جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

13‏/03‏/2012

رئيس مصر القادم


بالرغم من إن عدد المرشحين للرئاسه فى اللمون وفى ناس كتير بتنتقد ده!!
 وناس شايفه إن المنصب فقد هيبته (زى الشرطه كده):) 
 وناس شايفه إنها حاجه تستدعى السخريه!!
وناس بتقول ياحسره على اللى مصر وصلت له!! 
وكأن مصر فى محنه إن فيها إنتخابات رئاسه
(معلشى أصلهم مش متعودين على كده)
 وإنما أنا شايفاها حاجه طبيعيه جدا
 دلوقتى فى رئيس تنحى عن الحكم بسبب ثوره ومطلب شعبى
 والعادى إن ييجى رئيس غيره وبما إننا فى بلد (المفروض) إنها ديمقراطيه
 يبقى لازم ييجى رئيس بالإنتخاب
 ولازم ناس ترشح نفسها 
وباب الترشيح يكون مفتوح لكل من تنطبق عليه المواصفات للترشح
 وفى الأخر الحكم هايكون ل( ص) أو( ص ) كالأتى :
الصندوق أو الصفقه
بمعنى 
 أولا : الصندوق لو مشى بما يرضى الله أتوقع أنه يتحسم للرجل ده


 لأنه بالمنطق لو حطينا عدد أصوات الناس اللى كانوا مرشحينه من الأول واللى أكيد ماغيروش رأيهم فيه لأنه مواقفه غير متغيره + عدد أصوات مؤيدين البرادعى اللى كانوا حاطين أبو الفتوح رغبه تانيه وبعد مالبرادعى خلع يبقى منطقى إنهم يختاروه  + عدد أصوات الناس اللى تعاطفت معاه بعد الإعتداء عليه بغض النظر
 (هو كان بعلمه أو لأ) + عدد أصوات بعض الإخوان اللى هايدعموه لأنه إخوانى بفكره + عدد أصوات الناس اللى شايفه إنه لا غبار عليه فعلا ويستاهل إنتخابه 
بعد مانجمع كل دول أعتقد إنه ينجح 

 ثانيا : الصفقه 

ولو كان للصفقه  المزعومه بين العسكر والإخوان واللى اتوقع برضه إنها منطقيه نوعا ما أتوقع يتحسم لحد من الإتنين دول

لأن العوا علاقته جيده بكل من المجلس والإخوان
 ولأن شفيق علاقته كويسه بكل الطرفين زائد إنه شخص جيد لتظبيط المجلس العسكرى بغض النظر عن إنه كان حريص جدا إنه مايبصش فى عين عمرو أديب لما سأله إذا كان الإخوان هايدعموه فى الإنتخابات أو لأ وكان بيجاوب وهو بيبص فى الورقه اللى فيها برنامجه الإنتخابى 
ودى أكيد حاجه غريبه وهايبان سببها عاجلا أو أجلا
أو الأخ ده 

وده لنفس السبب إنه على علاقه جيده بالمجلس العسكرى

ثالثا: للصندوق والصفقه معا
الإتنين يدعموا بعض بمعنى دعم كلا من المجلس والإخوان ويتحسم برضه لأبو الفتوح وده معناه و(إن كنت أستبعده) إن يكون أبو الفتوح فعلا بيصيع وهو على وفاق مع الإخوان وزى السمن على العسل مع المجلس ومتفقين على الشو ده قدام الرأى العام عشان الشعب يتعاطف مع أبو الفتوح أكتر وينتخبه وببعدين ييجى أبو الفتوح يظبط المجلس العسكرى ويضمن له الخروج الاّمن حسب ماتمليه الصفقه وأكيد برضه الصندوق هايكون له دور كبير جدا لأن زى ماقلت فى الأول فى ناس هاتنتخب أبو الفتوح من غير صفقه ولا يحزنون وإن كنت أستبعد صفة الغش والطرمخه عن أبو الفتوح 
أما بالنسبه لكل الإخوه الباقيين زى عمرو موسى وابو اسماعيل وصباحى وغيرهم  أتوقع إنه لن ينجح أحد 
أما بالنسبه للسواد الأعظم من المرشحين اللى ماحدش يعرف عنهم حاجه والغوغاء وعامة الشعب كتير منهم متأكدين إنهم مش هايكسبوا قدام الفطاحل اللى ذكرتهم فوق ولكن مترشحين بس عشان بس كل واحد منهم يقول
  (كنت مترشح لرئاسة الجمهوريه )
 الفشخره المصريه العاديه
(إنت أكيد أكيد فى مصر)
وفى الأخر دى كلها توقعات يا تصيب يا تخيب 

10 مستعده أن أضحي بنفسي من أجل حقك في أن تقول رأيك ".:

حنعيش يعنى حنعيش يقول...

تحليل جدير بالتحليل

ابراهيم رزق يقول...

انا واحد من الناس اللى كنت ضد ابو الفتوح و غيرت رائى و لو ابو الفتوح بيمثل اعتقد كان غلط فى طول الفترة
نرجع للتبرع بالدم
التلوث يحدث من انتقال الدم للجسم و ليس العكس لان الابرة التى توضع فى الجسم من الشركة المنتجة لكى مباشرة
المكان الذى نتبرع فيه معهد الامصال خمس نجوم كل عوامل الرعاية و النظافة تتم فيه بالاضافة الى تحليل شامل للدم تاخذيه بعد اسبوعين من التحليل اى تبرع و تشيك اب على الدم
بجد الدكاترة هناك ممتازين
عملية التبرع سهلة جدا و لا نشعر باى شىء بالاضافة انهم بيكشفوا قبل التبرع و بيحللوا لو وجدوا اى شىء بيرفضوا
تحياتى لكى

فافى يقول...

ابراهيم رزق :
ميرسى ليك كتير على تواصلك اولا وعلى انك اضفت لمعلوماتى ثانيا وكده اروح وانا متطمنه:)

Hesham يقول...

بصى يافاى تحليلك جميل ويدل على نظرة واقعية للأمور ولكن الم تسألى نفسك لماذا وصل عدد من طلبوا الترشيح الى 600 فرد فى 8 ايام ؟؟؟؟؟ طيب لماذا لم ينص فى الاعلان الدستورى على ان من يتقدم لسحب الترشيح يكون معاه ال30000 صوت قبل سحب الإستمارة ؟؟؟لو عايزة تعرفى الاجابة قوليلى وانا اجاوبك

فافى يقول...

hesham
هتناقش معاك بعد ماعرف اجابتك على السؤال :)

Hesham يقول...

أولا دعينا نتفق على أن الثورة بصفة عامة شابها العديد من العيوب أهمها عدم الوعى من الشباب الذى استغله المجلس العسكرى والتيارات الاسلامية للوصول الى الحالة التى نحن عليها بالفعل وهو ماكرس لمفهوم عدم صلاحية الديمقراطية للشعب المصرى وبالتالى فان وجود الهرجلة الحادثة حاليا فى موضوع انتخابات الرئاسة يكرس ايضا لهذا المفهوم كون ان الحلاق والحرامى والتربى مع احترامنا لهم ولمهنهم يتقدمون للترشح للرئاسة يعنى هذا ان صورتنا امام انفسنا وامام العالم اهتزت فالعالم بدأ فى السخرية من الشعب المصرى ويتكرس لديه بافعل هذا الشعور وداخليا نشعر بانفسنا بالمهانه لان الاحساس بهذه الهرجلة يجعلنا نندم على مافات ، وبالتالى لاتستبعدى ان من يريد ان يكرس لهذا المفهوم يقوم بتمويل هؤلاء للتقدم للترشح يعنى انا لو حلاق مثلا وواحد جالى وادانى 5000 جنيه وقالى روح اسحب استمارة ترشح للرئاسة حروح طبعا داانا نفسى لو حد قالى كده حروح واكسب 5000 جنيه من الهوا كل هذا ليظهر الشعب المصرى ( وهى حقيقة بالفعل ) بصورة انه لاتصلح له الديمقراطية كما قالها احمد نظيف من زمان

فافى يقول...

Nelson Souzza
so happy for your sharing and comment,
ofcourse i will visit u soon dear,
but how did u understand my words :)

فافى يقول...

hesham:
انا شخصيا ماتفرقشى معايا مين دافعلهم وعشان ايه المهم مين هايكسب وهايكسب بدعم مين ؟

mohamed يقول...

ترشيح الشاطر اعتقد قلب موازين التحليل ده

فافى يقول...

mohamed :
فعلا بس مش قوى
لأن لسه ابو الفتوح وشفيق والعوا داخل سباق الرئاسه

إرسال تعليق

fafy music