جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

17‏/11‏/2010

حاجه تقرف

حاجه تقرف

دخلت على الأكونت الخاص بيا على الفيسبوك لقيت على الصفحه الرئيسيه واحد مدخل فيديو بيتكلم عن فضل الصلاه المفروض إنى أقول جزاه الله خيرا لكن اللى حصل إنى نقدته نقد لاذع جدا عجب بعض الناس وعملوه عليه لايك وماعجبش البعض الأخر وكتبوا تعليقات نقد ليا أنا والبعض الأخر لا مع ولا ضد والبعض بيشجع اللعبه الحلوه.

وكل ده ليه؟

لأن الأستاذ المحترم كاتب على الفيديو العنوان الأتى(فضيحة بنت فى خدمه إجتماعيه) إعتقادا منه إن ده العنوان اللى هايشد الناس إنها تتفرج على الفيديو على إعتبار إن الناس بتعشق الفضايح طبعا.

بقى بالذمه ده كلام فى حد يكتب على فيديو بيبين فضل الصلاه عنوان غير لائق كده ؟ ومايتناسبش مع الصلاه ولا قدسيتها؟ ولو الأخ ده متدين أوى وعايز يهدى الناس بيكدب ليه ؟هو العنوان ده مش يعتبر كدب وضحك على الناس عشان يغريهم يشوفوا الفيديو ؟ولا هو لازم عشان يهدى الناس لحسنه يعمل هو سيئه؟

واللى غايزنى إن الناس قاعده تشكر فيه وتقول له جزاك الله خيرا ,نفسى أفهم على إيه على إنه كدب وخدع الناس وحتى لو الفيديو محترم وهانقول الغايه تبرر الوسيله لسه الناس محتاجه النهارده فيديو يعلمهم أهمية الصلاه ؟هى الصلاه دى إختلفوا عليها الفقهاء ولاإيه؟ مافيش أيات صريحه فى القراءن والسنه بتتكلم عن أهمية الصلاه ولا الناس دى كانت محتاجه فيديو عنوانه فضيحة بنت فى خدمة إجتماعيه عشان يصلوا والله كان يقدر يكتب عنوان محترم  واللى عايز يتفرج يتفرج واللى مش عايز هو حر.

ربنا يهدى

9 مستعده أن أضحي بنفسي من أجل حقك في أن تقول رأيك ".:

غير معرف يقول...

like

:)

فافى يقول...

مبسوطه انها عجبتك يا سمو الامير

غير معرف يقول...

فعلا عتدك حق ماهو مش عشان يعمل خير يقوم ياخد بداله سيئه بس فى ناس كتيره من عينة الاخ ده فى كل حته

Mona Hekal يقول...

فافي
ازيك معاكي حق طبعا تنتقديه هو الفيس بوك كده فيه حاجات مش منطقيه كتير تلاقي الناس عامللها لايك و بتهيصلها من غير ما تفهم
مبروك اللوك و الموسيقي شاطرة عرفتي تعمليها :)
تحياتي

غير معرف يقول...

حبيبتى فافى
كويس قوى انك رديت عليه رد لاذع...بس مش كفايه..المفروض النوعيه البذيئه دى تاخد بالحزمه (لامؤاخذه)..بس صعبه دى على النت..
عموما انا عجبنى البوست المرة دى ...مع ان غايظنى بال...ظ..مش بال..ز..
داليا

فافى يقول...

هههههههههه اه والله عندك حق يا دولى انا برضه حسبت ان فى حاجه غلط فى الكلمه دى شكرا على التوضيح

فافى يقول...

ميرسى اوى يا منى انك متابعانى ولو انى زعلانه منك عشان مش قلتى لى اعمل الموسيقى ازاى عموما ا نا شاطره عاملتها لوحدئ(:

Unknown يقول...

السلام عليكم

مؤيدك تماما في رد فعلك (مع تحفظي على كلمة العنوان)..

وقد كتبت أيضا أكثر من مرة عن ظواهر شبيهة.. أقصد الذي يدعو إل الدين بسذاجة تفسد ما يود عمله من خير، وتعطي انطباعا سيئا نحو المتدينين من جهة أخرى!!!!

تحياتي على عقليتك الناقدة الفاحصة...

فافى يقول...

ميرسى على تعليقك اللطيف يا ماجد بس هو انت تقصد عنوان البوست نفسه؟
عموما اذا كنت تقصد عنوان البوست فده سببه انى دايما بكتب زى مابتكلم وانا فعلا قلت ساعتها حاجه تقرف:)) عموما شرفتنى متابعتك

إرسال تعليق

fafy music