جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

30‏/05‏/2012

يوميات اخوانيه فلوليه


 
 النهارده فى القطر كانت نص العربيه اللى انا راكبه فيها هاتنتخب شفيق وهما واقفين يتكلموا على الموضوع ده لقوا واحده ست تدخلت فى الحوار من غير مناسبه شتمت فى شفيق وفضلت تدعم الاخوان وبتقول:
(خليهم يحكمونا عشان يعفونا ) !
قام واحد هب فيها وقالها وانتى مالك ومالنا ماتروحى تنتخبى مرسى ده بعيد عننا وبعدين انتى اخدتى كام قزازة زيت عشان تقولى كده ؟:)))
 
كل الحوار ده فاكسان جدا وشفتوا 100 مره على الفيس وفى الشارع لكن مش دى كانت مشكلتى
ولكن توقفت عند كلمة (خليهم يعفونا ) وبالرغم من ان الست خلقتها تعلم العفه لوحدها (سامحنى يارب) ولكن سألت نفسى سؤال مهم 
 هى الست دى مستنيه العمر ده كله مرسى والاخوان يعلموها العفه ؟
 وهى مش متعلماها لوحدها ليه ؟
ثم عشان تتعلم العفه تضيع مصر كلها ؟؟
 
سمعت الايام اللى فاتت رأى سطحى واهبل جدا
الناس فاكره انى مش عايزه الاخوان عشان البس براحتى  ومحدش يقولى البس نقاب ههههههههههههههه
ده على اساس انى مقطعه البكينى ؟ ولا طول النهار مش راحمه نفسى من الميكروجيب ؟
ماقدرشى انكر ان حريتى فى كل شىء سبب من الاسباب ولكن اقسم بالله العظيم ان لو ده تمن ازدهار البلد مش هابخل عليها بيه ويبقى ثمن قليل ولو شايفاهم كويسين هانتخبهم لكن انا بجد شايفه الاخوان سيئين وبيجروا وراء الكرسى والسلطه بأى طريقه ومش يهمهم ثوره ولا شهداء
بدليل انهم فضلوا كراسى مجلس الشعب عليهم واللى بيجننى ان انصارهم مش بيصدقوا حاجه عليهم وبيطنشوا عن افعالهم دى وبيحللوها ليهم كمان !
النهارده زعقت على الفيس وقلت 
انا حررررررررررررررررررررررررره 
اقول اللى انا عايزاه وانقد اللى انا عايزاه وانتخب اللى انا عايزاه 
,فى ثوره قامت فى البلد ولازم استفيد منها على قد ماقدر لانى مش عارفه بكره لو اتكلمت هافضل عايشه ولا هايقيموا عليا الحد ؟
ولا هى الثوره مقصود بيها بس المعايره والدم والمزايده وقلة الادب و لولانا ماكنتوش انتخبتوا ولولانا ماكنتوش اتهببتوا؟
وانتوا عبيد وجهلاء واغبياء ؟
 لا الثوره كمان لازم ترتبط بحاجات زى حرية الرأى والديمقراطيه والا لو فضلت اعمل حساب لحد اقبل ماقول رأى يبقى فى نظرى الثوره ملهاش لازمه 
زمان كنا بنخاف نتكلم عشان امن الدوله مايكرهبوناش بيتهيألى بقى دلوقتى لازم كلنا نتكلم وننقد وماحدش يخاف
وعلى الاخوان (وانصارهم) تقبل النقد بصدر رحب لو عايزين يثبتوا انهم اهل للمرحله القادمه المبنيه على الديمقراطيه واهل للانتخاب ولا ايه؟ :))
 
انا حاسه ان اصحابى اللى مش بيكتفوا بانهم يناقشونى على الفيس ولما بقفله بيجروا جرى يكملوا عليا فى التليفون عشان يقنعونى بالاخوان حاجه من الاتنين يا قابضين يا واخدين زيت وسكر!
 
انبسطت اوى لما استاذى اللى بيدربنى على العلاج النفسى كان رأيه سيكولوجيا فى الاخوان زى رأى تمام وهو كالأتى:
 ( حبستهم فى السجون خلتهم عندهم نهم للسلطه ولو اخدوها مش هايسبوها نهائى ولو حد من الثوار فاكر ان الاعتراض عليهم هايبقى سهل يبقى غلطان لأنهم هايمارسوا الاستبداد الدينى فى اشد صوره ودلوقتى المجلس او شفيق بيعملوا محاكم عسكريه انما الاخوان هايلموا الثوار لو عارضوهم ويعدموهم بحجة انهم كفرا وخارجين على الحاكم ومش هايغلبوا يجيبوا فتوى بكده وعشان كده هو هيختار شفيق بمنطق اقل الضررين)
وسيذكر التاريخ ان فافى لم تنصر الدين وتقاعست وتخاذلت و(كام كلمه مجعلصين كده عن اداء دورها الوطنى وبسببها بااااظت الثوره 
ده على اساس ان اللى قاطعوا فى المره الاولى ماكنوش من اسباب وصولنا للمفاضله بين شفيق والاخوان 
بالرغم من تعاطفى مع شفيق احيانا وبحس ان الناس مدياه اكتر من حجمه وانه مفترى عليه فى حاجات كتير ومش يستاهل الهجوم ده كله ده غير انى شايفه ان اسقاطه سهل جدا اكتر من الاخوان 
 لكن انا مش مقتنعه به رئيس للجمهوريه وشايفه انه لايصلح وعشان كده هاقاطع وماحدش يقرفنى ويقولى مانتى كده صوتك هايروح لشفيق هاقولوا يروح 
انا مش مضطره 
 وياريت نقرأ المقال ده  فى واحد على عشره من اسباب ضيقى من الاخوان

6 مستعده أن أضحي بنفسي من أجل حقك في أن تقول رأيك ".:

ابراهيم رزق يقول...

ادى اللى كان وادى القدر و ادى المصير
نودع الماضى وحلمه الكبير
نودع الافراح
نودع الاشباح
راح اللى راح ماعدش فاضل كتير

ايه العمل فى الوقت ده يا صديق
غير اننا عند افتراق الطريق


تحياتى

Unknown يقول...

اولا صباح الخير
ثانيا قد اكون متفق معاكي في حاجات كتير الا ان شفيق مفتري عليه , اما شفيق يصرف فلوس علي الدعاية تعدي 200مليون جنيه واكيد كلنا شفنا الاوت دور اللي كان حاجزه من قبل الانتخابات جاب الفوس دي منين , هنا تحسي ان الموضوع كبير جداعلي شفيق لوحده فاكيد ان ده لعبة كبيرة اوي علينا
قد لاتكوني ثقتي كبيرة بالاخوان الا انني لا اثق اصلا في شفيق
وشايف ان حتي المقاطعه فيها في مصلحة شفيق

بس عايز اقولك علي حاجه لو الاتنين عندك واحد واي واحد فيهم حيكسب مش حيشكل معاكي فرق فخليكي مقاطعه
وانا شايف ان مرسي لو كسب ممكن يبقي فيه امل لكن لو شفيق كسب يبقي ياقلبي لاتحزن علي اللي ماتوا
وياخسارة دمهم علي شعب مايستهلش

تحياتي

فافى يقول...

ابراهيم رزق :
واضح من الاغنيه انك لسه فى حالة الاحباااااااااااااااط عموما ربنا يولى من يصلح ايا كان

محمد عامر
خد بالك انى قلت مفترى عليه فى حاجات كتير :)
وده يثبت عليه حاجات تانيه
ولكن فى رأى انه مافيش حاجه اسمها الشعب مايستاهلشى الكل غلطان والكل اشترك فى اللى احنا وصلناله ده وهاتعرف ليه لما تقرأ البوست اللى قبل ده

اشكركم على تواصلكم معايا

محمد يقول...

مستحيل بالنسبه ليا ادي صوتي لشفيق وصعب اقاطع واساعده في الفوز , فالحد يوم الانتخابات ان ماظهرش حل بديل علي الساحه للورطه دي صوتي هايكون للاسف لمرسي

وبالنسبه للامل فهو موجود في اختيار مرسي بس مش في قيادات الاخوان اللي متفق معاكي انهم بيدوروا علي كراسي ونزولهم منها مش هايكون سهل لكن الامل موجود في شباب الاخوان اللي نزلوا معانا يوم 25 بالرغم ان الجماعه رفضت النزول واللي وقفوا معانا في موقعه الجمل ومواقف تانيه كتير

فافى يقول...

محمد :
ضحكتنى والله وانت بتقول الامل فى مرسى مش فى الجماعه
وهى الجماعه ايه ومرسى ايه ؟ ثم انا بتكلم على الاخوان لان فى الواقع مرسى ده حد مش موجود اصلا بالنسبه لى وشوف ال صوره اللى قبل قبل الاخيره فى البوست وانت تفهم قصدى :))
مرسى على مرورك الراقى

محمد يقول...

انا مش قصدي افرق بين مرسي والجماعه انما قصدي اختيارهم نفسه مقارنه بينهم وبين شفيق فيه امل , و انا متفق معاكي حزب الحريه والعداله كله لعبه في ايد شوري الاخوان وحتي الكلام عن الفصل بينهم مش منطقي

وعلي العموم بعد مسرحيه الحكم اللي حصلت اعتقد الايام الجايه هايحصل تغييرات كتير

إرسال تعليق

fafy music