جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

15‏/02‏/2011

خطاب للريس


خطاب للريس

بعد كل الأحداث اللى مرت بينا دى نفسى أوجه كلمه لناس كتيره أوى و أولهم :

الشعب المصرى : لم نكن ضحيه بالكامل ولم يمكن هو طاغيه بالكامل  ولكن كلنا ساهمنا فى إيصال مصر لهذه الحاله  كنا شركاء ليه لما سمحنا له إنه يفضل فى الحكم 30 سنه وماعترضناش  وكنا شركاء ليه لما سمحنا له  هو وابنه يسرقوا فينا  وماتكلمناش وكنا شركاء له لما سمحنا له يزور إنتخابتنا وكنا شركاء له لو فى يوم كنا أخدنا رشوه أو دفعنا رشوه وكنا شركاء له لو فى يوم كنا رمينا ورقه  فى  الشارع  أو كتبنا على الحيطه  أو كسرنا إشاره  أو زورنا ورقه  وكنا شركاء له لو فى يوم لم نراعى ضميرنا فى عملنا وقلنا لما يدونا فلوس اكتر والامثله كتييييره أوى يبقى طالما راس الأفعى إتقطعت يبقى لازم كمان نصلح من نفسنا عشا ن ننهض بالبلد ماينفعشى نصلح من فوق بس لازم نظبط من تحت كمان عشان نبتدى صح وعلى نضافه والا يبقى نتنحى احنا كمان ونستورد شعب من بره بأه

ولازم كمان نتعود نحترم أراء بعض إذا كنا عملنا ثوره عشان مبارك يحترم رأينا يبقى لازم نحترم أراء بعض ونبطل نبقى ناقمين وساخطين على أراء بعض وإلا هانثبت للناس اللى بتقول إن مصر مش جاهزه للديمقراطيه إنهم عندهم حق لأ إحنا لازم نثبت إننا جاهزين للديمقراطيه وإننا جامدين أوى وماحدش يقدر علينا
وعايزين بأه نبطل نقول إن المذيعه دى خاينه عشان كانت ضد الثوره لأن والله مافى حد ضدكم لكن الناس كانت خايفه على البلد اللى بتنهار يعنى بيحبوا البلد زيكم بالظبط بس بطريقتهم  وهما مش أقل منكم وطنيه ماحدش كان ضد  الثوره هما كان ليهم وجهة نظر تحترم ونبطل نقول الفنانه دى خاينه عشان كانت متشاله على الأعناق بتأيد مبارك ماشى بتأيد مبارك مش ايهود باراك يعنى عشان تقولوا خاينه وكل واحد حر فى رأيه يمكن ماوقعشى عليها ظلم مباشر من النظام لازم ندى العذر للناس كلها ونبطل نزايد على وطنية حد ونبطل كلمة قابضين ومأجورين وخاينين مش هانقدر ننكر إن فى ناس كانت فعلا مؤيده لمبارك ونزلت فى مظاهرات لأنها بتحبه ومش قابضه بس إحنا اللى مش عايزين نعترف بكده زى مافى ناس كانت مأجوره فعلا من النظام عشان تضرب المتظاهرين أو عشان تنقذ ماء وجه الريس وتثبت إن فى ناس لسه بتحبه ومش كل الشعب ضده
ياشعب مصر عايزين نبطل ندور على الكره وخلينا دايما ندور على الحب  ونرجع جبهه واحده بعد ما إتقسمنا لجبهتين  جبهه مؤيده وأخرى معارضه عشان نقدر نقف جنب بعض ونحط إيدينا فى إيد بعض ونبتدى نعمر تانى فى أم الدنيا ونخليها ترجع أحسن مما كانت

شباب 25 يناير: ماقدرشى أنكر إنى كنت ضد توقيت ثورتكم وشايفه إنها المفروض تكون قبل كده بكتير لكن معلشى كل شىء بأوان وده ترتيب ربنا ومأقدرشى أنكر إن عدت عليا لحظه حسيت فيها إنى ضدكم وعايزكم ترجعوا وكفايه كده لكن ده من خوفى لما لقيت البلد بتتخرب وبتتضيع والاقتصاد بينهار والبورصه بتقع والناس بتتخرب بيتها  والناس بتقتل فى بعض  صعب عليا أشوف مصرى بيقتل مصرى و غصب عنى خفت وحسيت إن البلد بتضيع وفعلا بقيت مش عايزاكم تكملوا لكن أنتم طلعتم أشجع منى وماسمحتوش لحاجه تقلل من عزيمتكم أو تخوفكم لكن عاتبه على اللى منكم كان ناقم وساخط على اللى بيفرح معاكم وهو كان قبل كده عايزكم ترجعوا وبقل لهم يا جماعه تانى والله مافى حد ضدكم لكن الناس كانت خايفه على البلد اللى بتنهار يعنى بيحبوا البلد زيكم بالظبط بس بطريقتهم  وهما مش أقل منكم وطنيه وعشان كده ماينفعشى تلوموا عليهم اوتستكتره عليهم فرحتهم بالثوره لإنكم ماكنتوش رايحيين تحققوا مجد شخصى ولكن كنتم عايزين ترفعوا راسنا وتجيبوا لينا حقنا يبقى لما عملتوا كده مستكترين ليه كل الناس تفرح معاكم ؟
وكمان عايزه اقولكم بهرتوا العالم لما نضفتم الشارع بعد ثورتكم رفعتوا رأسنا وخليتوا العالم يحترمنا وعرفتوهم إن إحنا متحضرين وراقيين
ونفسى أسألكم سؤال إزاى كنتم على يقين من إنكم هاتنجحوا وماضعفتوش قدام أى ضغط كنتم فعلا مدربين على ده ولا عملتوا كده بالفطره ؟

مبارك: شكرا على  الحاجات الحلوه اللى عملتها للبلد ولو إنى مش قادره أفتكرها وطبعا  مش هاشكرك على الطلعه الجويه  اللى كل شويه تزلنا بيها لأن دا كان واجب عليك دى مش تضحيه كنت تقدر تعتذر عن المهمه لو عايز أما بالنسبه للحاجات اللى أنت بره السلطه دلوقتى بسببها
ربنا وحده هايحاسبك عليها ,مانكرشى إنك صعبت عليا فى وقت من الأوقات مش بسبب رائحه إستدرار العطف التى كانت تفوح من خطاباتك التلاته ولكن بسبب إضطرارك لإستدرار العطف وأعتقد إنك كنت ممكن تفضل فى السلطه لو كنت قلت الخطاب رقم 3 مكان الخطاب رقم 1 وخصوصا عبارة (ابنائى وبناتى ) ولو كنت طلعت بدرى شويه قبل مالدنيا تشعلل لكن انت طبعا واللى حواليك قلتوا دول شوية عيال ومسيرهم هايسكتوا ويروحوا للأسف أبخستهم قدرهم
بس عايزه أسألك سؤال :
طالما فى ناس شريفه زى شفيق وسليمان ليه بتعين ناس زى نظيف وحبيب وطالما تقدر تشغل ناس كتير كنت بتعطلهم ليه وطالما تقدر تصلح فى البلد كنت سايبها خربانه ليه كنا لازم نعمل ثوره ويموتوا الاف مننا عشان تصلح البلد
ربنا يشفيك وبالرغم من انى مع
تنحيك بسبب ما تسببت فيه من مصر من فساد وتركت من حولك يتمادوا فى
استغلالنا واهانتنا .. لكن مازال بداخلي شيئا يحبك ولا اتمنى لك المرض ولا
الاهانه .. والحق الذى لديك لابد وان يعود بشكل محترم وفى النهايه ألمى عليك
أقل من ألمى على شهيد راح ضحية نظام فاسد تزعمته كرئيس جمهوريه - مع كامل
...احترامى لشخصكوأتمنى لك العافيه اكبارا لكبر سنك

  
اخواتى الشهداء: ربنا يرحمكم ويسكنكم فسيح جناته هاتفضلوا فى قلوبنا دايما وعمرنا ماهننساكم ودايما هانكرمكم مع إننا مش هانقدر مهما عملنا نوفيكم حقكم عمرنا ماكنا هانوصل للى إحنا وصلنا له من غير سقوط دمائكم العزيزه على أرض مصر

أسر الشهداء : ربنا يصبركم إنتوا أهل أبطال ضحوا بحياتهم عشان خاطربلدهم وربنا يجعل ده فى ميزان حسناتهم وماتزعلوش عليهم هما أكيد فى أحسن حال وفى أحسن مكان

 







2 مستعده أن أضحي بنفسي من أجل حقك في أن تقول رأيك ".:

واحد شايف نفسه يقول...

انا مش هعلق عالبوست ده بس عموما انا لفيت مدونتك وعجبتنى جدا

ربنا يوفقك

تحياتى

fafy يقول...

ه مش هاتعلق شايف نفسك ولا ايه ؟ههههههه عموما براحتك انا فاهمه طبعا انك نش عاجبك الكلام بس ده مش معناه انه كلام مش كويس بس ده رأيك وانت حر فيه لكن انا مش مصدفه ان البوست كله مش عاجبك اكيد فى ولو جمله عجبتك

إرسال تعليق

fafy music