دين قال كده ,فى كل الاديان أعطوا إهتمام كبير للإختيار ففى حديث شريف عن الرسول عليه الصلاة والسلام الذى رواه البخارى ومسلم قال(تنكح المرأه لأربع لمالها وحسبها ولجمالها ودينها فاظفر بذات الدين تربت يداك )صدق رسول الله (ص) وفى حديث تانى بيقول (خير النساء إذا نظرت إليها سرتك وإذا أمرتها أطاعتك وإذا أقسمت عليها أبرتك واذا غبت عنها حفظتك فى نفسها ومالك)صدق رسول الله (ص).
 وفى الانجيل (قال أدم : هذه الأن عظم من عظامى ولحم من لحمى هذه تدعى إمرأه لأنها من أمرء أخذت) لذلك يترك الرجل أباه وأمه ويلتصق بإمرأته ويكونان جسدا واحدا) يبقى لو إلتصق بإمرأه أساء إختيارها يبقى الحياه شكلها ايه ؟

 وعشان كده أى حد بياخد وقت أطول عشان يدور على شريك حياه أكتر من الوقت اللى بياخده عشان يدور على زوج أو زوجه.
(شريك حياه ) جمله مكونه من كلمتين لكن معانيها كتيره جدا ومؤثره ممكن تصنع حياه سعيده أو تصنع حياه تعيسه وكله من إختيارنا .
كلمة شريك تعنى مشاركه مش مشاركة يوم أو شهر أو سنه ولكن شخص بيشاركنا حياتنا كلها بكل مافيها ألامنا وأفراحنا وإهتمامتنا وأولوياتنا وميولنا وأهدافنا وأحلامنا و قيمنا ومبادئنا ومسئولياتنا وعقلنا وجنوننا وشبابنا وشيخوختنا .

شريك حياه يعنى حمايتك وأمانك والرجل اللى بيكون وراكى عشان يدفعك تكونى أحسن وشريكة حياه هى الست اللى بتكون وراك عشان تدفعك تكون أعظم .

 



.

شريك حياه يعنى الرجل اللى بيتقبلك فى شبابك وإنتى كلك جمال ويتقبلك أكتر فى
شيخوختك بعد مايضيع الجمال ده وشريكة حياه يعنى ست تتقبلك فى صحتك وفى مرضك تخدمك 

 

شريك حياه يعنى رجل حنين يتقبل منك إنك ممكن تقصرى فى حقه            
 لوإنك فى يوم مريضه وشريكة حياه يعنى ست أصيله تقف جنبك على الحلوة والمرة.

شريك حياه يعنى رجل يهتم بيكى ويسمع لمشاكلك حتى لو مش هايحلها وشريكة حياه يعنى ست تهتم بيك وبمشاكلك وتسمعلك وقت اللزوم.


 

شريك حياه يعنى رجل يحترم غيبتك وشريكة حياه يعنى ست تصون غيبتك.

شريك حياه يعنى رجل يستجيب لرغباتك حتى ولو كانت مجنونه وشريكة حياه يعنى ست تستجيب لهمساتك عشان ماتهمسش بيها لواحده تانيه.

شريك حياه يعنى حد تكون مكالمتك ليه أهم مكالمه فى الدنيا ومكالمته ليك أهم مكالمه فى الدنيا تحتويه ويحتويك تفكر فى إحتياجاته قبل إحتياجاتك فى الوقت اللى هو بيفكر فى إحتياجاتك قبل واجباتك يستوعب تلقائيتك وتستوعب جنونه.

هو ده معنى  شريك حياه جايز أكون خياليه وده مش بيحصل لكن ده مش معناه انه مش ده اللى لازم يحصل أو إنه صعب التحقيق يعنى اذا ماكنش هو طمأنينتى وأنا سكينته يبقى الجواز إيه لازمته ؟




لكن اللى بيحصل فى مجتمعنا إن بعض الرجاله مش بياخدوا وقت فى التفكير فى الجواز أى ست والسلام تعمر البيت وتربى العيال وتكمل الشكل الاجتماعى قدام الناس وهو  بره يعيش حياته ويعرف عليها واحده واتنين وعشرة ومش بعيد يكون مقرر كده من الأول من قبل حتى مايعرف إذا كانت هاترضيه أو لأ ,طيب بالذمه ده يرضى ربنا؟طب طالما مش مليا عينك بتتجوزها ليه ؟ ليه لازم يكون لك عشيقه وزوجه ليه مادورتش على واحده من الأول شايف فيها العشيقه والزوجه والأم وإخترت صح ولا كان عندك أولويات تانيه؟
وبعض الرجاله بيدوروا على مجرد بنت حلوه مجرد شكل ومش مهم من جوه هى عامله إزاى ولو طلع عقلها فاضى بعد كده يتضايق ويشتكى مع ان ده إختيارك وانت اللى دورت على شكل وبس
وبعض الرجاله يدوروا على بنت لازم تكون بتشتغل عشان تساعده فى مصاريف البيت  بقى هى دى كل أحلامك بنت بتشتغل عشان تساعدك ؟يا عينى على الرجاله

مش بقول إن البنات دايما بيختاروا صح كمان بعض البنات  بتختار غلط لما بتسعى إنها تتجوز رجل غنى والسلام او تتجوز عشان تهرب من البيت اللى هى عايشه فيه لو كانت عايشه فى مشاكل أو عشان تجيب أولاد وبس أو عشان ترضى أهلها أو عشان تهرب من لقب عانس وبعدين  تعيش عنوستها بعد الجواز و تحس ان جوزها مش مالى عينها أو مقصر فى حقها فتلجأ للخيانه وتعرف حد على جوزها ومصادر الخيانه كتير اذا كان النت والشات أو الموبيل أو العلاقه بزملاء العمل اللى غالبا مابتبتدى بصداقه وبعدين تتطور.
للأسف الخيانه إنتشرت فى المجتمع ومابقتشى قاصره على الرجاله انتشرت بين البنات كمان وحتى مابقتشى قاصره على البنات من بيئات معينه لأ دى خلاص بقت فى كل المستويات وللأسف ده بسبب الإختيارات الغلط من الأول ده طبعا غير الإنحطاط الأخلاقى اللى بقى موجود فى المجتمع أصلا و على كل المستويات.

مش بقول إن كل الناس بتختار غلط ولا بلغى القسمه والنصيب ولكن أعتقد إن الصح اننا نعمل كل حاجه فى الدنيا ممكن تسعدنا ونحسب حسباتنا كويس ونبقى متأكدين اننا متقبلين الاخر بعيوبه قبل مميزاته ونستخير ربنا ونحكم عقلنا وقلبنا مع بعض فى إرتباطنا لكن لو كان نصيبنا إننا نبقى تعساء يبقى ربنا أراد كده لكن مانبقاش عارفين ان فى حاجه هاتتعسنا فى ارتباطنا ومع ذلك نكمل فيها يبقى مانلومشى غير نفسنا بعد كده.

5 مستعده أن أضحي بنفسي من أجل حقك في أن تقول رأيك ".:

رشا فرج يقول...

كلامك اكتر من الصح بشوية ، لكن للأسف الاحتياج الفطري للزوج أو الزوجة و الرغبة في الاستقلال و الاستقرار (سواء كان ايجابي أو سلبي بس على الأقل الواحد يبطل يدور)مع المؤثرات الخارجية اللي بتزق كل شاب أو شابة إنه يتجوز خلت المفهوم الحقيقي لشريك الحياة و جوهر الزواج مبهم و مش أساسي في العلاقة المهم الأنثى تلاقي ذكر و الذكر يقابل أنثى و تستمر الحياة.
بس العبرة بالنهاية السعيدة، البيت المستقر اللي مليان سكن و تفاهم و يخرج أولاد خاليين من العقد و الاسقاطات النفسية. يا رب يكون ده هو الهدف الأساسي للكل من الجواز.
رشا فرج

هبه مختار يقول...

كلامك مظبوط ياوفاء بس من تجربتى فى الزواج انى كنت بختار بردو وبرفض كتير زى مقالت رشا بسبب القبول او اسباب تانيه كتير خلت الكل ينتقدنى بس انا قولت مش هتجوز الى الى احس ان فى كل المواصفات الى عايزاها ومع ذلك سبحان الله جوازتى كان زى القدر المستعجل يعنى حسيت انى اتخدت مفكرتش كله تم بسرعه عشان زى مبيقولوا النصيب الله اعلم بقى وبرغم ان معظم صفاته كانت عكس الى كنت عايزاه بس حبيته واتعلقت مع الوقت بيه وغيرنا من نفسنا احنا الاتنين عشان نرضى بعض ودى الفكره بقى انك تغيرى نفسك او يغير منه نفسه عشان كل طرف يرضى الاخر وده بيخلينى احترمه واحبه اكتر واتقبل اى عيب ممكن مكنش عاجبنى فى الاول بس خلاص هو قدر يرضينى بطريقته واكيد انا فيا عيوب مكنتش شايفاها مبتعجبوش وحاولت اغيرها عشانه لازم يكون فى توافق وتنازل ورضا عشان الحياه تستمر

love_piraat يقول...

جمييل جدا مع ان الاختيار على اسس العقل صعب جدا ده لأن البشر عمتا الشىء الغالب عليهم العاطفة فا انا دايما بدعى ربنا وقعنى فى موززا اصيلة ولا جسسة @#$% وكل شىء قسمة ونصيب الرضا النفسى عن الحب نفسة صعب بس لمل يكمل بوووم علشان كدة لازم لما نختار نفرض العقل على القلب ونشوف الوضع من جميع الزويا وندرسه حلو وناخد الوقت والمساحة فى الاختيار علشان ميجيش اليوم ونقول انا اخترت غلط .....كان معكم كيمو.....

غير معرف يقول...

أن الناس ثلاث أنواع نوع يتمنى لك السعادة حتى وأن كان لا يعيشونها ونوعا لا يبالى بما يحدث لك سواء كان شرا أو خيرا ونوعا يتمنى أن تتجرع من الأحزان كما يتجرعونها هم وأكثر
وآيا ما كان الناس فإنك أنت من تعيش حياتك فعشها كما تريد وليس كما يريد الآخرين ولتعلم أنك أن فرحت سيشاركك من حولك الفرحة ولكن أن حزنت وتألمت فلن يفعلو شيء غير مصمصة الشفايف متظاهرين بالإشفاق عليك أو مشفقين عليك بالفعل ولكن إشفاقهم لن يقلل من أحزانك بل سيزيدها
........................ dalia mohamed reda

غير معرف يقول...
أزال أحد مشرفي المدونة هذا التعليق.

إرسال تعليق

fafy music