ايه رأيك فى الثوره ؟
ايه موقفك من الثوره ؟
انتى مع الثوره ولا ضدها ؟
انتى مع ميدان التحرير ولا مع الكنبه ولامع الفلول ؟
دى عينه من الأسئله اللى بتسألها وللأسف مش بعرف أرد عليها بكلمه واحده لسببين:
أولا: لأن موقفى من الثوره معقد حبتين وصعب يتلخص فى كلمه إسمها أه أو لأ
وثانيا: لأن معظم الناس بتاخد الكلام حزمه على بعضها بمعنى
إنت مع الثوره؟
تبقى لازم تكون مع ميدان التحرير وتكون مأيده على طول الخط من 25 يناير إلى إعتصام مجلس الوزراء مرورا بحرق السفاره وهدم سورهاو تكون مع الثوار بسلوكياتهم الخطأ والصح و تكون مع 6 ابريل
و تكون ضد المجلس وشفيق والاخوان والسلفيين
وده لا يصح
ليه الواحد لازم يكون مع أو ضد
ليه مايبقاش مع الثوره بس لما يحب ينقدها ينقدها براحته من غير ماتتفتح نار جهنم عليه ويتقال عليه فلول مره وحزب كنبه مره واغلبيه صامته مره وبتاع الإستقرار مره ومنكم لله خربتوا البلد مره؟
فلول :لو بمنطق إنهم تربية النظام القديم يبقى يا عزيزى كلنا فلول
حزب كنبه: ماهولازم تكون فى ناس فى الميدان وناس ماتقدرشى تنزل لأى ظروف وقاعده فى بيتها يعنى عمرناسمعنا إن فى ثوره قامت فى بلد بتعداد سكانها!!!
وتبقى ملياريه مثلا؟
طب الميدان يستوعبهم إزاى؟
اغلبيه صامته : بتنقسم لنوعين: ناس مش بتحب تزعل حد أو مش بتستحمل النقد أومش بتحب تدخل فى جدال أوكلامهم محسوب عليهم زى فنانين ولاعبى الكرة مثلا
( القائمه السوداء إياها ) و بتسكت وبرضه مش بتسلم من السخريه
وناس تانيه ساكته عشان مش فاهمين وشايفين كل حاجه وعكسها وده غصب عنهم برضه عشان فى حاجات غامضه كتير حتى بالنسبه للثوار نفسهم
بتوع الإستقرار : فجأه كده بقى الإستقرار كلمه قبيحه وعجلة الإنتاج أوقح؟
نفسى أفهم بننقدهم ليه ؟
الناس ديه سعادتها فى الإستقرار وكانت بتحب مبارك عشان السبب ده ولا بتفكر فى الدستور ولا مجلس الشعب ولا حكومة الإنقاذ الوطنى ولا غيره وشىء طبيعى إنهم يبحثوا عن الإستقرار لأنه المحور اللى بتدور عليه حياتهم زى ما الحريه هى المحور اللى بتدور عليه حياة اللى فى الميدان وزى مافى ناس بتدور على الإستقرار بقيت حاسه إن فى ناس بتدور على عدم الإستقرار برضه وليها مزاج فى الفوضى وكأنها حاسه مثلا إن الإستقرار ده تواطىء وضعف
منكم لله خربتوا البلد : ماهم شايفين البلد بتخرب فعلا قدامهم أرصفه بتتكسر ومبانى بتتحرق وأسعار بتزيد وبورصه بتقع هايقولوا إيه غير كده ؟
وكل دول مش بيسلموا من السخريه والنقد والتريقه ليل نهار
ده غير إنك لو ضد الثوره لأى سبب يبقى إنت بقدرة قادر بقيت ضد الشهداء كمان ويارب يتعمل فيك أو فى حد من قرايبك زى ماتعمل فيهم !!!!
ده على إعتبار إن فى ناس بتفرح فى الموت يعنى ؟
يبقى الحل الوحيد إنك تكون مع ميدان التحرير على طول الخط عشان هما أكبر منك ويعرفوا مصلحتك أكتر منك ومش من حقك تقول رأيك ولا تتنفس وإلا قلة الأدب وطولة اللسان تشتغل على طول وطول النهار نتهم حزب الكنبه إنهم سلبيين ونشتمهم ونسنفز فيهم عشان ينزلوا التحرير فى حين إن مافيش فايده من نزولهم لأنهم مش مقتنعين بالنزول من أساسه يبقى نزولهم أكيد مش هايكون مؤثر
لأن ثوره من غير حماس ماتنفعشى
يتبع .....
المشاركات
2 مستعده أن أضحي بنفسي من أجل حقك في أن تقول رأيك ".:
انا معكى تماما
كلا حر فى اختياراته
لكن بعيد عن التخوين و بعيد عن الاتهام بالجهل
لكن توجد حاجات مث نور الشمس حقيقة لا يستطيع احد حجبها مثل الفتاة التى انتهكت
اسالك سوال و ارجو ان تجيبى عليه بضميرك
هل هذه الحقيقة الواضحة تخضع لوجهة النظر
تحياتى
ابرهيم رزق:
اتمنى تدخل تانى عشان تشوف الاجابه
لو صبر القاتل هههههههههه
لما تقرأ السلسله كلها هاتعرف رأى ايه فى سياسات المجلس العسكرى عامة
لكن على كل حال هاجاوبك الان اجابه مباشره ,طبعا بدين سياسة السحل والقتل وكل ده ودى من الحاجات اللى فعلا ماينفعشى نتناقش فيها ولكن برضه اللى بيقول (ايه اللى وداها وكانت تقعد تصون نفسها فى البيت احسن لها ) ماقدرشى اشتمه او اهزئه او اقاطعه او اتهمه بالجهل وغسيل المخ مش لان كل واحد حر فى رأيه ولكن لانى مهما عملت ده مش هايغير من الامر شىء اللى مش متعاطف هايفضل مش متعاطف وفى الاخر بسيب كل واحد باعتقاده عشان ماخسرشى حد
إرسال تعليق