جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

04‏/03‏/2011

تناقضات ميدان التحرير

تحديث: لكل الناس اللى اتضايقت من جملة الناس بتوع التحرير انا قلت كده مش قصدى اهانه دى جمله عفويه لأنى مش عايزه اصنفهم كشباب لانى شفت بعينى انهم كانوا من جميع فئات الشعب وللمره المليون بسجل احترامى ليهم جدا النقد مش موجه لأشخاص ده موجه لبعض الأفكار اللى مش منطقيه الغرض من ده كله اننا نفضل نحب بعض ونبطل نخون بعض للمره المليون انا مع الثوره من قبل حتى مالثوره تحصل


كل حاجه فى الدنيا فيها مميزات وفيها عيوب قبل الثوره كان فيه مميزات وعيوب وبعد الثوره نفس الحكايه فيها مميزات وفيها عيوب يعنى المميزات ان احنا بنتطلع اننا نكون احسن ولو ان لسه مابقناش احسن ومن العيوب اننا فقدنا الاخلاق واحترام الكبير وللأسف بنسمى ده شرعيه ثوريه كنا دايما ايد واحده دلوقتى انقسمنا وبقى كل واحد رأى وناس مؤيده وناس معارضه وماحدش بيحترم رأى حد وكله مش طايق بعضه

بتوع ميدان التحرير بيتضايقوا اوى من اى حد يعارضهم فى حاجه وشايفين ان رأيهم هو الصح واى رأى مخالف خطأ وبيحجروا على أراء الأخرين وبيتنرفزوا اوى لما حد يقول رأى مخالف ليهم مع إن هما نفسهم رايحين ميدان التحرير عشان يعبروا عن رأيهم  بحريه وعايزين ديمقراطيه  بعد ماعانوا من الديكتاتوريه سنين طويله  ليه بيكونوا ديكتاتورين على الناس هو مش كل واحد حر يا جدعان ؟

كمان نزلوا عشان يدافعوا عن حقوق الناس ومطالبهم ولما الناس فرحت معاهم بتحقيق المطالب دى زعلوا وقالوا كنتم فين من الاول مانتم مانزلتوش الميدان معانا وكأن لازم ال80 مليون ينزلوا الميدان او انهم كانوا عايزين يحققوا مجد شخصى لهم ومش عايزين حد يشاركهم فيه وان ده انتصارهم لوحدهم طب كنتم بتقولوا من الأول ليه بقى انكم بتتكلموا بإسم كل المصريين ؟ كنتوا قصروا وقولوا انكم بتتكلموا بإسم نفسكم ؟ مستكترين الفرحه علينا ليه ؟هو مش كلنا مصريين ؟

كمان بتزعلوا اوى ان حد يخون وائل غنيم او اى رمز من رموز الثوره  ده على إعتبار إن الدهولل ده من رموز الثوره وتقولوا هو احنا لازم نخون يا جماعه  وايه دليلكم على كده ؟فى حين ان انتم واقعين فى نظرية المؤامره والتخوين دى لشوشتكم والدليل تخوين 100 فنان وفنانه وقلتم دول قابضين من النظام لمجرد انهم بيعبروا عن رأيهم زى أى حد  ده غير المذيعين والمذيعات اللى انضموا للبلاك ليست مؤخرا واخر ماخونتم هو شفيق لما قلتم بيسمع كلام مبارك وبيدير البلد من خلاله وبرضه مافيش دليل على كده لا حول ولا قوة إلا بالله ماهو مافيش دليل فى الحالتين  دا حتى الجيش حبيبكم شككتم فيه وقلتوا ده حد شاحنه ضدنا لمجرد إن الجيش إتخنق وزهق من عمايلكم وطلعت نواره نجم فى مدونتها تقول امن الدوله غير الجيش علينا وكأن الجيش أهبل بأه

بتزعلوا لو حد قال دول قابضين من الإخوان أو المعارضه أو بياكلوا كنتاكى عشان يفضلوا فى ميدان التحرير وأنتم كمان طول النهار بتتهموا الناس إنهم خاينين وعملاء وقابضين من النظام عشان بيقولوا لكم كفايه كده البلد باظت بقى كل دول قابضين من النظام ؟ده مبارك لو كان وزع فلوسه على كل دول يقبضهم عشان يشتريهم كان زمانه خرج من مصر مفلس

كمان بتقولوا انكم ايد واحده ومطالبكم واحده وبتسخروا من اى حد يقول فى اجندات تانيه  وفى نفسى الوقت نواره نجم تطلع تقول فى مدونتها كان فى ناس فى ميدان التحرير بيهتفوا هتافات غيرنا  وده يدل على إن فى ناس لها حسابات تانيه بلاش أجندات تانيه الكلمه اللى بتنرفزكم دى

انا ضد التعميم إنما فى دى هاعمم عمرى فى حياتى ماتكلمت مع حد فى ميدان الحرير او مؤيد لميدان التحرير إلا ولقيته بيفكر كده كلهم كلامهم واحد وتفكيرهم واحد فى السلبيات والإيجابيات على حد سواء

اذا كنتم عايزين البلد تكون احسن ممكن انما لو عايزين تقتلعوا الفساد من جذوره فا مش هاتقدروا وإلا تعملوا مظاهرات تطلبوا فيها إن الشعب يتنحى قلت ولسه بقول لازم نظبط من تحت زى فوق وربنا يهدى

10 مستعده أن أضحي بنفسي من أجل حقك في أن تقول رأيك ".:

غير معرف يقول...

مبدئيا حلوه المدونة دى جدا وأهنيكى عليها
نتكلم بأه...
كلامك منطقى وان كنت معترض على المسميات زى:
الناس بتوع التحرير!!!!!!! ده مين الناس بتوع التحرير دول؟
او انك قولتى على وائل غنيم دهل!!! ليه تقولى كده؟؟؟ انا ولا بحبه ولا بكرهه بس تقولى حتى على مدير تسويق جوجل فى الشرق الاوسط دهل!!!!
ثانيا وده الاهم:
لما ناس تموت فى التحرير عشان طقت وانفجرت فى ثورة شعبية وواحد يتصل يقول فى التحرير فيه جنس ومخدرات؟؟؟ يبقى عادى؟ كده واحد عادى بيقول رأيه؟؟ او لما واحده عفا عليها الدهر تقول ولعوا فيهم يبقى ده عادى برده؟ مش فيه حاجه اسمها مسئولية اجتماعية ان انت كفنان او كاتب لازم رأيك يبقى بمستوى الناس اللى بتسمعلك مش بمستوى متدنى زى ده كله كدب وافترا.........مش مجرد انهم قالوا كفاية كده البلد باظت

fafy يقول...

اولا ميرسى على متابعتك ليا ومبسوطه ان مدونتى عجبتك نتكلم بأه...:))
انت لفتت نظرى فعلا ان جملة الناس بتوع التحرير جمله مستفزه للبعض لأن انت مش اول واحد تعلق عليها لكن حقيقى انا مش قصدى اهانه انا بحترمهم جدا لكن اصلهم كانوا من جميع فئات الشعب مش شباب بس عشان اقول شباب التحرير وهاقول ده فى تحديث للمدونه
اما فيما يخص وائل غنيم وبلاش الدهولل انا مش بشتمه انا بوصفه بس بجد مش لاقيه كلمه توصفه اكتر من انه دهولل ولا يعنينى فى شىء اذا كان مدير تسويق او غيره هو ماكنش مدير تسويق فى منظمة حقوق الانسان يعنى انا كمان لابحبه ولا بكرهه لكن انا شايفه انه خد اكتر من حقه ومش ده اللى يمثلنى ويتكلم باسمى طبعا هاتحس انى هجوميه جدا عليه لكن انا مهنتى كأخصائيه نفسيه على( قدى يا سيدى )بتخلينى احكم على الناس بشكل مختلف والولد ده صدفنى ممثل كبير جدا ومجنووووووووووون شهره مش زى مالناس فاهمه
الاهم من المسميات بقى انه الجزء الاخير من تعليقك هو ده المغزى اللى بتكلم عنه لازم نعذر بعض ونبطل نخون بعض صدفنى اللى كان بيتصل يقول كفايه كده والله ناس بتحب البلد وصعبان عليها الخراب اللى كنا فيه وهما الفنانين دول مش بنى ادمين ليه احمد حلمى واحمد السقا وكل دول يتقال عليهم عملاء وخاينين وانا ليه يتقال عليا قابضه من النظام الناس اللى قاعده فى البيت لا تقل وطنيه عن اللى فى ميدان التحرير لما قالوا للثوره كقايه كانوا خايفين على البلد كل واحد بيحب البلد بطريقته ودى طريقتهم ولازم تقدروا مشاعرهم لما اتضايقوا من الناس اللى موجوده فى ميدان التحرير حتى يا سيدى لو كان مضحوك عليهم نفهمهم مش نقول عليهم خاينين وعملاء احنا بنسمى على اى اساس؟ ماهو انت زعلت اهو هشان قلت الناس بتوع الميدان مع انها مش اهانه لكن لما اللى فى الميدان يقول على اللى بره انه خاين ده عادى؟ صدقنى انا مش بهاجم اشخاص انا بهاجم اسلوب فكر ضحل

fafy يقول...

http://wafaa-shalaby.blogspot.com/2011/02/blog-post_08.html

اللينك ده فى بوست كنت كتباه من مده كبيره لما تقراه هاتفهم انا قصدى ايه

hany يقول...

تمام
على فكرة الموسيقى اللى هنا دى حلوة جدا...
المهم..
الناس اللى بتقول كفاية ثورة ونشوف شغلنا وبيصدقوا كلام فلول النظام ان الدنيا واقفة والحال واقف دول معذورين انهم مش بيقروا كتير او بيقروا ومش بيستوعبوا..مقدرش اكرههم على موقفهم ده او اللى هم فيه
انما لما تبقى ثورة يضرب بيها المثل فى الدنيا كلها وواحد اصلا منزلش من بيته يتصل يقول انا رحت لقيت جنس ومخدرات يبقى ده بيشتم ناس يهمونى ومنهم اللى مات شهيد عشان بلده يبقى هل ينفع اسكت؟؟؟؟ ولما حد يقول نولع فى ناس انا بحترمهم هل اسكت برده؟؟؟
الناس اللى عليها مسئولية اجتماعية واحنا معتبرينهم نجوم لازم يبقالهم موقف محدد من كل حاجه بتحصل وسلبيتهم دى غلط زى ابو تريكه وناس كتير مش هكرههم ولا هقاطعهم بس المفروض انهم مش هيبقوا نجوم بعد كده..هعامله بنفس السلبية بتاعته
انا احترم وجهات النظر لكن قلة الادب والافترا بيبانوا لوحدهم وانا مع اى مقاطعة للقائمة السوداء وأى حاجه عشان نعاقب الناس دى مش على رأيهم لكن على كذبهم وتضليلهم.

fafy يقول...

والله فيما يخص الجنس سمعتها كتير لكن مش شفت حاجه بعينى لكن المخدرات واحد ضابط( جيش) قالى ان كانت ريحة الحشيش بتكون فايحه من ميدان التحرير بليل وعموما يا سيدى انا برضه بعذرهم اهم معظمهم شباب واللى بيعملوه لما بيخرجوا يتفسحوا بيعملوه فى ميدان التحرير وده مالوش علاقه اطلاقا بوطنيتهم حلو كده؟اظن مافيش حد بيعذر حد ويحترم افعاله اكتر من كده وده المغزى بقى اننا ندى اعذار لبعض لكن فيما يخص ابو تريكه ثبت لى بالتجربه القاطعه ان اللى سكت هو الكسبان لان لما الفنان بيطلع ويقول رأيه بصراحه كأنسان بيتمرمط من الشعب ومش بيعجب حد وهايخسر نجوميته يبقى الاحسن يسكت ومع ذلك اللى سكت ماسلمشى لانك قلت عليه برضه سلبى طب بالله عليك يعمل ايه ؟لازم يبقى رأيه مع رأيك هو بالعافيه وماتنساش ان الفنان او لاعب الكره راس ماله شهرته وحب الناس له ماينفعشى يخسرهم من فضلك حط نفسك مكان الناس شويه وانت رأيك هايختلف وميرسى على رأيك فى الموسيقى بتاعتى

hany يقول...

واحد يشم حشيش فى ميداااااااااااان التحرير؟؟؟ مش غريبة شوية؟؟ ده لو فى نفس الأوضة ممكن ميشمهاش على فكرة!!!!
انا مش مضايق من أبو تريكة بس انت لو لاعب كرة كويس عادى انت بتعمل شغلك وخلاص انما النجم ده يفرق لان فيه ناس كتير أوى واخداك مثل أعلى وبتضرب بيك المثل مينفعش تبقى سلبى لا ده انت لازم تاخد موقف زى ما عمل ساعة حصار غزة على فكرة وهو ده اللى خلاه نجم ومثل أعلى لكن خلاص هتتنقل لمستوى اللاعب الكويس اللى الناس بتحبه وكل حاجه بس مش نجم ولا مثل أعلى....فهمتى وجهة نظرى؟؟؟
اوضحهالك اكتر؟؟؟
فيه بنات كانوا فى التحرير من الأيام الأولى كمان أنا مرضاش أنهم يتقال عنهم كده
طب لو واحد قال كلمة وحشة عن كل البنات اللى بيعملوا مدونات هل دى تبقى وجهة نظر أو رأى؟؟ انتى هتسكتى وتقولى وجهة نظره هو حر؟؟
اختلاف الرأى هو اللى انا وانتى فيه دلوقتى مع كل احترام انما اللى هم عملوه ده افتراء وكذب مش رأى

fafy يقول...

من اول مثال وانا فاهمه وجهة نظرك واكيد برضه انت حر فى رأيك فى ابو تريكه برافو عليك اديك قلت (تحبه وكل حاجه بس مش نجم ولا مثل أعلى)جميل جدا يعنى مش خاين وعميل وابن ستين فى سبعين والمسميات الكبيره اللى قطعا ملهاش اى اساس من الصحه وبيرددها ناس حافظه مش فاهمه هو ده اللى انا اقصده ,الخاين هو اللى بينقل اسرارك لعدوك وغير امين عليك واللفظ ده ماينطبقشى على حد من اللى الناس سحلتهم انت عارف مين الخاين بجد بقى عشان نكون واضحين مش اللى قالوا بنحبك يا مبارك لانى لان زى ماقلتلك عندهم اسبابهم سواء عجبتك او لا انما الخاينين وللاسف مصريين هما اللى كانت امن الدوله مجنداهم فى كل حته مذيعين او فنانين او صحفيين اوفى الجامعه يفتنوا على الطلبه الناشطين او البياعين فى الاكشاك هما دول الخاينين والصحفيين اللى كانوا بيدونا معلومات غلط وبيضللونا صدقنى البلد للاسف فيها ناس جديرين بكلمة الخيانه اكتر بكتير من فنان كان عايز يحافظ على فنه او لاعب كره عايز يحافظ على نجوميته

غير معرف يقول...

انا بصراحه لسه شايف الحوار دا انهاردا ومش عارف بئاله اد ايه منشور بس حبيت اعلق بكلام بسيط اولا احب ابدى اعجابى بالاخت fafy لان كلامها منطقى جدا ثانيا انا واحد من الشعب وكلامى اللى هقوله بيعبر عن راى ناس كتير جدا انا عايش بينهم وفى وسطهم الحقيقه وببساطه كلنا كنا محتاجين الثوره ولما حصلت فرحنا بيها جدا ورغم كل اللى كنا نعرفه من فساد فى البلد ورقه ونهب وظلم عيشين فيه لكن الثوره وضحت لناس كتير وكشفت حاجات اكبر من اللى كنا نعرفه ووعت ناس كتير جدا لحاجات ماتعرفهاش حتى الاجهله والاميين بس ليه الشباب مش عاوز يكتفى بكدا الناس دلوقتى عايش فى عذاب اكبر واكتر والسبب دلوقتى هما الشباب اصحاب الثوره ليه الشباب مش عاوز يسيب ميدان التحرير وينتظر تحقيق باقى المطالب ليه الشباب مش عاوزين يسيبو البلد تشتغل وتستقر عشان الناس اللى الخراب بيقرب من بيوتهم ليه مش واثقين فى القوات المسحه فى الف ليه وليه محتاجه اجابه خايف يوم 25 يناير اللى الشعب كله فرح بيه يتحول ليوم شؤم على البلد وثورتم تبوظ وتمشى فى الشارع تخاف تقول بعدها انا من شباب 25 يناير عندى احساس كبير اوى انكم باستمراركم فى التظاهر هتخربو البلد عاوز اقولكم مش مهم الخسائر المديه اللى حصلت للبلد بس المهم البلد ماتخربش كلها وباديكم الناس حبيبتكم لانكم خلصتوها من الطغاه ومفسدين كتير فى الارض بس ياريت مع حبى الشديد ليكم ماتخروهاش وماتنسوش ان لسه فى مخالب الطغاه موجوده وبتحاول تدمرها بس لو دا حصل هيبئا بايديكم وعن طرقيقم ومن خلالكم وهتبئو زى اللى جه يكحلها عماها وساعتها حسابكم عند ربنا مش هيقل عن حساب النظام الظالم السابق اتمنا من الله سعت الصدرمنكم وقبلو كلماتى البسيطهعلى انها راى واحد حر من الشعب اللى عاوز يبئا حر وشكرا

fafy يقول...

الى الغير معرف:
مبسوطه ان مدونتى عجبتك وعلى فكره لو عايز تعرف تاريخ اى بوست هتلاقيه فوق جنب العنوان وانشاء الله نخرج من اللى احنا فيه ده على خير ومصر تكون احسن عايزين نتفائل

رمرومي يقول...

معدن الناس بيظهر وقت الشدائد، والثورة أظهرت أسوء ما فينا، وبينت إن اللي حصلنا السنين اللي فاتت مش قليل، والتعليم المجاني عمل عمايله وبين إنه مش تعليم أصلا.

أنا حاسس إن البلوج ديه كلها مسروقة من عندي
HeHe :P
*bahazar*

إرسال تعليق

fafy music