مدمرين التنميه البشريه

 من يومين قريت الكارثه دى نوت مكتوبه بواسطة الأستاذ (المدرب)/محمد زكريا وماعتقدش إنه هايضايق لما أصرح بإسمه لأنه أكيد مش هايستعر من النوت مثلا بعد البوست ده , قريتها و إستفزتنى جدا ومش قادره أصدق إنى شايفه الكلام ده وإن لسه فى حد بيفكر بالطريقه دى وقررت أرد عليه بنوت تانيه :

* بعض الجمل الفذه للأستاذ وتعليقى عليها:

الاستاذ بيقول إيه بقى ؟

*إنه مضايق جدا إنه ساعات بيشوف بنات بتفضل الشغل على الجواز وبتفضل مستقبلها فى شغلها عن بناء أسره ودايما بيقولوا بلا جواز بلا كلام فاضى وإنها بتفضل تقول كده لحد ياحرام العمرما يجرى بيها وتبقى فوق التلاتين  وجمالها يدبل وقطر الجواز يفوتها 

( دا على اساس ان البنت فوق التلاتين بتبقى شكل صباح كده )

*ومكمل وقايل (وبدل من أن تعترف بخطا وجهة نظرها( ومش فاهمه طبعا ليه لازم تعترف او تعترف قدام مين )تتمسك بوجهة نظرها أكتر.

وقال ايه كمان :(*صدقونى ياجماعه المساواه والحريه والعمل والنجاح والحفر فى الصخر كلام فاضى لو هيكون على حساب الفطره وهى بناء المجتمع والأمه ,دخلت علينا مصطلحات غريبه مقرفه تسلب منا فطرتنا)

 (طبعا يقصد المساواه والحريه والنجاح والحفر فى الصخر طبعا يا جماعه ايه القرف ده , المساواه والحريه والعمل والنجاح والحفر فى الصخر عنده يبقوا كلام فاضى وتعريف الفطره عنده :بناء مجتمع وأمة يعنى ماتقصدشى فطرة الجواز اللى هى الجنس يعنى؟

*كنت بتفرج على لقاء للفنانه صباح اللى فضلت الفن على حياتها الشخصيه.

 انا بقى بقولك على فكره صباح اتجوزت  وعملت ميت حياه اسريه ومخلفه ولد وبنت يعنى الفن ماجاش على حساب حياتها الشخصيه ولا حاجه الا اذا كنت بتتكلم حضرتك على صباح تانيه.

*أنا مش ضد عمل المرأه أنا ضد خيبتها. 

عنوان النوت الركيك جدا (البنت الخايبه ) هو شايف ان البنت اللى بتهتم بمستقبلها هى بنت خايبه. 

وبما انى وعدته او بمعنى اصح توعدت له بإنى هارد على النوت دى فى مدونتى عشان كده هارد تانى هنا فى المدونه مش هاكتفى باللى قلته على الفيس .

*أحب أقولك يا مدرب يا عبقرى إنك ياريت ماتديش محاضرات تانى لأنك مناقد لنفسك  الطموح والإهتمام بالمستقبل عمره ماكان خيابه تحت اى ظروف حتى بمقارنته بالجواز بالعكس ده تنميه وتطوير ذاتى وبشرى يا استاذ (يا بتاع التنميه البشريه) طالما عايز البنت ترجع ميت سنه لورا وتقعد فى البيت مستنيه العدل قدام فرن البوتجاز او على طشت الغسيل يبقى ياريت تغير محاضرات التواصل وتحقيق الاهداف اللى بيحضروها ليك البنات وتخليها احسن فى طريقة عمل الكوسه بالباشميل عشان بحبها اوى .

*النوعيه اللى بتفنى ذاتها فى العلم والعمل ومش بيهمها العمر يجرى بيها النوعيه دى انقرضت لان زمان كانت موجوده لما الجواز كان سهل ومتاح لكن دلوقتى فى ازمه طبيعى مش ناقصه البنت تتأمر وعشان كده أول متلاقى الرجل المناسب بتمسك فيه  وأراهنك انها كمان ممكن تسيب طموحها واحلامها عشانه ومش معنى كده انها مش لاقيه حد يتجوزها  ولا رميه لان عدم وجود الرجل المناسب ان كان يعيب حد يبقى يعيب الرجل لان  يدل على ان( الرجل اللى بجد) مش  رجل عشان فى وشه شنب او مكتوب فى بطاقته ذكر لا وجود له وده بيخلى البنات تهتم بمستقبلها ونشاطتها اكتر

كمان طالما معلق وكاتب انك مش ضد عمل المرأه لكن ماتحبش تكون البنت دى مراتك او اختك اوكيه يعنى الموضع كله نوع من انواع الاسقاط اللارادى وذاتى بحت واعتقد انك ممكن تقول الكلام ده لمراتك واختك  وتخلص  وماتتعبشى نفسك وتوجه الكلام ده لكل البنات لأن اطمن البنات عارفه مصلحتها كويس قوى ولما بتقولك بلا جواز بلا كلام فاضى هى بتضحك عليك انت مش على نفسها لان من جواها نفسها تعمل بيت واسره بس مافيش حد مناسب اتقدملها او يمكن يكون مش بيتقدم لها حد اصلا واكيد مش هاتقولك كده وهاتفهمك ان هى اللى مش عايزه تتجوز. 

 *الرجل اللى مايرضاش يتجوز بنت ناجحه فى شغلها  او مرتبها اعلى من مرتبه او معاها شهادات اعلى منه هو بالأساس عنده عقد نقص وكلاكيع ربنا وحده اعلم هايخلص منها امتى وفى مصلحته انه ياخد واحده حماره عشان مايكونشى عقلها متفتح وتقدر تنقده لانها مابقتشى قطه مغمضه زى الاول وهاترضى بأول عريس اهبل يخبط على بابها وياريت هاتعجبه برضه وهايرضى بيها دا هايفضل يطلع عقده عليها ويعرفها ان فى ستات تانيه احسن منها وناجحين اكتر منها 

 وبقول لكل البنات اللى دخلت وعلقت على النوت انها جميله وصحيحه انا بقولكم (كاتكم نيله انتوا بقى البنات الخايبه اللى بتتكلم عنها النوت واقعدى انتى وهيا يا حبيبتى إستنى عريس الغفله قدام المرايا أو على طشت الغسيل لكن مش من حقك تقولى على غيرك خايبه إنتى اللى خايبه ونايبه 

لكل البنات الناجحين  اللى نقدت النوت وإتفرست منها زى أقولهم :

ولا كأنكم شفتوا حاجه أنا كبنت مصريه فخوره بيكم والى الامام دايما مش هانسمح لحد ابدا يقتل طموحنا او يرجعنا مليون سنه لورا انا بجد حاسه بتغيير جامد جدا فى سيكلوجية البنت المصريه يعنى بتكلم مع بنات صغيره فى العشرين واقل وبلاقيهم ناضجين وعاقلين وبيقولوا كلام جامد جدا ينم عن ثقافه وعقل وفى كتير منهم بيكتبوا مدونات هايله وبشوف بنات ناجحين فى عملهم مع انهم صغيرين وبجد مبسوطه بيهم جدا

وعلى فكره الجواز مش هايطير الجواز قسمه ونصيب ووقت ماربنا يأذن هاتتجوزى الرجل المناسب اللى يدفعك تكونى احسن وحتى لو قعدك فى البيت هاتبقى راضيه لانك هاتحسى ساعتها انه يستاهل تسمعى كلامه ولحد الوقت ده ماييجى انطلقى فى العمل والدراسه اوعى تصدقى كلام الرجاله الخايبه الى بيقولوا لك (اقعدى فى البيت احنا نقدر نعمل شغلنا وشغلك )دا كلام فاضى انتى نص المجتمع وسانده المجتمع  ولو قعدتى فى البيت المجتمع هايقع فى حاجات ماحدش يقدر يعملها غيرك .

وبقول للأستاذ اللى إتهمنى انى كنت هجوميه فى تعليقاتى وانى بطلع احقادى على البشر

كنت هجوميه اه لانى كنت متغاظه لكن بطلع احقادى والكلام الفاضى ده  دى مش صحيح واتكلم فى تخصصك  احسن لأن الاسقاط ده ملعبى انا انسانه متصالحه مع نفسى الحمدلله ناجحه فى عملى ودراستى ومع ذلك عندى استعداد اسيب كل ده عشان انسان بحبه وبحترمه او عشان اعمل اسره واحول نجاحى لولادى وجوزى او عشان مش قادره اوفق بين الاتنين ساعتها هاسيب عملى ودراستى وانا فى منتهى الرضا لا اسعى ابدا انى اكون ند للرجل ولا ابحث عن مساواه بالعكس انا راضيه اكون اقل  منه واكون خلفه ولست امامه ولكن فين الرجل اللى يستاهل انى اكون ورائه؟تلك هى المشكله وهاتلاقيها دى مشكلة معظم البنات مش انا بس 

الاستاذ اللى علق وقال ان الاولويات عند البنات والولاد محتاجه فحص بقوله :

من أنت لتفحص أولوياتى أو أولويات غيرى ؟أولوياتى انا الوحيده اللى ادرى بيها انا الوحيده اللى اعرف الاهم فا المهم عندى مش انت ثم انا ليه مش بتدخل فى اولوياتك كرجل لما بتهتم تقعد على القهوه اكتر من انك تقعد مع مراتك فى البيت او انك تتفرج على الماتش عن انك تتكلم مع مراتك ؟او انك تتسلى قبل الجواز عن انك تتجوز وتعمل اسره ان كان حد المفروض يفحص الاولويات فلست انت ايها الرجل لان فاقد الشىء لا يعطيه يا استاذ.

والأستاذ المدرب اللى  داخل علق وقال ( ايوه الست مالهاش الا بيت زوجها )

فجأه كده لما سمعت الكلام نطت فى دماغى صورة الخاله بهانه اللى لابسه منديل بؤيه وجلبيه وقاعد على المسطبه بتفتى فى اللى ملهاش فيه  

معقوله هما دول المدربين اللى بيلفوا يدوا محاضرات فى التنميه البشريه معقوله تكون دى افكارهم والمحاضرات دى بدل ماتبقى فى خدمة البلد هاتبقى السبب فى وكسة البلد ولا هى المشكله عندهم عائد مادى فقط ؟

هما دول اللى طول النهار بيعملوا محاضرات وبيتكلموا مع الشباب ويعرفوهم ازاى يتواصلوا ؟  وازاى يحققوا اهداف ؟دول مش محتاجين يقرأوا او يتثقفوا دول محتاجين ياخدوا كى جى وان من الاول تانى .

لازم يكون فى قانون فى مصر يحجم الناس دى ويمنعوهم  إنهم يعطوا محاضرات ويدخلوا  فى عقول الناس الكلام الفاضى ده .ومش كل من هب ودب يطلع فى دماغه يبقى مدرب يبقى مدرب على حساب عقول البشر اللى بتسمعه.