جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

10‏/09‏/2011

أنا بلطجى ألتراس وأنا بلطجى وطنى



فى البداية المتظاهرين مالهمشى دعوه باللى بيحصل بدليل المظاهرات المناظره لهم فى أسكندريه والسويس التزموا بالميعاد  ورجعوا فى نفس الوقت اللى حددوه يعنى معنى الكلام ده ان المتظاهرين السلميين الموجودين فى ميدان التحرير تحت بند الثوار وتحت بند( سلميه سلميه)
هما كمان مشيوا الساعه 6 أو مايقرب من كده أو حتى مارحوش حتة تانيه وده بشهادة الجميع من الميدان أومال مين المتظاهرين اللى راحوا عند السفاره وعند وزارة الداخليه وبهدلوا الدنيا؟؟؟
 
دول المتظاهرين تحت بند بلطجيه وينقسموا للاتى :

1- بلطجيه تحت مسمى (ألتراس) راحوا وزارة الداخليه عشان يفشوا غلهم فيها زى ما رجالة الداخليه فشوا غلهم فيهم لما قلوا أدبهم عليها فى الماتش وغنوا الاغنيه الشهيره(كان دايما فاشل فى الثانويه ..يادوب جاب 50%) وحسب قول البعض ان اللواءات اللى كانوا بيتفرجوا على الماتش  لما سمعوا الاغنيه إستفزتهم وقالوا لعساكر الأمن المركزى روقوا العيال دى وطبعا دا كلام منطقى ليه بقى ؟
لأن أغنيه تتقال بالصوت المسموع ده من الالتراس ومحفوظه بالحرفنه دى يبقى الاغنيه دى ماكنتشى وليدة اللحظه دى كانت مترتب لها وهما اللى بدأوا
لأن ببساطه قوى لو أنا واحد التراس محترم ورايح اشجع النادى بتاعى زى مانا متعود أعمل دايما وواقف اقول :اهلىىىىىىىى…اهلىىىىىىىىىى ..هوووه..هووووه والاهلى حديد وبعدين النادى بتاعى كسب فقمت مروح بيتى بمنتهى الاحترام وانا بهلل للنادى مش على الشرطه
الشرطه هاتضايقنى ليه ؟وهاتضربنى ليه ؟والامن المركزى هايضيع هيبتى ليه ؟ الا لو انا كنت قليل الادب وغنيت لهم اغنيه تستفزهم ؟ او احتكيت بيهم او عشان انا حمااااااار كبير وغبى أخر حاجه وعندى الامور سايحه على بعدها وبدخل السياسه على الكره على الشرطه وطلبت معايا اشتم مبارك والعادلى فى السكه ومش عارف انا رايح اشجع النادى بتاعى ولا اعمل لمصر مشكله جديده بغبائى وهى فى غنى عنها؟ وتطلع نواره نجم فى مدونتها تقول دول اجدع ناس

2- بلطجيه( فاكرين نفسهم وطنيين )راحوا للسفاره عشان يبلطجوا عليها ويهدوا السور دا على اساس ان السور ده مش فى مصر ده فى تل ابيب ومش عارفه اشمعنى يوم الجمعه 9/9 إفتكروا إن إسرائيل وحشه مع إن حادثة قتل الضباط بقالها مده وطلع بلطجى تانى تحت مسمى (بطل) غير الاولانى اللى لحد دلوقتى مش عارفه اذا كان احمد الشحات ولا مصطفى كامل ( البطل) طلع يفك العلم وينزله من على السفاره ليه بقى ؟عشان يقلد زميله الاولانى وينتهك القانون والناس الهبله تصقف ورئيس الوزراء يقول هييييه برافو بلطجت كويس خد الشقه دى يا وااد مش خساره فيك وده طبعا عشان رئيس الوزراء رجل حكيم  بيعمل كده عشان يشجع بلطجى تانى وتالت يطلع وينزل العلم طالما هاياخد شقه وياريتها جت على إنزال العلم وحرقه وهد السور بس لا دى هاصت قوى واقتحموا السفاره ورموا ورقها وملفاتها من فوق وكأنهم فاكرين ان السفير هايسيب اسرار عسكريه وراه ويمشى 
أغبياااااااااااااااااااا

3- بلطجيه تحت مسمى ناس بتهيص فى الهيصه ودول اتفه من انى اتكلم عنهم بس هانلاقيهم كتير وفى كل حته بس جوه مصر بس.
4- بلطجيه تحت مسمى بلطجيه برضه مالهاش مسمى تانى مدفوع لهم بس لحد كتابتى للمقال ده مش قادره أحدد اذا كان مدفوع لهم من العفريت اللى حضرناه ومش عارفين نصرفه (الفلول والثوره المضاده) ده على اساس نردد نشيد :
ولا يوم من ايامك يا مبارك  ويخرب بيت الثوره ومنكوا لله خربتوا البلد ؟
طب مين اللى بيدفع لهم وليه كل الفلوس دى و عشان الكلمتين دول بس؟
ولا بلطجيه بعتاهم الداخليه بدل مايكون العبء كله على الامن المركزى؟ 
وده سبب برضه غير منطقى.
ولا بلطجيه اعمال حره بيسرقوا العربيات ويولعوا فيها وماحدش دافع لهم بس بيؤدوا وظيفتهم اليوميه العاديه؟

أطالب المجلس العسكرى بالتصدى لكل هؤلاء البلطجيه تحت جميع هذه المسميات ولن أمانع إطلاقا إذا ما إتحاكموا محاكمات عسكريه وماحدش هاينزل الميدان يطالب بحقهم لأنهم مش بيحبوا مصر دول بيخربوا مصر وبينقصوا من رصيد الثوره عند عامة الشعب قبل مثقفينه
ملحوظه:أنا أهلاويه ومش واقعه فى غرام الشرطه
إلى اللقاء  مع البوست القادم: ( بلطجية وزارة التربيه والتعليم اللى عايزين  يبلطجوا ويقعدوا فى بيوتهم ومافيش دراسه)

15 مستعده أن أضحي بنفسي من أجل حقك في أن تقول رأيك ".:

فافى يقول...

جايز كلامى يكون صح وجايز يكون غلط بس انا فقط حكمت عقلى والمنطق وعايزه اعرف الى متى ستبقى هذه المهزله؟؟؟؟

محمد زلط يقول...

المهم ان حد عبر عن رأيه بموضوعية يا فافي دي كفاية

فافى يقول...

ايوه الموضوعيه والحياديه معظم الشعب المصرى محتاج يفهم المفهومين دول صح

جايدا العزيزي يقول...

فافى

طرح راقى وتعبير عن رائيك

يستحق الثناء

دمت مبدعه تحياتى

sabry abo-omar يقول...

اتفق معاكى فى كل كلمة.. بقى زمن البلطجة فعلا..إختلطت الأمور وربنا يستر... تقبلى تحياتى وعلى فكرة انا كاتب بوست بنفس المعنى تقريبا

فافى يقول...

جايدا العزيزي:
ميرسى على مرورك الراقى ورأيك فى البوست ةاتمنى تتابعينى دايما

فافى يقول...

sabry abo-omar:
ميرسى على مرورك ورأيك واكيد هاردلك الزياره واشوف البوست

hardway يقول...

هكذا يكون الرأي والتحليل من أجل وطننا الغالي....
هكذا تكون المدونات ليصبح لها فائدة وجدوي وصدي عند الناس....أما تهييس وهرتلة وعبط نوارة الانتصار فالأناء ينضح بما فيه

فافى يقول...

hardway:
ربنا يخليك بس هو انا يعنى عجبت ؟ماهو فى ناس مش عجبها كلامى وشايفين ان الالتراس ملائكه وانا متحامله عليهم وان بتوع السفاره برضه عندهم حق لان الحكومه كانت مش مهتمه عموما ميرسى على تعليقك اوى وان شاء الله تتابعنى دائما

غير معرف يقول...

مِساء الزهر يا قمر ^^..
مُختلفة معاكِ تقريباً بِالمُجمل .. بس طبعاً مايمنعش ان رأيك يُحترم بِكُل تفاصيله .. وَ تسلم ايدك :)
اممم فيما يخص الـألتراس انا اصلاً مُعترضة على الـأسلوب العام للـألتراس زيك تمام .. لكن لو راعينا ان ده الطبيعي من الـألتراس .. بمعني انها مش اول مرة تتغني الاغنية .. بالعكس اتغنت كتير وفى حضور اعداد كبيرة من الامن والشرطة !
لكن فى المُقابل ماكانش في رد فعل واحتكاك قوى من الأمن .. مع مراعاة كمان ان الاستاد بيعاني من مشكلة اخلاقية على الدوام .. الالتراس سواء اهلى او زمالك اعتادوا ان هتافاتهم بتكون فيها اهانات وشتائم للفرق واللاعبيين والجمهور المقابل وحتى الشرطة .. فى مُشكلة اخلاقية لازم تتصلح عموماً .. ديه لا تبرر بأى حال الاحتكاك المبالغ فيه اللى حصل فى المباراة .. !
النقطة الاهم ان الداخلية اصلاً بلطجية ولازالت بتتعامل مع الشعب بمبدئ تعالى ولسه شايفيين انهم اسيادنا! طبعاً مع عدم التعميم كل مكان فيه الصالح والطالح ..
بِالنسبة للسفارة .. الحقيقة انا شخصياً فرحانة باللى حصل .. ده اروع دليل على كم بغض الشعب المصرى لوجود هذا الكيان على ارضه .. !
بس بالمُناسبة كمان القلق مش من الهجوم على عقار او هدم سور اصلاً بناءه كان جريمة فى حق الشعب المصرى .. وإنما القلق كان المفترض يكون من المجلس العسكرى .. اللى سمح اصلاً للثوار انهم ينجحوا فى اقتحام السفارة على مرأى ومسمع منه - ده كان موافق - لأهداف مش نبيلة بالمرة وهى قانون الطوارئ ( أول خطوة لأحكام عرفية ) الطريق لدولة عسكرية !!!!
المجلس العسكرى مُش محتاج توصية .. لأنه جزء من نظام سابق وبيتعامل مع الشعب اللى قام بثورة على انه قام بجريمة قلب نظام حكم ومستعد يحول الشعب كله لمحاكمات عسكرية !
لسه النظام ماسقطش
ربنا يصلح الحال يا رب .. وتسلم ايدك يا عسل :)

فافى يقول...

مها:
اولا :شرفتى مدونتى وميرسى على تعليقك
ثانيا :يؤسفنى طبعا ان احنا مختلفين لكن برضه انا كمان بحترم رأيك جدا
ثالثا :انا ضد جملة ده الطبيعى من الالتراس مش عشان ده الطبيعى بالضروره يكون صح ,طبعاالالتراس الاهلاوى والزملاكاوى الاتنين عايزين يتولع فيهم ومش بقولك ان الشرطه متربيه وكمان الشرطه لازم تتعلم الادب بس ماتنسيش ان الاغنيه كانت مستفزه جدا وانا ضد اننا ندخل زيد على عبيد مال السياسه ومال الكوره؟وليه نغنى اغنيه تستفز الشرطه فى ماتش كوره ؟
اما بقى بخصوص السفاره برضه مش بالعاه بكره اسرائيل اه بس بحب بلدى واى شبر من ارض بلدى وفى المجمل عايزه مصر تكون راقيه واهلها مؤدبين ومتربيين مش شايفه ان مكاسب الثوره هى خلع المخلوع بس او حبس الفاسدين لكن نفسى البلد كلها تتغيرونكون متحضرين عشان كده انا ضد فرض الرأى بالقوه

غير معرف يقول...

ينبغي لنا أن نتعلم كيف نصغي لجميع الآراء سواءالتي تتفق مع أرائناأم لا ،فاالحرية تعني احترام كل الآراء على اختلافتها .
ولاننا مصريين يحبون هذا البلد ونأمل أن يكون أفضل لنا ولمن يشا الله ان ياتوا بعدنا
علينا جميعا أن نعمل على إعادة بناء وطننا انهامسئوليه كبيرة ومع احترامي للجميع كل منا يجب ان يضع الاختلافات والخلفات جنبا فى الوقت الراهن .
ولنتذكرأثناء حرب 6 أكتوبر كيف كان المصريين على شتـى اختلافاتهم يد واحده متحضره حتى ان الاقسام فى هذا الوقت لم تسجل حادث سررقه واحد .
ذلك ما ينبغي أن نفعله الآن ......
خلال الأيام الأولى لثورة25 يناير كان الجميع شخص واحد بقلب أحب هذا البلد واتقى الله فى كل ما نقوم به فشاء الله ان تتم على خير فلا داعى لان نخسر ما تعب واستشهد الكثيرون لتحقيقه .
إنها مسؤوليتنا أن نبنى عصر جديد يتسم بالإيمان وحسن الخلق والعمل.
هذه الثورة في حاجة إلى الحماية ، فالنراقب مايحدث ..... هناك فرقا كبيرا بين الحرية والفوضى .
نحن الآن بحاجة إلى استعادة أخلاق ميدان التحرير التى اتسمت بهاالأيام الأولى للثورة
دعونا نستخدم عقولنا وأخلاقنا بدلا من العضلات والكلمات البذيئة
يجب على كل منا أن يكون مثالا يحتذى به ونتوقف عن الحكم على بعضنا بعضا وتصنيف بعضنا بعضا .
ولا داعى لمنح الفرصه لمن يريدون سوءا بهذا البلد.
مع خالص شكرى
SNOW

شمس النهار يقول...

لييييه لما بتكتبي بوست مش بيطلع عندي؟؟

فافى يقول...

شموسه :
مش عارفه!!!
بس اومال انتى دخلتى ازاى دلوقتى يا بكاشه هههههههعرفتى منين ان فى بوست جديد(وش واحده بتغمز)

رمرومي يقول...

أشك إن في حد فيهم مدفوعله فلوس عشان يعمل كده، أغلبهم من التصنيفات اللي قولتيها في البوست والباقي كان واقف يتفرج...

مفيش إيد خارجية ولا داخلية ولا فلول ولا بطيخ، إحنا بنبوظ ثورتنا بنفسنا. عشان كدا كان من الأولي إن إحنا نعمل ثورة علي النفس قبل ثورة علي النظام السياسي.

إرسال تعليق

fafy music