جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

28‏/01‏/2012

58 مليون فكر



(وإحنا في المواصلات إمبارح وداخلين على مسجد الإستقامة
كان صوت الهتاف أمام المسجد واصل لمسافة طويلة جدا
وكان من الركاب معانا واحدة ست وإبنها
قالها : يا ماما عايز أنزل معاهم.
قالتله : بس يا ولة دي عيال قابضة وجاية تخرب.
  قالها : يا ماما دول اللى معانا في العربية رايحين!
بصت علينا كده بتتفحص أشكالنا ولقيتها دققت في شكل لحيتي بالذات
وسألتنا: إنتو نازلين ليه !؟
قلنالها: نازلين نستكمل الثورة وتحقق أهدافها .. شايفة تغيير في وجود المجلس ؟
سألتنا : إنتو مش ستة إبريل ؟
قلتلها : لأ أنا 16 إبريل
D:
سكتت وابتسمت وبصت على المسيرة (شكلهم شباب كويس عادي)
وقفت العربية بعدها ونزلنا وشفتها بالصدفة إنضمت لينا هي وابنها)

القصه دى كتبها واحد من ثوار ميدان التحرير على الستاتوس بتاعه على الفيس وفى الحقيقه إن فى معنى مهم جدا بين سطورها 
وهو اللى بأكد عليه دايما من أول الثوره ماقامت
إن الناس سهل تقتنع وسهل تبقى إيد واحده بس باللين والهدوء 
مش بالهجوم والسب والنعت بالجهل مره وبالتخلف مره وحب العبوديه مره
وتصنيفهم أغلبيه صامته وحزب كنبه
  فى إمكان ثوار الميدان إنهم يقوموا اللى قاعد على الكنبه من على الكنبه ويخلوا الاغلبيه الصامته تتكلم
بس 
بالإقناع واللين وتفسير موقفهم بهدوء لكن هما بيتسهلوا الشتيمه على اعتبار ان دول كلهم أغبياء مش فاهمين حاجه وهو الناشط السياسى الوحيد اللى بيفهم
وفى نفس الوقت بيستنكروا إن الناس دى مش بتساندهم 
طب يساندوكم إزاى وأنتم بتشتموهم وبتسخروا منهم ليل نهار!!!!
يعنى الشاب اللى بيقول لأهله أنتم إتعودتم تكونوا عبيد
العبيد دول ربوك ثائر إزاى بتناضل من اجل حريتك
  إزاى العبيد يربوا أحرار ؟؟
ومع ذلك أنا مايهمنيش المجلس يمشى أو لأ
يعنى مش فلول ولا كنبه ولا اغلبيه ولكن 
(هارشه ومطنشه )
يعنى عارفه مساوىء المجلس  كويس و لكن مطنشه لحد مايمشى لأنى مش شايفالها حل تانى لازم نقبل بالحلول الوسط عشان الدنيا تمشى وعلى فكره الحلول الوسط هايتضمنها برضه عيش حريه عداله اجتماعيه ومش معنى ان الدنيا تمشى يعنى قصدى استقرار
ولو انى مش شايفه الاستقرار كلمه قبيحه
انما لو فضلنا نفرض على كل رياسه انها تاخدلنا حقنا من الرياسه اللى قبلها يبقى هاندخل فى حلقه مفرغه مش هانخرج منها لأن ببساطه
كله متواطىء مع كله 
 وعشان كده مستغربه أوى من الناس اللى إتفاجئت بسلوكيات المجلس وكأن المجلس ده جايلنا من بره مفترض فيه إنه يبقى فله شمعه منوره
ماهو أيوه بواقى النظام وتربيته 
وأكيد هايمشى على نهجه
والعقل والمنطق يقول إن مبارك ماكنشى بيحتفظ بحد نضيف طول الفتره دى يعنى أكيد طنطاوى فاسد زيه ولو سيناريو( الإنقلاب المتفق عليه) صح يبقى ده السبب فى التباطىء والتواطىء الى احنا شايفينه 

ومع ذلك مش هاكون متضايقه لو المجلس مشى برضه
ولو انى استبعد انه هايمشى الا على جثته أو حتى جثة كام شهيد تانيين وخصوصا انه مدعم بالأغلبيه الصامته وحزب الكنبه  اللى الثوار (بيشتموهم ليل نهار) وهما برضه اللى قالوا نعم فى التعديلات الدستوريه وهما اللى كتير منهم بيروحوا العباسيه

إنما كل اللى بحلم بيه اننا نكون ايد واحده تحت فكر واحد ومطلب واحد لاننا ساعتها بس هانكون اقوى ولا هايقدر علينا 100 مجلس ولا 100 مبارك
لكن كل مااحلم أصحى على كابوس ال5000 إئتلاف وال 7000 حزب وال3000 حركه
والنتيجه....
58 مليون فكر واعتقاد  
ده غير بقى اللى باعو القضيه من يوم ماقعدوا على الكرسى ولا يفرق معاهم حق شهداء ولا غيره 


  لكى الله يا مصر

8 مستعده أن أضحي بنفسي من أجل حقك في أن تقول رأيك ".:

حلم بيعافر يقول...

فعلا موضوع الاقناع ده مجدى




بس مع شريحة ضيقة جدا

ابراهيم رزق يقول...

صلى على النبى
زيدى النبى صلاه

احنا كنا بنكلم نفسينا و بنتناقش مع نفسينا و بنهاجم نفسينا بينما غيرنا تركنا و ركب الناقة و شرخ

مبسوط جدا من حملة كاذبون و حملة سلاسل الثورة و حملة مصرنا اخيرا تركنا الكيبورد و نزلنا للناس على الارض نتكلم معاهم فيه اللى هيقتنع و فيه اللى مش هيقتنع لكن فى كل الاحوال قدرنا نسمع الناس كلام مختلف و فكر مختلف
موضوع كثرة الائتلافات ده بدأ حاليا فى التقليل منه و اتحدت اغلبها و ربنا يستر
موضوع الحلول الوسط مع انى مش مقتنع به نهائيا الا انى مستعد لقبولها بشرط وحيد هو حق الدم

تحياتى و تقديرى

فافى يقول...

حلم بيعافر :
انا مش معاك اعتقد انه مجدى ومش هاقولك مع الكل لكن مع شريحه لا بأس بها وممكن تكون مؤثره
اشكرك على مرورك الراق

فافى يقول...

ابراهيم رزق:
عليه افضل الصلاة والسلام :)
انا كمان مبسوطه من حملات كاذبون وسلاسل الثوره بالظبط هو ده اللى اقصده ولو انه جه متأخر بس خلينا متفائلين
وبخصوص الحلول الوسط عايزه اقولك حاجه ممكن تصدمك اعتقد ان الحلول الوسط مش هايتضمنها حق الدم للاسف والا ماتبقاش وسط :)
عموما حق الشهيد فى الاخر عند الله سبحانه وتعالى اللى احسن من المجلس والاخوان ولايقبل الجدال بشأنه
وعموما دى كلها تكهنات منى وليس حقائق عليها ادله
بسعد بمرورك الراق دائما

غير معرف يقول...

لا نجاح في إدارة البلاد من دون وفاق وطني لا يستثني أحد ولا يصادر على رأي الأقليات الثورية، وإلا كنا على أحسن تقدير نعاني من طغيان الأغلبية ، وآفة الديمقراطيات الوليدة طغيان الأغلبية.

حنعيش يعنى حنعيش يقول...

موافق وباصم بالعشرة على كل كلمه ... بس فيه حاجة ممكن انتى تكونى اكتر واحدة تستوعبيها .... ياترى ادركنا للواقع هوه الواقع الحقيقى ولا هوه رؤيتنا للواقع .... وياترى حد فينا كلنا عندة داتا يقدر يبنى عليها تصور ... ولا 90% من الداتا مصدرها الفيس بوك وافتكاسات المفتكسين ... عموما انا ممكن اسامح حسنى على اى حاجة عملها ... الاتخريب العقول والنفوس اللى صاب الشعب اواللى كان شعب

فافى يقول...

حنعيش يعنى حنعيش :
سعيده بمرورك الاول :)
جوابى على سؤالك هو ان مش فى كل الحالات بيكون واقع حقيقى ومش فى كل الحالات بتكون رؤيتنا او خلفيتنا احنا انما كله بيعتمد على مدى قدرة الانسان انه يكون موضوعى وغير متحيز وده بيتحقق انه يراقب نفسه والفاظه طول الوقت يعنى لما يشوف حاجه على الفيس يستفتى عقله ويحلل ويمنطق و يدور و يجمع ويستخلص عشان يوصل للحقيقه
طبعا الموضوع هايكون مرهق بس يستاهل فى ناس بتموت وهى بتدور علي الحقيقه :)
وبخصوص حسنى طبعا دى اكتر حاجه مش مسمحاه عليها

غير معرف يقول...

i love uou fafi

إرسال تعليق

fafy music