إرحموا أم الدنيا

يعنى وبعدين هانفضل كده ضد بعض ؟

وبنضرب فى بعض بدل مانحط إيدينا فى إيد بعض ونرجع نعمر البلد اللى خربت؟

هانفضل كده مابين مؤيدين للريس ومعارضين له والبلد بتضيع؟ هانفضل كده لحد ماأمريكا تبعتلنا قوات تحمينا ونبقى العراق التانيه؟

هانفض كده لحد ما
إسرائيل تدخل علينا بما إن الجيش المصرى مش فاضى وقاعد يشتغل شغل الشرطه؟

معقوله الناس مش قادره تستنى 7 شهور ولا هو بقى تار بينهم وبينه ؟

وضاعت المطالب ونسيوا هما عايزين إيه وكل اللى بقى يهمهم إنهم يذلوا الرجل ده و فاكرينه بن على اللى هايهرب على السعوديه

حقيقى مش فاهمه ليه العند ده و ليه الناس مش عايزه تصبر ولو ماتحققتشى المطالب يرجعوا ميدان التحرير تانى هو هايطير؟

ومش فاهمه الناس اللى بتفتى زى الأستاذه نواره نجم وبتقول دى خدعه وهايرشح نفسه تانى أو هايخلى إبنه يترشح أو الأستاذه المحاميه مها اللى ظهرت مع عمرو أديب وقالت إن الخطاب ده خدعه عشان فى الأخر يكلف وزير الداخليه من جديد بحملة إعتقالات بقى بالذمه ده كلام ناس عاقله وبالذمه ده كلام منطقى ؟يا جماعه الرجل ده خلاص خلص وهايمشى أكيد بس هو عايز يحافظ على ماء وجهه قبل مايمشى بلاش تملوا قلبكوا بالغل وتحقروا من شأنه أكتر من كده ده حتى ولو كان 3000 طاغيه فى بعض برضه كرامته من كرامتنا كمصريين ياريت نخليه يمشى بكرامه وكفايه فرجه لل عالم علينا ونشمتهم فينا

 وياريتكم كلهم وطنيين اللى غايظنى إن كل واحد نازل بأجنده خاصه بيه ومش كل اللى قاعدين فى ميدان التحرير أجندتهم واحده

فى ناس بيندفعلها وبتحصل على وجبات أكل وبطاطين عشان تفضل قاعده ودول جزء منهم عصابة المعارضه بتظبطهم

 وجزء تانى عصابة الإخوان بيظبطوهم

وفى ناس  تانيه جماعة حماس من فلسطين بعتاهم مخصوص عشان تسخنهم

وفى ناس عايزه الأصلاح وقفل ملف التوريث وعدم ترشح الريس لفتره مقبله ودول  اللى روحوا بيوتهم بعد خطاب الريس واعتبروا نفسهم حققوا اللى هما عايزينه ودول بتوع 25 يناير

وناس تبع الأخ البرادعى اللى عايز يحرق الأخضر واليابس إذا مبارك لم يرحل وكأن الأخضر واليابس دول مش فى مصر  وفى بلد تانيه واللى بيدعى إن( كل )الشعب المصرى فوضه مع إن أنا واحده من مصر لم أفوضه و أساسا  مايدخلشى فى ذمتى ببصله كرئيس

وناس  مصممه على تنحى الريس حااااااااالا  ودول لسه قاعدين من غير مايفهموا إن فى ناس تانيه من مصلحتها إن الدنيا تفضل مولعه  عشات يبقى فى فراغ سياسى فى مصر وهما بكده بيخدموهم من غير مايحسوا  ودول زى الأستاذه إسراء عبد الفتاح عضو حزب الوفد اللى بعد ماخرجت من السجن قالت (حرمت )وكأنها مش صاحبة مبدأ وشايفه إنها كانت على باطل ماهو الواحد مش بيقول حرمت غير لما يحس إنه كان يستاهل العقاب اللى خده والاستاذه المناضله دى بقى اللى المفروض انها بتحب مصر طالعه تكلم قناة الجزيره مع علمها بأن القناه دى عدوه لمصر طيب ماتتكلمى فى تلفزيون بلدك احسن يا هانم ياللى بتحبى مصر وقلتى كمان مش هارجع الا لما يبقى فى ستة مليون شهيد يا سلام الدم المصرى رخيص عندك كده

وحتى المظاهرات المؤيده كل واحد نازل بأجنده خاصه  فيه منهم اللى بجد مؤيدين للريس ولحكومته ونازلين يعبروا عن ده بعفويه وفى منهم اللى برضه (يقال )إنهم مدفوع لهم أو مغصوبين عشان ينزلوا كطريقه جديده لحفظ ماء وجه الريس وإظهار إن فى ناس مؤيده ومش الكل ضده

نفسى بجد حد حكيم  أو رجل دين ينزل بمكبرات صوت أو يكون فى شاشات عرض يهدى الناس ويفض الإشتباكات بدل مايراق دم المصريين على أيدى مصريين

نفسى بجد الناس المؤيده والمعارضه ترجع بيوتها وتحط مصر فى أول أولوياتها البلد اتخربت حسوا بينا بقى واتقوا الله اذا كنتم بتتظاهروا عشان  حياه افضل لعم حسين اللى على قد حاله اللى واقف بعربيه فى الشارع يبيع غزل البنات او حلبسه احب اعرفكم ان عم حسين ده بسببكم اتخرب بيته واذا كنتم بتتظاهروا عشان خايفين على بكره بتاعكم احب اقول لكم ان هانقضى يكره ده نصلح فى امبارح 

يا جماعه الرجل ده هايحافظ على كلمته قدام العالم ومش هايرجع فيها حافظوا انتم على مصر واتراجعوا