وفيها إيه لو كنت مع الثوره بس ماروحتش ميدان التحرير؟
ماهو اللى ماراحشى زى اللى راح يتفرج بس
وزى اللى راح فضول
وزى اللى راح عشان يظبط بنات
وزى اللى راح عشان يتظبط حشيش
وزى اللى راح لأن الجو عجبه هناك
وزى اللى خرم من الميدان عشان يروح حته تانيه
ماهو اذا كنت نازله من بيتنا لاى غرض غير انى نازله الميدان شايله روحى على كفى عشان البلد يبقى نزولى أهبل ومالوش معنى
ومع ذلك برضه أنا مانزلتش يمكن لانى كنت خايفه
يمكن عشان ماقدرشى ابات فى الشارع
يمكن لان اهلى كانوا خايفين عليا
ممكن لأى سبب لكن مش عشان مش بحب البلد
واحنا طول النهار نزايد على وطنية بعض
ياللى بتقوله اللى مانزلشى الميدان يبقى مايستهلشى يعيش على ارضها بالله عليكم ده كلام ناس عاقلين ؟
مايستهلشى يعيش على ارضها ليه؟
فشى سرها ؟؟
هو فى طريقه واحده بس مافيش غيرها تثبت بيها إنك بتحب البلد ؟
وهى إنى أنزل ميدان التحرير
ده فى مية طريقه أثبت بيها إنى بحب البلد
لو راعيت ربنا فى شغلى أبقى بحب البلد
لو فضلت ماسكه فى إيدى كوباية الأيس كريم لحد ما ألاقى باسكت أرميها فيه أبقى بحب البلد
لو شلت ورقه من الأرض ونضفت الشارع بتاعى أبقى بحب البلد
لو ذاكرت وإجتهدت عشان أخد درجات علميه زياده أنفع بيها البلد أبقى بحب البلد
لو ربيت إبنى كويس وطلعته مهندس مايوقعشى عمارات أو دكتور يراعى ربنا فى مهنته أو ظابط يدافع عن البلد أبقى بحب البلد
لو ربيت إبن صحيح جسديا وقللت مريض من البلد أبقى بحب البلد
لو نصحت واحد راكن صف تانى إنه يمشى بعربيته أبقى بحب البلد
لو تطوعت فى جمعيه خيريه تاخد من المليان تكب على الفاضى ابقى بحب البلد
وحاجات كتير قوى لا يتسع البوست ليها لو عملتها ابقى برضه بحب البلد
انما بعد كده تيجوا تختزلوا البلد كلها فى ميدان التحرير ويبقى اللى بره الكام متر مربع ده مش بيحب البلد ؟
وياللى بتقولوا لى إنتى قاعده فى بيتك مرتاحه وبتكتبى وانتى مش شايفه حاجه بقولكم هو إيه اللى فى كتاباتى هايتغير لو نزلت يعنى لما وصفت هادمى السور ومقتحمى السفاره إنهم بلطجيه لو كنت نزلت وشفتهم بيعملوا كده بعينى كان إيه اللى هايختلف فى كتاباتى ؟؟
لما يكون مقياس البلطجه عندى هو العنف وفرض الرأى بالقوه يبقى إيه اللى هايتغير لو نزلت ماهى مبادئى هى مبادئى برضه مش هاديهم الحق فى ده
وبخصوص الحشيش وتظبيط البنات برضه إيه اللى هايختلف فى وجهة نظرى انا سمعت من ناس كتير الموضوع ده وماشفتش فعلا بعينى لكن اذا كان فى واحد ابن خالة صاحبتى رايح للغرض ده يبقى فيه شريحه زيه واذا كنت كلمت صديق ليا هناك وقلت له قولى بصراحه هو إنت روحت الميدان عشان انت ثورى ولا رايح لأن القعده عجبتك قالى (بصراحه القعده هنا حلوه قوى والجو جميل )!!!!
وبرضه هنلاقى شريحه زيه
ااااااه لأ دول كدابين, قابضين ,فلول
برضه فلول ؟
انا بقول الكلام ده ليه؟
مش عشان أشكك فى الثوره ولا فى دوافع الثوار ولا ادخل بقى فى مهاترات ملهاش لازم عشان أثبت بكل ما أوتيت من قوه ان الميدان فى حشيش أو دعاره
مش دى قضيتنا اصلا
انا مقتنعه ان ميدان التحرير منتخب من الشعب عينه تجريبه بلغة علم النفس وعينه مثيره لأى أخصائى نفسى لأنها بتضم طوائف الشعب كلها لو كان قاصد باحث يجيبها ماكنشى جابها بالحرفنه دى
ثقافات مختلفه واعمار مختلفه
كبار وصغيرين
بنات وولاد وعائلات
وفنانين ورياضيين
مسيحين ومسلمين
متوحدين على هدف واحد
وطبيعى إن زى ما فى مصر حشيش هايبقى فى الميدان حشيش وزى ما فى فى مصر تظبيط موزز طبيعى يبقى فى الميدان تظبيط موزز
اللى اقصد أقوله إن ده مالوش علاقه لا بالثوره ولا بدوافع الثوار بس الحكايه كلها
إن الميدان هو مصر بحلوها ومرها بكل مافيها من سلبيات وإيجابيات
يتبع ....
المشاركات
3 مستعده أن أضحي بنفسي من أجل حقك في أن تقول رأيك ".:
كلام جميل كلام معقول مقدرش اقول حاجه عنه بس اولا احييكى ثانيا طبعا اتفق معاكى لان مثلا لو الأمور تقاس هكذا يبقى نقول السويسى اللى فى حصار السويس عام 1973 لم يشارك فى الدفاع عنها يبقى مش سويسى واللى محاربش من الجيش المصرى فى حرب اكتوبر يبقى مش مصرى علما بانه فيه قوات وضباط كانوا موجودين ساعة الحرب فى الجيش ولم يحاربوا ليس خوفا بالطبع ولكن طبيعة عملهم اقتضت ذلك كمن كان يخدم ساعتها فى الجيش اللى على حدود ليبيا .
عموما اتفق معكى تماما لان الامور اختلت وساعيد عليكى عبارتين من شعر كتبته فى الماضى قيبل الثورةولكنهم يتعلق بالنفاق وهو اليوم نفاق الثورة " جزء من قصة شعرية "
هـــــو : ألم أقل لك من قبل أنك لاتدرين
ملخص كلامى ياعزيزتى ان مصر أصبحت شمساً للفاسدين يعيث فيها كل من فى قلبه مرض من فساد
أو يشكو من خلل عقلى كما يقول القائمين علينا من الحاكمين.
أنـــــا : ألست معى ياصديقى أن الله تعالى قد قال إن بعد العسر يسرا فكن بحق هذه الآية الكريمة من المتفائلين
هـــــو : وقد قال أيضاً أنه لايغير مابقوم حتى بغيروا مابأنفسهم أم لاتتذكرين ؟ لقد صرنا جميعاً ياعزيزتى إما قلة منافقون أو كثرة مـــن المنافقين
دي صور مين دول؟؟؟
وبعدين هعلق
شموسه :
نورتينى ,ى صورة بنات و اولاد كانوا فى التحرير وكانوا معلقين عليها كلام من قبيل (ترضى لاختك تقعد كده فى التحرير فى وسط شباب وكلام من ده )
لكن انا مش حطاها للغرض ده انا حطاها لانى مالقتش صوره مناسبه عندى للبوست الا دى باعتبارها لناس كانوا فى التحرير
إرسال تعليق