جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

10‏/02‏/2012

عصيان مدنى



مش هاعمل عصيان مدنى بس مش هاقول
لأ له
 مش هاقول بقى عشان الوضع الاقتصادى ومنكوا لله خربتوا البلد ولا حاجه لانها مخروبه أصلا 
ولكن لأن للمره المليون الشعب مش إيد واحده ومش متفق على حاجه 
وانا فى اعتقادى ان ده مهم بل اهم حاجه لازم تحصل
ولو ماحصلتشى مش هانوصل للى احنا عايزينه 
لو بقينا ايد واحده ولا هايقدر علينا 100 مبارك ولا 100 مجلس عسكرى ولا 100 سجين فى طره 
ولكن احنا متفرقين للاسف ومواقفنا متفتته
وعشان كده ضعيفه ومش بتجيب بتكون مؤثره
صحيح انا مش مع العصيان لكن لو كان مجدى وبجد فى مصلحة البلد 
وبقرار من جميع طوائف الشعب
اكيد كنت هاكون جزء منه لكنى للاسف مش متفائله ومش متنبأه بنتيجه جيده
لأن بصرف النظر عن الإستفتاءات المنتشره على الفيس بخصوص العصيان 
واللى أنا نفسى عملت واحد فيها 
واللى كلها بتأكد على إن الأغلبيه مش هاتعمل عصيان
ففى حقيقه مهمه ومنطقيه  جدا
بتقول ايه ؟ 
ان لو جمعنا( الاغلبيه) الصامته (حزب الكنبه +منكوا لله خربتوا البلد+ العباسيه+ بتوع لامؤاخذه الاستقرار  )
+ الفلول(طبعا) 
+ الاخوان والسلفيين( اللى الحمد لله طلعونا النهارده بفتوى لوذعيه كالعاده بتقول ان العصيان حرام شرعا )
+المواطنين الشرفاء (المأنتخين طول السنه وبيمضوا ويزوغوا وفجأه كده ضميرهم صحى وقرروا يروحوا أشغالهم عندا فى الثوار )
+ الهيئات والمؤسسات (اللى طلعت بيان النهارده بتقول فيه انهم مش هايضربوا زى السكه الحديد مثلا ) 
 بعد حاصل جمع دول كلهم هايفضل مين يعمل عصيان مدنى ؟
ولو فضل ميدان التحرير ياترى هايكون مؤثر ؟
وهايقدر يستحمل لحد امتى ؟
وخصوصا إنهم مش مدعمين بالأغلبيه
برضه هايفضل الميدان لوحده وماحدش معاه
صعبان عليا الميدان وحاسه بيهم 
العصيان المدنى مش حرام ومن حقهم وده كارت من كروت الثورات ومعروف جدا فى العالم كله ونجح قبل كده فى جنوب افريقيا فى مسيرة كيب تاون السلميه التى انهت الفصل العنصرى وفى الثوره الورديه فى جوروجيا التى ادت الى خلع الدوارد شفرنادزه والثوره البنفسجيه فى تشيكوسلوفاكيا التى ساهمت فى اسقاط النظام الشيوعى 
 وهما من حقهم يحققوا اهداف ثورتهم ويكملوها للنهايه وعشان كده بيعافروا لأخر نفس وعذراهم وحتى لو كنت مختلفه معاهم لكن عمرى ماكنت ضدهم وبتمنى من جوايا ينجحوا لكن للأسف متخونين ومكروهين من الشعب كله
وماحدش بيقدر هما بيعملوا إيه 
صحيح إنهم ممكن يكونوا مش عاملين حساب المستقبل ومش مستوعبين إنهم كده بيقتلوا مصر قتل رحيم (يعنى بيقتلوها عشان يرحموها من المجلس العسكرى ) 
ولكن فى نفس الوقت هما مش خاينين ولكن من وجهة نظرهم بيحبوا بلدهم ودى طريقتهم
كان نفسى الشعب يكون إيد واحده ويتفقوا على حاجه وساعتها هاكون جزء منها بكل كيانى
 

6 مستعده أن أضحي بنفسي من أجل حقك في أن تقول رأيك ".:

sho emad يقول...

انا معاكى فى دة جدا لازم نكون كلنا ايد واحدة . مصر مش دولة ضعيفة مصر دولة غنية ولكن ينقصها قادة شرفاء يعرفوا ازاى يحافظوا عليها ويستثمروا الثروة البشرية والغير بشارية الى عندنا ....... ربنا يحمى مصر ..لكى الله يا ام العرب

Hesham يقول...

مازلت ارى ياوفاء ان الغلطة الكبرى فى هذا التفرق تقع على عاتق شباب الثورة فهم من تركوا الميدان بعد 11 فبراير سعيا وراء غنائم الاعلام والاحزاب وتركوا الميدان للقوى الاخرى اسوة بما فعل المسلمون الاوائل فى غزوة احد حينما تركوا الميدان قبل استكمال الانتصار فالتف عليهم الكفار وهزموهم

فافى يقول...

استاذ هشام
اوافقك الرأى

فافى يقول...

sho emad
ميرسى على مرورك الاول واتمنى مايكونشى الاخير

ذو الوجه المبتسم يقول...

السلام عليكم
قبل ما انطق انا اتخضيت اول ما دخلت المدونة دى ههههههه لقيت طبلة وميزق انا قلت ايه ده رقص ده ولا ايه شكلى هارقص على وحدة ونص ههههههههه

البوست جميل ومتفق مع تعليق الاستاذ هشام
ولكن اهم من ان نبكى على ما فاتنا نفكر ف المستقبل واللى جاى - هنعمل ايه علشان نكون احنا ؟؟؟؟

تقبلي تحياتى
متنسيش تغيري الموسيقي دى هههههههههه
ولا اقولك خليها اهو حبة فرفشة - انا باحب الموسيقي الهادية

فافى يقول...

شرفنى مرورك الراقى وتعليقك الارقى:)
اما بالنسبه للموسيقى ده مجموعة مقطوعات وجه حظك بقى فى المقطوعه اللى فيها رقص:)

إرسال تعليق

fafy music