جميع حقوق النشر محفوظه ولا يجوز إستخدام أى من هذه المواد المنشوره أو نسخها إلا بإذن خطى من الناشر

08‏/02‏/2011

عشان نفضل نحب بعض



 (عشان نفضل نحب بعض)


أنا بعلن كامل تأييدى وإحترامى لإخواتى شباب 25 يناير والجميل بتاعهم على فوق راسى وبجد شابوه ليهم عملوا
اللى كتير مننا مأقدرش يعمله وبحترم جميع المظاهرات الموجوده فى جميع بقاع الجمهوريه الأن وعلى رأسهم ميدان التحرير لأنى بحترم أى وسيله (محترمه) للتعبير عن الرأى بحريه.
وبديهم العذر طبعا فى هجوميتهم الشديده فى الحديث إن كانت نواره نجم فى مدونتها  وإتهامها للناس المتضررين من إستمرار المظاهرات بإنهم يا مأجورين يا شحاتين أو إسراء عبد الفتاح اللى إفترست خيرى رمضان لمجرد إن طريقة إدراته للحوار والوقت فى البرنامج معجبتهاش ده طبعا غير تعبيرات وشها المستفزه كل ما تيجى مكالمه من الجمهور مش على مزاجها.
وبقول مش مشكله دى ناس واقعه دلوقتى تحت ضغط نفسى لأنهم مش بيناموا كويس أو بياكلوا كويس وعلى طول قلقانين  وده مخليهم عصبيين وهجوميين ده غير إنهم فقدوا الثقه فى النظام من كتر الوعود اللى مش بتتحقق

ومش لاقيه حاجه أقولها عن الشهداء غير إنى قلبى واجعنى عليهم بجد وربنا يرحمهم ويدخلهم فسيح جناته وربنا يصبر أهاليهم وعمرنا ماهننساهم.
وكمان بحترم حزب (الأن )كل المؤيدين لإستمرار المظاهرات وتنحى مبارك( الان )بالرغم من إختلافى معاهم وعدم إيجادى لمبرر منطقى  حتى الأن لإستمرارها طالما الرجل قال هايمشى فى شهر9

وكمان بحترم كل مؤيدين مبارك واللى عايزينه يستمر فى الحكم كمان 30 سنه بالرغم من إختلافى معاهم لأن
كفايه كده
لكن ماعلشى يمكن ماكنش فى ضرر مباشر وقع من النظام عليهم عشان كده مش حاسيين أو يكونوا من النوعيه اللى بتخاف من التغيير وبيتبعوا منطق اللى نعرفه أحسن من اللى منعرفهوش.

وأعتقد بقى إنه زى مابحترم كل الأراء وكل الناس حتى اللى بختلف معاهم وبعبر عن رأيى بأدب ومش بضايق  حد, يبقى حقى أنا كمان إن الناس تتقبل رأيى بصدر رحب ومايكونوش ناقمين وساخطين عليا عشان أنا عايزه المظاهرات تخلص أو عايزه مبارك يمشى بعد إنتهاء مدة رئاسته  والمفروض إن هما كمان يدونى عذرى
 مش يمكن زعلانه على البلد اللى إتخربت ونفسى ترجع زى ماكانت بسرعه قبل ماننهار أكتر من كده ؟
 ومش يمكن صعبانه عليا الناس اللى إتخرب بيتها ومش لاقيه تاكل دلوقتى ؟
ومش يمكن خايفه على إخواتى فى المظاهرات ليدخلوا فى مشاحنات مع إخواتى من الجيش أو الشرطه وتبقى النتيجه حمام دم بإيد مصريه على جسد مصرى ؟
مش يمكن أكون شايفه إن إنتقام ربنا من مبارك هايكون أشد وأقوى من مجرد التنحى أو الرحيل أو المحاكمه ؟
من حقى إن ماحدش يكلمنى وحش ومن حقى  ان ماحدش يكلمنى وكأنى عميله وخاينه ومن حقى  إن ماحدش يعمل نفسه أوف لاين لما يشوفنى على الفيسبوك  أو إنى أصحى الصبح ألاقى  واحد كاتب على الفيس بوك
(اللى مؤيد إن مبارك يفضل لحد نهاية مدته يمسحنى من عنده من فضلكم)
 حاجه غريبه جدا هو ده محكنا فى التعامل مع بعض ؟
منين طول النهار بتنادوا بحريتكم فى الدفاع عن وجهة نظركم وأرائكم وشايفين إن مبارك طاغيه إنه بيحاول يقمع حريتكم فى حين إنكم بتقمعوا حرية اللى يخالف رأيكم ؟
                                                                                                                      
وكله كوم والفيسبوك ده كوم بدخل أشوف الكومنتات بلاقى الناس مش طايقه بعض وبتشتم فى بعض وماحدش عاجبه رأى التانى وشايف  إن رأيه هو بس الصح والباقى حميير وناس شايفه إن اللى مانزلوش فى المظاهرات ماعندهمش دم  وكأن المفروض المظاهره تبقى 80مليون  وبعدين كل واحد ظروفه غير التانى
وناس لسه ماطلعتش من البيضه وبيتكلموا كأنهم سياسيين مخضرمين وناس بتفتى وناس شايفه إن كل اللى المعارضين لإستمرار المظاهرات خاينيين ليه إن شاءالله هما كانوا عملاء لإسرائيل إيه المسميات الغريبه دى؟
وناس شايفه إن كل المعارضين لإستمرار المظاهرات قابضين من النظام طب ياريت والله مأخدت حاجه
وهما دول برضه اللى بيزعلوا لو الناس قالت إن( كل )اللى فى المظاهرات قابضين  يالا ماهو تعميم بتعميم 
أنا نفسى أعرف الناس بتعمم على أساس إيه ؟
عملوا إحصائيه عشان يقولوا (كل) ده حتى لو عملوا إحصائيه النتيجه مش هاتطلع 100%
اللى عايزه أقوله أنا مش مع حد ضد حد وبحترم كل الأراء ومهما كلنا إختلفنا لكن فى الأخر اللى بيجمعنا إننا كلنا مصريين وولاد بلد واحده وبنحب مصر ولازم نفضل إيدينا فى إيد بعض عشان نرجعها زى ماكانت وأحسن يبقى عشان نفضل نحب بعض يبقى لازم نحترم رأى بعض ونعطى العذر لبعض

2 مستعده أن أضحي بنفسي من أجل حقك في أن تقول رأيك ".:

Hany يقول...

أنا موافقك على كل كلامك...
لكن الكلام ده فى حالة ما يكون فى حاجه محط خلاف اصلا أو محط اختلاف للآراء زى مثلا رأيك فى عبد السلام النابلسى انما ان يكون الخلاف على حاجه ميختلفش عليها اتنين يبقى كده دى مش مسألة رأى فقط لا دى مسألة تانية اما انتفاعية من الوضع القديم أو ايا كانت الدوافع فهى كلها مش مجرد خلاف رأى او خلاف فكرى انما ده خلاف على واحد واكلنى وظالمنى انا والبلد كلها والاقى واحد جاى يقولى محصلش ده راجل كويس مسرقش ومظلمش يبقى كده هو معاه عليا انا...بيكدب عليا وبيكدبنى وغير أمين عليا ولا على الناس اللى يهمونى ولا على بلدى
ازاى عاوزانى احترمه او اكلمه تانى؟؟؟؟؟

فافى يقول...

معاه عليا انا...بيكدب عليا وبيكدبنى وغير أمين عليا ولا على الناس اللى يهمونى ولا على بلدى
ازاى عاوزانى احترمه او اكلمه تانى
مش ملاحظ انه كلام كبير اوى ولو نفذناه تبقى مصيبه انا مش بحب مبارك وشايفه انه كان لازم يمشى بعد اول ماقضى اول مده مش دلوقتى اوكيه؟ بس اختى من النوعيات اللى بتكره التغيير موت ودايما خايفه من اللى بعد كده وشايفه انه وماله لما يقعد ماهوالدنيا امان احسن فى شخصيات كده
وزميلتى فى الدبلومه لو ماكنتش عارفاها كويس كنت قلت دى قابضه من النظام هههه عملت صفحه على الفيس عشان مبارك وعيون سيادته وزميلتى التانيه كنت حطاه على برفايلها انا ماتجرأشى اعمل كده
هههههههه وغيرهم وغيرهم المفروض لو مشيت على حسب كلام حضرتك امشى واسيب البيت وماتكلمشى مع زمايلى واقاطعهم واروح بقى اعيش فى ميدان التحرير
ده صح ؟شفت عنوان البوست بيقول عشان نفضل نحب بعض مش عشان نفضل نكره فى بعض ونخون بعض (الاختلاف فى الراى لا يفسد للود قضيه )واللى عايزنى اتجاهلهم وماحترمهمشى دول اخواتى واصحابى وجرانى وناس فعلا محترمه مش هاخسرهم عشان مبارك

إرسال تعليق

fafy music