جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

06‏/07‏/2012

أنا واحده من العاهرات اللى انتخبوا شفيق

 البوست ده موجه لأى واحد هايتكلم نص كلمه على ست مصريه انتخبت شفيق
 وبطالب كل ستات مصر مش منتخبات شفيق بس يطالبوا الاسوانى وعلاء صادق باعتذار عن تجاوزهم ده 
أفتح تويتر فى يوم ألاقى الشخص الغير محترم ده بيقول الكلام ده,
 أرد عليه على تويتر ألاقى بعديها بشويه 
 أقول ياربى ايه الغل ده مايحاسب النائم العام على سفره وبلاغاته هو ماله ومال مؤيدات شفيق ؟
أكتب له تعليق على مقالته وأرد عليه وامشى
ألاقى الناس على الفيس قاعده تشتم فى اللى إنتخبوا شفيق وتقول عليهم جهله وعبيد وخاينين للثوره 
ياخبر أبيض 
يعنى انا خاينه للثوره ؟
أقول ياواد طنش خااااااااالص وأقول أخدهم على قد عقلهم بدل ماكل يوم أهزأ حد وأسكت
 ألاقى حتى جهلة الجهلاء وأنصاف المتعلمين بينقدوا اللى إنتخبوا شفيق وإنى إزاى ماقلتش نعم للدين :)

 بلاش قلة ادب وخلينى أكون هاديه وأتناقش بالعقل والمنطق اللى المفروض يفهموه أنصاف المثقفين اللى زى علاء الأسوانى وعلاء صادق  وغيرهم من سلطاء اللسان

هل يصح إنكم تطلقوا أسماء على ناس هما شخصيا لم يختاروها لأنفسهم ؟
وهل يصح إنكم تقولوا لفظ عاهرات على سيدات مصراللى منهم أهلكم وجيرانكم لمجرد إنهم إنتخبوا شفيق ؟
وهل يصح التعميم ؟ 
وهل يصح ننصب نفسنا حكام ونتكلم بإسم الثوره ونحكم مين خاين ومين مش خاين ؟ 
عملتوا بحث حاله ودراسه على كل منتخبى شفيق وإتأكدتوا بالدليل القاطع إن
(كلهم ) معاهم شهادة محو أميه ؟

بحثتوا فى سيكولوجية منتخبات شفيق وإتأكدتم بالدليل القاطع إن
(كلهم)  فتيات ليل مش عايزين غير شفيق الموز أبو بلوفر وياكشى تولع مصر ؟

عملتوا بحث حاله ودراسه على كل منتخبات شفيق وإتأكدتم بالدليل القاطع أن (كلهم) أرامل ؟
 فكرتوا قبل ماتهينوا الناس تسألوا نفسكم مين كان خصم شفيق والناس هربت منه ليه ؟وحملتوه هو وجماعته جزء من المسؤليه لانهم ماقدموش السبت
؟
طب انتوا عندكم فكره إن فيه ثوار كانوا فى ميدان التحرير ال18 يوم وحضروا موقعة الجمل وانتخبوا شفيق رئيس وزراء موقعة الجمل هروبا من الاخوان ؟
ولا بتضحكوا على نفسكم لسه وفاكرين ان دول (كلهم) حزب الكنبه وبتوع الاستقرار وعواجيز مصر وعبيدها:)))؟

طب انتوا عندكم فكره ان اسامه الغزالى حرب وجورج اسحاق المحسوبين على الثوار ومن اكبر المعارضين للنظام القديم إنتخبوا شفيق؟
(لازم عشان يرجعوا النظام القديم تانى مش كده؟)

طب انتوا عندكوا فكره انى بكتب النوت وخايفه تقع فى ايد حد اخوان يصفينى ؟

فكرتوا قبل ماتلوموا اللى انتخبوا شفيق تحللوا النوعيه اللى انتخبتوا دى تنتمى لأى فئه من الشعب ولا هل هى خليط من الفئات ؟

لا طبعا ماحدش عمل كل ده والكل بيستسهل الشتيمه والنقد وقلة الأدب وعامل فيها ابو العريف
وبيردد كلام حافظه ومش فاهم منه أى حاجه زى حق الشهداء اللى بنفتكروه بس لما نتكلم عن شفيق ؟
انما مرسى ؟
لا عادى ده مننا وعلينا
طالما من النظام الجديد خلاص مش مطالب يجيب حق الشهداء
ولا ستاتوس واحد  شفته بعد مامسك مرسى بيطالب بحق الشهداء  زى ايام شفيق ,زى مايكون حق الشهداء بقى تجاره زى الدين نستخدمه بس لما ييجى وقته  او نوع من انواع العند

ده لو كل ستات مصر انتخبوا شفيق ماحدش يقدر يلومهم بعد اللى شافوه من السلفيين والاخوان ومن الناس اللى ماكنتشى تقدر تفتح بقها زمان وكانوا ماشيين جنب الحيط وخايفين من امن الدوله اللى كانت لماهم دلوقتى بيتكلموا بمنتهى البجاحه و المنقبات بقت تنصح  (بتهديد )عشان حاسين ان البلد بقت بلدهم :)
(لا انا ماشفتش بعينى قابضه عشان اقول كده :)
ده مش كفيل يخلى الستات تطالب برجوع حسنى مبارك تانى مش ترشح شفيق ؟
أنا واحده من البنات اللى انتخبوه 
 كنت ناويه اقاطع ثم اخدت قرار بالابطال ولما لقيت النتيجه فى صالح مرسى صليت استخاره و نزلت قبل غلق اللجنه بساعه وانتخبت شفيق 
وفيه شريحه كتير زيى 
لانى مش عايزه تاجر دين 
ومش عايزه عروسه ماريونت فى ايد المرشد

ومش عايزه ناس تحكم وناس تحتها تهيص فى الهيصه وتيجى تتعدى على حريتى 
وعايزه واحد سهل اسقاطه لكن مش عايزه واحد هايركب هو وجماعته مش هاينزلوا 
ومش عايزه واحد لما اختلف معاه يكفرنى ويجيب فتوى بقتلى
ومش عايزه واحد يقولى يانا يا الفوضى ولا ماختوش بالكم:)
ايام مبارك كنت عارفه انى لما افضفض بكلمتين فى المدونه بكتيره هالاقى امن الدوله بتخبط على بابى تانى يوم لكن دلوقتى مش عارفه الضربه هاتجيلى منين ؟
ولا اى حد هايقول عليا خارجه عن الحاكم وحلال قتلى وتصفيتى؟

بتقولوا العالم هايضحك علينا لو اسقطنا نظام وجبنا رئيس وزراءه رئيس؟ 
طب والعالم مش هايضحك علينا لما يلاقينا ثورنا عشان حريه ,عداله اجتماعيه وبعد كده يلاقينا مش طايلين الحريه ولا العداله الاجتماعيه ؟
بمناسبة الحريه عندكوا فكره انى بمشى  فى الشارع خايفه عشان عامله الطرحه اسبانش او مش لابسه نقاب وانى عمرى ماكنت خايفه كده حتى فى عز الانفلات الامنى؟
عارفين كام اسره مسيحيه أعرفها مشيت من البلد يا بتوع العداله الاجتماعيه ؟
(اخرهم طنط هدى جارتنا راحت لابنها كندا بعد مامرسى كسب على طول)
(عملت بنصيحة الشيخ يعقوب)
(لا لا ده كدب المسيحين موجودين ماحدش مشى ولا حاجه انا قابضه عشان اقول كده )
اومال انتوا كنتوا بتعلموا ثوره لمين لنفسكم ؟ولا عشان تحققوا مجد شخصى؟
ولا عشان مصر الحيطان ومصر الشوارع
وطظ فى مصر البنى أدمين
ولا ثوره عشان ناس وناس لأ؟

مش هاقول ان اختيارى هو احسن اختيار ولا وجهة نظرى هى احسن وجهة نظر فى الدنيا بس على الأقل هى وجهة نظر تستاهل التوقف عندها والنقاش وليس التجريح وقلة الأدب والنعت والسب 
أنا بقى كبنت مصريه انتخبت شفيق اعتقادا منى ان ده فى مصلحة البلد 
هل انا عاهره ؟
هل انا جهله ؟
هل استحق يتقال عليا ارمله من ارامل شفيق ؟
هل استحق انه يتقال عليا خاينه للثوره؟
 كل نساء مصر من منتخبى شفيق او مرسى من اشرف النساء فى العالم وظفرهم برقبة اى حد يسبهم او يعتدى عليهم بالضرب (زى ماحصل ايام الانتخابات )عشان بس  بيعبروا عن رأيهم
وللعلم علاء الاسوانى وعلاء صادق ومحمود سعد مش بيعملوا كده عشان خاطر عيون الثوره والشهداء ولكن عشان تصفية حسابات خاصه مع شفيق لان كفه معلم على قفا كل واحد فيهم واللى مايعرفشى يدور
والأمر لا يتعدى كونه غيرة رجاله من رجل معظم ستات مصر بتحبه حتى ولو كان قاتل وسفاح

انا مش بدافع عنه لانه له ما له وعليه ماعليه ولكن بدافع عن حقى ووجهة نظرى فى اختيارى ليه
من حقى اختار اى شخص من غير سب وقذف لشخصى
انقدوه براحتكم لكن لا تخوضوا فى اعراض منتخبيه وهى دى الديمقراطيه اللى طول النهار بناخد منها حته ونسيب منها حته وطول النهار نكيل الامور بمكيالين

انا بحترم كل اللى انتخبوا مرسى وعمرى ماهجبر حد ينتخب واحد هو (شايف) ان ايده ملوثه بدماء شهيد وقع برصاصه جنبه
وعشان كده نفسى الناس تبطل تبقى اعداء للحريه ويبطلوا الكلام عن الصح و الغلط والحق وكأن الامور يا ابيض يا اسود واذا ماكنتش معانا تبقى ضدنا
عمر الامور مابتتحسب كده
 ملحوظه سيكولوجيه:  نسبه لا بأس بها من رجالة مصر بتنقده غيره منه وليس وطنيه والا ماكنوش يوجه كلامهم لينا إحنا الأرامل والعاهرات
:)))
اى رجل يوجه نقده للستات اللى انتخبوا شفيق اعرفوا على طول انه غيران منه مش غيران على الثوره
نصيحه سيكولوجيه: كل رجل بينقد شفيق يقعد مع نفسه ويدور جوه نفسه على السبب الحقيقى هل هو دم الشهداء  ولا البلوفر؟
ولو لقاه البلوفر لازم يشوف دكتور نفسى او ييجى اعالجه وافك له عقدة شفيق بس مايقرفناش بطولة لسانه ويطلع غله فينا احنا الستات الغلبانه




20 مستعده أن أضحي بنفسي من أجل حقك في أن تقول رأيك ".:

غير معرف يقول...

العزيزة فافي

بوست جرئ اتفق معك في بعض نقاطه و بالطبع اختلف في بعضه.

من الشاهد انه حدث تغير في سلوك و أخلاق الشعب المصري بجميع فئاته و طوابقه بعد الثورة فقد زادت إظهار قل الادب و التصريح بها و كلما زاد علو الصوت كلما زاد الإعجاب فمثلا علاء الأسواني أليس هذا من كان محمولا على الأعناق في بداية الثورة من الليبراليين و الان هو يغازل التيار الاسلامي اتمنى من الله ان يكون تغيير للأفضل (ما علينا)
عن نفسي انا مناصر للتيار الاسلامي و اجد من الخطأ الشديد الذي وقع فيه الكثير من الطرفين التعميم فانا انتخبت مرسي باقتناع و هناك كثير من أصحابي المقربين و زملائي بالعمل انتخبوا شفيق. و لا غضاضة بين فلا تخوين او قلة أدب بيننا فلكل وجهة نظره و رأيه و قناعته فلا يجوز قلة الادب على ايهما. و كم المني ما قد نشر على الفيس بوك ان هذا استبن و هذا بوبوني فلكل احترامه
طبعا قد يكون هذا الكوم نت في غير موضعه فأرجو قبول العذر

Hesham يقول...

هو عموما انا مبحبش البلوفرات اصلا ومعنديش ولا بلوفر لانى مبلبس بلوفرات فى الشتا لانى فى حقيقة الامر لااشعر بالبرد بس عموما هو برضه شيك جدا وعلى فكرة بقى يافافى انا لى تجربة شخصية مع الفريق شفيق لانى كنت مرافق له لمدة اسبوع كامل فى لندن لما حضر الى هناك للعلاج وكان دا سنة 2000 يعنى من 12 سنه وكان قائد القوات الجوية وهو بغض النظر عن انتمائه لمبارك الا انه يبقى رجل قوى الشخصية وعااااااااااااادل

Hesham يقول...

سؤالين والنبى ياوفاء
الأول انتى جايبه الساعة الفوكس دى منين لانها بجد روعه
الثانى ازاى بتشغلى موسيقى على المدونه
برجاء الاجابة
المخلص هشام شفيق

ابراهيم رزق يقول...

متفق معاكى الا فى موضوع البلوفر ده
انا يوم ما اغير من شفشق هاكون ميت اكيد
ههههههههههههههههههههه
مفهوش حاجة يتغار منها
ده مش بيجمع

نيجى للجد
اتنا اختى و جوز اختى انتخبووا شفشق

كل واحد حر
دول هيكشفوا نفسهم بسرعة
و هيقعوا بسرعة

تحياتى

شمس النهار يقول...

مالك ياتانت في ايه
داخله في الناس شمال ليه
كده مرور بلوجر هياخدك مخالفة
كل واحد حر في اللي هو عايزة
وماينفعش حد يصادر علي راي حد
ولما الناس كلها اتجاه واحد كنا عملنا الانتخابات ليه بقا
وزي ماقلتي الاخوان والسلفين بعمايلهم همه اللي وصلونا لكده
تعالي اخر بوست عندي واقريه واقري تعليقي علي تراكيب
اااااااااهدي ان شاء الله كله هيبقا تمام
انا امي انتخبت شفيق:))من خوفها وهي الست المتعلمة الكبيره
وانا كنت مقاطعون
وبنتي انتخبت مرسي
وبنتي التانية راحت ابطلت صوتها
وبنتي التالته قالت لي مش فاضية اروح اصلا
يبقا خلاص
ده مالوش دعوة بالتربية ولا انا ربيت واحدة وماعرفتش اربي الباقي
:)))

حنعيش يعنى حنعيش يقول...

حالبس بلوفر .... والساعة حألبسها فى اليمين ... وحقول بشويش بشويش ... حاكل بنبونى وحأحط صورة بروفايلى على المدونه والفيس صورة شفيق ... وانا فلول وخاين الثورة وبايع دم الشهداء ... وبأكرة الاخوان .... والاخوان زباله تجار دين .... وانا اللى اكلت الجبنة .... شفيق... شفيق... شفيق

العقاد يقول...

هكذا تأتي الكلمات عندما يتغلب الهوي علي العقل ... وهكذا يكون استخدام البلاغة وسيلة كحق يراد به باطل ... وهكذا تكون السطحية والنفاق وسوء النوايا ... وهكذا يكون العهر النابع من أفكار مسمومة مغلوطة ... لو أردتي الحقيقة فلتبحثي عنها ... فهي واضحة وضوح الشمس ... واعلمي انك انسانه مغيبة ... صاحبة غرض وفي الأغلب مرض ... وهذا ليس لانتخابك شفيق ولكن لمبادئك وكلماتك التي تقطر جهلا ورعبا وسفها ...

فافى يقول...

العقاد: هههههههههههههههه
فى الحقيقه انا حاسه ان حضرتك بتتكلم على حد غيرى او دخلت المدونه غلط لانك بتقول استخدام البلاغه وسيله كحق يراد به باطل :واضح ان حضرتك حافظ مش فاهم وحد قالك تكتب كده,
بلاغة ايه؟
انا بكتب بقلبى وليس بقلمى ولم استخدم اى اسلوب بلاغى
ثما سطحية ايه ونفاق لمين وماهو بالتحديد السطر اللى حسسك بسوء النوايا ؟
وماهى الافكار المسمومه والمغلوطه هو حضرتك مش واخد بالك من المقالات ولا ايه ؟ ولا انا جايبه الكلام ده من عند الست الوالده بتاعة حضرتك ؟
اما فيما يتعلق بكونى مريضه المدونه اسمها مذكرات(psycho) :)
ثما هو لما كلماتى تقطر رعبا ده عيب فيا ولا حاجه تتعاطف معايا بسببها:) ؟!
فى الحقيقه انا مش عارفه حضرتك معترض على ايه بالظبط ولا جاى هنا ليه اصلا ؟
يمكن تكون ضليت طريقك لمدونتى على كل حال
واضح ان حضرتك من النوع اللى ذكرته اخيراوبيغير من البلوفر وعشان كده الكلام جه على الوتر و محتاج علاج ومش مركز شرفتنى بمرورك الغير راقى تحياتى :) على

فافى يقول...

الى الغير معرف :
لم انشر تعليقك حتى لا أؤذى أعين الراقيين ممن يتابعون مدونتى بتعليق (ذكر) لا يستطيع التفكير غير بالنصف الاسفل من جسده :)))
وبالرغم من انه لا يرتقى لمرتبة التعليقات التى تستحق الرد ولكن سأرد عليه لا لسبب غير لان تعليقك بيثبت انى على صواب وهذا فى حد ذاته انتصار ساحق لى:))

حمقتك الزياده دى وهجومك عليا أكدلى انك من الممكن ان تكون من النوعيه اللى بتغير من شفيق فعلا والتى سبق الحديث عنها فى البوست لانك لم تنقد كلامى سياسيا ولكن نقدت كلامى جنسيا وعملت زى الدهولين علاء الاسوانى وهلاء صادق بالظبط من غير ماتحس :))
او من الممكن انك تكون بتعمل عليا اسقاط وانك تكون من نوعية (الذكور) التى تفضل النساء ظل الحيط عن الارتباط بواحد (منهن:))
ممممممم او من النوعيه اللى البنت تفضل عانس طول عمرها ولا تتجوز واحد زيه:))
عموما ميرسى لمرورك ,واتمنى تتباعنى دايما
تحياتى :)

فافى يقول...

العقاد :

لاعلم لا شخصيه لا منطق لا اخلاق لا عقل :)
جميع ماسبق هو وحدة قياس راااااائعه لاسقاطاتك عليا
لان اكيد انت شايف نفسك كده
وانا كمان شايفاك كده :)
ميرسى لمرورك وتابعنى دايما
تحياتى :)

العقاد يقول...

نفس الأسلوب التهكمي البذئ الذي لا يقبل الانتقاد. لو كنتي تريدين فعلا نقاشا ايجابيا ولو كنتي تريدين فعلا ان تبحثي عن الحقيقة كان أسلوبك ليكون أرقي من هذا واقل تهكما وسخرية ولكن ومع مراجعة كل ما كتبتيه في المدونة اتضح لي ان هذا هو اسلوبك فعلا . السخرية والتهكم واساءة الأدب في معظم الأحيان عموما أعتذر فعلا لو هاجمتك باسلوب فظ وادعوك مباشرة للنقاش الايجابي بعيدا عن وجهات النظر والسخرية والتهكم . أدعوك لمحاولة البحث عن الحقيقة والنقاش بين العقول وقد يكون هذا اختبار حقيقي لكي أمام قراءك . دعينا نبتعد عن أسلوب الحوار والنقاط التي تمس كرامة كل منا ونجعله حوارا ونقاشا حقيقيا . فقط لو كنتي تريدين هذا وتستطيعينه ولك كل احترامي

فافى يقول...

العقاد :

بخصوص السخريه فى كتاباتى هذا شرف لا ادعيه لان الكتابه بأسلوب ساخر نوع معروف من انواع الكتابه واذا اسلوبى لا يعجب حضرتك ليك مطلق الحريه فى انك لا تتابع مدونتى مطلقا اسهل من محاولة اجبارى على اسلوب اخر:)
اما بخصوص النقاش الراقى انا احترم قرائى جيدا على اختلاف توجهاتهم وشخصياتهم وفئاتهم وانتمائتهم حتى ولو كانوا من ضمن(احنا اسفين ياريس)واسمح للجميع التعبير عن ارائه فى اطار الادب وليس اساءة الادب مثلا مافعلت حضرتك وهذا كافى لاثبات تقبلى للنقد
واذا كنت حضرتك تريد نقاش راقى غرضه معرفة الحقيقه لماذا لم تبدأ به انت ؟:)
عموما يسعدنى اعتذارك وارحب بالنقاش المهذب وهذا ليس خوفا من للاختبار الذى تزعمه لانى لا التفت لمثل هذه (الالعاب النفسيه) :)
ولكن بمحض ارادتى لكى اثبت لك انه كان بإمكانك اطفاء صبغة من الادب والرقى على حديثنا لو كنت تريد:)
ولكن شرط انا اعرف من انت واعتقد ان هذا منتهى العدل لانك تعرف هويتى
اشكرك على مرورك وانتظر متابعتك
تحياتى :)

العقاد يقول...

شكرا لتقبلك اعتذاري . أولا لابد أن نتفق ان الانتقاد ليس معناه الاهانة . هذة واحدة . ثانيا السخرية قد تجوز كأسلوب كتابة ونوع من الأدب معترف به ولكن عندما تصبح لغة حوار فهذا هو الغير مقبول من وجهة نظري . راجعي ردودك وليس كتاباتك وستجدينها تقطر سخرية ورأيي المتواضع أن هذا يضعف موقفك ولا يقويه ابدا . ثالثا . الاحترام وان كان مبدأ ولكن لا نستطيع تعميمه طوال الوقت خصوصا عندما نقارن حق وباطل . خطأ وصواب . أنا لا أوافقك علي احترام من ينكر علي مبارك فساده وتكبره واستبداده ويتأسف له بدعوي احترام الرأي الأخر هذا ليس برأي ابدا ولن يكون. هذا يمكن وصفه بالاشتراك في الفساد او بالغباء المطلق ولكنه أبعد ما يكون عن الرأي والرأي الأخر . أخيرا أنا بالفعل لا أعرف هويتك ولكن وصلتني هذة المدونة من صديق يري فيك مثال حي لعدم الحيادية والذعر المبالغ فيه من التيارات الاسلامية وكان يستشهد بك لما وصلنا له من رعب غير مبرر من كل ما هو اسلامي

فافى يقول...

العقاد :
اولا :ياريت حضرتك تكف عن اسلوب التوجيه والتعليم فى حديثك لان حضرتك خاطىء تماما فيما تقوله لسبب بسيط ان حضرتك اهانتنى وليس انتقدتنى ولذلك تستحق ردى لان قلت عليا هوائيه وسطحيه ومنافقه وسيئة النيه وافكارى مسمومه ومغيبه وصاحبة غرض وجهله وسفيهه ومرعوبه !!!!
فاضل ايه على الاهانه وقلة الذوق ؟
لو حضرتك هاتبتدى تلعب بالالفاظ وهاتكمل نقاش بالطريقه دى يبقى ياريت نقفل النقاش احسن
ثم بأى حق تتحدث باسم الحق وبالباطل وتحتكرهم لنفسك وتتكلم بإسمهم كل واحد حر فيما يعتقده وواجب احترام كل الاراء لان كل واحد شايف الامور من وجهة نظره وزى ماحضرتك بتقول عليا مثااااال جيد لعدم الحياديه انا برضه شايفه ان حضرتك مثال جيد على عدم الحياديه واحترام الرأى الاخر بدليل انك برضه بتشتم فى بتوع احنا اسفين ياريس ومعندكشى استعداد تفهم وجهة نظرهم او تحترمهاو اعتبرت انهم سفهاء لا يجب اصلا التفكير فى الحديث عنهم
يبقى اازى عايزنى افهم وجهة نظرك وتحيزك المبالغ فيه لتجار الدين ؟
فاقد الشىء لا يعطيه يا استاذ :)
عموما انا مضطره اعماملك بنفس منطقك واقولك انا اسفه جدا ارفض المناقشه فيما هو محسوم :)
فى رأى ان الاخوان تجار دين وشوكة فى ظهر الثوره وماهم الا كائنات يقولون مالا يفعلون ويستخدمون الدين ستاره فقط لتحقيق اغراضهم الشخصيه وحضرتك على علم بذلك وواضح لك مثل الشمس ولكن لا تكترث !!
ثم مين قال انى مذعوره من الاخوان ؟ هما اضعف من كده بكتيييييييييييير جدا :)
ميرسى لمتابعتك
تحياتى :)

العقاد يقول...

متشكر لرفضك استمرار النقاش ولكن مراجعة بسيطة لكل ما كتبتيه من ردود كاف لحسم الأمر . لك خالص تحياتي وتقديري

فافى يقول...

العقاد :

العفو على شكرك لرفضى استمرار النقاش واحترام اسبابى
واتعشم انك زى ماراجعت ردودى عليك انك تراجع ردودى فى بقية البوستات على بقية القراء حتى المختلفين معايا فى الرأى وانت تعرف انا هجوميه عليك ليه ؟ :)
وياريت تتكلف عناء قراءة البوست المسمى الطرف التالت وحضرتك تعرف ليه انا مقتنعه برأى جدا
اشكرك على مرورك واتمنى تتابعنى دايما
تحياتى :)

غير معرف يقول...

يا وفاء انا حنان لا شفيق ولا الاخوان هينفعوا مصر مصر هينفعها الاخلاص فى العمل وبعدين بالراحه خالص وانا عارفة ان برج الميزان يحكم عقله كتير شفيق مسكوا عليه فساد وقضايا كتيرة احنا مش بنقول مرسي ملاك بس يكفى انه يقابل ربنا 5 مرات يوميا وحافظ كتاب الله يمكن يعمل بحرف واحد فيه نعطي له الفرصة وبعدين الوضع تدمر وفسد بعد 4 سنوات مع السلامة ونجيب غيره انا ضد فكرة الهجوم لجل الهجوم ولا ايه

فافى يقول...

حنان :
فعلا صح ماقلتيه لا شفيق ولا مرسى هاينفعوا مصر ومصر فعلا هاينفعها الاخلاص فى العمل وبما انك اختى اكيد عارفه انى مش عندى عقده من الدين والاسلام وبحفظ فى كتاب الله وبصلى وبصوم ولكن انا ارفض الاتجار بالدين واظن من حقى انى اكون غيوره على دينى
ثم ايه المشكله ان مرسى يكون بيصلى 5 صلوات يوميا ويبقى رئيس جمهوريه فاشل ؟وبدون الدفاع عن شفيق بس ايه عرفك برضه ان شفيق مش بيصلى ؟ :)
عموما انا كنت برد على شخصيه مش محترمه رافض يدينى حرية الاختيار ومش هايتقبلنى الا اذا اخترت مرسى
شرفتينى بتعليقك
وتحياتى

ذو الوجه المبتسم يقول...

بوست جرئ من عقليه فاهمة ومتفهة للامور
لكن ارجو نظرة اكتر مبعدية للمستقبل حتى لو كان فيه الاخوان حاكمين لامور البلاد
تحياتى

فافى يقول...

الى ذو الوجه المبتسم :)
اسعدنى مرورك و كلاماتك الرقيقه
تحياتى

إرسال تعليق

fafy music