جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

19‏/10‏/2011

33






لقد دقت الساعه الثانية عشر ودقيقه اليوم العشرين من شهر اكتوبر  
 إمبارح كان عمرى 32 سنه و 11 شهر و19 يوم لكن النهارده بقى عمرى :

(33)

فى ناس كتير بتقولى انتى البنت الوحيده اللى مش بتتكسف تقول على سنها انا بقولهم واتكسف ليه انا بثق فى نفسى وعارفه ان الصغير مسيره يكبر وبنت ال16 النهارده هى نفسها بنت ال36 بكره وهى نفسها بنت ال56 بعده و كل سن له حلاوته ومانكرشى انى لما كنت عندى 13 سنه او 23 ماكنشى عندى خبرة دلوقتى فى كل حاجه الذوق فى اختيار اللبس والتعامل مع الناس والعلم والمعرفه.


متعوده دايما (:
إنى أحاسب نفسى مع بداية سنه جديده فى عمرى وأقيمها أشوف إيه سلبياتها وإيه إيجابياتها وإيه اللى إتعلمته و إيه اللى منعنى عندى إنى أتعلمه ومين اللى أثر فيا بالسلب و مين أثر بالإيجاب .
السنه اللى فاتت قلت الاتى :
(مأقدرشى أنكر إن السنه الواحد وثلاثين من حياتى كانت شديدة القسوه شفت اللى ماشفتهوش طول حياتى إتعاملت مع ناس سيئه جدا وشفت ناس كتير معندهاش ضمير ولا أخلاق ولا دين عمرى ماكنت أتصور إنى ممكن أتعامل معاهم  وشفت خيانه كتير وغدر كتير وحظى السىء خلانى أتعامل  مع أحط طبقات المجتمع وبعترف إنى نزلت بمستوايا  كتير عشان أحاول أرد الإساءه بالإساءه أوحتى عشان أكون على مستوى الموقف لكن فشلت فى الإتنين وده كان أحسن كتير لأن مش صح الناس دى ينجحوا فى إنهم يخلونى زيهم وده اللى إتعلمتوا مؤخرا و دى كانت من الإيجابيات وإتعلمت كمان إن زى مافى ناس وحشه فى الدنيا فى ناس حلوه حواليا كتير وإنى لازم أشوف نص الكبايه المليان مش الفاضى و إن مافيش حاجه ممكن تخلينى سعيده زى نفسى وإنى أسيطر على غضبى و إنى أسمع كويس قبل ماهاجم (:
وإنى أكون متأكده إن عاجلا أو أجلا هايدفع أى أنسان تمن غلطه ولو بعد حين ومش لازم أضيع وقت فى إنى أكره حد لكن لازم أضيع بعض الوقت فى إنى أحب نفسى

السنه دى بقى قابلت ناس أسوأ لدرجة انى حسيت انى اللى قابلتهم قبل كده كانوا ملايكه لكن الجديد ان عرفت ازاى اتعامل معاهم وازاى اكون حكيمه (الى حد ما) فى تصرفاتى وازاى اتقبل النقد وحاسه انى بقيت اهدى (الى حد ما) وبحاول اقلل من عصبيتى( الى حد ما ) 
  
بس زى ماقابلت ناس سيئه كمان اتعرفت بناس غايه فى الروعه والجمال واتمنى صداقتى تدوم بيهم ان شاء الله 
اتمنى السنه التلاته وتلاتين فى حياتى تكون احلى واروع واجمل ان شاء الله 






6 مستعده أن أضحي بنفسي من أجل حقك في أن تقول رأيك ".:

شمس النهار يقول...

كل سنة وانتي طيبة وبخير وصحة وسعادة
يارب دايما سعيدة
يارب تحققي كل احلامك
ربنا يبعتلك اللي يستاهلك ويفرحك

كل سنة وانتي صديقة عزيزة
ممكن نكون مااتقابلناش بس بحسك زي بناتي بالظبط

عقبال ميت سنة هنا

sabry abo-omar يقول...

كل سنة وانتى طيبة وعبقال الف سنة سعادة وصحة ...نتمنى نكون زيك وعندنا الروح الحلوة دى ومش محتاجين اخصائين نفسين يعالجونا لكن ممكن نحتاجهم اصحاب واهل دايما.... تحياتى

فافى يقول...

شمس النهار:
وانتى طيبه وبخير وبصحه يارب ودايما ممتعانا ببوستاتك الهايله
وميرسى على دعواتك ولولا انى خايفه اكبرك كنت قلت بحس انك زى مامتى

فافى يقول...

sabry abo-omar:

وانت طيب وبخير وبصحه وانت فعلا روحك حلوه وجميله وصدقنى مافيش انسان مش عنده مشاكل ومحتاج لاخصائى نفسى حتى انا هههههههه

Hesham يقول...

اولا كل سنة وانتى طيبه وان شاء الله يكون المستقبل افضل من الماضى هذا مانتمناه وان كان ليس كل مايتمناه المرء يدركه
ثانيا انا فى رأىى المتواضع ان عمر الانسان لايقاس بالزمن بقدر مايقاس بالتجارب والعلاقات والخبرات وامور كثيره
عموما تحياتى وتمنياتى بدوام الصحة

فافى يقول...

hesham
وانت طيب يا استاذ هشام وبخير

إرسال تعليق

fafy music