جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

28‏/09‏/2011

رحلتى مع العلاج النفسى (2)




                                                                                  
أنا ليه بقى قلت الرغى اللى فى البوست اللى فات ده ؟؟
 عشان أمهد للمأساه الكبرى اللى لقتها لما زرت عيادة طبيب المفروض إنه أحد المشهورين و الأكفاء فى الطب النفسى  وده عشان أتدرب فى عيادته وكانت الطامه الكبرى 
العياده زى مابيقول الكتاب بالظبط 
اقل مايقال عنها انها
طابونه
اولا لما دخلت من الباب إنقبضت من رؤية السكرتيرة حاجه كده زى السجانات اللى بيطلعوا فى الأفلام يعنى المريض يا دوب يدخل العياده يتخض ويعقل لوحده المهم طلبت منها إنى أقابل الدكتور وطلبت منى إنى انتظر لحد ما الحاله اللى جوه تخرج وفعلا إنتظرت وبعدين لفت نظرى إن صوت التلفزيون عالى جداوهى مش بتحاول توطيه شويه وكنت متأكده إن صوته واصل عند الدكتور جوه وقعدت اسأل نفسى طب المريض إزاى مركز فى الإجابه على أسئلة الدكتور وإزاى الصوت العالى ده مش مضايقه وازى الدكتور ساكت اصلا على كده ؟  المهم قلت ممكن تكون مش جلسه نفسيه تستاهل التركيز والدكتور هايكتب له على دواء ويخرج  ولكن بعد شويه لقيت 3 بنات صغيرين  دخلوا العياده  وعملوا دوشه جامده جدا وفهمت انهم بنات الدكتور وعايزين يدخلوا طبعا كنت متأكده ان السكرتيره هاتمنعهم لكن فجأه لقيت بنتين منهم فتحوا الباب من غير مايخبطوا حتى ودخلوا قعدوا 5 دقايق جوه وخرجوا بقيت فى حالة ذهول حتى لو كشف عادى برضه ده ماينفعشى انا لو مريضه والدكتور بيكتب لى على ادويه هاتضايق جدا انى اكون قاعده فى المرستان ده  المهم زهقت من الانتظار وقلت للسكرتيره :هو قدامه كتير انا ممكن أمشى وأجى تانى فوجئت انها بتقولى أصلها جلسه نفسيه وعشان كده بتاخد وقت انا طبعا ذهلت
كل المرستان ده وجلسه نفسيه ؟؟
دى مصيبه أومال المريض عارف يركز ازاى فى الجو ده؟
  والدكتور ده مجنون ولا ايه؟ 
وكله كوم واللى شفته لما دخلت للدكتور كان كوم تانى خالص بعد ما الحاله خرجت دخلت لقيت تلفزيون تانى عند الدكتور جوه وقاعد يتفرج على فيلم بوبوس وبيضحك  كأنه قاعد فى بيتهم
نظرت للحائط وجدت أية الكرسى وسورة الفلق معلقه على الحائط وقعدت أسأل نفسى طب ممكن لو دخل مريض مسيحى أو حتى ملحد يا ترى هايعرف يفضفض للدكتور بحريه ولا هايحس ان الدكتور متحيز مسبقا لرأى ما دون الاخر وعشان كده مش هايكون حيادى وهو بيسمعه وده كفيل ان يجعل المريض مايبقاش على راحته وهو بيتكلم؟
الحاجه التانيه اللى لاحظتها انه واضع صورة أسرته كامله على المكتب وده أكيد يعطى إيحاء  أو تصور إنه سعيد فى حياته الأسريه ومرتبط بأسرته وده جعلنى أسأل نفسى تانى طب لو دخل للطبيب ده مريض تعيس فى حياته الأسريه أو مريضه ماعندهاش أطفال بالمره ياترى هايكون إيه شعورها وهذا بالطبع مع ملاحظة إن المريض النفسى بيكون حساس جدا والتعامل معاه لازم يتم بحظر والغريب ان الطبيب ده ولا كأنه درس علاج نفسى فى حياته وده دايما اللى بيأكد لى إن الأطباء النفسيين أسهل حاجه عندهم الروجته واقلب يعنى لا عنده خلق يسمع ولا يحل مشكله
يتبع....

5 مستعده أن أضحي بنفسي من أجل حقك في أن تقول رأيك ".:

sabry abo-omar يقول...

بوصى الفيصل عند الدكتور هنا عدد الكشوفات ودخل العيادة.. وتلاحظ العلاقة العكسية بين الإلتزام بتقاليد المهنة والنظافة وبين الحاجات دى.. اكيد مش تنكرى اللى بتحكى عنه مشهور اوى والناس كتيره عنده وبيكسب كويس.. حاولى فهمنى السبب طيب

فافى يقول...

sabry abo-omar

فعلا بس المشكله هنا فى الضمير او قلته المشكله انه لو ماتبعشى القواعد كما يجب هيأثر على سير العلاج كله وعلى علاقته بالمريض وكل حاجه
بجد نفسى احضر جلسه من دول عشان اعرف ازاى المريض بيقدر يتفاعل فى الجو ده لكن طبعا ده مستحيل يحصل عشان اخلاقيات المهنه ولو انى اعتقد ان الطبيب ده يعملها ههههههههههه

Mona يقول...

مش قادرة أعلق :(

Mona يقول...

مش قادرة أعلق :(

فافى يقول...

mona
ليه يا منى مش قادره تعلقى كفى الله الشر :)

إرسال تعليق

fafy music